Le Auala e Mataulia ma Manumalo ai i so o se Vaivaiga i le Itu Faaleagaga

E TUSA AI O TALA FAAFAGOGO A ELENI, O ACHILLES O LE TOA ELENI LEA SA sili ona lototele i toa uma i le Taua i Troy, o se tauiviga sa faasaga i le aai o Troy. Fai mai le tala faaanamua a o pepe meamea Achilles, na fufui ai o ia e lona tinā i vai o le Vaitafe o Styx, na faapea ai ona lē afaina o ia i osofaiga seʻi vaganā ai lava le vaega o lona tino sa uu e lona tinā—lea ua fai ma alagaupu o le mulivae o Achilles. O le vaega tonu lava lena na ati ai le ū, na fana atu e Paris, le atalii o le tupu o Priam o Troy, ma fasiotia ai Achilles.

O Kerisiano o tagata tau ia a Keriso, o loo auai i se taua faaleagaga. (2 Timoteo 2:3) Ua faamatala mai e le aposetolo o Paulo: “Tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.” Ioe, o o tatou fili e leai lava se isi na i lo Satani le Tiapolo ma temoni.—Efeso 6:12.

E manino mai, o se taua e lē fetaui itu pe ana fai tatou te lē mauaina le fesoasoani a Ieova le Atua, o lē ua faamatalaina faapea “o le toa lava ia.” (Esoto 15:3) Ina ia puipuia i tatou mai o tatou fili sauā, ua tuuina mai ia i tatou se ofutau faaleagaga. O le mafuaaga lena na timai mai ai le aposetolo: “Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.”—Efeso 6:11.

O le ofutau ua saunia mai e Ieova le Atua, e leai se masalosalo, o se ofu e sili ona lelei, lea e mafai ai ona tumau i so o se osofaiga i le itu faaleagaga. Seʻi tau ina vaai i le lisi na tuuina mai e Paulo: sulugatiti o le faamaoni, ufifatafata o le amiotonu, seevae o le tala lelei, talipupuni telē o le faatuatua, puloutau o le faaolataga, ma le pelu a le agaga. O le ā se isi auupega e sili atu ona lelei e toe moomoo i ai se tasi? E ala i le ofuina o lena ofutau, e mafai e se tagata tau Kerisiano ona manumalo, e tusa lava po o le ā le anoanoai o faigata.—Efeso 6:13-17.

E ui lava o lenei ofutau faaleagaga mai ia Ieova o se ofu e sili ona lelei ma o se puna o le saogalemu mo i tatou, ae e lē tatau lava ona tatou faatalalē i so o se mea. Pe a manatunatu i le tagata na peiseai e lē mafai ona faaumatia o Achilles, pe e lē o ono iai foi itu o tatou vaivai ai, se mulivae faaleagaga o Achilles? E mafai ona mautinoa le oti ai pe afai e maua i tatou ae lē o mataala.

Iloilo Lou Ofutau Faaleagaga

O se tamaloa na manumalo faalua i le pine auro i le taaloga o le faasee i le aisa i le Olimepeka, ma na foliga mai foi sa atoatoa le malosi o lona tino, na faafuasei lava ona matapogia ma oti ai a o faia sana faataitaiga. Mulimuli ane i lena mea na tupu na lipotia mai ai se tala faatupu manatu i le New York Times e faapea: “O le ʻafa o le 600,000 o tagata Amerika o loo maua i le fatu pe i tausaga taitasi latou te lei muai iloaina ni āuga.” E manino mai, o le tulaga o loo iai lo tatou soifua maloloina e lē mafai ona fuaina i le lagona o tatou faalogoina.

E faapena foi i lo tatou soifua maloloina i le itu faaleagaga. Fai mai le fautuaga a le Tusi Paia: “O lē manatu o loo o tu ia, ina faaeteete ia neʻi paū.” (1 Korinito 10:12) E tusa lava la po o lo tatou ofutau faaleagaga o se ofu lea e sili ona lelei o loo iai, ae mafai lava ona tupu aʻe ai se vaivaiga. O le mafuaaga ona ua tatou fananau mai ma le agasala, ma o lo tatou tulaga agasala ma le lē lelei atoatoa e faigofie lava ona manumalo i la tatou faaiuga ina ia faia le finagalo o le Atua. (Salamo 51:5) E ui lava i o tatou faanaunauga lelei, ae mafai e lo tatou loto taufaaʻoleʻole ona olegiaina i tatou i le faatupuina lea o ni mafaufauga po o ni faamolemolega taufaasese, ina ia faigofie ai ona tatou lē amanaiaina o tatou vaivaiga ma faaseeina ai i tatou i le manatu faapea o loo lelei pea lo tatou itu faaleagaga.—Ieremia 17:9; Roma 7:21-23.

