Na Latou Faia le Finagalo o Ieova
Ua Faia e le Tagata Silisili se Auaunaga Maualalo
NA SILAFIA e Iesu le tāua o ona toe taimi ma lona au aposetolo. Sa lē o toe mamao lava ae puʻea loa o ia, ma tofotofoina ai lona faatuatua i se tofotofoga sa lei faapea muamua. Na silafia foi e Iesu faamanuiaga matagofie sa taatitia mai i luma. Na lē o toe umi ae faaeaina loa o ia i le itu taumatau o le Atua ma tuuina atu i ai “le suafa e silisili i suafa uma lava; ina ia tootuli o tulivae uma lava i le suafa o Iesu, o e o i le lagi, ma e o i le lalolagi, ma e o i lalo o le lalolagi.”—Filipi 2:9, 10.
Peitai, sa lei avea le atuatuvale i lona maliu na taufaamataʻu ane pe na avea lona matuā naunau atu mo lona taui folafolaina ma mea na tosina ese atu i ai Iesu mai manaoga o ona aposetolo. Sa ia “alofa ia i latou ua oo i le gataaga” e pei ona faamauina e Ioane mulimuli ane i lana Evagelia. (Ioane 13:1) Ma i ia toe itula tāua na totoe o lona soifuaga o se tagata lelei atoatoa, na aʻoaʻoina ai e Iesu i ona aposetolo se lesona e sili ona tāua.
Se Lesona o le Lotomaulalo
Na iai faatasi Iesu ma le au aposetolo i le afeafe pito i luga i Ierusalema e faamanatu le Paseka. Muamua atu, na faalogo ai Iesu o fefinauai i latou po o ai e sili ia i latou uma. (Mataio 18:1; Mareko 9:33, 34) Sa ia talanoaina lenei mataupu ma i latou ma taumafai ai e faasaʻoina o latou manatu. (Luka 9:46) Peitai, i le taimi lea, na faamamafa ai e Iesu na lesona e ala i le faaaogaina o se taulimaga e ese mai. Sa ia filifili e lē gata ina talanoa atu ia i latou e faatatau i le loto maulalo ae ia faataitai foi.
Ua tusi mai Ioane, ona “tu lea o [Iesu] i luga a o fai le talisuaga, ua tuu ese ona ofu, ua tago foi i le ie sōloi, ua fusi ia te ia. Ona liligi lea e ia o le vai i le ipu e mulumulu ai, ua mulumulu i vae o ona soo, ma sōloi ai i le solo ua ia fusi ai.”—Ioane 13:4, 5.
I le taumafanafana i Sasaʻe Tutotonu anamuā, sa masani ona faaaogaina ai e tagata seevae tosotoso pe a savavali i luga o auala pefu. Pe a ulufale atu i se aiga o se tagata lautele, e faafeiloai mai ai i latou e se tagata talimalo o lē o le a ia saunia ni apa ma ni vai ina ia latou mulumulu ai o latou vae. I aiga e mauoloa, e faatino ai e se pologa le galuega o le mulumuluina o vae.—Faamasino 19:21; 1 Samuelu 25:40-42.
I le afeafe pito i luga, sa lei iai se isi na talimalo ia Iesu ma ona aposetolo. Sa lei iai sē na talimalo e saunia ni apavai ma sa leai se pologa e mulumuluina vae. Ina ua amata ona mulumuluina e Iesu o latou vae, na tuua ai le au aposetolo i se tulaga o le matuā faateia. O Ia lenei o lē silisili ia i latou uma, ua na faia se galuega matuā sili ona maualalo!
I le taimi muamua, na musu Peteru e mulumulu e Iesu ona vae. Peitai sa fetalai atu Iesu ia te ia: “Afai ou te le mulumulu ia te oe, e leai sou tofi faatasi ma aʻu.” Ina ua maeʻa ona mulumulu e Iesu vae o le au aposetolo uma, na ia faapea ane: “Ua outou iloa ea le mea ua ou faia ia te outou? Tou te taʻua mai aʻu, o le aʻoaʻo ma le Alii; ua lelei foi la outou e fai mai na, auā o aʻu lava lea. O lenei, afai o aʻu le Alii, ma le aʻoaʻo, ua ou mulumuluina o outou vae, e tatau ona outou femulumuluai o outou vae. Auā ua ou avatu le faaaʻoaʻo ia te outou, e pei ona ou faia ia te outou, ia faapea lava e outou ona fai.”—Ioane 13:6-15.
Sa lei faavaeina e Iesu se tu faaletapuaiga o le mulumuluina o vae. Na i lo lena, na ia fesoasoani i ona aposetolo ina ia mauaina se uiga fou—se uiga o le lotomaulalo ma le lotomalie e faia le galuega pito sili ona maualalo mo ona uso. E manino sa latou maua le manatu. Mafaufau i le mea na tupu i tausaga mulimuli ane ai ina ua lāgā le fesili o le peritomeina. E ui ina “tele le fefinauai” na iai, ae o i latou na auai sa lelei ona faasolosolo ma faalogologo ma le faaaloalo i manatu o isi. E lē gata i lena, e foliga mai o lē na taitaifono i lena fono o le soo o Iakopo—e lē o se tasi o le au aposetolo, e pei ona tatou ono faatalitalia, auā na latou auai. O lenei faamatalaga i le tala o i le Galuega ua faailoa ai le faia e le au aposetolo o se agaigai tele i luma i le faaalia o le lotomaulalo.—Galuega 15:6-29.
Le Lesona mo i Tatou
E ala i le mulumuluina o vae o ona soo, na saunia ai e Iesu le lesona malosi o le lotomaulalo. O le mea moni, e lē tatau i Kerisiano ona manatu e tāua tele i latou na i lo isi, ma e tatau i isi ona auauna atu ia i latou i taimi uma, e faapena foi ona lē tatau ona latou saili e aapa atu i ni tulaga maualuluga ma le mamalu. Na i lo lea, e tatau ona latou mulimuli atu i le faaaoaoga na faataatia e Iesu, o lē “e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui aʻi tagata e toatele.” (Mataio 20:28) Ioe, e tatau i soo o Iesu ona lotomalilie e faia le auaunaga pito sili ona maualalo mo le isi.
Mo se mafuaaga lelei na tusi atu ai Peteru e faapea: “Ia oofu [“fusi,” NW] outou uma lava i le loto maulalo o le tasi i le tasi; auā, E tetee atu le Atua i e faamaualuluga, a e foaiina mai le alofa tunoa i e faamaulalo.” (1 Peteru 5:5) O le upu Eleni mo le “fusi” e sau mai le upu o lona uiga “o le talieleele a se pologa,” lea e fusiina ai se ofu e ʻoʻo. Pe sa faasino atu e Peteru i gaoioiga a Iesu o le fusi o ia i se solo ma mulumuluina vae o ona aposetolo? E lē o mafai ona taʻua ma le mautinoa mai lena mea. E ui i lea, o le auaunaga maualalo na faia e Iesu na saunia ai se faaaoaoga e lē mafaagaloina i le loto o Peteru, lea e tatau ona iai foi i loto o i latou uma o le a avea ma soo o Keriso.—Kolose 3:12-14.