Faaalia le Alofa ma le Faaaloalo o se Avā
“E tatau i le avā ona faaaloalo loloto o ia i lana tane.”—EFESO 5:33, NW.
1. O ā fesili ua mapuna aʻe e faatatau i tulaga o faaipoipoga i aso nei?
I LENEI vaitaimi faaonaponei o le tutoatasi ma le “faasaolotoga,” ua pagatia ai le vaaiga masani i faaipoipoga i ni luʻitau matuiā. E faitau miliona aiga e galueaiina lava a e leai se tamā po o le leai foi o se tinā. O le nonofo faatasi e aunoa ma le faia o se faaipoipoga faaletulafono ua avea o le masani a le toatele. Peitai pe ua taʻitaʻiina atu ai lenei mea i se saogalemu sili mo le fafine ma le tinā? Pe ua ia saunia ai se tulaga mautu mo le fanau? Ma pe o lenei malepe i lalo o uiga tautele ua taʻitaʻiina atu ai i se faaaloalo sili i totonu o le fuafuaga faaleaiga? I le tuufaafeagai ai, o le ā ua fautuaina e le Afioga a le Atua?
2. Ai se ā na lē lelei ai mo Atamu ona faaauau na o ia?
2 Ina ua faailoa mai e le Atua lona finagalo ina ia foafoaina le uluai fafine, na ia taʻua e faapea: “E le lelei ina toatasi o le tagata.” Ma ina ua uma ona matauina aiga o manu—manu poʻa ma manu fafine ma a latou fanau—sa ao ona ōgatasi faalogona o Atamu ma lena faaupuga. E ui lava ina sa lelei atoatoa ma sa i ai i se parataiso e faamalieina ai, sa leai se paaga a Atamu e tusa ma ia. Sa tuuina atu ia te ia le meaalofa o le atamai ma le tautala, a e sa leai se isi meafaiola e tutusa ma ia ina ia mafai ona fetufai ai na meaalofa. Peitai, o le a lē o toe umi se taimi a e faaeseeseina lena tulaga, auā na fetalai le Atua: “Ou te faia sona fesoasoani e tatau ma ia.”—Kenese 2:18-20.
3. (a) Na faapefea ona avea Eva o se “ituaiga” e tutusa ma Atamu? (e) O le ā lona uiga mo le tane ia “faatasi” atu i lana avā?
3 Na foafoaina e Ieova le fafine o Eva e ala i le faaaogāina o se tasi o ivi asoaso o Atamu e fai ma faavae. O le mea lea, o Eva sa o le “ituaiga” e tutusa ma Atamu. E lē o ia o se manu e maulalo ifo, peitai sa o le “ivi . . . o [ona] ivi, ma le aano o [ona] aano.” Ma le tusa ai, ua faapea mai le faamatalaga faagaeeina: “O le mea lea e tuua ai e le tane lona tamā ma lona tinā a e faatasi ma lana avā; ona avea ai lea o i laua ma tino e tasi.” (Kenese 2:23, 24) O le upu Eperu na faaliliuina i le “faatasi” o le uiga faaletino “e pipii atu, po o le fepiitai, a e maise lava i se tulaga mautu, e pei ua faapipii i se kelū.” (Gesenius’ Hebrew and Chaldee Lexicon to the Old Testament Scriptures) Ua matuā faaalia e lenei mea le manatu i se tane ma se avā e avea o se aumea e lē mafai ona tetea ese. Ua faapea mai se tasi tagata aʻoga faapea “ua faasino atu lenei mea i se tulaga autasi e sili atu a le tane ma le avā na i lo o feusuaiga ma faalautele atu i le faiā atoa.” I lea, o le faaipoipoga e lē na o se feni e faapasi taimi ma iʻu ai. O se faiā tumau. Ma i le mea o loo i ai le feavatai ma le fefaaaloaloai, o lena autasi, e ui lava atonu e milosia e nisi taimi, a e lē tatau lava ona motusia.—Mataio 19:3-9.
