O Tane “E Iai Faalogona e Tusa ma i Tatou”

SA AVEA o ia ma tupu ma perofeta peitai o ia foi o se tamā agaalofa. O se tasi o ona atalii na ola aʻe ma avea o sē e faamaualuga. I lona maumauai ina ia fāoa le nofoalii, na faamaite ai e lenei atalii se taua a tagata o le malo lava latou, ma le faamoemoe ina ia maliu ai lona tamā. Ae ina ua tau le taua mulimuli ane ai, na iu ina fasiotia ai le atalii. Ina ua logotala le tamā ua oti lona atalii, na maliu aʻe na o ia i le afeafe aupito i luga ma tutulu ai e faapea: “Loʻu atalii Apisaloma e, loʻu atalii e, loʻu atalii Apisaloma e! ta fia oti e sui ai oe Apisaloma loʻu atalii e, loʻu atalii e!” (2 Samuelu 18:33) O le tamā iinei, o le tupu lea o Tavita. E pei lava o isi perofeta a Ieova, o ia o ‘se tagata e iai faalogona e tusa ma i tatou.’—Iakopo 5:17.

O tane ma fafine sa tautatala mo Ieova i taimi o le Tusi Paia o tagata lava e masani ai. E pei lava o i tatou, e iai o latou faafitauli ma e mafatia foi ona o le lē lelei atoatoa. O ai nisi o nei perofeta, ma e faapefea ona tutusa o latou faalogona ma i tatou?

Na Suia Mose Mai le Soona Mautinoa i le Agamalu

O se perofeta mataina i le vaitaimi a o lei oo mai i le Faa-Kerisiano o Mose. Peitai, e ui lava ina ua fasefulu tausaga lona matua, na lei sauni lava o ia e auauna o se fofoga fetalai o Ieova. Aisea? A o faapuapuagatiaina ona uso e Farao o Aikupito, sa tausia aʻe Mose i le aiga o Farao ma sa “malosi i ana upu ma ana mea na faia.” E tusa ai ma faamatalaga tusitusia ua faapea mai: “Fa te ia e iloa e ona uso e faaola le Atua ia te i latou i lona lima.” O le soona mautinoa naʻuā na ia gaoioi malosi ai e puipuia le pologa Eperu, ma fasiotia ai le tagata Aikupito.—Galuega 7:22-25; Esoto 2:11-14.

Na faamalosia Mose e sola ese, ma na ia faaalu le isi fasefulu tausaga o se leoleo mamoe i Mitiana mamao. (Esoto 2:15) I le iuga o lena taimi, o lea ua valusefulu nei tausaga o le soifua o Mose, na tofia ai e Ieova e avea ma perofeta. Ae ua lē o toe soona mautinoa naʻuā Mose i le taimi lea. Sa ia matuā manatu lava o ia e lē agavaa ma ia fesiligia ai le tofia o ia e Ieova o se perofeta, ma faaaogā faaupuga e pei o lenei, “O ai ea aʻu nei, ou te alu atu ai ia Farao?” atoa ma le, “Se a ea saʻu e fai atu ai ia te i latou?” (Esoto 3:11, 13) Ona o le toe faamautinoa mai ma le alofa atoa ma le fesoasoani a Ieova, sa agaʻi atu ai Mose e faataunuuina lona tofiga ma na taulau manuia.

Pe sa pei ea oe o Mose, i le faataga o le soona mautinoa naʻuā e taitaia oe e tautala atu po o le faia foi o mea sa faamaonia le lē atamai? Afai o le tulaga lena, ia talia atili ma le loto maulalo isi toleniga. A lē o lena foi, pe sa e lagona ea le lē agavaa e faataunuu nisi tiute tauave faa-Kerisiano? Nai lo le teena, talia fesoasoani o loo ofo mai e Ieova ma lana faalapotopotoga. O Lē na fesoasoani ia Mose e mafai foi ona fesoasoani ia te oe.

Sa ia Elia Faalogona e Tusa ma i Tatou i Taimi e Avatu ai Aoaiga

“O Elia o le tagata ia e tusa ma i tatou, ua matuā tatalo o ia ina ia le ua; ona le uaina ai lea o le fanua i tausaga e tolu ma masina e ono.” (Iakopo 5:17) Sa talafeagai le tatalo a Elia ma le finagalo o Ieova ina ia aoaia le nuu ua liliu ese ia te Ia. Peitai, na iloa e Elia e faapea o le vaitaimi e aunoa ma se timu lea na ia tatalo i ai o le a faapogaia ai mafatiaga i tagata. O le nuu o Isaraelu sa mafuli atu i le fai faatoaga; sa faalagolago le ola o tagata i le sau ma le timu. O le faaauau ona leai o se timu e aumaia ai omiga faigata. O le a mamae laau; ma faaleagaina faatoaga. O manu vaefa e faaaogā i galuega ma meaʻai o le a mamate, ma o le a matuā faapopolegia nisi aiga i le matelaina. O ai o le a sili ona mafatia? O tagata lautele. Na taʻu atu mulimuli ane e se fafine ua oti lana tane ia Elia e faapea toe pau lava mea o loo ia te ia o le luutaga o falaoa ma sina suauu itiiti. Sa ia faatalitalia ma le mautinoa o le a la oti ma lana tama i le fia ʻaai. (1 Tupu 17:12) Ina ia mafai ona tatalo Elia e pei ona sa ia faia, sa tatau ona ia te ia le faatuatua mautu e tausia e Ieova Ana auauna—pe mauoa pe matitiva—i latou e lei lafoaia le tapuaiga moni. E pei ona faaalia e faamaumauga, e lei vale se tali ia Elia.—1 Tupu 17:13-16; 18:3-5.

