Ia E Iloa le Auala e Fai Atu ai se Tali

O NISI fesili e tai pei lava o ni papatū. E lē iloa atu le vaega e aupito i sili ona tāua o loo natia i totonu. O le mataupu la lea e lē o iloa atu e masani ona sili atu lona tāua na i lo le fesili.

E tusa lava pe o loo naunau mai le tagata o loo fesili mai i se tali, o lou iloaina o le auala e fai atu ai se tali e ono aofia ai le iloa po o le ā le tele o mea e ao ona taʻu atu ma le vaega o le mataupu e ao ona e talanoa i ai. (Ioa. 16:12) I nisi tulaga, e pei lava ona faailoa atu e Iesu i ona aposetolo, e ono fesili mai se tagata i faamatalaga e lē tatau ona ia iloaina, ia pe e matuā lē aogā lava iā te ia.—Galu. 1:6, 7.

Ua fautuaina i tatou e le Tusi Paia e faapea: “Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taitoatasi uma.” (Kolo. 4:6) O lona uiga la, a o tatou leʻi fai atu se tali, e manaʻomia ona iloilo e lē gata po o le ā o le a fai atu ai ae o le ā le auala e fai atu ai.

Ia Malamalama i Manatu o Lē o Loo Fesili Mai

Sa taumafai le ʻau Satukaio e maileia Iesu i se fesili e faatatau i le toetū mai o se fafine o lē e tele taimi sa faaipoipo ai. Peitaʻi, sa silafia e Iesu o le mea moni lava sa latou lē talitonu i le toetū. I lana tali atu la, sa ia tali atu i la latou fesili i se auala na taulimaina ai le manatu lē saʻo lea sa avea ma māfuaaga iloagatā o lenā fesili. I le faaaogāina o fefulisaʻiga saunia lelei atoa ai ma se faamatalaga faale-Tusi Paia ua masani ai, na taʻua ai e Iesu se mea latou te leʻi manatunatu muamua lava i ai—o faamaoniga manino e faapea o le a toe faatutūina moni lava e le Atua ē ua maliliu. O lana tali sa matuā maofa ai ē na tetee iā te ia ma na iʻu ina latou fefefe e toe fesili atu iā te ia.—Luka 20:27-40.

Ina ia e iloa le auala e fai atu ai se tali, e ao foʻi ona e malamalama faapena i le vaaiga ma manatu o ē o fesili mai. Mo se faaaʻoaʻoga, e ono fesili atu se tasi o lau vasega i le aʻoga po o se tasi lua te faigaluega faatasi, po o le ā le māfuaaga e te lē faamanatuina ai le Kirisimasi. Aiseā ua ia fesili ai? Pe o ia fia iloa moni lava le māfuaaga, pe na ona ia tau mānatu pe faataga oe e te auai i ni faafiafiaga? Ina ia iloa lenā mea, e ono manaʻomia ona e fesili pe aiseā ua māfua ai le fesili. Ia ona avatu tonu lava lea o le tali talafeagai. E te ono mafai foʻi ona faaaogā le avanoa e faaali atu ai e faapea, o le mulimuli i taʻiala a le Tusi Paia e puipuia ai i tatou mai i vala o aso mālōlō na o loo faapogaia ai le lē fiafia ma avea ma avega mamafa i tagata.

Seʻi faapea ua valaaulia oe e te talanoa atu i se vaega o ni tagata aʻoga e faatatau i Molimau a Ieova. Ina ua uma lau tautalaga, latou te ono fai mai ni fesili. Afai e foliga mai e moni ma tuusaʻo le faiga o fesili, e sili ona lelei le avatu o tali e faigofie ma tuusaʻo. Afai e aliali mai i fesili ni uiga faailoga tagata o se vaipanoa, atonu e lelei ona e faatomua atu au tali i ni manatu puupuu e faatatau i ni mea e ono māfua ai ni manatu masani i na mataupu, ma le pogai ua filifili ai Molimau a Ieova e faatulaga mai e le Tusi Paia tapulaa mo i latou. O le tele lava o taimi, e aogā le manatu i fesili faapena o ni mataupu o loo manatu mamafa i ai, ae e lē o se faatavā mai—e ui lava atonu o le auala lenā o loo fai mai ai. O lau tali atu la, e te maua ai le avanoa e faalautele ai le manatu o lau aofia, e avatu ai iā i latou faamatalaga saʻo, ma faamatala atu ai le faavae faale-Tusi Paia o o tatou talitonuga.