4. I le ā le uiga ua avea ai le fafine o se fesoasoani ma sē e lagolagosua i le tane?
4 Na fetalai le Atua faapea o le fafine e tatau ona avea o le fesoasoani ma lē e lagolagosua i le tane. Talu ai ona sa faia i laua i foliga o le Atua, ua na faatalitalia la i laua ina ia faaalia ona uiga—le faamasinotonu, alofa, atamai, ma le malosi—i la laua faiā o le tasi i le isi. O le mea lea, e tatau ai ona avea Eva o sē “e lagolagosua,” a e lē o sē e faatautavā. E lē tatau ona avea le aiga o se vaa e lua ni kapeteni tauva, peitai e tatau ona faatinoina le tulaga ulu e Atamu.—1 Korinito 11:3; Efeso 5:22-24; 1 Timoteo 2:12, 13.
5. Ua faapefea ona feutagai le toatele o tane ma fafine, ma pe ua i ai le faamaoniga a le Atua i lenei mea?
5 A e peitai, o le fouvale ma le agasala a le uluai ulugatagata faasaga i le tulaga ulu alofa a le Atua na vave ona suia ai se isi fuafuaga mo le faia o lo la aiga, ma aiga uma lava i le lumanai. Faatasi ai ma le muai iloa o iʻuga o la laua agasala ma ona auga i le fanau a tagata, na fetalai atu ai Ieova ia Eva: “E uai atu lou manao i lau tane, e pule foi o ia ia te oe.” (Kenese 3:16) O le tulaga lē manuia, ona ua tele senituri o loo pulea ai e le toatele o tane fafine i se auala sauā. E tele auala na tuua ai fafine i se tulaga maulalo ma o loo tumau pea ona faamaulaloina fafine i le lalolagi atoa. A e peitai, e pei ona tatou vaaia i le mataupu na faatoʻā mavae atu, o le faatatauina o mataupu silisili a le Tusi Paia ua lē o aumaia ai se faavae mo se pule sauā a se tane. I le isi itu, ua ia faamamafa mai le tautele o le faaaloalo loloto.
Faaaloalo Loloto—O se Luʻi
6, 7. (a) Atonu e mafai faapefea ona manumalo le upu moni i tane lē talitonu? (e) E mafai faapefea ona atonu e lē taulau se avā i le faaalia o le “faaaloalo loloto” mo lana tane lē talitonu?
6 Na auiliili mai e le aposetolo o Peteru le faaaʻoaʻoga a Keriso i le amio ma faamatala mai ai faapea na tuu e Iesu le ‘faaaʻoaʻo ia mulimulitui ai i ona tulaga aao.’ Ona faapea mai lea o Peteru: “I le auala faapena, outou avā, ia gauai atu i a outou lava tane, o le mafuaaga lea, afai e lē usiusitai nisi i le upu, e mafai ona maua i latou e aunoa ma se upu e ala i amio a a latou avā, ona o lo latou vaavaai ane i a outou amio mamā faatasi ai ma le faaaloalo loloto.” (1 Peteru 2:21–3:2, NW) E mafai faapefea e avā Kerisiano ona faaalia lenei “faaaloalo loloto”?
7 E toatele o tatou tuafafine Kerisiano e i ai tane lē talitonu ma i nisi taimi e tetee ai tane. O nei ea la tulaga o lona uiga faapea ua lē toe aogā fautuaga a Peteru? E leai, o le gauai ma le faaaloalo e manaomia e tusa lava pe “lē usiusitai nisi i le upu.” O le mea lea, pe o se faailoga o le faaaloalo loloto pe afai o se tuafafine Kerisiano e i ai sana tane lē talitonu o le a sau i le Maota o le Malo ma faitatala ai e uiga ia te ia, i le faailoa atu i le toatele o tuafafine i le faapotopotoga faiga leaga uma na ia maua mai lana tane? Afai na te faia lena mea e faatatau i se uso po o se tuafafine i le faapotopotoga, o le ā le taʻu e taʻu ai lena mea? O le faitatala, pe atonu foi o le taufaaleaga. O le mea lea, e lē o se faaalia foi o le faaaloalo loloto mo se avā ona faia ni faamatalaga leaga e uiga i lana tane lē talitonu. (1 Timoteo 3:11; 5:13) Peitai, ua iloa faapea ua maua e nisi tuafafine ua tetea, le faafitauli matuiā. O le ā le vaifofo faa-Kerisiano? E mafai ona latou ō atu i toeaina ma saili la latou fautuaga ma le fesoasoani.—Eperu 13:17.
