Taulimaga e Lē Faavaea i le Upu i le Upu

E TE ono galue mamafa i lau lauga. Atonu ua iā te oe ni faamatalaga fou e tufaina atu. Atonu ua lelei ona faatulaga saʻo. Atonu o le ā sologa lelei ona e taulimaina. Peitaʻi afai e lē o atoatoa le uaʻi mai a lau aofia—e na o ni vaega la o mea o e fai atu ai o loo latou faalogo mai i ai, ona o loo fai ma alu o latou mafaufau i isi mea—o faapeʻī le uigā o lau taulimaga? Afai o faafaigatā ona uaʻi mai o latou mafaufau i le lauga, faamata e ono mafai ona e pāʻia o latou loto?

O le ā e ono avea ma pogai autū o se faafitauli faapena? E tele mea e ono faapogaia ai. O le tulaga masani lava, ona ua tauaaoina le lauga i se taulimaga e faavae i le upu i le upu. I nisi faaupuga, ua autilo soo le failauga i ana faamaumauga, ia po ua soona faamamapo naʻuā le auala o fai ai lana taulimaga. Peitaʻi, o nei faafitauli, e fesootaʻi tuusaʻo lava i le auala na sauniunia ai le lauga.

Afai e te tusia lau lauga i le taimi muamua lava ona taumafai lea e faaaogā ia pei o se auivi, e lē taumatea o le a e mātauina le faigatā ona tauaaoina upu i le upu. Aiseā? Ona ua uma ona e filifilia upu tonu lava o loo e fuafua e faaaogā. E tusa lava pe e te faaaogā le auivi mo le tauaaoina atu, o le a e taumafai lava e manatua upu sa e faaaogāina ia sa e tusia muamua. Pe afai e tusia se mea, o le a sili atu ona aloaʻia le gagana ma o le a sili foʻi ona lavelave le faatulagaina o fuaiupu na i lo le gagana e faaaogā i aso faisoo. O le a atagia atu lenā mea i lau taulimaga.

Na i lo le tusia auʻiliʻili o le lauga, faataʻitaʻi le faatulagaga o loo mulimuli mai: (1) Fili se matua ma vaega autū o le mataupu o le a e faaaogā i le atiina aʻe o lenā mataupu. Mo se lauga puupuu, atonu ua lava manatu autū se lua. O se lauga umi e ono fā pe lima manatu autū. (2) I lalo ifo o manatu autū taʻitasi, ia faamau ai mau autū faale-Tusi Paia o loo e fuafua e faaaogā i le atiina aʻe o manatu autū; e lē gata i lenā ia faailoa mai au tala faatusa ma faamatalaga tāua. (3) Ia mafaufau i le auala o le a e faatomua atu ai le lauga. E te ono tusia se fuaiupu se tasi pe lua. E lē gata i lenā, ia faatulaga au upu faaiʻu.

E tāua tele sauniuniga mo le taulimaga. Ae aua e te autaluina le lauga upu i le upu ma le faanaunauga ina ia e taulotoina. I le tautala atu e lē faavaea i le upu i le upu, e ao i sauniuniga mo le taulimaga ona ave le faamamafa, e lē i upu, ae o manatu o le a faamatalaina. E ao ona autaluina manatu seʻia oo ina fesootaʻi faatasi i lou mafaufau. Afai e saʻo lelei ona ati aʻe le faatulagaina o lau lauga ma fuafua lelei, o le a lē faigatā la ona fai lenei mea, ma o le a faigofie le oso mai o manatu e pei ona masani ai a o fai lau taulimaga.

Ia Manatunatu i Aogā. O se mea e lelei ai le taulimaga e lē faavaea i le upu i le upu, o le a mafai ai ona e tautala atu i se uiga e masani ai le toʻatele, lea e ono faigofie ona tali mai i ai tagata. O le a sili atu ona ola lau taulimaga ma logolelei i lau aofia.

