E Ui i Tofotofoga, ae ia Taofi Mau i Lou Faatuatua!

“Oʻu uso e, ia outou manatu, o le mea e fiafia tele ai pe a maua outou i tofotofoga eseese.”—IAKOPO 1:2.

1. O ā mea e ui lava ina tutupu, ae o loo auauna atu pea tagata o Ieova ia te ia i le faatuatua ma le “fiafia o le loto”?

E AUAUNA tagata o Ieova i le avea o ni ana Molimau, i le faatuatua atu ia te ia ma le “fiafia o le loto.” (Teuteronome 28:47; Isaia 43:10) Latou te faia lenei mea e ui lava ina siomia e le tele o tofotofoga. E ui i faigata latou te fesagai, ae ua faamafanafanaina i latou i upu nei: “Oʻu uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai.”—Iakopo 1:2, 3.

2. O le ā ua iloa e faatatau i le tusitala o le tusi a Iakopo?

² Sa tusia lena faamatalaga i le tusa o le 62 T.A. e le soo o Iakopo, o le ʻafa uso o Iesu Keriso. (Mareko 6:3) Sa avea Iakopo ma toeaina i le faapotopotoga i Ierusalema. O le mea moni, o ia, o Kefa (Peteru), ma Ioane o i latou ia “o e na taʻupoutuina”—o ē na lagolago malosi, ma maumauai mo le faapotopotoga. (Kalatia 2:9) Ina ua tuuina atu le mataupu o le peritomeina mo le filifiliga a “le au aposetolo ma toeaina” i le tusa o le 49 T.A., na faatū ai e Iakopo se manatu aogā faale-Tusi Paia, lea na faaaogaina e lena vaega pule o le uluai senituri.—Galuega 15:6-29.

3. O ā nisi o faafitauli sa fesagai ma Kerisiano o le uluai senituri, ma e mafai faapefea ona tatou maua aogā silisili mai le tusi o Iakopo?

³ Ona o se leoleo mamoe faaleagaga e manatu mamafa, sa ‘matuā iloa tino ai e Iakopo le lafu mamoe.’ (Faataoto 27:23) Sa ia iloa le fesagai o Kerisiano i lena taimi ma ni tofotofoga matuitui. O nisi o i latou sa manaomia ona toe fetuutuunai o latou mafaufauga, auā sa latou faaituau atu i tagata mauoloa. Mo nisi, sa avea le tapuaiga ua na o se faiga e masani aʻi. O nisi na latou faapogaia ni aafiaga leaga ona o le lē pulea o le laulaufaiva. Sa iai ni aafiaga e faaleagaina ai mai le agaga faalelalolagi, ma e toatele na lē toe iai se onosai ma na lē toe tatalo foi. O le mea moni, sa aafia nisi Kerisiano i le maʻi faaleagaga. O loo talanoaina i le tusi a Iakopo na mataupu i se auala faalaeiau, ma o loo aogā ana fautuaga i aso nei e pei foi ona sa aogā i le uluai senituri T.A. O le a sili atu ona aogā mo i tatou pe afai tatou te talanoaina lenei tusi e pei lava o loo tusi totino mai ia i tatou.a

Pe a Tatou Fetaiai ma Tofotofoga

4. E tatau faapefea ona tatou manatu i tofotofoga?

⁴ Ua faaalia mai e Iakopo ia i tatou le auala e manatu ai i tofotofoga. (Iakopo 1:1-4) I lona lē taʻuaina o le la faiā faaleaiga ma le Alo o le Atua, ae ua ia taʻua ma le lotomaulalo o ia “o le auauna a le Atua ma le Alii o Iesu Keriso.” Ua muamua lava ona tusi atu Iakopo i “itu aiga e sefulu ma le lua” o le Isaraelu faaleagaga “ua faasalalauina,” na amata mai ona o sauaga. (Galuega 8:1; 11:19; Kalatia 6:16; 1 Peteru 1:1) I le avea o ni Kerisiano, o loo sauaina foi i tatou, ma o loo “maua [i tatou] i tofotofoga eseese.” Peitai afai tatou te manatua o le tumau i tofotofoga e faamalosia ai lo tatou faatuatua, o le a tatou “manatu la o le mea e fiafia tele ai” pe a tatou fetaiai ma na mea. Pe afai tatou te tausisia lo tatou faamaoni i le Atua i taimi o tofotofoga, ona aumaia lea e lenei mea ia fiafiaga tumau ia i tatou.

