O Taaʻiga a Agelu i o Tatou Olaga

NA FAAMATALA e Tanielu le faaaliga lea na ia vaaia ai agelu a le Atua. Na tusi o ia: “Ua afe ni afe [agelu] o ē auauna [i le Atua], e mano ni mano o ē laulaututū i ona luma.” (Tanielu 7:10) Ua faaalia i lenei mau le māfuaaga na faia ai e le Atua agelu. Latou te auauna i le Atua ma nofosauni e fai ana faatonuga.

Ua tofia e Ieova le Atua, agelu ina ia faatino ni galuega patino, lea e aafia ai tagata i le lalolagi. O le a tatou iloiloina auala ua faaaogā ai e le Atua ana agelu, ina ia faamalosia ma puipuia ona tagata, momoli mai feʻau i tagata, ma faaoo foʻi lana faasalaga i ē amioleaga.

Faamalosia ma Puipuia e Agelu

Ua autausagā o naunau mai agelu i tagata, talu ai na latou vaaitino i le faia o le lalolagi ma tagata. A o leʻi afio mai Iesu i le lalolagi, i lona tulaga o le poto na fetalai ai o ia: “O loʻu fiafia foʻi, sa i le fanau o tagata lea.” (Faataoto 8:31) O loo taʻua foʻi i le Tusi Paia, ‘o loo naunau le ʻau agelu i le fia matamata’ i mea na faia e Keriso, ma mea o le a tutupu lea ua faailoa atu i perofeta a le Atua.—1 Peteru 1:11, 12.

A o faagasolo tausaga, ua mātau mai e agelu le toʻatele o tagata ua lē auauna i le Atua alofa o lē na faia i latou. Pagā le faanoanoa ai o agelu faamaoni! Ae ‘e olioli agelu’ pe a salamō se tagata agasala ma toe liliu atu iā Ieova. (Luka 15:10) E manatu mamafa mai agelu i tagata e auauna i le Atua. Na fai ma faaaogā e Ieova ana agelu e faamalosia ma puipuia ana auauna faamaoni i le lalolagi. (Eperu 1:14) Ia manatu i faaaʻoaʻoga nei.

Na fesoasoani ni agelu se toʻalua iā Lota ma ona afafine, ina ia sao mai le faaumatiaga o Sotoma ma Komoro. Na taʻitaʻi ese i latou e agelu mai nei aai leaga.a (Kenese 19:1, 15-26) Ina ua mavae le faitau selau o tausaga, na lafo ai Tanielu i se lua o leona ae na lē afāina o ia. Aiseā? Na fai mai Tanielu: “Ua auina mai e loʻu Atua o lana agelu, ua punitia ai gutu o leona.” (Tanielu 6:22) Na fesoasoani agelu iā Iesu a o pōpōfou le galuega talaʻi a Iesu i le lalolagi. (Mareko 1:13) A o toeitiiti maliu Iesu, na faaali atu ai se agelu iā te ia ma “faamalosi iā te ia.” (Luka 22:43) E mautinoa lava na matuā faamāfanafanaina Iesu i na taimi, ona o le fesoasoani a agelu! Na faasaʻoloto foʻi e se agelu Peteru mai le falepuipui.—Galuega 12:6-11.

Pe e puipuia i tatou e agelu i aso nei? Afai tatou te tapuaʻi iā Ieova e tusa ai ma lana Afioga, e mautinoa la e puipuia i tatou e ana agelu malolosi. Ua folafola mai le Tusi Paia: “E to lauapi le agelu a Ieova e siʻosiʻomia ai ē o matataʻu iā te ia, e laveaʻi foʻi o ia iā te i latou.”—Salamo 34:7.

Ae ia tatou iloa, e auauna agelu i le Atua ae lē o tagata. (Salamo 103:20, 21) E faatino e agelu faatonuga a le Atua, ae lē o talosaga a tagata. O lea la, e tatau ona tatou ʻaiʻoi atu i le Atua mo se fesoasoani, ae lē o agelu. (Mataio 26:53) Talu ai tatou te lē vaaia agelu, tatou te lē iloa po o ā mea patino ua tofia ai i latou e le Atua, ina ia fesoasoani ai i tagata. Ae ua tatou iloa, o Ieova e “fesoasoani iā te i latou o ē ua sao o latou loto iā te ia.” (2 Nofoaiga a Tupu 16:9; Salamo 91:11) Ua tatou mautinoa foʻi “pe afai tatou te ole atu ai se mea e tusa ma lona finagalo, e faafofoga mai [le Atua] iā te i tatou.”—1 Ioane 5:14.