O le auala lenei o le tautala e mafai ai ona maua sina fesootaʻiga ma lau ʻaufaalogologo e ala i lau vaai, lea o le a faaleleia ai lau fesootaʻi atu iā i latou. Talu ai e te lē faalagolago i faamaumauga mo le faaupuina o fuaiupu uma, o le a sili atu la ona manatu lau ʻaufaalogologo e faapea ua e iloa lelei lau mataupu ma ua e matuā talitonuina mea o loo e fai atu ai. O lea la, o le ituaiga taulimaga faapenei e sau mai le loto e ono mafai ona pāʻia ai loto o le ʻaufaalogologo.

O le taulimaga e lē faavaea i le upu i le upu, e mafai ai foʻi ona faia i ai fetuutuunaʻiga. E lē o maumaututū lava le faatulagaina o mataupu e faapea e lē mafai ona fai i ai ni fetuutuunaʻiga. Seʻi faapea i le amataga o le aso lea e fai ai lau lauga, ua lipotia mai ai se tala matilatila lea e fesootaʻi tuusaʻo lava i lau mataupu. Pe o le a lē talafeagai ea ona faasino atu i ai? Ia pe atonu foʻi a o e lauga atu, ua e mātauina ai e toʻatele tamaiti aʻoga o loo iai i le aofia. Maʻeu le lelei o le a iai pe a fetuunaʻi au talafaatusa faapena ma le faatatauga o le manatu, ina ia fesoasoani ai iā i latou ia talisapaia le auala e aafia ai o latou olaga i le mataupu!

O le tasi mea e lelei ai le taulimaga e lē faavaea i le upu i le upu, o le uunaʻiga lea i lou lava mafaufau. Pe afai e talisapaia ma sagisagi mai lau aofia, o le a oo ina e aasa ai foʻi ma oe ma faalautele atu ai le talanoaina o manatu po o le faaalu foʻi o le taimi e toe taʻua ai nisi manatu mo faamamafaga. Afai e te mātauina ua fāi atu le fiafia o le aofia, e mafai ona e faia laasaga ina ia faaleleia ai le faafitauli na i lo le talanoa atu lava i tagata e ese le mea o loo iai o latou mafaufau.

Ia ʻAlofia Lamatiaga. E ao foʻi ona e malamalama e iai lamatiaga o le taulimaga e lē faavaea i le upu i le upu. O se tasi o nei lamatiaga o le ono ova lea o le taimi. Afai o le a tele manatu e te faaopoopo atu a o fai le lauga, e ono avea le taimi ma faafitauli. E mafai ona e faafetaiaʻia lenei faafitauli e ala i le tusia i lau auivi le taimi e talanoaina ai vaega taʻitasi o le lauga. A uma, ona tausisi lelei lea i lau faasologa lenā.

O le isi lamatiaga, aemaise lava failauga ua iai le poto masani, o le mautinoa naʻuā. Ona ua masani e lauga i le lautele, e ono lē faigatā ai i nisi ona taaofaʻi faatasi nisi o manatu ma faatumu ai le taimi faatagaina. Peitaʻi o le lotomaulalo atoa ma le talisapaia o le mea moni e faapea o loo tatou auai i se polokalame tau aʻoaʻoga lea o loo avea ai Ieova ma Aʻoaʻo Sili, e ao ona uunaʻia ai i tatou e manatu i tofiga taʻitasi faatasi ai ma le tatalo naunautaʻi ma ia sauniuni lelei.—Isa. 30:20; Roma 12:6-8.

Atonu o le popolega tele lava i le tele o failauga e leai se poto masani i le taulimaga e lē faavaea i upu i le upu, o le manatu faapea e galo iā i latou mea latou te mananaʻo e fai atu ai. Aua neʻi avea le ono tupu o lenei mea e faapogaia ai oe e taofia ai mai i le uia o lenei laasaga auiluma i le tautala atu ma le uigā. Ia sauniuni lelei, ma taulaʻi atu iā Ieova mo le fesoasoani a lona agaga.—Ioa. 14:26.

