Ia Tumau lo Outou Alofa Faaleuso!

“Ia tumau lo outou alofa faaleuso.”—EPERU 13:1, NW.

1. O le ā e te faia ina ia faaolaola ai pea se afi o loo mumū i se po mālūlū, ma o le ā le tiute tauave faapena ua ia i tatou uma?

SEʻI faapea o loo e nofo i se vaipanoa o loo matuā maʻatiʻati ai le mālūlū o fafo ma o loo faasolo ina faateteleina le mālūlū. E na o le pau lava le mea e maua ai se mafanafana i totonu o lou fale o le afi lea o loo faamumū i totonu o le mea e tafu ai le afi. O loo faalagolago atu ola i lou faaolaolaina pea o le afi. Pe o le a na ona e nofonofo lava ma matamata atu a o faasolo pepē ifo malala o loo aasa ma amata ona liu efuefu? E mautinoa e leai. E te faamalosi lava e laʻu i ai fafie i totonu ina ia faaolaola ai pea le afi. I se faauigaina, e tai tutusa uma galuega a i tatou taitoatasi pe a oo mai i le “afi” e sili atu ona tāua—le afi lea e tatau ona mumū aʻe i totonu o o tatou loto—o le alofa.

2. (a) Aisea atonu ai e faapea atu ua maalili pe ua mou atu le alofa i nei aso e gata ai? (e) O le ā le tāua o le alofa i Kerisiano moni?

² O loo tatou ola i se taimi, lea ua leva ona valoia e Iesu, e maalili pe mou atu ai le alofa o i latou ua faapea mai o Kerisiano i le lalolagi aoao. (Mataio 24:12) Sa faasino fetalaiga a Iesu i se ituaiga o alofa e silisili atu ona tāua, le alofa lea mo Ieova le Atua ma lana Afioga, le Tusi Paia. O isi ituaiga o alofa, o loo mou atu foi. Na valoia e le Tusi Paia e faapea, i “aso e gata ai,” e toatele o le a ‘leai se lotoaiga.’ (2 Timoteo 3:1-5) Maeu le moni o lenei mea! E tatau ona avea le aiga ma mapusaga o lagona alofa faaleaiga, ae ua oo lava iina ua avea ai le sauā ma faiga lē alofa—o nisi taimi o faiga faataugā faamoʻamoʻa—o ni mea ua masani ai. Peitai, i lenei lalolagi ua leai se alofa, ua poloaia ai Kerisiano ina ia lē gata ia iai lo latou alofa o le tasi i le isi ae ia iai foi se alofa faataulagaina totino, o le faamuamua lea o isi nai lo oe lava. E ao ona tatou faaalia lenei alofa i se uiga manino ina ia mafai ona iloa mai e tagata uma, ia avea o le faailoga e mataulia ai le faapotopotoga o Kerisiano moni.—Ioane 13:34, 35.

3. O le ā le alofa faaleuso, ma o le ā le uiga o le faatumauina pea o lena alofa?

³ Sa faagaeeina le aposetolo o Paulo e poloai mai: “Ia tumau lo outou alofa faaleuso.” (Eperu 13:1, NW) E tusa ai o le faamatalaga a se tusi a se tagata atamai, o le upu Eleni o loo faaliliuina iinei “alofa faaleuso” (phi·la·del·phiʹa) “e faasino atu i le alofa māfana, le faaalia o le agalelei, faalogona tiga alofa, le ofoina atu o se fesoasoani.” Ma o le ā na uiga i ai Paulo ina ua ia faapea mai e tatau ona tatou faatumauina pea lena alofa? Ua taʻu mai e lena lava tusi: “E lē tatau lava ona maalili pe mou atu.” E lē lava la le na ona iai o lagona māfana mo o tatou uso; e tatau ona tatou faaali atu. E lē gata i lea, e tatau ona tatou faatumauina lenei alofa, ia aua lava neʻi mou atu. Pe o se luʻi ea? Ioe, peitai e mafai ona fesoasoani mai le agaga o Ieova ia i tatou ina ia ati ae le alofa māfana faaleuso ma ia tausisia. Seʻi o tatou iloiloina ni auala se tolu e faaolaolaina ai le afi o lenei alofa i totonu o o tatou loto.