8. O ā ni manatu atonu o le a avea o ni faavae e tetee ai le tane?
8 E mafai faapefea e toeaina ona feutagai ma le tomai ma se tane tetee? Muamua lava, e mafai ona latou taumafai ia vaai i le mataupu i lana itu. O ana faaupuga ma uiga sauā faaletino e mafai ona uunaia e uiga valea ma le lē iloa e pei o se filifili sautua tolu lena ua taʻitaʻiina atu ai i le fefe ma oo ai ina faia ni gaoioiga sauā. Ma ai se ā ua tupu ai lenei mea? I nisi taimi atonu e itiiti po o le leai foi se mea e iloa e le tane e uiga i Molimau a Ieova seʻi vagana ai tala taufaaleaga e faalogo ai mai ē latou te faigaluega faatasi. Na te iloa faapea a o leʻi amata e lana avā ona suesueina le Tusi Paia atonu sa matuā mitiia o ia ma tuutoina atu ia te ia ma la laua fanau. E ui lava atonu ua avea nei o ia o se avā ma se tinā e sili ona lelei, a e o lona manatu ua faapea: ‘E faatolu ona ia tuua aʻu i le vaiaso ina ia alu atu i na sauniga. Ou te lē iloa po o le ā le mea o fai ai i na sauniga, peitai o loo i ai ni tamaloloa aulelei i inā i le maota, ma . . . ’ Ioe, o lona lē iloa atonu e taʻitaʻiina atu ai i le fuā ma le fefe. Ona oo mai ai lea o le gaoioiga e tetee. E mafai faapefea ona atonu e fesoasoani toeaina i ni vala po o ni itu o faaalia ai nei uiga?—Faataoto 14:30; 27:4.
9. O ā ni faafeiloaiga tomai atonu e mafai ona faaaogā atu i ni tane lē talitonu, ma o ā auga atonu o le a maua ai?
9 Atonu e mafai e se tasi o le au toeaina ona taumafai ina ia masani pe iloa lea tane i se tulaga faaletino. (1 Korinito 9:19-23) Atonu e tomai le tane lea i se tulaga faaeletise, kamuta, po o se vali fale. Atonu o le a ia manao e faaaogā lena tomai e fesoasoani atu ai i se faafitauli i le Maota o le Malo. I lena auala o le a mafai ona ia vaai i totonu o le Maota o le Malo e aunoa ma le i ai o se faalogona i se tiute tauave e auai i le sauniga. A o agaʻi atu ina ia iloa ni uso, o ona uiga agaʻi i lana avā ma le upu moni atonu o le a faaitiitia. I lona vaaia o le alofa ma le agaga o le felagolagomai i totonu o le faapotopotoga, atonu o le a amata ai ona ia aumaia lana avā i sauniga. I le ma lea, a o agaʻi atu ai le isi mea i le isi, atonu o le a mafai ona ia laa atu i totonu o le maota i le taimi o faia ai le sauniga e faalogologo mo sina taimi. O le a lē umi lava, o le a mafai ona ia talosaga atu mo se suesuega faale-Tusi Paia. O nei mea uma e mafai ona faia ma i nisi taimi ua faia faapea. E faitau afe tane talitonu i aso nei, faafetai atu ona o lea alofa ma le tomai ma le “faaaloalo loloto” a le avā.—Efeso 5:33, NW.
Leoleo i Lona Aiga
10, 11. O ā ni vala eseese ua faamatalaina e le Tupu o Lemuelu e faatatau i se avā amio lelei? (Ia iloiloina eseese mai.)
10 Na maua e le Tupu o Lemuelu se fautuaga lelei mai lona tinā e faatatau i uiga o se fafine amio lelei. (Faataoto 31:1) O lona faamatalaina o se avā galue mamafa ma se tinā i le Faataoto 31:10-31 ua aogā ma lelei ona faitauina ma le faaeteete. E manino lava lona poto masani i le faatatauina o tulaga amiotonu a le Atua ma i le faaalia o le faaaloalo loloto.
