Ia Tuuina Atu i a Ieova Mea Uma e te Popolevale ai
“Ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai. Ia tuuina atu ia te ia mea uma tou te popole ai, auā o loo manatu mai o ia ia te outou.”—1 PETERU 5:6, 7.
1. E mafai faapefea ona aafia i tatou i popolega, ma atonu e mafai faapefea ona faataitaia lenei mea?
O POPOLEGA e mafai ona matuā aafia ai ō tatou olaga. E mafai ona faatusaina i se mea o faalavelavea ai se pese mālie o sau i le leitiō i nisi taimi. Pe afai e leai se mea o faalavelavea ai ave faasalalau o le leitiō, e mafai ona lagonaina ni pesega mālie ma e mafai ona aumaia ai se tulaga toafilemu. Peitai, e mafai e le leo gogolo ona o loo faalavelavea e se mea ona faaleagaina ai se fātuga mālie, ma faapogaia ai ona tatou loto tigā ma oo ai ina fiu. O le popole, e mafai ona aumai ai se āuga faapea i lo tatou toafilemu. E mafai ona faagapelu ai i tatou ma ua lē mafai ai ona faia o isi mea aogā. E moni lava, “o le atuatuvale i le loto o le tagata ua faavaivai ai o ia.”—Faataoto 12:25.
2. O le ā na fetalai i ai Iesu e tusa ai “ma le popole i mea a le olaga nei?”
2 Na fetalai Iesu Keriso e faatatau i le matautia o le tosina ese ona o le soona popole. I lana valoaga e faatatau i aso o le iuga, na ia faalaeiau mai ai e faapea: “Ia outou, neʻi mafatia o outou loto i le soona ulavale, ma le ōna, ma le popole i mea a le olaga nei, neʻi faafuasei mai lea aso ia te outou e pei o se mailei; auā e oo mai ai i e nonofo uma lava i le fogāeleele uma. O lea ia outou mataala e le aunoa ma tatalo ina ia outou maua le malosi e sao mai ia mea uma ua tāli oo mai, ma ia tutū i luma o le Atalii o le tagata.” (Luka 21:34-36) E pei lava ona faaniniva pe a soona ʻai ma soona inu, o lea, o le soona “popole i mea a le olaga nei,” e mafai foi ona mou atu ai lo tatou mataala, ma oo ai i ni iuga matautia.
Le Mea e Taʻua o le Popole
3. Ua faauigaina faapefea le “popole,” ma o ā nisi o mea e māfua ai?
3 O le “popole,” ua faauiga o le, “tiga po o le lē toafilemu o le mafaufau e masani lava ona o se gasegase po o se faaletonu o faatalitalia.” O le “naunau fia iloa e mataʻu ai,” faatasi ma le “faatumulia i le lē toafimalie, ma le mataʻu e ō mai faatasi ma faailoga vaaia (e pei o le āfu, lē toʻa, ma le tātā vale o le fatu, e ala i le masalomia o tulaga moni o le faamatauga, faatasi ma le lē mautinoa totino e tusa ai ma le tomai o le tagata lava ia e onosai ai.” (Webster’s Ninth New Collegiate Dictionary) O lea, o le popole e mafai ona avea ma faafitauli lavelave. O nisi nei o mea e tele ina māfua ai, o le maʻi, faasolo ina matua, mataʻu i solitulafono, tuli ma le galuega, ma le naunau atu mo le lelei o lou lava aiga.
4. (a) O le ā e lelei ona manatua e uiga i tagata ma ō latou popolega? (e) Afai o iai ni ō tatou popolega, o le ā e mafai ona faia?