Ia Faaalia Lagona Faaleuso

4. O ā lagona faaleuso?

⁴ Pe afai e te manao ia faateleina lou alofa mo ou uso ma tuafāfine Kerisiano, atonu e manaomia muamua ona iai ni ou lagona mo i latou, ia tiga alofa faatasi ma i latou i ni tofotofoga ma luʻi latou te fesagaia i le olaga. Sa fautuaina e le aposetolo o Peteru lenei mea ina ua ia tusi mai: “Ia loto gatasi outou uma, ia fealofani [“iai lagona faaleuso,” NW], ia alolofa i le au uso, ia mutimuti vale i le alofa, ia agalelei.” (1 Peteru 3:8) O le upu Eleni o loo faaaogā iinei mo le faaalia o “lagona faaleuso” e faauiga i le “puapuagatia faatasi.” Ua taʻua e se tasi molimau i Tusitusiga Paia Eleni e faatatau i lenei upu e faapea: “E faamatala ai le ituaiga o mafaufau e iu ina iai pe a tatou lagona faatasi ma isi e peiseai o o tatou faalogona lava na.” O lea, e manaomia ai le tiga alofa. Na faapea mai se auauna faamaoni ua matua lava a Ieova: “O le tiga alofa o loʻu lagonaina lea o ou tiga i totonu o loʻu loto.”

5. E faapefea ona tatou iloa e iai lagona faaleuso o Ieova?

⁵ Pe e iai ea ia Ieova na lagona faaleuso? O le mea mautinoa lena. Mo se faataitaiga, ua tatou faitau e faatatau i mafatiaga o ona tagata Isaraelu: “O o latou puapuaga uma na puapuaga ai o ia.” (Isaia 63:9, NW) Sa lei na ona silasila mai o Ieova i faalavelave na latou fetaiai; sa ia lagona le alofa i tagata. O le loloto o ona lagona o loo faataitaia mai lea i fetalaiga a Ieova lava ia i ona tagata, o loo faamauina i le Sakaria 2:8 e faapea: “O lē pai atu ia te outou, ua pāia e ia le tamatamai mata o [loʻu mata].”a Ua taʻua e se tasi tagata faimanatu e faatatau i lenei fuaiupu: “O le mata o se tasi o vaega e sili ona lavelave ma sili ona faapelepele gatā i le tino o le tagata; ma o le tamatamai mata o le mata—e matala ina ia ulufia e le malamalama ma mafai ai ona vaai—o le vaega silisili lea ona leatapaʻia gofie, ma sili foi ona tāua o le mata. E leai se mea e sili atu lona lelei nai lo le mata e mafai ona faaoo mai ai le manatu i le tausiga e sili ona faapelepele a Ieova mo mea o loo faaalia i ai lona alofa.”

6. Sa faapefea ona faaalia e Iesu Keriso lagona faaleuso?

⁶ Sa masani foi ona faaalia e Iesu le loloto o lagona faaleuso. Sa faifai pea ona ‘mutimuti vale lona alofa’ ona o tulaga leaga sa oo i ona uso a tagata o ē na mamaʻi pe atuatuvale. (Mareko 1:41; 6:34) Sa ia faaalia e faapea pe a lē taulau i se tasi ona faia ma le agalelei ona soo faauuina, na te lagonaina e peiseai o ia lava lea ua fai atu i ai nei faiga. (Mataio 25:41-46) Ma i aso nei i le avea o ia ma “ositaulaga sili” i le lagi, o ia lea e mafai ona “tiga alofa faatasi ma i tatou i o tatou vaivai.”—Eperu 4:15.

7. E ono fesoasoani faapefea ia i tatou lagona faaleuso pe a faatiga mai se uso po o se tuafafine ia i tatou?

⁷ “Tiga alofa faatasi ma i tatou i o tatou vaivai”—pe ua lē o se manatu faamafanafana loto ea lena? E mautinoa la, tatou te mananao e faia foi lea lava mea e tasi i le isi tagata. O le mea moni, e sili atu ona faigofie le vaavaai i vaivaiga o le isi tagata. (Mataio 7:3-5) Ae i se isi taimi e faatiga atu ai se uso po o se tuafafine ia te oe, aisea e te lē faataitaia ai lenei mea? Seʻi faapea o loo oo ia te oe tulaga o loo iai lena tagata, i lena talaaga, i na uiga totino, i na masei totino o loo fesagaia. Pe mafai ea ona e mautinoa e te lē faia na lava mea sese—pe atonu foi o ni mea e sili atu ona leaga? Nai lo le soona faatalitalia o ni mea lelei mai isi, e tatau ona tatou faaalia lagona faaleuso, lea o le a fesoasoani ia i tatou ia fetuutuunai ai e pei o Ieova, o lē na te ‘manatua o le efuefu lava i tatou.’ (Salamo 103:14; Iakopo 3:17) Na te silafia o tatou vaivaiga. E lē tāitai ona ia faatalitalia ni mea se tele e sili atu nai lo o mea e mafai ona tatou faia. (Faatusatusa i le 1 Tupu 19:5-7.) Seʻi o tatou faasalafa atu na lagona faaleuso i isi.