E faaopoopo atu i ai, o loo tatou ola i se lalolagi o loo lē mautonu ma eseese o latou lagona i le po o le ā le saʻo ae o le ā le sese. Ina ia iloa pe saʻo pe sese se mea, atonu e mafai ona filifili e tusa ai o le faalogona o le tagata. O lenei ituaiga o manatu o loo faalauiloaina i faasalalauga faapisinisi, faafiafiaga lauiloa, ma faasalalauga eseese. E mautinoa, afai tatou te lē faaeteete, e mafai ona tatou tosina atu i lena ituaiga o mafaufauga, ma amata ona ono faavaivaia ai lo tatou ofutau faaleagaga.

Na i lo le paʻū atu la i lena tulaga lamatia, e tatau ona tatou utagiaina le fautuaga a le Tusi Paia: “Ina tofotofo ia outou ia te outou, po ua outou i le faatuatua; ina suesue ifo ia ia te outou.” (2 Korinito 13:5) Pe a tatou faia faapea, o le a mafai ai ona tatou matauina so o se vaivaiga e ono tuputupu aʻe ma gaoioi ai i laasaga tatau ina ia toe faaleleia ai a o lei oo ina iloa mai e o tatou fili ma sauni mai ai sa latou osofaiga. E faapefea la ona tatou faia lenei iloiloga? O ā nisi o āuga e tatau ona tatou vaai totoʻa i ai i lenei iloiloga totino?

Matauina o Āuga

O se tasi o āuga masani e mafai ona iloa ai le vaivai faaleagaga, o le faatalalē lea i la tatou masaniga o le faia o suesuega totino. O nisi latou te manatu faapea e tatau ona latou suesue atili, ae peitai ona pau lava ua lē lava so latou taimi e fai ai. I le olaga pisi la lea ua iai i aso nei, e faigofie ai lava ona lolo atu i lena tulaga lē lelei. Ae peitai, o le mea e sili ona leaga, e masani ona fai manatu mai nisi tagata faapea e lē o leaga tele i latou, auā o lea lava e fai ma o latou faitauina lomiga faale-Tusi Paia ma o loo mafai foi ona latou ō atu i nisi o sauniga faa-Kerisiano.

O na ituaiga o mafaufauga e faasese tagata. E tai pei lava o se tagata ua manatu ua fai si ona pisi tele ua leai ai se taimi e nofo ai i lalo e ʻai se meaʻai aogā lelei, ona fealualuai lava lea ma ʻai pe a maua lava sina avanoa. E ui lava atonu e lē aafia o ia i le mole manava, ae e lē o toe mamao ona mapuna aʻe lea o ni faafitauli tau i lona soifua maloloina. I se tulaga talitutusa, afai e lē mautū ona faasolosolo lelei le aveina i totonu o meaʻai susua faaleagaga, e lē umi lava ae tatou faatupuina ni vaega vaivai i lo tatou ofutau faaleagaga. O le faaauau pea ona osofaia e ala mai i gaoioiga ma manatu faalelalolagi, e ono faigofie ai lava ona tatou lolo atu i osofaiga a Satani e oti ai.

O se tasi āuga o le vaivai faaleagaga o le mou atu lea o le vaaiga faanatinati i la tatou taua faaleagaga. E lē lagonaina e se fitafita i le taimi o le toafilemu le manatu e popole ma e matautia le taua. Atonu na te lē lagonaina le manaomia ona faanatinati ona sauniuni. A faafuasei la ona amia o ia e tau, atonu e iai o ia i se tulaga lē saunia. E faapena le itu faaleagaga. Afai tatou te faatagaina lo tatou uiga faanatinati e mou atu, e mafai ona tatou lē lava tapena ai e tetee atu i osofaiga tatou te fetaiai.