4 E mautinoa lava, e tele ituaiga o popolega, e pei lava ona iai tulaga eseese po o mea eseese e māfua ai. E lē tutusa le tali atu a tagata uma i se mea e tulai mai. E ui i lea, e ao ona tatou iloa e faapea, e tusa lava pe lē o faapopoleina i tatou i se mea, ae atonu o le mea lava lea e tasi ua avea o se popolega tele i nisi o ō tatou uso tapuai i a Ieova. O le ā se mea e mafai ona fai pe a oo atu le tele o le popole i se tulaga ua lē mafai ai ona tatou toe manatunatu loloto i le autasi ma le matagofie o upu moni o le Afioga a le Atua? Ae faapefea pe afai ua matuā pagatia i tatou i le popole ma ua lē mafai ai ona tatou taulai manino atu i le finauga o le pule silisili a Ieova ma le faamaoni faa-Kerisiano? Atonu e lē mafai ona tatou suia ō tatou tulaga. Na i lo lea, e manaomia ona tatou saili atu i ni manatu mai le Tusi Paia e aogā i a i tatou e faafetaiaia le popolevale e mafua mai ona o faafitauli tūgā o le olaga.
E Maua le Fesoasoani
5. E ono mafai faapefea ona tatou amioai e tusa ai ma le Salamo 55:22?
5 Pe a manaomia e Kerisiano le fesoasoani faaleagaga, ma ua mafatia i popolega, e mafai ona latou maua faamafanafanaga mai le Afioga a le Atua. Ua ia saunia fesoasoani maufaatuatuaina ma aumaia i a i tatou faamautinoaga e tele e faapea e lē o tuulafoaiina i tatou o ni auauna faamaoni a Ieova. Mo se faataitaiga, na pese le faisalamo o Tavita e faapea: “Ia e tuuina atu ia Ieova o mea e te popole vale ai; o ia lava na te tausia oe; na te le tuuina e faavavau le amiotonu ia faagaeetia.” (Salamo 55:22) E mafai faapefea ona tatou amioai e tusa ai ma nei upu? E ala lea i le tuuina atu o ō tatou popolega uma, mea o matatau i ai, ma faanoanoaga i lo tatou Tamā alofa faalelagi. O le a fesoasoani lenei mea e aumaia i a i tatou le lagona saogalemu ma le toafilemu o le loto.
6. E tusa ai ma le Filipi 4:6, 7, o le ā e mafai ona faia e le tatalo mo i tatou?
6 O tatalo fai soo mai le loto e tāua pe afai e tuu atu ō tatou mafatiaga e aofia ai ma ō tatou popolega uma i a Ieova. O le a tatou maua ai se toafilemu i totonu, auā na tusi mai faapea le aposetolo o Pauro: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia [“filemu,” NW] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6, 7) ‘O le filemu mai le Atua’ e lē mafaatusalia o se toafilemu uigaese lea o loo olioli ai auauna tuuina atu a Ieova e oo lava i tulaga e tulai mai ai faalavelave e sili ona faigata. E maua lea ona o la tatou faiā mafana totino ma le Atua. A o tatou tatalo atu mo le agaga paia ma tuu atu na te uunaia i tatou, e lē faapea e faasaolotoina ai i tatou mai faafitauli uma o le olaga, peitai tatou te maua le fua o le agaga o le filemu. (Luka 11:13; Kalatia 5:22, 23) Ua lē soona mafatia i tatou i le popole, auā ua tatou iloa e faia e Ieova ona tagata faamaoni ia ‘nonofo ma le filemu,’ ma na te lē faatagaina se mea e tupu e faaleagaina ai i tatou e faavavau.—Salamo 4:8.
7. O le ā le vaega e mafai ona faia e toeaina Kerisiano e fesoasoani ai i a i tatou e onosaia popolega?
7 E ui i lea, e faapefea pe afai e faaauau pea ona tatou popole, e ui lava o loo tatou manatunatu loloto i le Tusi Paia ma finafinau i le tatalo? (Roma 12:12) O toeaina tofia i le faapotopotoga, o se tasi ia o sauniuniga a Ieova e fesoasoani i a i tatou i le itu faaleagaga. E mafai ona latou faamafanafana ma fesoasoani i a i tatou e ala i le faaaogaina o le Afioga a le Atua, ma tatalo ma i tatou po o le tatalo foi mo i tatou. (Iakopo 5:13-16) Na augani atu le aposetolo o Peteru i ona uso a toeaina ina ia latou tausi i le lafu mamoe a le Atua ma le loto fiafia, ma le naunau, ma i se auala e fai ma faaaoaoga lelei. (1 Peteru 5:1-4) Ua iai i loto o nei tane se naunautaiga faamaoni mo lo tatou lelei, ma e fia fesoasoani mai. O le mea moni ina ia maua atoatoa aogā mai le fesoasoani a toeaina ma lelei le tulaga faaleagaga ma le faapotopotoga, e manaomia e i tatou uma lava ona faatatauina fautuaga nei a Peteru: “Ia faapea outou o e talavou, ia usiusitai i toeaina; ma ia oofu outou uma lava i le loto maulalo o le tasi i le tasi; auā, E tetee atu le Atua i e faamaualuluga, a e foaiina mai le alofa tunoa i e faamaulalo.”—1 Peteru 5:5.