O le a faapefea ona e tali atu i se pule i le galuega o lē e lē manaʻo e faataga oe e mālōlō mai le galuega ina ia e auai atu ai i se tauaofiaga? Muamua, ia manatu i mea mai i lana vaaiga. Faamata e fesoasoani pe a e ofo atu e te galue ovataimi i nisi taimi? Faamata e iai se eseesega pe a e faamatala i ai e faapea, o faatonuga e maua i a tatou tauaofiaga e fesoasoani iā i tatou ina ia faamaoni, ma avea ai ma tagata faigaluega maufaatuatuaina? Afai e te faailoa atu o loo e manatu mamafa i mea o loo ia naunau i ai, atonu o le a ia amanaʻiaina foʻi la mea e na te iloa o loo tāua i lou olaga. Ae faapefea pe afai o le a manaʻo le pule e te faia se gaoioiga e lē faamaoni? O le faamanino atu e te teena ma avatu se manatu mai i le Tusi Paia e lagolago ai, o le a matuā faamanino atu ai lou tulaga. Peitaʻi, faamata e lē sili ai ona lelei pe a muamua ona e faamatala atu i ai e faapea, o le tagata e mafai ona pepelo pe gaoi mo ia, e ono mafai foʻi ona pepelo iā te ia pe gaoi mai iā te ia?

I le isi itu, atonu o oe o se tagata aʻoga e te lē manaʻo e auai i ni gaoioiga e lē faale-Tusi Paia i le aʻoga. Ia manatua, atonu e lē silafia e le faiaʻoga ou manatu, ma o lana matafaioi le puleaina lelei o le vasega. O luʻitau la ua fesagaʻi ma oe o le (1) ia uaʻi atu i mea e manatu mamafa i ai le faiaʻoga, (2) ia faamatala atu ma le faaaloalo lou tulaga, ma le (3) ia maumauaʻi i mea ua e iloa e fiafia i ai Ieova. Ina ia maua ni iʻuga e sili ona lelei, e tele mea e manaʻomia na i lo le na ona fai atu o se faamatalaga puupuu ma le tuusaʻo i mea e te talitonu i ai. (Faata. 15:28) Afai e te laʻitiiti, e mautinoa o le a fesoasoani atu lou tamā po o lou tinā iā te oe i le saunia o se faamatalaga e fai atu.

I nisi taimi, atonu e manaʻomia ona e faamaonia le sesē o ni tuuaʻiga ua faia iā te oe e se tasi o loo i tulaga o pulega. E ono manaʻomia mai oe e se leoleo, se tagata faigaluega sinia a le malo, ia po o se faamasino e tali atu ni fesili e faatatau i le usiusitai i se tulafono, lou tulaga i le solitū faa-Kerisiano, ia po o lou manatu i le auai i le faasalalauina o nisi o faiga faalotonuu. O le a faapefea ona e tali atu? Ua fautua mai le Tusi Paia: “Ma le agamalu ma le ava.” (1 Pete. 3:15, LF) E lē gata i lenā, ia fesili ifo iā te oe lava i le māfuaaga e faatāuaina ai nei mataupu, ma ia faailoa atu ma le faaaloalo lou amanaʻiaina o lenā faatāuaina. Ona ā lea? Sa faasino atu le aposetolo o Paulo i faamaoniga a le tulafono a Roma, o lea la e mafai ona e taʻua ni faamaoniga faaletulafono e faatatau mai i lou tulaga. (Galu. 22:25-29) Atonu o ni mea moni e faatatau i le tulaga na uia e uluaʻi Kerisiano ma uia e Molimau a Ieova i le lalolagi atoa o le a faalautele ai le vaaiga a le sui o le malo. Ia pe e te ono taʻua foʻi le auala ua uunaʻia ai tagata ina ia usiusitai e lē aunoa i tulafono talafeagai a tagata, pe a amanaʻia le pule a le Atua. (Roma 13:1-14) O se faamatalaga auʻiliʻili faapena, e ono talileleia ai se faamatalaga o ni māfuaaga faale-Tusi Paia mo lou tulaga.