8. E tatau faapefea ona tatou gaoioi pe a fesagaia e se uso po o se tuafafine ni tulaga faigata?

⁸ Na tusi Paulo e faapea ua faapei le faapotopotoga o se tino o loo iai ona itu tino eseese e ao ona galulue faatasi i le autasi. Na ia faaopoopo mai: “Pe afai e tiga le tasi itu tino, ia tiga faatasi ai itu tino uma lava.” (1 Korinito 12:12-26) E manaomia ona tatou mafatia faatasi, pe tiga alofa faatasi, ma i latou o loo fesagaia ni tulaga faigata. E taimua toeaina i le faia faapea. Na tusi mai foi Paulo: “Po o ai le ua vaivai, ou te le vaivai ai? Po o ai le ua tausuai, ou te le tiga ai?” (2 Korinito 11:29) E faataitai atu toeaina ma ovasia femalagaai ia Paulo i lenei itu. I a latou lauga, i a latou galuega faaleoleo mamoe, e oo lava i lo latou taulimaina o mataupu faafaamasinoga, latou te taumafai e faaalia lagona faaleuso. Na fautua mai Paulo: “Ia outou tagi foi faatasi ma e ua fetagisi.” (Roma 12:15) Pe a lagona e mamoe e moni lagona alofa o leoleo mamoe mo i latou, e malamalama i o latou vaivaiga, ma tiga alofa atu i tulaga faigata o loo latou fesagai, e masani lava ona sili atu ai ona latou naunau e talia fautuaga, o taiala, ma aoaiga. Latou te naunautai ai e auai i sauniga, i le mautinoa o iina o le a latou maua ai le ‘malologa mo o latou agaga.’—Mataio 11:29.

Le Faaalia o le Loto Talisapaia

9. Ua faapefea ona faaalia e Ieova na te talisapaia ni mea lelei ia i tatou?

⁹ O le auala lona lua e faaolaola ai pea le alofa faaleuso e ala lea i le loto talisapaia. Ina ia talisapaia isi, e tatau ona tatou uaʻi atu ma faatāua o latou uiga lelei ma a latou taumafaiga. Pe a tatou faia faapea, ua tatou faataitai atu ai ia Ieova lava ia. (Efeso 5:1) I aso taitasi o loo ia faamagalo mai ai le tele o a tatou agasala iti. Ua oo foi ina ia faamagalo maia agasala matuia pe afai e iai le salamō moni. Ma o le taimi lava na te faamagalo ai a tatou agasala, e na te lē toe manatuaina lava. (Esekielu 33:14-16) Na fesili le faisalamo: “Ioa e, afai e te mataulia le amio leaga, le Alii e, o ai se na te mafaia ona tulai?” (Salamo 130:3) O mea o loo taulai i ai le silasila a Ieova o mea lelei ia o loo tatou faia i le auauna atu ia te ia.—Eperu 6:10.

10. (a) Aisea e matautia ai mo paaga faaipoipo pe a mou atu le talisapaia e le tasi o le isi? (e) O le ā e tatau ona e faia pe afai ua tau mou atu lou talisapaia o lau paaga?

¹⁰ E tāua faapitoa le mulimuli atu i lenei faaaoaoga i totonu o le aiga. Pe a faaalia e mātua e talisapaia e le tasi le isi i lo laua lava va, ua la faataatia ai se faaaoaoga mo le aiga. I lenei vaitaimi o faaipoipoga lē mautū, ua faigofie ai lava ona manatu māmā i se paaga, ma faamatilatila ona sese ae faagalogalo ona uiga lelei. O na mafaufauga lē lelei e faamalepeina ai se faaipoipoga, e suia ai e avea o se avega e leai se olioli e maua ai. Pe afai ua tau mou atu lou talisapaia o lau paaga, ia fesili ifo ia te oe lava, ‘Pe ua lē o iai moni lava ni uiga lelei o laʻu paaga?’ Seʻi toe manatu i tua i mafuaaga na e matuā alofa ai i ai seia oo ina lua faaipoipo. Pe ua matuā mou atu ea na mafuaaga uma e alofa ai i lenei tagata? E mautinoa e leai; o lea la, ia taumafai malosi e talisapaia uiga lelei o lau paaga, ma ia faaleo atu i upu lou talisapaia.—Faataoto 31:28.