8, 9. O le ā le faamafanafanaga e mafai ona maua mai i le 1 Peteru 5:6-11?
8 Na faaopoopo mai faapea Peteru: “O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai. Ia tuuina atu ia te ia mea uma tou te popole ai, auā o loo manatu mai o ia ia te outou. Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia; ia outou tetee atu ia te ia, o mausali outou i le faatuatua, ina ua outou iloa o loo oono lo outou au uso o i le lalolagi i ia lava mea tiga. A o le Atua e ona le alofa tunoa uma lava, o le na valaauina i tatou ia iu atu i lona mamalu faavavau o ia Keriso, pe a tigaina outou i nai aso, e faaatoatoaina outou e ia lava, e faatumauina, e faamalosia foi outou. Ia ia te ia le mana e faavavau faavavau lava. Amene.”—1 Peteru 5:6-11.
9 Maeu se faamafanafana loto i le iloa e mafai ona tatou ‘tuuina atu mea uma tatou te popole ai i le Atua auā e manatu alofa mai o ia i a i tatou’! Ma afai o nisi o ō tatou popolega e māfua mai i taumafaiga a le Tiapolo e faaleaga la tatou faiā ma Ieova, i lona aumaia lea o sauaga ma isi puapuaga i a i tatou, pe lē o se mea matagofie ea le iloa e faapea o le a iai taunuuga lelei mo ē tausisia pea le faamaoni? Ioe, pe a mavae sina taimi o lo tatou puapuaga, ona faaiu ai lea e le Atua e ōna le alofa mutimutivale le toleniina o i tatou ma faatumauina ma faamalosia i tatou.
10. O ā uiga e tolu ua faatatau i ai le 1 Peteru 5:6, 7 e mafai ona fesoasoani i a i tatou e faaitiitia ai le popole?
10 Ua faatatau le 1 Peteru 5:6, 7 i uiga e tolu na e mafai ona fesoasoani i a i tatou e onosaia ai popolega. O le tasi o nei uiga o le loto maulalo, po o le “faamaulalo.” Ua faaiu mai faapea le fuaiupu e 6, “i ona po e tatau ai,” ma ua fautuaina mai ai le manaomia ona onosai. Ua faaalia i le fuaiupu e 7 le mafai ona tatou tuu atu ma le mautinoa ō tatou popolega uma lava i le Atua, ‘auā e manatu mai o ia i a i tatou,’ ma ua faalaeiau mai e nā upu le tuu atu o le faatuatua atoatoa i a Ieova. Seʻi ō tatou tagaʻi nei la i ai pe faapefea i le loto maulalo, onosai, ma le faatuatua atoatoa i le Atua ona fesoasoani i a i tatou e faafetaiaia ai popolega.