Tolu tausaga mulimuli ane ai, ina ua faailoa mai e Ieova ua lē o toe mamao ona ia aumaia lea o le timu, o faanaunauga ma le naunautai o Elia ina ia iu loa le vaitaimi sa leai ai se timu na iloa atu i le fai ma toe fai o tatalo faatauanau a o ia “ifo ai i le eleele, ma tuu ona mata i le va o ona tulivae.” (1 Tupu 18:42) Sa faaauau ona ia nanati atu i lana auauna: “Ia e alu ae, ma vaavaai i tai” mo sina faailoga e iloa ai ua faafofoga Ieova i ana tatalo. (1 Tupu 18:43) Maeu le olioli atonu sa oo i ai mulimuli ane ina ua talia mai lana tatalo, “ona to ifo ai lea o le ua mai le lagi, ona fua mai ai lea o le eleele i ona lava fua.”—Iakopo 5:18.

Afai o oe o se matua ia po o se toeaina i le faapotopotoga Kerisiano, atonu o loo e tauivi ma faalogona loloto pe a oo ina avatu faasaʻoga. Peitai, o na faalogona faaletagata e ao ona fetuunai atoa ai ma le talitonuga e faapea o aoaiga e manaomia i nisi taimi ma pe a avatu i le alofa, “e fua mai ai le fua o le amiotonu e manuia ai e ua aʻoaʻoina ai.” (Eperu 12:11) O taunuuga o le usitaia o tulafono a Ieova e manaomia tele i taimi uma. I le pei o Elia, tatou te tatalo mai le loto ina ia faataunuuina.

Sa Faaalia e Ieremia le Lototele e Ui Ina Faalotovaivaiina

I tusitala uma lava o le Tusi Paia, masalo o Ieremia lava e sili ona tele mea na ia tusia e faatatau i ona faalogona. A o talavou lava sa ia faatalatū e talia lona tofiga. (Ieremia 1:6) E ui i lea na ia agaʻi atu ma le faamalosi tele e faalauiloa le afioga a Ieova, peitai na oo ina fetaiai ma teteega malolosi mai i tagata Isaraelu—amata mai lava i le tupu e oo i tagata lautele. Na aumaia e nei teteega ia te ia i nisi taimi le ita atoa ma loimata. (Ieremia 9:3; 18:20-23; 20:7-18) I nisi taimi eseese sa osofaia ai o ia e nei tagata, fasia o ia, saisai i le puipui, faafalepuipui, faamataʻuina i le oti, ma lafoai ia oti ai i le lua palapalā o se vaieli matutu. I nisi foi taimi e oo lava i le feau mai ia Ieova sa tiga, e pei ona faaalia mai i ana upu nei: “Loʻu manava e, loʻu manava e! ua tiga loʻu loto i totonu ia te au.”—Ieremia 4:19.

Ae sa faaauau pea ona ia fiafia i le afioga a Ieova, i lona faapea mai: “Sa ia te au lau afioga e fai ma mea e olioli ai ma fiafia ai loʻu loto.” (Ieremia 15:16) I le taimi lava e tasi, ona o le lē mautonu na māfua ai ona ia tagi atu ia Ieova: “Ua avea lava oe ia te au e peiseai ua pepelo, o le vai ua pē,” pei o se ālia e faigofie ona matutu. (Ieremia 15:18) Ae ui i lea, sa malamalama Ieova i ona faalogona fenumiai ma faaauau pea ona lagolago atu ia te ia ina ia faataunuu lona tofiga.—Ieremia 15:20; tagai foi i le 20:7-9.

Pe e pei ea oe o Ieremia, e fesagai ma le lē mautonu ma teteega a o faataunuu lau faiva? Tepa taulai ia Ieova. Faaauau ona mulimuli i lana taitaiga, ona faamanuiaina foi lea e Ieova o au taumafaiga.