5. O ā mea atonu e aofia i o tatou tofotofoga, ma o le ā e tupu pe afai e taulau ona tatou onosaia na tofotofoga?

⁵ O o tatou tofotofoga e aofia ai mala ia o loo taatele i tagata. Mo se faaaoaoga, e mafai ona faapuapuagatiaina i tatou i le lē lelei o le soifua maloloina. E lē o faatinoina e le Atua i le taimi nei ni faamalologa faavavega, peitai e tali mai o ia pe a tatou tatalo atu mo le atamai ma le malosi manao-mia ina ia fesagaia ai maʻi. (Salamo 41:1-3) E tatou te mafatia foi mo le mea ua tonu pe a sauaina i tatou ona o le avea ma Molimau a Ieova. (2 Timo-teo 3:12; 1 Peteru 3:14) Pe a taulau ona tatou ono-saia na tofotofoga, ona faamaonia ai lea o lo tatou faatuatua, ua avea o se ‘faatuatua ua tofotofoina.’ Ma pe afai e manumalo lo tatou faatuatua, ona ‘tupu ai lea o le onosai.’ O le faatuatua e faamalosia atili e ala i tofotofoga o le a fesoasoani lena ia i tatou e onosaia ai tofotofoga i le lumanai.

6. E faapefea ona ‘atoatoa le galuega a le onosai,’ ma o ā laasaga aogā e mafai ona faia pe a tatou fetaiai ma tofotofoga?

⁶ Ua faapea mai Iakopo: “Ia atoatoa foi le galuega a le onosai.” Pe afai tatou te faatagaina se tofotofoga e tupu e aunoa ma le taumafai e faamuta vave i se auala e lē faale-Tusi Paia, o le a faia la le “galuega” a le onosai o le faaatoatoaina lea o i tatou o ni Kerisiano, e lē o ʻasa i le faatuatua. O le mea moni, pe afai o se tofotofoga o le a aliai mai ai ni vaivaiga, e tatau ona tatou saili atu mo le fesoasoani a Ieova ina ia manumalo mai ai. E faapefea pe afai o le tofotofoga o se faaosoosoga ina ia faia ni feusuaiga lē mamā? Seʻi o tatou tatalo e faatatau i lena faafitauli ona gaoioi lea ia ogatusa ma a tatou tatalo. Atonu e manaomia ona suia la tatou galuega po o le faia o nisi laasaga ina ia tausisia ai le faamaoni i le Atua.—Kenese 39:7-9; 1 Korinito 10:13.

Le Sailiga mo le Atamai

7. E ono mafai faapefea ona tatou maua se fesoasoani e fesagaia ai tofotofoga?

⁷ Ua faaalia mai e Iakopo ia i tatou le mea e fai pe a tatou lē iloa ona fesagaia se tofotofoga. (Iakopo 1:5-8) O le a lē faalumaina i tatou e Ieova ona o lo tatou tatalo atu ma le faatuatua ona ua leai so tatou atamai. O le a ia fesoasoani mai ia i tatou ina ia saʻo le vaaiga i le tofotofoga ma ia onosaia. Atonu e faamanatu mai e o tatou uso talitonu ni mau pe manatua foi a o faia se suesuega faale-Tusi Paia pe a auai i sauniga. O mea tutupu e faatautaia e ala i le taitaiga a le Atua atonu tatou te mafai ai ona iloa le mea e tatau ona tatou fai. E ono taitaia i tatou e le agaga o le Atua. (Luka 11:13) Ina ia olioli i na manuia, o le mea masani lava, e tatau ona tatou pipii vavalalata atu i le Atua ma ona tagata.—Faataoto 18:1.