Le Auala e Aogā ai le Loto Maulalo
11. E ono mafai faapefea ona fesoasoani le loto maulalo i a i tatou e faafetaiaia popolega?
11 Pe afai tatou te loto maulalo, o le a tatou taʻutino e sili atu ona maualuga manatu o le Atua na i lo o ō tatou lava manatu. (Isaia 55:8, 9) E fesoasoani le loto maulalo i a i tatou e iloa ai le tapulaa o ō tatou tomai e mafaufau ai pe a faatusatusa atu i le lē gata mai o le aoao ma le manino o le silasila a Ieova. Na te silafia mea tatou te lē o matauliaina, e pei ona aliali mai i le mataupu na aafia ai le tagata amiotonu o Iopu. (Iopu 1:7-12; 2:1-6) O le gauai atu ma le faamaulalo “i lalo o le aao malosi o le Atua,” ua tatou faailoa atu ai lo tatou tulaga faatauvaa e tusa ai ma le Pule Silisili Ese. O lea la, ua fesoasoani lenei mea tatou te onosaia ai tulaga o ia faatagaina. Atonu e faanaunau atu ō tatou loto mo se mapusaga vave, peitai ona e atoatoa le paleni lelei o uiga o Ieova, na te silafia lelei lava po o le ā tonu le taimi ma pe faapefea foi ona tali mai mo lo tatou lelei. O lea la, seʻi o tatou faalagolago atu ma le loto maulalo e tai pei o uiga o tamaiti i le aao malosi o Ieova, ma ia mautinoa o le a ia fesoasoani mai i a i tatou e faafetaiaia ō tatou popolega.—Isaia 41:8-13.
12. E ono mafai faapefea ona aafia le popole atu i le saogalemu e maua mai i mea faaletino pe afai tatou te faatatauina ma le loto maulalo upu o loo i le Eperu 13:5?
12 O le loto maulalo e aofia ai le naunau e faatatauina fautuaga mai le Afioga a le Atua, lea e masani lava ona faaitiitia ai le popole. Mo se faaaoaoga, afai ua māfua le popole ona o le matuā aafia i le sailia o mea faitino, atonu e lelei mo i tatou ona toe manatunatu i le fautuaga lenei a Pauro: “Ia aunoa a outou amio ma le matapeapea; ia gata ia o outou manao i mea ua ia te outou; auā ua fetalai mai o ia [le Atua], Ou te le tuua lava oe, ou te le tuulafoai lava ia te oe.” (Eperu 13:5) I le faatatauina ma le loto maulalo o lena fautuaga, ua faasaolotoina ai e le toatele i latou mai le soona popole e faatatau i le saogalemu e maua mai ona o mea faitino. E ui e lē o faaleleia lo latou tulaga tau tupe, ae e lē o pulea e na mea ō latou mafaufau ma oo ai ina faaleagaina faaleagaga.
Le Vaega a le Onosai
13, 14. (a) O le ā le faaaoaoga na saunia e Iopu e tusa ai i le tumau ma le onosai? (e) O le ā le mea e mafai ona faia mo i tatou i le faatalitali atu ma le onosai i a Ieova?
13 O le faaupuga “i ona po e tatau ai” o loo i le 1 Peteru 5:6, ua fautuaina mai ai le manaomia o le tutumau ma le onosai. I nisi o taimi e iai pea le faafitauli mo se taimi umi lava, ma e mafai i lea ona faateleina ai le popole. I tulaga faapea, e lelei ai ona tatou tuu atu le mataupu i aao o Ieova. Na tusi mai le soo o Iakopo e faapea: “Faauta, ua tatou taʻuamuia i e onosai. Ua outou faalogologo i le onosai o Iopu, ua outou iloa foi le iuga i la le Alii, ina ua mutimuti vale tele le Alii ma le alofa naunau.” (Iakopo 5:11) Na faaleagaina le tamaoaiga sa i a Iopu, maliliu lana fanau e toasefulu, na puapuagatia i se maʻi leaga, ma sa taʻusalaina ma le lē tonu e le au faamafanafana pepelo. E masani ona oo mai le popole ona o tulaga faapena.
14 Na avea Iopu ma faaaoaoga lelei o le faaalia o le tumau ma le onosai i so o se tulaga. Pe afai e oo mai i a i tatou ni tofotofoga matuiā ona o le faatuatua, atonu e ao ona tatou faatalitali atu mo le laveaiina, e pei ona sa faia e Iopu. Ae na fesoasoani mai le Atua i a Iopu, ma mulimuli ane ai lava tuusaolotoina o ia mai i ona puapuaga ma faaopoopo atu taui e tele mo ia. (Iopu 42:10-17) O le faatalitali atu ma le onosai i a Ieova e iu ai i lo tatou tumau mausali ma faaali atu ai le tele o lo tatou tuutoina atu i a te ia.—Iakopo 1:2-4.