Sa Iai Faalogona o Iesu e Pei o i Tatou

O le perofeta sili lava i taimi uma o le Alo o le Atua lava ia, o Iesu Keriso. E ui lava o ia o le tagata lelei atoatoa, na te lei natia ona faalogona. Ua masani ona tatou faitau i ona faalogona i totonu, lea atonu sa iloa atu i ona fo-liga ma ana gaoioiga agaʻi i isi. Sa tele ina “alofa mutimutivale” Iesu, ma sa ia faaaogā foi le faaupuga lava lea i le faamatalaina o tagata i ana tala faatusa.—Mareko 1:41; 6:34; Luka 10:33.

E lē taumatea sa sii i luga lona leo ina ua ia tutulia i fafo le au faatau oa atoa ma manu mai le malumalu ina ua ia faapea atu: “Ave ese ia nei mea!” (Ioane 2:14-16) O le fautuaga a Peteru, “Le Alii e, ia mamao ia te oe lea mea,” na faapogaia ai se tali mai ma le malosi, “Satani e, ina alu ia oe i oʻu tua.”—Mataio 16:22, 23.

Sa mafana faapitoa Iesu i nisi sa vavalalata faapitoa atu ia te ia. Sa faamatalaina le aposetolo o Ioane e faapea o le “soo ua alofaina e Iesu.” (Ioane 21:7, 20) Ma tatou te faitau foi faapea: “Ua alofa lava Iesu ia Mareta, ma lona uso, atoa ma Lasalo.”—Ioane 11:5.

Sa ono mafatia foi faalogona o Iesu. I le lagonaina o le tiga ina ua oti Lasalo, “sa tagi Iesu.” (Ioane 11:32-36) Ina ua faamatala atu le tiga o lona finagalo ona o le a faalataina o ia e Iuta le Sekara, na sii mai ai e Iesu faamatalaga faamomoi loto o loo i le Salamo: “O le ʻai faatasi ma aʻu ua aa mai o ia ia te au i lona mulivae.”—Ioane 13:18; Salamo 41:9.

E oo lava i le taimi a o feagai ai ma mafatiaga matuitui i luga o le satauro, sa faaalia e Iesu le loloto o ona faalogona. Sa ia faamautinoa atu le tausiga o lona tinā i “le soo ua alofaina e ia.” (Ioane 19:26, 27) Ina ua ia silasila atu i faamaoniga o le salamō i se tasi o pagota sa faasatauro i lona itu, na fetalai atu Iesu ma le alofa mutimutivale: “Ta te faatasi ai ma oe i parataiso.” (Luka 23:43) Tatou te faalogoina foi le lē mataofia o ona lagona ina ua ia alaga: “Loʻu Atua e, loʻu Atua e, se a le mea ua e tuulafoai mai ai aʻu?” (Mataio 27:46) Ma o ana toe upu lava a o le a to lana mānava o loo atagia mai ai le alofa mai le loto atoa ma le faatuatua: “Loʻu Tamā e, ou te tuuina atu loʻu nei agaga i ou aao!”—Luka 23:46.

Maeu se faamautinoaga ua aumaia e nei mea uma ia i tatou! “Auā e le ia te i tatou se ositaulaga sili e le mafaia ona tiga alofa faatasi ma i tatou i o tatou vaivai, a ua faaosoosoina o ia [Iesu] i mea uma pei o i tatou, a ua leai se agasala ia te ia.”—Eperu 4:15.

Faatuatuaina e Ieova

E lei faapea lava ua salamō Ieova i tagata na ia tofia e fai ma ona fofoga fetalai. Na te silafia lo latou alolofa faamaoni ia te ia, ma na te faagaloina ma le alofa mutimutivale ia sese o ia tagata lē lelei atoatoa. Peitai na ia faatalitalia i latou e faataunuu o latou tofiga. Ma sa mafai ona latou faia faapea faatasi ai ma lana fesoasoani.

Seʻi faaauau ona tatou faaali atu lo tatou faatuatuaina o o tatou uso ma tuafāfine faamaoni. E tumau pea ona latou lē lelei atoatoa i lenei faiga o mea, e pei foi o i tatou. Ae ui i lea, e lē tatau ona tatou manatu i o tatou uso faapea e lē talafeagai ona alolofa ma manatu mamafa i ai. Na tusi mai Paulo: “O i tatou o e malolosi ia tatou fesoasoani i le vaivai o e ua le lavā e tatau ai; a e aua neʻi faafiafia i o tatou lava loto.”—Roma 15:1; Kolose 3:13, 14.

Na oo i perofeta a Ieova ia faalogona uma lava ia e oo ia i tatou. Ae ui i lea, sa latou faalagolago ia Ieova, ma na faamalosia i latou e Ieova. E sili atu i lena, na avatu e Ieova ia i latou mafuaaga e olioli ai—o se loto fuatiaifo lelei, le mauaina o lona finagalo malie, o aumea faamaoni o ē lagolago faamaoni ia i latou, ma le faamautinoa mai o se lumanai fiafia. (Eperu 12:1-3) Seʻi o tatou pipii atu foi ia Ieova ma le mautinoa atoatoa a o tatou faataitai i le faatuatua o perofeta anamua, o tane “e iai faalogona e tusa ma i tatou.”