Ua Fesili Mai Talavou . . .

E Mafai Faapefea Ona Ou Onosaʻia le Fāifaia o Aʻu?

O TALAVOU e ese le auala e laʻei ma amio ai mai a latou aumea e ono avea ma ē e fai i ai fāifaiga faatigā. E moni lenei mea i talavou Kerisiano, o ē masani ona matuā ese lava a latou amio mai isi talavou. Pe sa leʻi fetalai mai ea Keriso e faatatau i ona soo moni: “Afai ua latou faasaua mai ia te au, e faasaua foi ia te outou.”?—Ioane 15:20.

E faapefea ona aafia talavou Molimau a Ieova i lenei mea? O nisi o i latou ua tauemua ona o le lē faamanatuina o nisi o aso mālōlō; ma ua faitioina isi ona o le lē faʻalo i le fuʻa. O se fuainumera tele o i latou ua oo i ai faiga faasoesa ona o le lē tagofiaina o fuālaau faasāina, le faaalia o le faamaoni, ma le tausisia o tapulaa tau amio tatau a le Tusi Paia.

E lē fou lenei tulaga. O le mea moni na taʻu atu e le aposetolo o Peteru i Kerisiano na soifua ai i le uluaʻi senituri: “O le mea lea e ofo ai ma faifai ai i latou, auā tou te le taufetuli ma [tagata o nuu ese].” (1 Peteru 4:4) Ua faaupuina e isi faaliliuga e faapea, latou te “faaigoa ia te outou i igoa fāifai” (Knox) po o le, “Latou te faamaasiasiina outou.”—Today’s English Version.

Po ua tauemua ea oe ona o ou talitonuga faalelotu? Pe afai ua tupu lena mea, ia e lototele. E toʻatele foi isi ua tauemua ona o la latou talitonuga faaletapuaiga! Ma o le a e fiafia e iloaina faapea e mafai ona e aʻoaʻoina le auala e onosaʻia ai ni lagona lē lelei mai fāifaiga ona o lou faatuatua.

Aisea Latou te Tauemu Ai

Aisea e ulagia ai e isi i latou o ē e ese mai o latou talitonuga ma amioga mai ia i latou? O nisi taimi o tagata tauemu—e tai pei o ē e fia pule ma le malosi i isi—e lē mautonu. E latou te ono fāifaia oe ona o le fia viiviia i luma o a latou aumea. Atonu pe a tuua na o i latou, e toʻaitiiti lava nisi o na tagata fia malolosi o le a oso aʻe se naunau—pe maua le lototele—e faitioina oe faalauaʻitele.

I le isi itu, o nisi tagata tauemu e ‘maofa’ e pei ona tusi ai Peteru. Ioe, latou te ono ofo moni lava i le auala o e amio ai. Mo se faaaʻoaʻoga, pe afai o oe o se Molimau a Ieova, latou te ono mafaufau moni faapea e uigaese lou lē auai i mea e fesootaʻi atu ma nisi o aso mālōlō. Latou te ono maua foi ni faamatalaga ua mimilosesēina e faatatau i Molimau mai ē tetee ma le maumauaʻi.

Po o le ā lava le pogai, ae pe a osofaʻia oe i ni faaupuga taufāifai, atonu o le a e ioe faatasi ma le faataoto o le Tusi Paia: “O i ai lē soona tautala, e pei o tutuʻi i le pelu.” (Faataoto 12:18) Ae ia manatua o i latou o ē tautatala faapena atonu latou te lē o faia ona o se lē fiafia ia te oe o se tagata. E foliga o loo latou faia tonu lava le mea o loo fai mai ai le faataoto o le Tusi Paia—o le “soona tautala.”

Peitaʻi, o le tauemua e mafai ona tigā ai, e pei lava o se manuʻa i se tutui. Atonu e te lagona le tofotofoina o oe ina ia e lafoaʻia lou faatuatua e taofia ai le tele o tala e faalumaina ai. O lea, e mafai faapefea ona e onosaʻia le fāifaia o oe ona o ou talitonuga?

Fai Atu se Tali

Na apoapoaʻi atu le aposetolo o Peteru i Kerisiano e faapea: “Ia saunia pea lava outou e tali atu ma le agamalu ma le ava ia i latou uma o e fesili mai ia te outou i le uiga o le faamoemoe o loo ia te outou.” (1 Peteru 3:15, LF) O le faia o se tali faapena e tusa ai ma lou faatuatua e manaʻomia ai lou aveina i fale o le poto saʻo ma oo ai ina e malamalama i mafuaaga mo ou talitonuga.