Ua taʻua foʻi i le Tusi Paia, e na o le Atua lava e tatau ona tatou tatalo ma tapuaʻi i ai. (Esoto 20:3-5; Salamo 5:1, 2; Mataio 6:9) O le mea lenā e mananaʻo agelu faamaoni tatou te faia. O se faaaʻoaʻoga, ina ua tau ifo Ioane i se agelu, na aʻoaʻia o ia e le agelu i lona faapea atu: “Ia oe, aua lava; . . . ia e ifo i le Atua.”—Faaaliga 19:10.

Momoli Mai e Agelu Feʻau a le Atua

O le upu agelu e pei ona taʻua i le Tusi Paia Eperu ma le Eleni, o lona uiga o “le avefeʻau.” O se tasi lenā o auala e auauna ai agelu i le Atua, latou te momoli mai feʻau a le Atua i tagata. O se faaaʻoaʻoga, na “auina mai . . . e le Atua o le agelu o Kaperielu i le aai o Kalilaia, o Nasareta le igoa.” Aiseā? Ina ia faailoa atu iā Maria le taupou, o le a tō o ia ma fanauina se tama tane e igoa iā Iesu. (Luka 1:26-31) Na auina atu foʻi se agelu i leoleo mamoe i le vao, e faailoa atu iā te i latou ua fanau mai “Keriso le Alii.” (Luka 2:8-11) Na faapena foʻi ona auina atu agelu e momoli feʻau a le Atua iā Aperaamo, Mose, Iesu ma isi tagata o loo taʻua i le Tusi Paia.—Kenese 18:1-5, 10; Esoto 3:1, 2; Luka 22:39-43.

E faapefea ona avea agelu o ni avefeʻau a le Atua i aso nei? Ia manatu i le galuega na valoia e Iesu e fai e ona soo a o leʻi oo i le gataaga o le lalolagi. Na fetalai Iesu: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:3, 14) I tausaga taʻitasi, e silia i le tasi le piliona itula e talaʻia ai e Molimau a Ieova le tala lelei o le Malo o le Atua. Pe e te silafia o loo aafia foʻi agelu i lenei galuega? Na taʻua e Ioane i se faaaliga na ia vaaia: “Na aʻu iloa foʻi le tasi agelu . . . ua iā te ia le tala lelei faavavau e folafola atu i ē nonofo i le lalolagi, i atunuu uma, ma ituaiga, ma gagana eseese, ma nuu.” (Faaaliga 14:6, 7) Ua faaalia e lenei mau, le galuega autū o loo faia e agelu mo tagata i aso nei.

Ua mātau e Molimau a Ieova faamaoniga e iloa ai, o loo faatonutonuina e agelu la latou galuega talaʻi mai lea fale i lea fale. E masani ona latou feiloaʻi ma tagata o ē na tatalo ina ia auina atu se tasi e fesoasoani ina ia latou iloa le finagalo o le Atua. Ua anoanoaʻi tagata ua iloa Ieova i tausaga taʻitasi ona o le taʻitaʻiga a agelu, ae lē galo ai foʻi galuega fitā a le ʻau Molimau. E faamoemoe o le a e talia lenei galuega o loo taʻitaʻia e agelu, lea e maua ai le ola.

Faaoo Mai e Agelu le Faasalaga a le Atua

E ui e leʻi tofia agelu e faamasinoina tagata, ae e iai foʻi se isi galuega latou te faia. (Ioane 5:22; Eperu 12:22, 23) Na latou faaooina mai faasalaga a le Atua i aso ua teʻa. O se faaaʻoaʻoga, na faaaogā e le Atua ana auauna o agelu a o ia fetaiaʻi ma tagata Aikupito, o ē na nofo pologa ai le nuu o Isaraelu. (Salamo 78:49) O le “agelu a Ieova” na fasiotia fitafita e 185,000 i le pō e tasi, a o tolauapi fili o tagata o le Atua.—2 Tupu 19:35.

O le a faapena foʻi ona faaoo mai e agelu le faasalaga a le Atua i le lumanaʻi. O le a afio mai Iesu “faatasi ma agelu o lona malosi, i le afi mumū, na te taui ma sui i ē ua lē iloa le Atua, ma ua lē anaana i le tala lelei.” (2 Tesalonia 1:7, 8) E pau tagata e faasala o ē e lē anaana i le talaʻiga o loo faia nei i le atulaulau uma, lea o loo lagolagoina e agelu. O le a faasaoina tagata e saʻili i le Atua ma anaana i aʻoaʻoga a le Tusi Paia.—Sefanaia 2:3.

Tatou te lotofaafetai ona o nei agelu faamaoni o ē faia faatonuga a le Atua! E tofia i latou e Ieova e puipui ma fesoasoani mai i ana auauna faamaoni i le lalolagi. O se faamāfanafanaga lenā mea mo i tatou, auā o loo iai temoni po o agaga leaga e mananaʻo ina ia tatou leaga.

O Ai i Latou ua Taʻu o Temoni?