8. Aisea o le a lē maua ai e le tagata masalosalo se mea mai ia Ieova?

⁸ Ua foai mai e Ieova ia i tatou le atamai e manumalo ai mai tofotofoga pe afai tatou te “ole atu ma le faatuatua, aua lava neʻi masalosalo.” O le tagata masalosalo “e tusa ia ma le peau o le sami ua sousou i le matagi ma felafolafoaiina” ai e aunoa ma lona muai iloa. Pe afai e faapena lo tatou lē mautu faaleagaga, ‘e lē tatau lava la ona tatou faatalitalia o le a tatou maua so o se mea mai ia Ieova.’ Aua lava neʻi o tatou “faalotolotolua” ma “faaletumau” i le tatalo pe i isi foi auala. Nai lo lea, tau ina ia ia i tatou le faatuatua ia Ieova, o le Puna o le atamai.—Faataoto 3:5, 6.

E Mafai e Ē Mauoa ma Ē Matitiva Ona Olioli

9. Aisea ua iai ia i tatou ni mafuaaga mo le olioli i le avea o ni tagata tapuai a Ieova?

⁹ E tusa lava po o le mativa o se tasi lea o o tatou tofotofoga, ae ia tatou manatua, e mafai uma lava e Kerisiano o ē mauoa ma ē matitiva ona olioli. (Iakopo 1:9-11) A o lei avea ma soo o Iesu, o le toatele lava o ē faauuina sa vaivai lo latou tulaga i mea faitino ma sa vaai faatauvaa le lalolagi ia i latou. (1 Korinito 1:26) Peitai sa mafai ona latou olioli ina ua “faamaualugaina” i latou i le tulaga ua avea ai ma suli o le Malo. (Roma 8:16, 17) Ae i le isi itu, o tagata mauoa o ē sa faamamaluina i le taimi muamua, ua oo ina “faamaulaloina” i latou i le avea ma soo o Keriso, auā ua inosia i latou e le lalolagi. (Ioane 7:47-52; 12:42, 43) Peitai, i le avea ma auauna a Ieova, e mafai e i tatou uma lava ona olioli auā o le tamaoaiga ma tulaga maualuluga i le lalolagi e matuā leai se aogā pe a faatusatusa atu i tamaoaiga faaleagaga o loo tatou olioli ai. E maeu la so tatou loto faafetai, auā e leai se avanoa i totonu o lo tatou lotolotoi mo se uiga faamaualuga i ni tulaga faalelalolagi nei!—Faataoto 10:22; Galuega 10:34, 35.

10. O le ā le vaaiga e tatau ona iai i se Kerisiano e faatatau i le tamaoaiga faaletino?

¹⁰ Ua fesoasoani mai Iakopo ia i tatou ina ia tatou iloa e lē faalagolago atu lo tatou ola i ni tamaoaiga ma ni tulaga maualuluga ua ausia i le lalolagi. E pei ona lē mafai e le matagofie o se fugalaau ona taofia lona mamae mai le “vevela” o le la, e faapena i le tamaoaiga o se tagata ona lē faaumiumiina ai lona ola. (Salamo 49:6-9; Mataio 6:27) E ono oti o ia a o loo taumafai pea e sailia ‘ona ala o le olaga,’ atonu i se pisinisi. O lea la, o le mea tāua ia “mauoa i le Atua” ma ia faia mea uma tatou te mafai e faaauilumaina ai manaoga o le Malo.—Luka 12:13-21; Mataio 6:33; 1 Timoteo 6:17-19.