11 Ua tusi Lemuelu faapea o le “avā amio lelei” e maufaatuatuaina, e faalagolago i ai, ma faamaoni. (Faataoto 31 Fuaiupu e 10-12) E galue mamafa o ia e fafaga ma tausi lana tane ma lana fanau. (Faataoto 31 Fuaiupu e 13-19, 21, 24) E agalelei ma lima foai o ia ia i latou o i ai moni le manaomia. (Faataoto 31 Fuaiupu e 20) E ala i lona faaaloalo ma le amio lelei, ua ia faaopoopo atu ai i le talaaga lelei o lana tane. (Faataoto 31 Fuaiupu e 23) E lē o ia o sē faitatala fua pe vaavaai i masei. I le isi itu, e tautala i upu e faamalolo ai ma atiina aʻe ai. (Faataoto 31 Fuaiupu e 26) Ona e lē paiē o ia, e mamā ai lona fale ma maopoopo. (Faataoto 31 Fuaiupu e 27) (O le mea moni, o se aiga Kerisiano e tatau ona avea o se tasi o aiga aupito mamā i le vaipanoa.) O lana tane ma tamaiti latou te faafetai ma vivii atu ia te ia. O i latou i fafo atu o le aiga latou te talisapaia foi ona uiga. (Faataoto 31 Fuaiupu e 28, 29, 31) O lona lalelei e lē gata mai i le paʻu; o le lalelei lea o le fafine ua mataʻu i le Atua faatasi ai ma uiga faaleatua.—Faataoto 31 Fuaiupu e 30.
Le Loto Agamalu ma le Filemu
12. O le ā le mea e “tau tele lava lea i luma o le Atua,” ma ua faapefea ona faamatilatila mai e se faaupuga Sepania lenei manatu?
12 O lenei manatu mulimuli ua faaleoina mai e Peteru ina o ia fautuaina fafine Kerisiano ina ia aua neʻi manatu mamafa i o latou foliga mai fafo. Ua ia uunai mai: “A o le tagata lilo o le loto, ia teua lea i le mea e le pala, o le loto agamalu ma le filemu, o le mea tau tele lava lea i luma o le Atua.” (1 Peteru 3:3, 4) Matau le manatu faapea ‘o le loto agamalu ma le filemu o le mea tau tele lea i fofoga o le Atua.’ I lea, o se avā Kerisiano ma o se tinā e i ai lea agaga o le a lē gata ina faafiafia ai lana tane peitai e sili ona tāua, ua ia faafiafia le Atua, e pei ona sa faia e fafine faamaoni i aso anamua. O lenei matagofie i totonu ua faaatagia foi i se faaupuga Sepania ua faapea mai: “O se fafine lalelei e faafiafia ai mata; o se fafine lelei e faafiafia ai le loto. Afai o lē muamua o se maatāua, o lē mulimuli o le oloa tāua.”
13. O le ā le auga e malōlō ai e mafai e se avā ona avatu i lana fanau?
13 O se avā Kerisiano e mafai ona malōlō ai i latou uma i lona aiga. (Faatusatusa le Mataio 11:28-30.) A o matauina e lana fanau lona faaaloalo mo lana tane, o le a faapena foi ona latou faaatagia lena faaaloalo i a latou feutagaiga ma mātua ma i latou i fafo atu o le aiga. E avea o se iʻuga, o le a avea ai fanau Kerisiano o ni ē agalelei ma magafagafa. Ma maeu le faafouina ai pe a tauofo tamaiti e faia galuega na i lo o le uunai faamalosi o i latou ia faia! O lo latou lē manatu faapito e saosaolaumea i le fiafiaga o le aiga, ma o le ataata fiafia a le tinā e faamaonia ai ua lava ma totoe lea e taui ai.
14. O le manaomia ona faia o se aʻoaʻiga atonu o le a taʻitaʻiina atu ai i le ā le luʻi?
14 A e faapefea i taimi pe a manaomia le aʻoaʻiga? E pei lava o o latou mātua, e fai foi e tamaiti mea sese. I nisi taimi e lē usiusitai ai. O ā uiga faaalia o se tinā Kerisiano pe afai e lē o i ai le tamā? Pe o le a faaauau ona ia faaaloalo i le tulaga o la laua fanau? Pe o le a ia ee ma le sauā ina ia taumafai ia maua le usiusitai o i latou? Ia, e mafai e se tamaitiiti ona aʻoaʻo mai le leotele? Pe o le leo lemu uigā o le a maua ai se auga sili?—Efeso 4:31, 32.