O Manatu o Lē o Loo Fesili Mai e Uiga i le Tusi Paia

Pe a filifili le auala e tali atu ai, e ono manaʻomia foʻi ona e iloiloina manatu e uiga i le Tusi Paia a lē o loo fesiligiaina oe. Na fai e Iesu le mea lenā ina ua ia taliina le fesili a le ʻau Satukaio e faatatau i le toetū. I lona silafiaina e na o tusitusiga lava a Mose latou te taliaina, sa talanoa atu ai Iesu i se manatu o loo maua i le Penetatuka, ma faatulaga lana faamatalaga i le faapea atu: “A o le faatuina o e ua oti, ua faailoa mai lea mea e Mose.” (Luka 20:37) Atonu o le a faapena foʻi ona sili ona lelei lou sii mai o ni vaega o le Tusi Paia e talia e lau tagata faalogologo ma e masani ai.

E faapefea pe afai e lē manatu lau tagata faalogologo i le Tusi Paia faapea o se tusi e fua i ai ni faaiʻuga? Mātau le mea na fai e le aposetolo o Paulo i lana lauga i Areopako, e pei ona faamauina i le Galuega 17:22-31. Sa ia taʻu atu upu moni mai le Tusi Paia e aunoa ma lona siiina saʻo mai i le Tusi Paia. Pe a talafeagai, e mafai foʻi ona e faia le mea lava lenā. I nisi nofoaga e ono manaʻomia ona fai ni nai lua talanoaga ma se tagata a o e leʻi sii saʻo maia ni faamatalaga mai i le Tusi Paia. Pe afai o le a e faaaogā le Tusi Paia, atonu e atamai le avatu muamua o ni nai māfuaaga e lelei ai le iloiloina o le Tusi Paia na i lo le maumauaʻi e faapea atu o le Afioga a le Atua. Ae ia manatua, e ao ona avea ma ou sini, le avatu o se molimau manino e faatatau i fuafuaga a le Atua ma, i se taimi mulimuli ane, ia iloa e lau tagata faalogologo lava ia le mea o fai mai ai le Tusi Paia. E sili atu ona lelei le faatalitonuina e le Tusi Paia na i lo so o se mea tatou te fai atu ai i tatou lava.—Epe. 4:12.

‘Ia le Aunoa ma le Alofa’

Maʻeu le talafeagai i auauna a Ieova, o ia lava o lē e alofa, ona faalaeiauina la latou tautala ina ia “le aunoa . . . ma le alofa, ia faamāi i le masima”! (Kolo. 4:6; Eso. 34:6) O lona uiga o lenei mea e manaʻomia ona tatou tautatala ma le agalelei, e tusa lava pe atonu e lē talafeagai ma le tulaga. E ao lava ona logolelei la tatou tautala, ae lē o le soona fai e aunoa ma le utaga mamao.

E toʻatele tagata o loo fesagaʻi ma le tele o omiga, ma o loo latou fetaiaʻi i aso taʻitasi ma faamatalaga e faaleagaina ai. Pe a tatou asiasi atu i tagata faapena, latou te ono soona tautatala mai. E tatau faapefea ona tatou tali atu? Ua faapea mai le Tusi Paia: “O le tali filemu e liliueseina ai le ita.” O ituaiga tali faapena e mafai foʻi ona faatoʻafilemu ai se tagata e iai sona manatu tetee mai. (Faata. 15:1; 25:15) O tagata e feagai ma faiga soona fai i aso uma, e mafai ona logolelei iā i latou se uiga ma se leo e faaali atu ai le agalelei ma latou ono faalogo mai ai i le tala lelei o loo tatou avatu.

Tatou te lē mananaʻo e finau ma i latou e lē faaalia le faaaloalo mo le upu moni. Na i lo lenā, o lo tatou faanaunauga ia fefulisaʻi mai i le Tusi Paia ma tagata o ē o le a latou faataga mai i tatou e faia faapea. Po o le ā lava le tulaga tatou te fetaiaʻi, ae teu i o tatou manatu e tatau ona tatou tali atu ma le agalelei ma le maumauaʻi e faapea, o folafolaga tautele a le Atua e maufaatuatuaina.—1 Tesa. 1:5.