O nisi failauga, ona o le soona popole i upu e faaaogā, ua taofia ai i latou mai le faia o se lauga e lē faavaea i le upu i le upu. E moni, o se lauga e lē faavaea i le upu i le upu atonu e lē filifilia lelei upu ma saʻo le kalama e pei ona iai i se lauga manusikulipi, peitaʻi o se faiga faatalanoa e faatosina atu i ai o le a sili atu ona lelei lenā, e ui lava e leʻi filifilia lelei upu ma saʻo le kalama. E faigofie ona nofo sauni tagata e tali atu i manatu e tauaaoina mai i upu e faigofie ona latou malamalama i ai ma i fuaiupu e lē lavelave. Afai e te sauniuni lelei, o le a faigofie lava ona oso mai faamatalaga talafeagai, e lē faapea ona ua e taulotoina, ae ona ua lava le taimi na e autaluina ai manatu. Afai foʻi e lelei lau tautala i talanoaga i aso faisoo, o le a faigofie foʻi ona e faia faapea a o e i le pulelaa.

O Ituaiga Faamaumauga e Faaaogā. I se taimi mulimuli ane ma ua uma foʻi ona fai ma faataʻitaʻi, e te ono mafai ona faaitiitia lau auivi ia tau lava o ni nai upu itiiti mo manatu taʻitasi o lau lauga. E faatasi ai ma le tusia o mau ua e fuafua e faaaogā, e ono tusia uma nei manatu i se pepa malō po o se pepa e faigofie ona e vaai i ai. Mo le faiva i le fanua, o le tele lava o taimi o le a faigofie ona tauloto se auivi faigofie. Afai sa fai ni au saʻiliʻiliga loloto i se mataupu mo se toe asiga, e te ono tusia ni faamaumauga itiiti i se fasi pepa ona tuu lea i totonu o lau Tusi Paia. Ia po o lou faaaogāina foʻi o se auivi mai i le “Mataupu o le Tusi Paia mo Talanoaga” ia po o faamatalaga o loo maua i le Reasoning From the Scriptures e avea ma faavae o lau talanoaga.

Peitaʻi, afai ua tofia oe e taulimaina ni vaega i sauniga e sosoo vaiaso ma atonu foʻi e aofia ai ma le faia o se lauga i le lautele, atonu o le a e mātauina e manaʻomia ni faamaumauga se tele. Aiseā? Ina ia faamanatu mai ai i lou mafaufau le mataupu a o leʻi taulimaina na tofiga taʻitasi. Ae e oo lava foʻi i le faia faapea, afai e te faalagolago tele i faamaumauga mo faaupuga a o fai lau taulimaga—autilo i ai i le toetoe lava i fuaiupu uma—o le a e misia aogā lea e mātaulia ai le taulimaga e lē faavaea i le upu i le upu. Afai e tele naʻuā faamaumauga e te faaaogāina, ia faailoga ina ia mafai ai ona e tagaʻi saʻo lava tau o ni nai upu na ua e faailogaina atoa ai ma mau sii o loo aofia ai i lau auivi.

E ui lava o le taulimaga o se lauga a se failauga ua iai le poto masani e tele lava ina tauaaoina i se taulimaga e lē faavaea i le upu i le upu, e iai foʻi tulaga lelei e faaaofia ai isi ituaiga taulimaga. I le faatomuaga atoa ai ma upu faaiʻu, lea e manaʻomia ai ona faaopoopo atu i fesootaʻiga lelei ma le aofia ia faamatalaga malolosi ua saunia ma le faaeteete, atonu e aogā ni nai fuaiupu ua taulotoina. I taimi e faaaogā ai ni faamatalaga o mea moni, o ni fuainumera, o ni manatu sii, po o ni mau, e talafeagai la ona faitau ma e mafai ona matuā faamamafa ai se manatu.

Pe a Manaʻomia Mai e Isi se Faamalamalamaga. E iai taimi e valaaulia ai i tatou e faamalamalama o tatou talitonuga e aunoa ma se avanoa e muaʻi fai ai ni sauniuniga. E ono tupu le mea lenei pe a lāgā mai e se tasi tatou te feiloaʻi i le fanua se teteega. E ono tutupu foʻi tulaga faapena pe a faatasi ma tauaiga, i le mea e faigaluega ai, po o le aʻoga. E ono manaʻomia mai e ni sui o le malo ni faamalamalamaga o o tatou talitonuga ma le auala o loo tatou ola ai. Ua timaʻi mai le Tusi Paia e faapea: “Ia saunia [pea] lava outou e tali atu ma le agamalu ma le ava ia i latou uma o e fesili mai ia te outou i le uiga o le faamoemoe o loo ia te outou.”—1 Pete. 3:15.