15. O le ā ua maua e tagata suesue e faatatau i le usiusitai o fanau?
15 I se faamatalaga e uiga i le usiusitai o tamaiti, na taʻua ai e le mekasini o le Psychology Today: “E tusa ai ma le suesuega talu ai nei, o lou soona fai atu ma le leo tele i tamaiti e aua le faia se mea, o le sili atu foi lena ona latou liliuese ma faia le mea maʻoti lava lea e te lē o manao latou te faia.” I le isi itu, ua iloa e tagata suesue faapea afai e tautala lemu tagata matutua, o le a mananao tamaiti e usiusitai e aunoa ma le tele o le faatalatu. O le mea moni, e faapitoa lava ona tāua le feutagai ma tamaiti na i lo o le na ona faaita ia i latou i le saputu atu i ai o faatonuga sauā.—Efeso 6:4; 1 Peteru 4:8.
Faaaloalo i le Faiā Faaletino
16. E mafai faapefea ona faaalia e se avā le magafagafa mo faalogona ootia ma manaoga o lana tane, ma faatasi ai ma ā aogā?
16 E pei lava ona tatau i le tane ona faaalia le magafagafa mo lana avā auā o ia e sili ona vaivai i ona uiga, o lea e tatau ai i se avā ona iloa faalogona ootia ma manaoga o lana tane e faatatau i feusuaiga. Ua faaalia i le Tusi Paia faapea e tatau i le tane ma le avā ona fiafia le tasi i le isi ma ia faapea foi ona faamalie e le tasi le isi. E manaomia ai i lena mea ona fuafua lelei e le tasi e faatatau i uiga ma manaoga o le isi. O lenei faamalieina i le va o le toalua o le a fesoasoani foi e faamautinoa ai faapea e leai se tasi o le paaga e vaavaai solo ona mata ma taʻitaʻiina atu ai i le manao solo o le tino.—Faataoto 5:15-20.
17. O le ā faapefea ona manatu se tane ma lana avā i le tuuina atu o le mea e tusa ma le faaipoipoga?
17 E mautinoa lava, o le mea e i ai le faaaloalo i le va o le toalua, o le a lē faaaogāina ai e se tasi o paaga manaoga tau i feusuaiga e avea ma auupega faalemafaufau. E tatau ia i laua uma ia aua le faafiti le tasi i le isi a ia tuuina atu le mea e tusa ai ma le faaipoipoga, ma afai e i ai se tulaga e taofia ai mo sina taimi, e tatau ona i ai le maliega i le va o le toalua. (1 Korinito 7:1-5) Mo se faaaʻoaʻoga, i nisi taimi atonu o le a malaga ese ai le tane mo sina taimi ona o se galuega o le fausiaina i le ofisa o le lala o le Sosaiete o le Olo Matamata po o se isi lava fuafuaga faatiokarate. I lena itu e tatau ona ia mautinoa faapea ua malie atoatoa i ai le loto o lana avā. O lena teteaese e mafai foi ona aumaia ai faamanuiaga faaleagaga i le aiga, o lona uiga, i se ituaiga o faalaeiauga e mafai ona maua i le faamatalaina mai e le tane o ni mea na tutupu pe a foi mai i le aiga.
Le Vaega Tāua a Tuafafine
18. Ai se ā e sili ai ona mamafa le avega tauave a le avā a se toeaina’?
18 Afai o se tane a se tuafafine Kerisiano o se toeaina, ua ia te ia la se avega tauave sili. Muamua, o le a sili ona tele mea e manaomia mai ia te ia [le tane]. O le a ia tali atu ia Ieova mo le tulaga faaleagaga o le faapotopotoga. (Eperu 13:17) Peitai i le avea o se avā a se toeaina ma atonu foi o se fafine matua, e tāua ai ana faaaʻoaʻoga o le faaaloalo. (Faatusatusa le 1 Timoteo 5:9, 10; Tito 2:3-5.) Ma maeu le faaaʻoaʻoga lelei ua faataatia e le toatele o avā a toeaina e lagolago atu ai i a latou tane! E masani lava ona toesea le tane ona o ni mataupu faalefaapotopotoga, ma atonu o le a tupu aʻe ai lona fia iloa. A e peitai, o le faamaoni o le avā amio atua o le a na lē suesuevale ai i mataupu a le faapotopotoga e pei o se tagata aiā valea.—1 Peteru 4:15.