E Fiafia i Latou o Ē Onosaia Tofotofoga

11. O ā faamoemoega o i latou o ē taofi mau atu i lo latou faatuatua e ui ina fesagai ma tofotofoga?

¹¹ Pe mauoa pe mativa, e mafai lava ona tatou fiafia pe afai tatou te onosaia tofotofoga. (Iakopo 1:12-15) Pe afai e mafai ona tatou onosaia tofo-tofoga a o mautu pea lo tatou faatuatua, o le a mafai la ona tatou fiafia ai, auā e maua le olioli i le faia o le mea ua tonu i le silafaga a le Atua. E ala i le taofi mau atu pea i lo latou faatuatua seia oo i le oti, ua mafai ai e Kerisiano faauuagagaina ona maua “le pale o le ola,” o le ola e lē mafai ona oti i le lagi. (Faaaliga 2:10; 1 Korinito 15:50) Pe afai o loo ia i tatou le faamoemoe faalelalolagi ma tausisia lo tatou faatuatua i le Atua, ona mafai lea ona tatou tulimatai atu i le ola e faavavau i luga o le lalolagi parataiso. (Luka 23:43; Roma 6:23) Maeu le lelei o Ieova i ē uma o loo faaalia le faatuatua ia te ia!

12. Pe a fetaiai ma mala, aisea e lē tatau ai ona tatou faapea atu: “Ua faaosoosoina aʻu mai le Atua”?

¹² Pe mafai ea ona tofotofoina i tatou e Ieova i ni mala? E leai, e lē tatau ona tatou faapea ane: “Ua faaosoosoina aʻu e le Atua.” E lē o taumafai Ieova e uunaia i tatou e faia se agasala ae mautinoa o loo ia fesoasoani mai ia i tatou ma tuuina mai ia i tatou le malosi manaomia e onosaia ai tofotofoga pe afai tatou te tumau mausalī i le faatuatua. (Filipi 4:13) E paia le Atua, e na te lē tuuina foi la i tatou i ni tulaga e ono faavaivaia ai lo tatou tetee atu i le faia o mea sese. Pe afai tatou te iai i se tulaga lē tatau ma tatou faia ai se agasala, e lē tatau ona tatou tuuaʻia o ia, “auā e le mafai ona faaosoosoina o le Atua i mea leaga, e le faaosooso atu foi o ia i se tasi.” E ui atonu e faatagaina e Ieova le oo mai o se tofotofoga ina ia aoaia ai i tatou mo so tatou lelei, ae na te lē tofo-tofoina i tatou ona o ni ona faanaunauga leaga. (Eperu 12:7-11) Atonu e tofotofoina i tatou e Satani ina ia faia se mea sese, ae mafai e le Atua ona laveaiina i tatou mai lē o leaga.—Mataio 6:13.

13. O le ā e mafai ona tupu pe afai tatou te lē aveesea se tuinanauga sese?

¹³ E manaomia ona tatou tausisi i le tatalo auā atonu e iai se tulaga e ono taitaiina atu ai i se faanaunauga sese lea e ono mafai ona maileia ai i tatou ina ia agasala. Ua faapea mai Iakopo: “Ua taitasi ma faaosoosoina, pe a tosina ma maileia i lona lava tuʻinanau.” E lē mafai ona tatou tuuaʻia le Atua mo a tatou agasala pe afai tatou te faataga o tatou loto e tuu ai pea tuinanauga agasala. Pe afai tatou te lē aveesea se tuinanauga sese, ‘e oo ina matua,’ e fatufatu aʻe pea i le loto, ma “fanau mai ai lea o le agasala.” Pe a faataunuu le agasala, ona “fanaua mai ai lea o le oti.” E manino mai, e manaomia ona tatou leoleomaluina o tatou loto ma tetee atu i faanaunauga agasala. (Faataoto 4:23) Sa lapataia Kaino ua latalata ona lofia o ia i le agasala, peitai na te lei teteeina. (Kenese 4:4-8) Ae faapefea la, pe afai ua amata ona tatou uia se ala e lē faale-Tusi Paia? E mautinoa e tatau ona tatou loto faafetai pe afai e taumafai toeaina Kerisiano e faasaʻoina i tatou ina ia tatou lē agasala ai i le Atua.—Kalatia 6:1.