E faapefea la ona tatou iloaina ua tatou paʻūū atu i lenei tulaga? E mafai ona tatou fesili ifo i ni fesili e mafai ona matuā faaalia ai lava le tulaga o loo iai: Po o tutusa loʻu filigā e auai i le faiva ma loʻu naunau e alu e tafao? Po o oʻu naunau e faaalu se taimi e sauniuni ai mo sauniga e pei o loʻu alu atu e faatau ia po o le matamata foi i le TV? O oʻu toe mafaufau ea e faatatau i mea sa ou sailia ma avanoa na ou maua ae na ou lafoaia ina ua avea aʻu ma Kerisiano? Pe o oʻu matauʻa ea i le olaga sologa lelei o loo ola ai isi? O ni fesili faatupu manatu nei fesili, ae e fesoasoani ina ia matauina ai so o se vaivaiga o loo iai i lo tatou ofutau faaleagaga.

Ona o lenei ofutau e puipuia ai e faaleagaga, e tāua ai la le leai o se mea e taofia ai le tafe mai o le agaga paia o le Atua i o tatou olaga. E atagia atu lenei i le tele o loo faatatauina ai fua o le agaga o le Atua i mea uma tatou te faia. Pe faigofie ea ona e ita pe lē fiafia foi pe a faia e se tasi se gaoioiga po o se faaupuga e te lē fiafia i ai? Pe e faigata ea mo oe ona taliaina fautuaga, ia pe e te manatu foi ua fai ma masani a isi le faitioina o oe? Pe o loo e matauʻa ea ona o faamanuiaga ua maua e isi po o mea ua mafai ona latou faia? Po o faafaigata mo oe ona faifaimea faatasi ma isi, ae maise lava ē tou te tupulaga faatasi? O se iloiloga totino faamaoni o le a fesoasoani ia i tatou e iloa ai po o tumu o tatou olaga i fua o le agaga o le Atua po ua amata ona atagia ai galuega a le tino.—Kalatia 5:22-26; Efeso 4:22-27.

Laasaga Mautinoa e Manumalo ai i Vaivaiga Faaleagaga

O le matauina o āuga o le vaivai faaleagaga o se tasi o itu; ae e ese gaoioiga e fai i le faafetaiaia ma faia ni laasaga ina ia faasaʻoina ai. O se tulaga e faanoanoa ai, e toatele ua māfuli atu i le faia o faamolemolega, ua faifai manatu, ua manatu faatauvaa i le faafitauli, po o le lē ioe foi faapea o loo iai se faafitauli. Pagā le matautia o lena mea—e tai pei o le alu atu i le taua ae lē o atoatoa vaega o le ofutau! O se ala faapena o le a faafaigofie ai lava ona osofaia i tatou e Satani. Na i lo lea, e tatau ona tatou vave faia ni laasaga mautinoa e faasaʻoina so o se faaletonu atonu ua tatou matauina. O le ā e mafai ona tatou faia?—Roma 8:13; Iakopo 1:22-25.

Ona o lea tatou te auai i le taua faaleagaga—o se taua e aofia ai le pulea o le mafaufau ma le loto o se Kerisiano—e tatau ai ona tatou faia mea uma tatou te mafaia ina ia leoleo ai o tatou mafaufau. Ia manatua e aofia ai i lo tatou ofutau faaleagaga “le ufifatafata o le amiotonu,” lea e puipuia ai o tatou loto, ma “le puloutau o le faaolataga,” lea e puipuia ai o tatou mafaufau. O le aʻoaʻoina ina ia faaaogā ma le atamai nei sauniuniga e mafai ona iu ai i le manumalo po o le toilalo.—Efeso 6:14-17; Faataoto 4:23; Roma 12:2.

O le ofuina lelei “o le ufifatafata o le amiotonu” e manaomia ai lo tatou tilofaia e lē aunoa i tatou lava e tusa ai i lo tatou alolofa i le amiotonu ma le ʻinoʻino i le amioleaga. (Salamo 45:7; 97:10; Amosa 5:15) Po ua tuutuu ifo ea i lalo o tatou tapulaa ia pei o le lalolagi? Po ua tatou fiafia nei i mea—pe o ni mea moni po o ia e faaalia mai i TV ma tifaga, i tusi ma mekasini—o mea atonu sa faateia pe faatiga ia i tatou i le taimi muamua? O le alofa mo le amiotonu o le a fesoasoani ia i tatou e iloa ai o mea o loo viiviia e lenei lalolagi e avea o le saolotoga ma le atamai, o le mea moni lava ua fenuminumiai ma tau faasese i le foliga mai.—Roma 13:13, 14; Tito 2:12.