Faatuatua i a Ieova
15. Aisea e ao ai ona tatou faatuatua atoatoa atu i a Ieova?
15 Na faamalosiau atu Peteru i uso talitonu ina ia ‘tuuina atu mea uma o popole ai i le Atua auā e manatu mai o ia i a i latou.’ (1 Peteru 5:7) O lea e mafai ona tatou faalagolago i a Ieova, ma e tatau ona tuu atu i ai lo tatou faatuatua atoatoa i a te ia. Ua faapea mai le Faataoto 3:5, 6: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” Ona o mea ua uma ona tutupu, ua faigata ai e isi o faatumulia i popolega ona talitonu i isi tagata. Peitai ua iai i a i tatou mafuaaga mautinoa e faatuatua ai i Lē na Foafoaina i tatou, o le Puna o lo tatou ola ma Lē e faatumauina. E tusa lava pe tatou te lē mautinoa i la tatou tali atu i se mataupu patino, ae e mafai ona tatou faalagolago atu e lē aunoa i a Ieova na te laveaiina i tatou i ō tatou puapuaga.—Salamo 34:18, 19; 36:9; 56:3, 4.
16. O le ā na fetalai i ai Iesu Keriso e tusa ai ma le popole i mea faaletino?
16 O le faatuatua i le Atua e aofia ai le usiusitai i lona Alo o Iesu Keriso, o lē sa aʻoaʻo atu mea na ia iloa mai i lona Tamā. (Ioane 7:16) Na faalaeiau atu Iesu i ona soo ina ia ‘teua mo i latou oa i le lagi’ e ala lea i le auauna atu i a Ieova. Ae faapefea manaoga faaletino e aofia ai mea e ʻai, lavalava, ma fale e nonofo ai? Na fautua mai Iesu e faapea: “Aua neʻi outou popole.” Na ia faailoa atu le fafagaina e le Atua o manu felelei. E teuteuina e ia fugalaau i ō latou ofu matagofie. Pe e lē sili ea ona tāua tagata o avea ma auauna a le Atua na i lo o nei mea? O le tulaga moni lava lea. O lea na faalaeiau mai ai Iesu e faapea: “A ia outou muai saili lona malo ma lana amiotonu [a le Atua]; ona faaopoopoina atu lea o ia mea uma ia te outou.” Na faaauau atili mai faapea Iesu: “O lenei, aua tou te popole i le aso a taeao; auā e popole le aso a taeao i ana lava mea. E tatau i le aso lona lava leaga.” (Mataio 6:20, 25-34) Ioe, tatou te manaomia mea e ʻaʻai ai, mea e inu ai, lavalava, ma fale e nonofo ai, ae afai tatou te faatuatua i a Ieova, o le a tatou lē soona popole i nei mea.
17. E mafai faapefea ona tatou faataitaia le manaomia o le faamuamua o le sailia o le Malo?
17 Ina ia faamuamua le sailia o le Malo, e ao ona tatou faatuatua i le Atua ma tatou tuu le faamuamua i mea e sili ona tāua. Atonu e maulu se tagata tofu i le taʻele o le sami e aunoa ma ni mea mānava e sailia se tifa o iai se penina i totonu. O lana galuega lea e maua mai ai le alagā tupe mo lona aiga. O le mea moni o se mea e faamuamua! Ae o fea e sili atu ona tāua? O le ea! E ao ona ia manu aʻe e lē aunoa ina ia faatumu ōna māmā i le ea. Ua avea ai le ʻea ma mea e sili atu ona tāua. I se uiga tali tutusa foi la faapena, atonu tatou te aafia i lenei faiga o mea auā le mauaina o mea e manaomia mo le olaga. Peitai ane, o mea faaleagaga e ao ona faamuamua ona e faalagolago i ai le mauaina e ō tatou aiga o le ola i nei mea. Ina ia alofia popolega lē tatau i manaoga faaletino, e ao ona i a i tatou le faatuatua atoatoa i le Atua. E lē gata i lea, o le ‘tele o mea e faia i le galuega a le Alii,’ e ono fesoasoani e faaitiitia ai le popole, “auā o le fiafia ia Ieova” ua faamaonia o lo tatou malosi lea.—1 Korinito 15:58; Neemia 8:10.