Le Atua—Le Puna o Mea Lelei

14. I le ā le uiga e mafai ai ona faapea atu e ‘lelei atoatoa’ meaalofa mai le Atua?

¹⁴ E ao ona tatou manatua o Ieova o le Puna, e lē o tofotofoga, ae o mea lelei. (Iakopo 1:16-18) E taʻua e Iakopo ona uso talitonu o “uso pele” ma faaali atu i ai faapea o le Atua o Lē na Foai maia ‘mea lelei uma atoa ma meaalofa uma e atoatoa ona lelei.’ O meaalofa faaleagaga ma le faaletino a Ieova e “atoatoa ona lelei,” pe atoatoa, e leai se mea e ʻasa ai. E maua “mai luga,” mai le afioaga o le Atua i le lagi. (1 Tupu 8:39) O Ieova o “le Tamā o malamalama”—le la, le masina, ma fetu. Ua ia tuuina mai foi ia i tatou le malamalama faaleagaga ma le upu moni. (Salamo 43:3; Ieremia 31:35; 2 Korinito 4:6) I le lē pei o le la lea e fesuisuiai ai ata lafoia a o faasolosolo ona oso aʻe ma e faatoʻā tusaʻo foi i le totonugalemū o le aoauli, e silisili pea ma maualuga le Atua i taimi uma i le saunia o mea ua lelei. E mautinoa o le a ia faaauupegaina i tatou mo lo tatou fesagaia o tofo-tofoga, pe afai tatou te faaaogā atoatoa ana sauniuniga faaleagaga o loo ala mai i lana Afioga ma “le auauna faamaoni ma le mafaufau.”—Mataio 24:45.

15. O le ā se tasi o meaalofa e sili ona lelei a Ieova?

¹⁵ O le ā se tasi o meaalofa e sili ona lelei a le Atua? O le faailoa mai o ona atalii faaleagaga e ala i le agaga paia, o loo latou galulue e tusa ai ma le tala lelei, po o le “upu o le mea moni.” O i latou ua fanauina e le agaga ua avea ma “faapolopolo,” ua filifilia mai le fanau a tagata ina ia avea ma “tupu ma faitaulaga” faalelagi. (Faaaliga 5:10, LT; Efeso 1:13, 14) Atonu sa mafaufau Iakopo i uluai fua o karite ia na ofoina atu ai taulaga ia Nisani 16, o le aso lea na toe faatuina aʻe ai Iesu, faapea foi le taulaga na ofoina ai areto e lua e faia mai le saito i le aso o le Penetekoso, ina ua liligiina ifo le agaga paia. (Levitiko 23:4-11, 15-17) I lena tulaga, ua avea ai Iesu o uluai fua, ae o ona suli ua avea ma “faapolopolo.” Ae faapefea pe afai o lo tatou faamoemoe o le lalolagi? O le manatuaina o lena faamoemoe o le a fesoasoani ia i tatou e pipii mau atu ai i lo tatou faatuatua i Lē e Foai maia “mea lelei uma,” o lē ua ia sauniunia mai le ola e faavavau i lalo o le pulega a le Malo.

Ia Avea ma ‘Lē Anaana i le Upu’

16. Aisea e tatau ai ona tatou ‘faataalise ona faalogologo ae faagesegese ona tautala atu ma faagesegese ona ita’?

¹⁶ E tusa lava po o tatou fetaiai ma tofotofoga o lo tatou faatuatua i le taimi nei pe leai, ae tatau lava ona avea i tatou ma “e anaana i le upu.” (Iakopo 1:19-25) E manaomia ona tatou “faataalise ona faalogologo” i le afioga a le Atua, ia avea ma ē anaana ma le usiusitai i ai. (Ioane 8:47) Ae i le isi itu, seʻi o tatou “faagesegese ona tautala atu,” ia manatunatu ma le faaeteete i a tatou upu. (Faataoto 15:28; 16:23) Atonu o loo aioi mai Iakopo ia i tatou ina ia lē vave ona faapea atu o le Atua e māfua mai ai o tatou tofotofoga. Ua fautuaina foi i tatou ina ia “faagesegese ona ita. Auā e le maua le amiotonu mai le Atua i le ita o tagata.” Pe afai tatou te feita i se faamatalaga ua faia e se tasi, seʻi o tatou ‘toʻa mālie’ ina ia alofia ai se tali atu ma le lotoa. (Efeso 4:26, 27) O le agaga lotoa lea e ono faatupuina ai ia i tatou ni faafitauli ma avea ma tofotofoga mo isi, e lē mafai ona maua ai le amio lea e tatau ona amioai se tasi o loo faatuatua atu i lo tatou Atua amiotonu. E lē gata i lea, pe afai e ‘tele lo tatou faautauta,’ o le a tatou ‘lē itagofie’ ai, ma o le a vavalalata mai ai foi o tatou uso ma tuafāfine ia i tatou.—Faataoto 14:29.