O le pulouina “o le puloutau o le faaolataga” e aofia ai le teu mau pea i mafaufau o faamanuiaga ofoofogia o loo i le lumanai, ina ia lē faatagaina ai i tatou e faaseseina e le feilafi ma le matagofie o le lalolagi. (Eperu 12:2, 3; 1 Ioane 2:16) O le iai o lenei vaaiga o le a fesoasoani ia i tatou ina ia faamuamua ai manaoga faaleagaga na i lo le mauaina o mea faitino po o se manuia totino. (Mataio 6:33) O lea, ina ia faamautinoa ua ofuina lelei lenei vaega o le ofutau, e tatau ona tatou fesili ifo ia i tatou lava ma le faamaoni: O le ā o loo oʻu sailia i le olaga? Po o iai ni oʻu sini patino faaleagaga? O le ā o oʻu faia ina ia ausia ai na sini? Pe o se tasi o le vaega totoe o Kerisiano faauuina po o le “motu o tagata e toatele,” e tatau ona tatou faataitai ia Paulo, o lē na faapea mai: “Ou te le manatu ua ou maua, a o le mea e tasi ou te faia, ou te faagalogalo i mea ua tuanaʻi, ou te momoʻe punou aʻi foi i mea o lumanai, ou te tausisi atu i le faailoga.”—Faaaliga 7:9; Filipi 3:13, 14.

Na faaiu mai le faamatalaina e Paulo o lo tatou ofutau faaleagaga i le timaiga lenei: “Ia outou tatalo i le Agaga i aso uma lava i talotaloga ma faatoga uma; ia outou mataala pea i lenei lava mea, ma matuā tausisi i le faatoga mo tagata paia uma lava.” (Efeso 6:18) Ua atagia mai ai iinei laasaga mautinoa e lua e mafai ona tatou uia ina ia manumalo pe puipuia mai ai i so o se vaivai faaleagaga: Ia ati ae se faiā lelei ma le Atua, ma ia osia se faiā vavalalata ma uso Kerisiano.

Pe afai tatou te fai ma masani le liliu atu ia Ieova “i talotaloga . . . uma” (taʻutinoga o a tatou agasala, talosaga mo se faamagaloga, olega mo le taitaiga, faafetai mo faamanuiaga, viiga mai le loto) ma “i aso uma lava” (i luma o le lautele, i le na o se vaega, pe a na o oe, i so o se taimi e lagonaina ai), tatou te maua ai se faiā vavalalata ma Ieova. O le puipuiga sili lena tatou te mafai ona maua.—Roma 8:31; Iakopo 4:7, 8.

I le isi itu, ua fautuaina i tatou ina ia tatalo “mo tagata paia,” o lona uiga, mo o tatou uso Kerisiano. E mafai i a tatou tatalo ona manatua ai o tatou uso faaleagaga i atunuu mamao o loo mafatia i sauaga po o isi tulaga faigata. Ae faapefea Kerisiano ia tatou te galulue ma auaumea faatasi i lea aso ma lea aso? E talafeagai foi le tatalo mo i latou, e oo lava ia Iesu na ia tatalo mo lona ausoo. (Ioane 17:9; Iakopo 5:16) O na tatalo e tosina vavalalata ai i tatou ma faamalosia ai ina ia tatalia osofaiga a “lē o loo leaga.”—2 Tesalonia 3:1-3, NW.

O le mea mulimuli, ia teu mau i mafaufau le apoapoaiga alofa a le aposetolo o Peteru: “Ua lata mai le gataaga o mea uma lava; o lena, ia faautauta ai, ma ia mataala outou ma le tatalo. Ia muamua i mea uma ona maua e outou o le alofa naunau o le tasi i le tasi, auā o le alofa e ufiufi ai agasala e tele.” (1 Peteru 4:7, 8) E faigofie tele ona faatagaina le lē lelei atoatoa faaletagata—o isi tagata ma i tatou lava—e galue ma faamautuina i o tatou loto ma mafaufau ma avea ma mea e tausuai ai, ma tautevateva ai. Ua matuā malamalama lelei Satani i lenei vaivaiga faaletagata. O se tasi o ana togafiti poto o le faatupu o le fevaevaeai ona faigofie lea ona ia manumalo ai. O lea la e tatau ona tatou faaaogaina le alofa e vave ufiufi ai na masei faatasi ai ma le alofa naunau o le tasi i le isi ma ia aua “neʻi tuuina atu se mea e mautu ai le tiapolo.”—Efeso 4:25-27.