11. Ina ia sao le alofa i le va o le ulugalii mai se uiga pepelo, o ā faiga e tatau ona alofia?

¹¹ E fesoasoani foi le loto talisapaia i paaga faaipoipo ina ia lē iai i lo la alofa le uiga pepelo. (Faatusatusa i le 2 Korinito 6:6; 1 Peteru 1:22.) O lena alofa, ua faaolaolaina e le talisapaia mai le loto, o le a lē faatagaina ai se avanoa mo ni faiga lē alofa pe a na o i laua, e leai ai se avanoa mo ni upu e faatiga ma faamasiasi ai, e leai ai se avanoa mo le alofiaina ma le loto i ai o le isi paaga, lea e alu ai ni aso e lē o tautala atu i se upu agalelei pe faaaloalo, ma e mautinoa foi e leai ai se avanoa mo ni faiga faasauā. (Efeso 5:28, 29) O se tane ma se avā e talisapaia moni e le tasi le isi, e la te faaalia foi le feāvaaʻi. E la te faia faapea e lē gata i luma o tagata ae i so o se taimi la te iai i le silafaga a Ieova—i se isi faaupuga, i taimi uma lava.—Faataoto 5:21.

12. Aisea e tatau ai i mātua ona faaali atu le talisapaia mo mea lelei o loo faia e a latou fanau?

¹² E manaomia foi e fanau se lagona o le talisapaia o i latou. E lē faapea e tatau i mātua ona soona faaviiviia i latou i faaupuga e leai se aogā, ae tatau ona latou faamālō atu i uiga e ono viiviia ai a latou fanau ma mea lelei moni o loo latou faia. Ia manatua le faaaoaoga a Ieova i le faaalia o lona finagalo malie ia Iesu. (Mareko 1:11) Ia manatua foi, le faaaoaoga a Iesu i le avea ma “matai” i se tala faatusa. Sa tutusa lelei lana faamālō atu i ‘auauna lelei ma le faamaoni’ e toalua, e ui lava sa iai se eseesega i mea sa tuuina atu i auauna taitoatasi ma se eseesega i mea na fuaina mai e auauna taitasi. (Mataio 25:20-23; faatusatusa i le Mataio 13:23.) E faapena foi ona sailia e mātua atamamai ni auala e faaali atu ai le loto talisapaia mo uiga tutasi o tamaiti taitoatasi, o latou tomai, ma mea ua latou faataulauina. Ae i le taimi e tasi, la te taumafai ia lē faamamafa naʻuā i mea ua faataulauina ina neʻi uunaia ai pea tamaiti e faia mea e faatavā ai le tasi i le isi. La te lē mananao ia ola aʻe le la fanau o ni tamaiti e lototiga pe lotovaivai.—Efeso 6:4; Kolose 3:21.

13. O ai e taimua i le faaalia o le talisapaia mo sui taitoatasi o le faapotopotoga?

¹³ I totonu o le faapotopotoga Kerisiano, e taimua ai toeaina ma ovasia femalagaai i le faaalia o le talisapaia mo sui taitoatasi o le lafu mamoe a le Atua. E faigata lo latou tulaga, auā o loo latou amoina foi le tiute tauave mamafa o le aoaia i le amiotonu, le faasaʻoina o ē ua sese i le agaga agamalu, ma le ofoina atu o fautuaga malolosi ia i latou o ē manaomia. E faapefea ona latou faapaleniina nei tiute tauave eseese?—Kalatia 6:1; 2 Timoteo 3:16.

14, 15. (a) Na faapefea ona faaalia e Paulo le paleni i le mataupu o le avatuina o fautuaga malolosi? (e) E mafai faapefea e ovasia Kerisiano ona faapaleniina le manaoga ina ia faasaʻo mea sese ma le manaoga ina ia avatu le faamālō? Ia faataitai.