17. O le ā e faataulauina e ala i le aveesea o mea leaga mai le loto ma le mafaufau?

¹⁷ E mautinoa le manaomia ona tatou matuā taumamao ese mai “mea eleelea uma”—o mea uma e inosia e le Atua ma e faatupuina ai lona toasa. E lē gata i lea, e tatau ona tatou ‘tuu ese mea e sili ona leaga.’ E tatau ia i tatou uma ona faamamā ese mai i o tatou olaga so o se gaoioiga po o ni uiga e lē mamā. (2 Korinito 7:1; 1 Peteru 1:14-16; 1 Ioane 1:9) O le aveesea o mea leaga mai le loto ma le mafaufau e fesoasoani lea ia i tatou ina ia “talia ma le faamaulalo le upu ua totōina” o le upu moni. (Galuega 17:11, 12) E tusa lava po o le ā le umi talu ona avea i tatou ma Kerisiano, ae tatau lava ona tatou totōina i o tatou mafaufau le tele o upu moni faale-Tusi Paia. Aisea? Auā o le agaga o le Atua, le upu ua totōina, e fua mai ai “le tagata fou” lea e mauaina ai le faaolataga.—Efeso 4:20-24.

18. E faapefea i le tagata o lē e na ona faalogologo i le upu ona ese mai le tagata o loo ia anaana pe faia le upu?

¹⁸ E faapefea ona tatou faaalia atu o loo avea le upu ma o tatou taiala? E ala i le avea o ni ē usiusitai e “anaana i le upu, a e aua le na ona faalogologo i ai.” (Luka 11:28) O “e anaana” ua ia i latou le faatuatua lea e fuaina mai ai galuega e pei o gaoioiga maelega i le faiva faa-Kerisiano ma le faia o se sao e faifai pea i sauniga a tagata o le Atua. (Roma 10:14, 15; Eperu 10:24, 25) O lē e na ona faalogologo i le upu “e tusa ia ma le tagata ua vaavaai i le faaata i ona lava mata na fanau ma ia.” E vaavaai atu, ona alu ese lea ma galo atu ai mea ia atonu e manaomia ona faaleleia atili ai ona foliga. I le avea ma “ē anaana i le upu,” tatou te suesueina ai ma le faaeteete ma usiusitai atu i ‘tulafono lelei atoatoa’ a le Atua, ia o loo aofia ai mea uma na te faafinagaloina mai ia i tatou. Ona tatou olioli ai lea i le saolotoga lea e matuā tuufaafeagai lava ma le faapologaina i le agasala ma le oti, auā o le saolotoga lea e taitaia atu ai i le ola. O lea, seʻi o tatou ‘tumau i le tulafono lelei atoatoa,’ e ala i le faifai pea ona matuā vailiili ma usiusitai i ai. Ma seʻi tau lava ina manatu! I le avea o i tatou ma ‘ē anaana i le galuega, ae lē o ni ē faalogologo ma faagalogalo i ai,’ ua mafai ai ona tatou maua le olioli lea e maua mai le finagalo malie o le Atua.—Salamo 19:7-11.

E Tele Isi Mea e Aofia ai Nai lo le Tau Ina Avea ma Ē Tapuai

19, 20. (a) E tusa ai ma le Iakopo 1:26, 27, o le ā e manaomia e le tapuaiga mamā mai ia i tatou? (e) O ā nisi o faaaoaoga o se tapuaiga e mamā?