Ina ua mavae le 1,500 tausaga talu ona ʻolegia e Satani Eva, na mātau ai e agelu a le Atua, ua faaliliu ese e Satani tagata uma mai le Atua, seʻi vaganā ai ni nai tagata faamaoni e pei o Apelu, Enoka ma Noa. (Kenese 3:1-7; Eperu 11:4, 5, 7) E iai foʻi agelu na lolo atu iā Satani. O loo taʻua i le Tusi Paia, o i latou o agaga e leʻi faalogo “i ona pō o Noa.” (1 Peteru 3:19, 20) Na faapefea ona iloa le lē usiusitai o nei agelu?

Na tuua e ni agelu i ona pō o Noa, lo latou nofoaga i le lagi, ae ō mai i le lalolagi ma liutino tagata. Aiseā? Na latou tuʻinanau e feusuaʻi ma fafine. Ona o lea, na latou maua ai ni fanau tinoeese toe sauā. Na “silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava.” E leʻi tuufau e Ieova le Atua, amioga leaga a tagata. Na ia aumaia se Lolo tele ma tafiesea ai tagata leaga ma tagata tinoeese, o fanau a agelu leaga. Na pau tagata na sao o auauna faamaoni a le Atua.—Kenese 6:1-7, 17; 7:23.

E leʻi faaumatia agelu faalogogatā i le Lolo, auā na latou tuua o latou tino tagata ae toe foʻi i le lagi i tino agaga. O le taimi lenā na faaigoa ai i latou o temoni. Ua latou ʻau ma Satani le Tiapolo le “alii o temoni.” (Mataio 12:24-27) E moomoo nei temoni ina ia tapuaʻi atu tagata iā i latou e pei o lo latou alii o Satani.

E mataʻutia temoni. Ae aua le fefefe i ai. E gata mai lo latou malosi. Ina ua toe foʻi agelu faalogogatā i le lagi, e leʻi mafai ona toe faatasitasi atu i agelu faamaoni a le Atua. E leʻi toe faasusulu i ai e le Atua lona malamalama faaleagaga, ma e leai so latou faamoemoe mo se lumanaʻi fiafia. Ua saisaitia i latou i le lua o le pogisa faaleagaga. (2 Peteru 2:4) O loo iai i latou i le pogisa faaleagaga, ona ua taofiofia i latou e Ieova i “noanoataga faavavau.” E lē gata i lea, e lē mafai ona latou toe liutino tagata.—Iuta 6.

O le ā se Mea E te Faia?

Po o faaauau ea ona taaʻina e temoni olaga o tagata? Ioe, latou te faia ni “togafiti” poto e pei ona faia e lo latou alii o Satani le Tiapolo. (Efeso 6:11, 12) Peitaʻi, e mafai ona tatou tetee atu i temoni e ala i le mulimuli i le Afioga a le Atua. E lē gata i lea, e puipuia e agelu malolosi tagata e alolofa i le Atua.

E tāua tele ona e iloa le finagalo o le Atua e pei ona faailoa mai e le Tusi Paia, ma ia anaana i ai! Ia logo Molimau a Ieova i lou vaipanoa pe a e fia silafia atili aʻoaʻoga a le Tusi Paia, pe tusi mai foʻi i ē na lomia lenei mekasini. E fiafia Molimau a Ieova e tou te suʻesuʻeina le Tusi Paia e aunoa ma se totogi, e pule lava oe i le taimi.

[Faamatalaga pito i lalo]

[Pusa i le itulau 6]

LE AUALA UA FAAMAOPOOPOINA AI AGELU

O le auala lenei ua faamaopoopo ai e Ieova lana ʻauagelu e toʻatele:

O le agelu pito i malosi ma maualuga o Mekaeli le agelu silisili, po o Iesu Keriso. (1 Tesalonia 4:16; Iuta 9) E na te vaavaaia serafi, kerupi ma isi agelu.

E maualuga tulaga o serafi i le faatulagaga a le Atua. Latou te auauna i le nofoālii o le Atua. O lo latou tofiga o le faalauiloa atu lea o le paia o le Atua, ma tausisia le mamā faaleagaga o ona tagata.—Isaia 6:1-3, 6, 7.

E laulaututū kerupi i le nofoālii o le Atua ma sapasapaia le mamalu o Ieova.—Salamo 80:1; 99:1; Esekielu 10:1, 2.

O isi agelu ua fai ma sui o Ieova ma latou te faia lona finagalo.

[Ata i le itulau 4]

Na taʻitaʻi e agelu Lota ma ona afafine ina ia saogalemu

[Ata i le itulau 5]

Ina ua tau ifo Ioane i le agelu, na faapea atu le agelu: “Aua lava”!

[Ata i le itulau 6]

E faaoo mai e agelu faasalaga a le Atua

[Ata i le itulau 7]

Po o e taliaina le galuega talaʻi lea e taʻitaʻia e agelu?