19. O le ā atonu o le a aafia ai se toeaina i le ‘pulea lelei o lona aiga’?
19 A e peitai, atonu o le a fautuaina e se toeaina lana avā pe afai na te faaalia ni uiga e lē atiina aʻe ai pe afai foi na te lē faataatia se faaaʻoaʻoga lelei mo isi tuafafine. ‘O le pule lelei i lona lava aiga’ e aofia ai e lē na o tamaiti peitai o le avā foi. O le faatatauina o lenei tapulaa faale-Tusi Paia atonu o le a tofotofoina ai le loto maulalo o nisi avā.—1 Timoteo 3:4, 5, 11; Eperu 12:11.
20. Ia taʻua ni faaaʻoaʻoga lelei o tuafafine ua faaipoipo ma ē leʻi faaipoipo i aso anamua ma aso nei. (Tagai i le “Life Stories of Jehovah’s Witnesses” (“Tala i Soifuaga o Molimau a Ieova”) i le Watch Tower Publications Index 1930-1985.)
20 O tuafafine e leʻi faaipoipo e mafai foi ona atagia ai le faaaloalo i le vaega a avā i le faapotopotoga. E tele lava ni faaaʻoaʻoga lelei a tuafafine faamaoni lelei e lē gata i le Tusi Paia a e i totonu foi o le faapotopotoga i aso nei! O Toreka, atonu o se tuafafine sa matuā maualuga le faamalo na avatu i ai ona o ana “galuega lelei.” (Galuega 9:36-42) Sa maelega foi Pisila ma Fipe mo le upu moni. (Roma 16:1-4) E faapena foi i aso nei, e toatele o tatou tuafafine, faaipoipo po o le lē faaipoipo foi ua avea o ni misionare, paeonia, ma ni tagata talaʻi mataʻina. I le taimi lava e tasi, ua tausia ai e na fafine amio atua le mamā, le maopoopo o fale ma aiga ma latou te lē tuulafoaia lava o latou aiga. Ona o le toatele o i latou ma e tusa ai ma o latou tulaga, e masani lava ona latou faia se vaega sili ona tele i le galuega talaʻi.—Salamo 68:11.
21. Ua faapefea ona avea tuafafine faamaoni o ni faalaeiauga i o latou uso Kerisiano?
21 Ua faia e tuafafine faamaoni se vaega tāua e atiina aʻe ai i le faapotopotoga. O lo latou maelega ma faaaʻoaʻoga ua avea o ni faalaeiau i uso ma i le faapotopotoga Kerisiano lautele. O i latou o ē lagolagosua moni ma o ni fesoasoani. (Faatusatusa le Kenese 2:18.) Maeu le tatau mo i latou o le alofa ma le faaaloalo moni! Ma mo paaga Kerisiano faaipoipo, ua fetaui moni lava ia i latou le fautuaga a Paulo: “Ia taitasi outou ma alofa i lana lava avā faapei o ia lava ia te ia; i le isi itu, o le avā foi ia faaaloalo loloto o ia i lana tane.”—Efeso 5:33, NW.
E te Manatua?
◻ O ā vaega i le amataga na tuuina atu e le Atua i le tane ma le fafine lelei atoatoa?
◻ E ao faapefea ona atonu e manumalo le upu moni i tane lē talitonu?
◻ O ā uiga mataʻina a avā amio lelei?
◻ E mafai faapefea e se avā Kerisiano ona faaalia le ‘loto agamalu ma le filemu’?
◻ O ā vaega paleni e manaomia i le faiā faaletino i le va o paaga faaipoipo?
[Ata i le itulau 16]
E lē tatau ona pei le aiga o se vaa e lua ni kapeteni tauvā
[Ata i le itulau 18]
Atonu e oo ina fuā se tane lē talitonu, e oo lava ina fefe, e uiga i le auai atu o lana avā i sauniga po o isi gaoioiga faa-Kerisiano. E mafai faapefea ona fesoasoani atu ia te ia?