Tusi o le Tusi Paia Numera 61—2 Peteru
Lē na Tusia: Peteru
Nofoaga na Tusia Ai: Papelonia (?)
Māeʻa Ona Tusia: Pe tusa o le 64 T.A.
INA ua tusia e Peteru lana tusi lona lua, na ia iloa ua lē o toe umi ae oo i lona oti. sa ia matuā faanaunau e faamanatu atu i ona uso Kerisiano le tāua o le poto saʻo e fesoasoani iā i latou e tumau mausalī ai i la latou faiva. Pe e iai ea se māfuaaga e fesiligia ai le tusiaina e Peteru o le tusi lona lua o loo faaigoa i lona igoa? Ua aveesea e le tusi lava ia so o se masalosaloga e ono tulaʻi mai e tusa ai ma lē na tusia le tusi. O loo faapea mai le tusitala o ia o “Simona Peteru, o le pologa ma le aposetolo a Iesu Keriso.” (2 Pete. 1:1 ) O loo ia taʻua le tusi lenei e faapea “o le tusi lona lua lenei ua ou tusi atu ai iā te outou.” (3:1) O loo ia faapea mai foʻi na ia vaaitino i le liliuina o Iesu Keriso, o se faaeaga na maua e Peteru, Iakopo ma Ioane, ma o lea sa ia tusia ai na mea e tusa ma lagona o sē na vaaitino i ai. (1:16-21) O loo ia taʻua ai foʻi le valoiaina e Iesu o lona maliu.—2 Pete. 1:14; Ioa. 21:18, 19.
2 Peitaʻi, ua faasino atu nisi tagata faimanatu i le eseese o auala o loo tusia ai tusi e lua e faapea ai e leʻi tusiaina e Peteru le tusi lona lua. Ae e lē o se faafitauli lea mea, auā e eseese mataupu ma māfuaaga na tusia ai nei tusi. E lē gata i lenā, na tusia e Peteru lana tusi muamua e ala iā “Siluano o le uso faamaoni,” ma pe afai sa iā Siluano le faitalia e faaupu ma faatulaga ai fuaiupu, e mafai la ona eseese le auala na tusia ai nei tusi e lua, auā e foliga mai e leʻi tusia e Siluano le tusi lona lua. (1 Pete. 5:12) Na fesiligia foʻi le aofia ai o le tusi i tusi ua faamaonia o le Tusi Paia talu ai “e tau lē o taʻua e Faatamā Faalelotu.” Ae ui i lea, e pei ona mātauina i le siata “O le Lisi o Tusitusiga Iloga Anamua e Faatatau i Tusitusiga Kerisiano Eleni,” na manatu le toʻatele o tusitala a o leʻi oo i le Third Council of Carthage e faapea na avea le tusi Lona Lua a Peteru ma vaega o tuufaatasiga o Tusitusiga Paia.
3 O anafea na tusia ai le tusi lona lua a Peteru? E malosi le manatu atonu na tusia pe tusa o le 64 T.A. i Papelonia po o se nofoaga e lata ane i ai, e lē umi se va ma le tusi muamua, peitaʻi e lē o faamaonia patino mai le nofoaga tonu. O le taimi lea na tusia ai le tusi, ua oo atu le tele o isi tusi a Paulo i faapotopotoga ma sa iloa foʻi e Peteru, lea na ia manatu o ni tusi faagaeeina ma na faavasegaina faatasi ma “isi mau uma o Tusitusiga Paia.” Na tusi atu le tusi lona lua a Peteru “i ē ua maua le faatuatua, o se faaeaga tutusa ma lea ua iā i matou,” ma na aofia ai i latou na avatu i ai le tusi muamua ma isi na talaʻi atu i ai Peteru. E faapei lava ona oo atu le tusi muamua i le tele o nofoaga, sa faapena foʻi le tusi lona lua.—2 Pete. 3:15, 16; 1:1; 3:1; 1 Pete. 1:1.