¹⁴ E telē se fesoasoani mai o le faaaoaoga a Paulo. Sa mataina lona avea o se faiaʻoga, se toeaina, ma se leoleo mamoe. Sa tatau ona ia faatautaia faapotopotoga sa iai ni o latou faafitauli ogaoga, ma sa lei faatalatū o ia pe fefe i le avatuina o fautuaga malolosi i taimi na manaomia ai. (2 Korinito 7:8-11) O se vaaiga aotele i le faiva a Paulo e iloa ai sa seāseā soona aoai mamafa atu o ia—seiloga o se tulaga sa tatau ai pe na manaomia ai ona ia faia faapea. I lenei tulaga sa ia faaalia ai le atamai faale-Atua.

¹⁵ Pe afai e faatusatusa atu le faiva a se toeaina i se musika, o le aoai mamafa la ma le otegia o le a pei o se nota e tasi e mafai ona ofi atu i totonu o le musika atoa. O lena nota ua talafeagai lava i lona tulaga o loo iai. (Luka 17:3; 2 Timoteo 4:2) Seʻi faapea la o se pese e na o le pau lava lena o le nota o loo iai, e faifai ai pea lava pea. O le a vave lava ona tiga ai o tatou taliga. I se tulaga talitutusa, e taumafai toeaina Kerisiano e faaleleia la latou aʻoaʻo atu ma faaeseese le avatuina. Latou te lē o faamuta mai i le na o le faasaʻoina o faafitauli. Nai lo lea, o a latou aʻoaʻoga atoa o se mea e faalaeiauina ai. I le pei o Iesu Keriso, ua faapena ona vaavaai muamua toeaina i ni mea lelei e faamālō atu ai, ae lē o mea sese e faitio atu ai. Latou te talisapaia galuega mamafa o loo faia e o latou uso Kerisiano. Ua latou mautinoa i mea uma lava, o loo tele lava ina faia e tagata taitoatasi le mea sili na te mafai ina ia auauna atu ai ia Ieova. Ma e naunau toeaina e faailoa atu i upu na lagona.—Faatusatusa i le 2 Tesalonia 3:4.

16. O le ā le aafiaga na oo i uso Kerisiano o Paulo ona o le uiga talisapaia ma lagona māfana sa ia faaalia?

¹⁶ Ma le lē fesiligia, o le toatele o Kerisiano o ē na auauna atu i ai Paulo sa latou lagona lona talisapaia o i latou ma le iai o ona lagona faaleuso mo i latou. E faapefea ona tatou iloa lenei mea? Tagai foi i o latou lagona na iai mo Paulo. Sa latou lei fefefe ia te ia, e ui lava sa telē le pule na ia te ia. E leai, o ia o sē sa alofagia ma faigofie i tagata ona faalatalata atu i ai. Ioe, ina ua ia tuua se tasi vaipanoa, ‘sa fusi atu toeaina ia te ia ma feasogi ia te ia’! (Galuega 20:17, 37) Maeu le tatau i toeaina—ma i tatou uma—ona loto faafetai ona ua ia i tatou le faaaoaoga a Paulo tatou te faataitai i ai! Ioe, seʻi o tatou faaalia le loto talisapaia o le tasi mo le isi.

O Gaoioiga o le Alofa Agalelei

17. O ā nisi o āuga lelei e maua mai gaoioiga o le agalelei i totonu o le faapotopotoga?

¹⁷ O se tasi o mea e sili ona uigā mo le faaolaolaina o le alofa faaleuso o sina gaoioiga o le agalelei. E pei ona fetalai Iesu, “e sili le manuia o le na te foai atu, i lo le na te talia mai.” (Galuega 20:35) I lo tatou foai atu pe i le itu faaleagaga, le itu faaletino, pe i o tatou taimi ma malosi, o le a lē gata ina tatou faafiafiaina ai isi ae tatou te faafiafiaina ai foi i tatou lava. I totonu o le faapotopotoga, e mafai ona sosolo atu le agalelei ma aafia ai isi. O se gaoioiga agalelei e tasi e iu ai i le faia mai o nisi gaoioiga agalelei faapena. E lē umi lava, ae olaola loa le alofa faaleuso!—Luka 6:38.