O Filifiliga Totino ma Mataupu e Fua i le Lotofuatiaifo

Pe a fesili mai se tagata suʻesuʻe o le Tusi Paia po o se aumea talitonu po o le ā lana mea e tatau ona fai i se tulaga patino, e tatau faapefea ona e tali atu? Atonu ua e iloa le mea e te faia. Peitaʻi e taʻitoʻatasi le tagata lava ia ma tauave lana lava matafaioi i ana lava filifiliga i le olaga. (Kala. 6:5) Sa faamatala e le aposetolo o Paulo e faapea, sa ia faalaeiauina le “usiusitai i le faatuatua” i tagata sa ia talaʻi atu i ai. (Roma 16:26) O se faataʻitaʻiga lelei lenā mo i tatou e mulimuli ai. O se tagata e faia ana filifiliga e tau lava ina ia faafiafia ai lona faiaʻoga o le Tusi Paia po o se isi tagata, o loo ia auauna i tagata, e lē o ola i le faatuatua. (Kala. 1:10) O lea la, atonu o se tali faigofie ma tuusaʻo, o le a leai se aogā e maua ai mo lē o loo fesili mai.

E faapefea la ona e tali atu i se uiga e tutusa ma taʻiala a le Tusi Paia? E te ono tataʻi atu manatu i ni mataupu silisili talafeagai o le Tusi Paia ma ni faaaʻoaʻoga o loo iai i faamaumauga a le Tusi Paia. I nisi tulaga, e te ono faasino i ai le auala e fai ai suʻesuʻega loloto ina ia ona maua ai lava e ia na mataupu silisili ma faaaʻoaʻoga. E ono mafai foʻi ona e talanoaina mataupu silisili ma aogā o faaaʻoaʻoga, ae e aunoa ma le faatatauina i le tulaga o loo talanoaina i le taimi lea. Fesili i le tagata pe o ia iloaina ai se mea o le a fesoasoani iā te ia e fai se filifiliga atamai. Faalaeiau o ia ina ia iloilo i le malamalamaga o nei mataupu silisili ma faaaʻoaʻoga, po o le ā le auala e fiafia i ai Ieova. O lenā la ua e fesoasoani i ai ina ia ‘toleni lona tomai faalemafaufau e tuueseese le mea saʻo mai le mea sesē’—Epe. 5:14, NW.

Le Faia o Tali i Sauniga a le Faapotopotoga

E masani ona tatou maua avanoa i sauniga a le faapotopotoga Kerisiano e faailoa atu ai i luma o le lautele lo tatou faatuatua. O se tasi o auala e tatou te faia ai le mea lenā o le fai lea o se manatu e tali atu ai i fesili. E tatau faapefea ona faia a tatou tali? Ia fai ma le manatu e vivii, pe tautala lelei ai e faatatau iā Ieova. O le mea lenā sa fai e le faisalamo o Tavita pe a iai “i totonu o faapotopotoga.” (Sala. 26:12) E ao foʻi ona avatu ni a tatou tali i se uiga e faalaeiauina ai aumea talitonu, ma taufaatupu ai iā i latou “le alofa ma galuega lelei,” e pei ona timaʻi mai le aposetolo o Paulo. (Epe. 10:23-25) O le muaʻi suʻesuʻeina muamua o lesona o le a fesoasoani iā i tatou i le faia o le mea lenei.

Pe a valaaulia oe e fai sau tali, ia faafaigofie ou manatu, ia manino, ma faapuupuu. Aua le faaaofiaina le palakalafa atoa; talanoa tau o le manatu e tasi. Afai e te avatu na o se vaega o le tali, o le a maua ai e isi le avanoa e avatu ai nisi manatu faaopoopo. E faapitoa lava le aogā pe a faamatilatila mau o loo faasino mai i le mataupu. Pe a faia faapea, taumafai malosi e tataʻi atu manatu i le vaega o le mau lenā e faatatau atu i ai le mataupu o loo talanoaina. Faamasani e tali atu i au lava upu na i lo le faitau saʻo mai i le palakalafa. Aua e te lē mautonu pe afai e lē saʻo le faaupuina o lau tali. E masani ona tupu le mea lenā i tagata uma lava e fai a latou tali.

E manino mai o le iloaina o le auala e tatau ona tatou tali atu ai, e aofia ai le tele o mea na i lo le iloaina o le tali lava ia. E aofia ai le faautauta. Peitaʻi maʻeu le faamalieina ai pe a e avatu se tali e sau mai i lou loto ma e pāʻia ai loto o isi!—Faata. 15:23.