Peitaʻi, e tatau foi ona e aʻoaʻoina le auala e faailoa atu ai ou talitonuga i isi ma le “ava” pe e pei ona faaupu ai e le Bible in Basic English, “e aunoa ma se faamaualuga.” O lou poto e faatatau i le Tusi Paia ma ana aʻoaʻoga e lē tatau ai ona e manatu faamaualuga e sili aʻe oe i lo isi. I lona tuufaafeagai, e tatau ona e taumafai e atiina aʻe le uiga o le aposetolo o Paulo, o lē na tusi e faatatau i lana faiva e faapea: “Ua faapologaina aʻu e aʻu mo tagata uma, ina ia atili ai ona toatele ou te maua.”—1 Korinito 9:19.

Pe afai o loo e iloaina e te lē lototele e fai atu se tali mo lou faatuatua, aua e te faavāivai. E toʻatele talavou Molimau e faapena foi o latou lagona. Ua faapea mai Jamal: “A o oʻu i le aʻoga tulagalua sa ou leʻi iloa le auala e faamatalaina ai i isi le mafuaaga sa ou lē faamanatuina ai aso mālōlō pe faʻalo i le fuʻa ae pe aisea foi ou te alu ai i le faiva mai lea fale i lea fale.” O le ā na fesoasoani ia te ia? “Na fesoasoani mai pea loʻu tamā ia te aʻu seʻia oo lava ina mafai ona ou faamatalaina nei mea, ma na faia e lena mea se suiga tele.” Pe afai e iai sou faafitauli i le faamatalaina o ou talitonuga i isi, atonu e mafai ona e tāpā le fesoasoani a se matua po o se isi sui taʻumatuaina o le faapotopotoga Kerisiano e fesoasoani ia te oe ina ia aʻoaʻoina auiliili le poto e uiga i le Atua.—Efeso 3:17-19.

Na faapea mai se Molimau e 16 tausaga lona matua, na fesoasoani se polokalame o suʻesuʻega totino o le Tusi Paia ia te ia e mauaina ai le lototele ina ia faamatala atu ma le manino mea moni i le aʻoga. Na ia taʻutino mai: “I le taimi muamua pe a ula mai tamaiti o laʻu vasega ia te aʻu ona o se Molimau, sa ou lē iloa po o le ā saʻu tala a fai. I le taimi nei, ina ua avea aʻu o se faievagelia faataimi atoa, ua faatele ona oʻu suʻesuʻeina le Tusi Paia, ma ua mafai ai ona ou fai atu se tali. O le faitauina e lē aunoa o mataupu fou o mekasini o Le Olomatamata ma le Ala Mai! ua fesoasoani ai ia te aʻu e talanoa atu i aʻu uō i le aʻoga e faatatau i oʻu talitonuga.”

O le mea moni, e lē tutusa uma ni tulaga se lua. O lea e manaʻomia ai foi i nei tulaga eseese ni tali e eseese. Peitaʻi, pe a tofotofoina oe i ni faaupuga lē alofa, e lē tāitai ona talafeagai ona “taui atu le leaga i le leaga.” (Roma 12:17-21) O se tali atu ina ia faalumaina, tusa lava pe tuuina atu i se auala faatalasua, o le a na ona faaopoopo atu ai o malala i le afi ma atonu e oo ina faatupuina atili ai nisi fāifaiga. O lea, ua iloa ai e nisi le sili atu ona lelei pe a aua le amanaʻia fua fāifaiga e fai ane.

I nisi tulaga, e pei o se faamatalaga e faia ona o le taumafai e faamālie, atonu o se faiga atamai le toē faatasi ai na i lo le ita ai fua. (Failauga 7:9) Pe afai e vaai mai lē o loo fāifai e te lē o āno atu i ana faamatalaga, atonu e taofia ai e ia ana faiga faasoesa.—Faatusatusa i le Faataoto 24:29; 1 Peteru 2:23.

Tautala Atu

E ui i lea, e iai taimi atonu e mafai ai ona e ofoina atu se faamalamalamaga puupuu ma le magafagafa o ou talitonuga. Na faataʻitaʻi e se teine e 13 ona tausaga lenei mea ma mauaina ai ni iʻuga mataʻina. Na ia faapea mai: “Ina ua ou savali atu i laʻu vasega ae amata ona ula mai nisi o tamaiti aʻoga i Molimau a Ieova. Na ou manaʻo e fai atu i ai saʻu tala, ae sa na ona latou savavali ese ma toē mai pea ia te aʻu—seʻi vaganā ai se tasi o teineitiiti. Na liliu mai ia te aʻu lenei teineitiiti e igoa ia Jaimee ma ia faapea mai o loo iai lana tusi E Mafai ona E Ola e Faavavau i Parataiso i Le Lalolagi.a Na fai mai ua toetoe lava uma ona ia faitauina, ae sa ia naunau e maua nisi faamatalaga atili e faatatau i o tatou talitonuga. Na amata ai loa ona ma suʻesuʻeina le Tusi Paia ma Jaimee.” I le faalaeiʻauina o ia e ala i mea na oo i ai, na amata ai loa e le talavou Molimau ona talanoa atu i isi talavou. Na ia faapea mai: “O loo oʻu asiasi atu e lē aunoa i ni teineiti aʻoga se toʻafā o ē sa faaalia le naunau ma ou te mautinoa o le a lē toe umi ae faia foi se matou suʻesuʻega.”