Mātau le auala na tali atu ai Peteru ma Ioane i le ʻau Saniterini Iutaia, e pei ona faamauina i le Galuega 4:19, 20. E na o le lua lava fuaiupu, na la faamanino lelei ai lo la tulaga. Sa la faia i se auala lea sa talafeagai mo le la aofia—i le faasino atu e faapea o le mataupu e pei ona feagai ma le ʻauaposetolo sa feagai foʻi ma le faamasinoga. Mulimuli ane, na tuu atu ai ni tuuaʻiga sesē iā Setefano, ma na avatu o ia i luma o le faamasinoga lava lenā e tasi. Ia faitau i lana tali atu ma le malosi e leʻi sauniunia i le Galuega 7:2-53. Sa faapefea ona ia faamaopoopoina ana faamatalaga? Sa ia faamatalaina mea tutupu i le faasologa na tutupu ai i le talafaasolopito. Ina ua oo i se vaega talafeagai, ona amata loa lea ona ia faamamafaina le agaga fouvale na faaalia e le nuu o Isaraelu. I le faaiʻuga, sa ia faaalia ai e faapea sa faaalia foʻi e le ʻau Saniterini le agaga lava lea e tasi e ala i le fasiotia o le Alo o le Atua.

Pe afai e valaaulia oe e fai se faamalamalamaga e leʻi saunia o ou talitonuga, o le ā e mafai ona fesoasoani iā te oe ina ia uigā ai au tali? Ia faaaʻoaʻo iā Neemia, o lē na tatalo lē leoa a o leʻi tali atu i le fesili na lāgā mai e le tupu o Aretaseta. (Nee. 2:4) A uma lenā, ia faatulaga vave se auivi i le mafaufau. E ono faatulagaina faapenei laasaga e faavae ai: (1) Ia filifili se manatu se tasi pe lua lea o le a aofia i le faamalamalamaga (e te ono filifili e faaaogā manatu o loo maua i le Mataupu o le Tusi Paia mo Talanoaga). (2) Ia filifili po o ā mau o le a e faaaogā e lagolago ai manatu na. (3) Ia fuafua ma le faautauta le auala e amata ai lau faamalamalamaga ina ia naunau ai lē o loo fesili e faalogo mai. Ona amata loa lea ona e tautala atu.

I lalo o omiga, pe o le a e manatua le mea e fai? Na taʻu atu e Iesu i ona soo e faapea: “Aua tou te popole pe faapefea, pe se a foi tou te fai atu ai; auā e foaiina mai ia te outou i lea lava itu aso se upu tou te fai atu ai. Auā e le o outou e tautala atu ai, a o le Agaga o lo outou Tamā e tautala mai ai i totonu ia te outou.” (Mata. 10:19, 20) E lē o le uiga o lenei mea faapea o le a e maua le “upu o le poto” lea sa tuuina atu i Kerisiano i le uluaʻi senituri. (1 Kori. 12:8) Peitaʻi afai e te faaavanoa atu e lē aunoa oe i le aʻoaʻoga lea ua saunia mai e Ieova mo ana auauna i le faapotopotoga Kerisiano, o le a aumaia e le agaga paia faamatalaga manaʻomia i lou mafaufau pe a manaʻomia.—Isa. 50:4.

E aunoa ma se masalosalo, e mafai ona matuā uigā lava le taulimaga e lē faavaea i le upu i le upu. Afai e te faataʻitaʻia e lē aunoa pe a tauaaoina tofiga i le faapotopotoga, o le a lē faigatā la ona avatu ni tali e leʻi sauniunia pe a oo ina manaʻomia, auā o le ituaiga auivi lava e tasi e manaʻomia ai. Aua le faatalatū. O le faamasani e tautala atu i se taulimaga e lē faavaea i le upu i le upu, o le a fesoasoani iā te oe ina ia matuā uigā ai i lau auaunaga i le fanua. Ae afai e te maua le faaeaga e tauaaoina ai lauga i le faapotopotoga, o le a ono mafai ona e faatumauina le uaʻi mai o le aofia ma pāʻia o latou loto.