Faaauau Pea ona Tuuina atu i a Ieova Mea E te Popolevale Ai
18. O le ā le faamaoniga e iloa ai e aogā moni lava le tuu atu i a Ieova o mea uma tatou te popole ai?
18 Ina ia tumau pea ona manino le taulai atu faaleagaga, e ao ona faaauau pea ona tatou tuuina atu i a Ieova o mea uma o tatou popolevale ai. Ia manatua pea o loo manatu moni mai lava o ia i ana auauna. O se faataitaiga o lenei mea: Na iai se fafine Kerisiano na oo ina lē mafai ona moe ona ua faateleina le popole, talu ai ona ua lē faamaoni lana tane i a te ia. (Faatusatusa i le Salamo 119:28.) E ui i lea, i le taimi e taoto ai i le moega, na te tuuina atu ona popolega uma lava i a Ieova. Na te sasaa atu lona loto atoa i le Atua, o loo taʻu atu i a te ia le tiga o puapuagatia ai o ia ma lana fanau teine laiti e toalua. Pe a uma ona tatalo atu o ia ma le faatauanau mo se mapusaga, ona mafai ai loa lea e ia ona moe, auā na faatuatua o ia o le a tausia pea o ia ma lana fanau e Ieova. O lenei fafine ua tatalaina faale-Tusi Paia lana faaipoipoga, ua faaipoipo atu nei o ia ma le fiafia i se toeaina.
19, 20. (a) O ā nisi o auala e mafai ai ona tatou faafetaiaia ai popolega? (e) O le ā e ao ona tatou faia e lē aunoa i mea uma tatou te popolevale ai?
19 Ona o i tatou o tagata o Ieova, ua i a i tatou ala eseese tatou te faafetaiaia ai popolega. O le faatatauina o le Afioga a le Atua e tele sona aogā. Ua tatou maua le anoanoai o taumafa faaleagaga ua saunia mai e le Atua e ala mai i lana “auauna faamaoni ma le mafaufau,” e aofia ai mataupu aogā e maua ai le faafouina ua lomia i Le Olomatamata ma le Awake! (Mataio 24:45-47) Ua i a i tatou foi le fesoasoani a le agaga paia o le Atua. O le tatalo atu ma le faatauanau e lē aunoa, e aogā tele mo i tatou. Ua nofosauni foi toeaina Kerisiano tofiaina e tuuina atu le fesoasoani faaleagaga ma e naunau foi i latou e faamafanafana atu.
20 O lō tatou loto maulalo ma le onosai e aogā tele i le faafetaiaia o popolega atonu e oo mai i a i tatou. E sili foi ona tāua le faatuatua atoatoa atu i a Ieova, auā e tupu ai lo tatou faatuatua a o tatou maua lana fesoasoani ma lana taitaiga. O le iuga, o lo tatou faatuatua i le Atua, o le a mafai ai ona tatou lē soona popole. O le faatuatua o le a na uunaia i tatou e saili muamua le Malo ma faia mea e tele i le galuega e olioli ai a le Alii, lea e mafai ona fesoasoani i a i tatou e onosaia ai popolega. O galuega faapena, tatou te lagona ai le saogalemu, i le faatasi ma i latou o ē o le a pepese atu i viiga o le Atua e faavavau. (Salamo 104:33) O lea, seʻi faaauau ia ona tatou tuuina atu i a Ieova o mea uma tatou te popolevale ai.
O le a Faapefea ona E Tali?
◻ E ono faauiga faapefea le upu, popole?
◻ O ā nisi o auala e mafai ai ona tatou onosaia popolega?
◻ E mafai faapefea ona aogā le loto maulalo ma le onosai e faaitiitia ai popolega?
◻ A o faafetaiaia popolega, aisea e tāua ai le tuu atu o le faatuatua atoatoa i a Ieova?
◻ Aisea e ao ai ona faaauau ona tatou tuuina atu i a Ieova mea uma tatou te popolevale ai?
[Ata i le itulau 24]
Pe e te iloa aisea na fetalai atu ai Iesu, “Aua neʻi outou popole”?