Na iai foi se mea talitutusa na tupu i se tamaitiiti aʻoga i se atunuu i Aferika o Laiperia i tausaga ua mavae. A o faagasolo se vasega o mataupu tau i le soifuaga lautele, na ia faamatalaina atu ma le faaaloalo e faapea i le avea ai o ia ma se Molimau a Ieova, e talitonu o ia i le foafoaga na i lo le evolusione. I le taimi muamua, o le toʻatele o ana uō i le aʻoga sa matuā faitio lava. Ae sa faataga o ia e le faiaʻoga e faamatala ona talitonuga i le vasega, lea na iʻu ai ina taliaina e le faiaʻoga le tusi Life—How Did It Get Here? By Evolution or by Creation?b

Ina ua maeʻa ona faitauina le tusi, na faapea atu ai le faiaʻoga i le vasega: “E sili atu ona maualuga le tusi lenei pe a faatusatusa atu i isi tusi. O se tasi o tusi faasaienisi e sili atu lona aogā e faatatau i le foafoaga ua ou faitauina.” Ona faamatalaina lea e le faiaʻoga e faapea e naunau o ia e faaaogā le tusi Creation faatasi ai ma le tusi aʻoga a le vasega mo isi kuata e lua o loo sosoo ai, ma sa ia faatonuina le vasega ina ia talosaga atu mo ni kopi mai le tamaitiiti aʻoga Molimau! E tele ni tusi na tuua ai, ma na toʻatele foi tamaiti aʻoga na suia ai la latou vaaiga e faatatau i Molimau a Ieova!

O le Faatuatua ua Tofotofoina o le Faatuatua Lea e Malosi

O le mea moni, e iai taimi atonu e te lagona ai le lofitūina ona o le toʻatele o i latou e lē tutusa—pe e lē talisapaia—lou tulaga e faavae mai le Tusi Paia. (Faatusatusa i le Salamo 3:1, 2.) O lea, o se mea atamai le saili o le faauōga ma i latou e tutusa manatu ma talitonuga. (Faataoto 27:17) Ae faapefea pe afai e leai ni talavou e tutusa o outou faatuatuaga i lau aʻoga pe tou te tuaoi?

Pe afai o le tulaga lena, manatua o lau Uō sili lava o Ieova le Atua, ma e mafai ona ia fesoasoani ia te oe. Na avea o ia ma taulaʻiga autū o fāifaiga a Satani mo le faitau afe o tausaga. O lea e mafai ona tatou mautinoa faapea e faafiafiaina le finagalo o Ieova pe a tatou tutū mausalī mo lo tatou faatuatua. O se olaga faapena e tuuina atu ai ia te ia se avanoa e ‘tali atu ai ia Satani o lē fāifai atu ia te ia.’—Faataoto 27:11.

E ao ona e faatalitalia, o le a tofotofoina lou faatuatua mai lea taimi i lea taimi. (2 Timoteo 3:12) Peitaʻi, ua faamautinoa mai i tatou e le aposetolo o Peteru e faapea o le tofotofoina o lo tatou faatuatua e “silisili ona aoga i le auro e faaumatia, e ui lava ina tofotofoina i le afi.” (1 Peteru 1:7) O lea, pe afai e faalumaina oe ona o lou faatuatua, vaai i ai o se avanoa e faamalosia ai lou faatuatua ma faataʻitaʻia ai lou onosaʻi. Na tusi le aposetolo o Paulo faapea o le onosaʻi e taʻitaʻiina atu ai i “se tulaga ua talileleia mai.” (Roma 5:3-5, NW) Ioe, o le naunau ina ia maua le finagalo malie o Ieova ua saunia ai se uunaʻiga malosi mo oe e onosaʻia ai fāifaiga ona o lou faatuatua!

[Faaopoopoga i lalo]

[Ata i le itulau 19]

Pe mafai ona e tali atu mo lou faatuatua?