Ia Tausia le Malosi Faaleagaga i le Taimi Nei

Pe afai e te iloa o loo veuveua lou ulu ia po o piʻo foi lou fusiua, o le ā le mea e te faia? E tele lava ina e vave gaoioi e faasaʻo i le vave e mafai ai. E toaitiiti lava tagata latou te lē gaoioi e faaleleia sea tulaga, i le manatu faapea o faaletonu faapena e lē afaina. Seʻi o tatou tali atu la i le vave e mafai ai pe a oo i o tatou vaivaiga faaleagaga. O ni ila i le faaletino e ono uaʻi mai ai ma le ʻinoʻino le vaai a tagata, ae o vaivaiga i le itu faaleagaga e lē faasaʻoina e ono iu i le lē maua ai o le finagalo malie o Ieova.—1 Samuelu 16:7.

Ua foaiina mai ma le agalelei e Ieova ia i tatou mea uma tatou te manaomia ina ia fesoasoani ai e liaiina ese so o se vaivaiga faaleagaga ma ia tausia ai le malosi faaleagaga. E ala mai i sauniga faa-Kerisiano, lomiga faale-Tusi Paia, ma Kerisiano taʻumatuaina ma alolofa, ua ia saunia mai ai pea lava pea faamanatuga ma manatu aogā i mea e ao ona tatou faia. Ua ia i tatou le faitalia i le taliaina ma faatatauina. O le faia faapea e manaomia ai ni taumafaiga ma le pulea totino. Ae ia manatua le mea na taʻua ma le faamaoni e le aposetolo o Paulo: “Ua faapea ona ou momoʻe e le ma le faaletonu; ua faapea ona ou tuʻi, e le pei o se tuʻi le matagi. A ou te faatoilaloina loʻu nei tino, ma aʻu fai ai ma pologa, ina neʻi iu ina le faamaoni aʻu, o aʻu sa talaʻi atu i isi tagata.”—1 Korinito 9:26, 27.

Ia mataala, ma ia aua lava neʻi faatagaina se mulivae faaleagaga o Achilles e tuputupu aʻe. Na i lo lena, i se uiga maulalo ma le lototele seʻi o tatou faia le mea ua ao ona tatou faia i le taimi nei ina ia mataulia ma manumalo ai i so o se vaivaiga faaleagaga o ia i tatou.

[Faamatalaga faaopoopo i le itulau 19]

“INA TOFOTOFO IA OUTOU IA TE OUTOU PO UA OUTOU I LE FAATUATUA; INA SUESUE IFO IA IA TE OUTOU.”—2 Korinito 13:5.

[Faamatalaga faaopoopo i le itulau 21]

“IA MATAALA OUTOU MA LE TATALO. IA MUAMUA I MEA UMA ONA MAUA E OUTOU O LE ALOFA NAUNAU O LE TASI I LE TASI, AUĀ O LE ALOFA E UFIUFI AI AGASALA E TELE.”—1 Peteru 4:7, 8.

[Pusa/Ata i le itulau 20]

FESILI IFO IA TE OE LAVA . . .

◆ Po o oʻu naunau e faaalu se taimi e sauniuni ai mo sauniga e pei o loʻu alu atu e faatau ia po o le matamata foi i le TV?

◆ Pe o oʻu matauʻa ea i le olaga sologa lelei o loo ola ai isi?

◆ Pe e faigofie ea ona ou ita pe lē fiafia foi pe a faia e se tasi se gaoioiga po o se faaupuga ou te lē fiafia i ai?

◆ Pe e faigata ona ou taliaina fautuaga, po o loʻu manatu foi ua fai ma masani a isi le faitioina o aʻu?

◆ Po o faigata ea mo aʻu ona faifai mea faatasi ma isi?

◆ Pe ua tuutuu ifo ea i lalo oʻu tapulaa ia pei o le lalolagi?

◆ Po o iai ni oʻu sini patino faaleagaga?

◆ O le ā o oʻu faia ina ia ausia oʻu sini faaleagaga?

[Ē Ana le Ata i le itulau 18]

Achilles: Mai le tusi Great Men and Famous Women; Fitafita Roma ma le itulau 21: Historic Costume in Pictures/Dover Publications, Inc., New York