LE POGAI E AOGĀ AI
8 Maʻeu le manaʻomia o le poto saʻo! Na faaaofia e Peteru i ana faamatalaga le poto saʻo lea na ia maua mai i Tusitusiga Paia Eperu. Na ia faamaonia mai le faagaeeina i le agaga paia o nei tusi: “Auā e lē o le loto o tagata na aumai ai valoaga, ae na tautatala tagata i mea na faailoa mai e le Atua e ala i le taʻitaʻiga a le agaga paia.” Ua ia faailoa atu foʻi e faapea o le poto o Paulo na “foaʻiina atu iā te ia.” (1:21; 3:15) O le a matuā aogā iā i tatou pe a iloiloina nei Tusitusiga Paia uma ma taofi mau i le poto saʻo. Ona lē avea lea o i tatou ma ē e faatalalē pe lē manatu mamafa, e pei o i latou ia na faamatala e Peteru na latou faapea mai: “E leai lava se mea o suia talu mai le foafoaga o le lalolagi.” (2 Pete. 3:4) Tatou te lē paʻuʻū atu foʻi i le mailei a aʻoaʻo pepelo e pei o i latou ia o loo taʻua e Peteru i le mataupu e 2 o lana tusi. Nai lo lea, e tatau ona tatou iloiloina upu faamanatu na saunia mai e Peteru ma isi tusitala o le Tusi Paia. O le a fesoasoani lea iā i tatou e “tutū mausalī i le upu moni” ma onosai ma maumauaʻi ai e “tuputupu pea i le agalelei faifua ma le iloa e faatatau i lo tatou Alii ma le Faaola o Iesu Keriso.”—2 Pete. 1:12; 3:18.
9 Ina ia fesoasoani e faatuputeleina le “iloa lelei o le Atua ma Iesu lo tatou Alii,” na fautua mai Peteru ina ia faia ni taumafaiga maelega e atiina aʻe uiga faa-Kerisiano o loo lisiina i le mataupu 1, fuaiupu 5 e oo i le 7. Ae i le fuaiupu e 8, ua ia faapea mai atili: “Auā afai e iai nei mea iā te outou ma ua tele foʻi, e taofia ai outou ina neʻi outou paiē ma lē fua mai, e tusa ai ma le iloa lelei o lo tatou Alii o Iesu Keriso.” O se faalaeiauga matagofie moni lenei i le galulue ai o ni faifeʻau a le Atua i nei aso faigatā.—2 Pete. 1:5-8.
10 Maʻeu le tāua o le faia e se tasi o le mea sili na te mafaia ina ia faamautinoa ai le faia o se sao i “folafolaga tāua ma le matagofie” a Ieova le Atua! O lea ua timaʻia ai e Peteru Kerisiano faauuina ina ia taulaʻi atu i le sini o le Malo, i le faapea mai: “Ia outou saga finafinau ai ina ia faamautinoa le valaauina ma le filifilia o outou; auā a faaauau ona outou faia nei mea, e tou te lē paʻuʻū lava. O le mea moni, o le a faataga outou e ulufale atu ma le mamalu i le malo e faavavau o lo tatou Alii ma le Faaola o Iesu Keriso.” Na sosoo ai ma le tataʻi e Peteru o manatu i le maoaʻe o le mamalu o le Malo o Iesu, lea na ia vaaitino i ai a o faaali mai le vaaiga o lona liliuina, ma faapea mai atili: “O lea la, ua atili ai ona matou mautinoa i upu faavaloaga.” O le mea moni, o valoaga uma e tusa ai ma le Malo matagofie o Ieova o le a iai se faataunuuga. O le mea lea, e mafai ona tatou faaleoina atu ma le mautinoa upu a Peteru o loo sii mai i le valoaga a Isaia: “Ae e tatou te faatalitali i le lagi fou ma le lalolagi fou, e tusa ma lana folafolaga, e mau ai le amiotonu.”—2 Pete. 1:4, 10, 11, 19; 3:13; Isa. 65:17, 18.