¹⁹ Afai tatou te fia olioli i le finagalo malie o le Atua, e manaomia la ona tatou manatua o le tapuaiga moni e lē tau o se faatulagaga masani e ao ona fai. (Iakopo 1:26, 27) Tatou te ono manatu o i tatou o ni ‘tagata tapuai masani’ e taliaina e Ieova, peitai o le mea e sili ona taulia o lona finagalo lea i le ituaiga moni o tagata e iai i tatou taitoatasi. (1 Korinito 4:4) O se tasi o masei matuia o le lē taulau lea ona ‘taofiofi le laulaufaiva.’ O se matuā faaseseina o i tatou pe afai tatou te manatu faapea o loo fiafia le finagalo o le Atua i la tatou tapuaiga pe afai tatou te taufaaleaga i isi, faia ni tala pepelo, pe faaaogā sese le laulaufaiva i isi auala. (Levitiko 19:16; Efeso 4:25) O le mea moni, tatou te lē mananao i la tatou ‘tapuaiga’ ina ia ‘lē aogā’ ma lē talia mai e le Atua ona o se tasi o na mafuaaga.

²⁰ E ui e lē o sii maia e Iakopo vala uma taitasi o le tapuaiga mamā, ae ua ia faapea mai, o loo aofia ai le “tauasiasi atu i e mātua oti ma fafine ua oti a latou tane i o latou tiga.” (Kalatia 2:10; 6:10; 1 Ioane 3:18) E faaalia e le faapotopotoga Kerisiano le naunau faapitoa i le saunia o mea mo fafine ua oti a latou tane. (Galuega 6:1-6; 1 Timoteo 5:8-10) Talu ai o le Atua o ia o Lē Puipuia le fafine ua oti lana tane ma le tama ua matuaoti, o lea, seʻi o tatou lagolagosua atu la ia te Ia, e ala i le faia o mea tatou te mafai ina ia fesoasoani atu ai ia i latou i le itu faaleagaga ma le itu faaletino. (Teuteronome 10:17, 18) O le tapuaiga mamā e uiga foi i le ‘leoleo o se tasi ia te ia ina neʻi pisia mai i le lalolagi,’ o le sosaiete o tagata amioletonu o loo pulea e le mana o Satani. (Ioane 17:16; 1 Ioane 5:19) Seʻi o tatou tumau la ona aloese mai amioga faalematau a le lalolagi, ina ia mafai ona tatou faamamaluina Ieova ma faaaogā ai i tatou i lana auaunaga.—2 Timoteo 2:20-22.

21. I le fesootai atu ma le tusi a Iakopo, o ā isi fesili e tatau ona tatou talanoaina?

²¹ O fautuaga a Iakopo ia ua uma ona tatou talanoaina, e tatau ona fesoasoani ia i tatou e onosaia ai tofotofoga ma pipii mau ai i lo tatou faatuatua. E tatau ona atili ai ona tatou talisapaia Lē na Foaiina mai ma le alofa meaalofa e lelei. Ma e fesoasoani upu a Iakopo ia i tatou ina ia tatou faatinoina ai le tapuaiga mamā. O le ā le isi mea lea ua ia faailoa mai ia i tatou? O ā isi laasaga e mafai ona tatou uia ina ia faamaonia ai e moni lo tatou faatuatua ia Ieova?

[Faaopoopoga i lalo]

E Faapefea Ona E Tali?

◻ O le ā o le a fesoasoani ia i tatou e onosaia ai tofotofoga?

◻ E ui lava i tofotofoga, ae aisea e mafai ai e Kerisiano ona olioli?

◻ E mafai faapefea ona avea i tatou ma ē anaana i le upu?

◻ O le ā e aofia ai i le tapuaiga mamā?

[Ata i le itulau 9]

Pe a fesagai ma tofotofoga, ia faatuatua atu i le mana o Ieova na te tali mai i tatalo

[Ata i le itulau 10]

O “ē anaana i le upu” o loo faalauiloaina le Malo o le Atua i le lalolagi aoao