18. O le ā le uiga o le “agalelei” lea o loo talanoaina i le Mika 6:8?

¹⁸ Sa uunaia e Ieova ona tagata Isaraelu ina ia faaalia le agalelei. I le Mika 6:8, tatou te faitau i ai: “Sole, ua faaali atu e ia ia te oe le mea lelei; se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa [“agalelei,” NW], ma ia feooai ma lou Atua ma le loto faamaulalo?” O le ā le uiga o le “ia naunau i le agalelei”? O le upu Eperu o loo faaaogā iinei mo le “agalelei” (cheʹsedh) ua faaliliuina foi e le faa-Peretania i le “mercy” (alofa mutimutivale). E tusa ai o le tusi The Soncino Books of the Bible, o lenei upu “ua faaalia mai ai se uiga e galue pe olaola nai lo le upu faa-Peretania mo le alofa mutimuti vale e atagia mai ai na o se manatu. E faauiga faapea ‘o le alofa mutimuti vale ua faatinoina i galuega,’ le faatinoga o gaoioiga o le alofa agalelei a le tagata lava ia, e lē gata i ē matitiva, ae i ona uso a tagata uma.” Ona faapea mai lea o se tasi tagata aʻoga, o le cheʹsedh e faauiga i le “alofa ua faatinoina i gaoioiga.”

19. (a) O ā auala tatou te ono taulamua ai i le faaalia o le agalelei i isi i totonu o le faapotopotoga? (e) Aumai se faaaoaoga o se auala na faaalia atu ai le alofa faaleuso ia te oe.

¹⁹ O lo tatou alofa faaleuso e lē na o se manatu. O se mea moni lava. O lea la, ia vaai mo ni auala e faia ai gaoioiga agalelei mo ou uso ma tuafāfine. Ia e pei o Iesu, o lē sa lei tau ina faatalitali mo tagata e ō mai ia te ia mo se fesoasoani ae sa masani ona taulamua o ia e gaoioi. (Luka 7:12-16) Ia mafaufau faapitoa ia i latou o loo sili ona iai se manaomia. Po o manaomia ea e se tagata matua po o sē o faataotolia i maʻi se asiasi atu i ai pe atonu o se fesoasoani i le faia o ni feau? Po o manaomia e se ‘tamaitiiti matua oti’ sina taimi e faifai mea ai ma ia ma le uaʻi atu i ai? Po o manaomia ea e sē o loto mafatia se tasi e faalogologo atu i ona lagona po o ni upu faamafanafana? A o tatou mafaia ona fai, seʻi o tatou faaavanoa atu se taimi mo na gaoioiga o le agalelei. (Iopu 29:12; 1 Tesalonia 5:14; Iakopo 1:27) Aua lava neʻi galo, i totonu o se faapotopotoga e tumu i tagata lē lelei atoatoa, o se tasi o gaoioiga e sili ona tāua o le agalelei, o le loto faamagalo lea—o le vave ona faamatuu atu le ita, e tusa lava pe o iai se mafuaaga saʻo e faitio ai. (Kolose 3:13) O le nofo sauni e faamagalo e fesoasoani lea ina ia lē mafai ai lava ona oo atu i le faapotopotoga ni fevaevaeaiga, ni feitagaiga, ma ni fefinauaiga, lea ua pei ai o ni tagata latou te tapēina mālie ifo le afi o le alofa faaleuso.

20. E tatau faapefea ia i tatou uma ona iloiloina pea i tatou lava?

²⁰ Tau ina ia tatou filifili uma e faaolaola aʻe pea i totonu o o tatou loto lenei afi tāua o le alofa. Seʻi o tatou iloiloina pea i tatou lava. Po o tatou faaalia ea lagona faaleuso i isi? Po o tatou faaalia ea le loto talisapaia mo isi? Po o tatou faatinoina ea gaoioiga o le agalelei i isi? Pe afai lava tatou te faia faapea, o le a faapena foi ona faamafanafanaina la tatou aufaatasiga o uso e le afi o le alofa, e tusa lava po o le ā le matuā leai o se alofa ma ni lagona māfana ua iai lenei lalolagi. Ioe, “ia tumau lo outou alofa faaleuso”—i le taimi nei e oo i le faavavau!—Eperu 13:1.

[Faaopoopoga i lalo]

O le ā Sou Manatu?

◻ O le ā le alofa faaleuso, ma aisea e tatau ai ona tatou faatumauina pea?

◻ E faapefea i le iai o lagona faaleuso ona fesoasoani ia i tatou e tausisia ai lo tatou alofa faaleuso?

◻ O le ā le matafaioi e faatinoina e le loto talisapaia i le alofa faaleuso?

◻ E faapefea i gaoioiga o le agalelei ona faapogaia ai le lauolaola aʻe o le alofa faaleuso i totonu o le faapotopotoga Kerisiano?

[Ata i le itulau 18]

O uiga fiafia ma le talisapaia o le aposetolo o Paulo sa faigofie ai e tagata ona faalatalata atu i ai