Tusi o le Tusi Paia Numera 60—1 Peteru

Lē na Tusia: Peteru

Nofoaga na Tusia Ai: Papelonia

Māeʻa Ona Tusia: Pe tusa o le 62–64 T.A.

A O FOLAFOLA atu e uluaʻi Kerisiano uiga silisili ona lelei o le Atua, na tupu olaola ma faateleina le galuega o le Malo i le emepaea atoa o Roma. Ae peitaʻi, sa sesē manatu o isi i lenei vaega o tagata maelega. O se tasi o māfuaaga ona na tupuga mai la latou lotu mai Ierusalema ma na faia aʻe i tagata Iutaia, lea na manatu sesē ai nisi o i latou o le ʻau Iutaia mapolotu maelega valea sa pupū i faiga faapolotiki, o ē na lē lavā onosaia le nofo pologa ai i pulega faa-Roma ma latou faatupu vevesi ai i ē na pule i o latou vaipanoa. E lē gata i lea, sa ese Kerisiano ona sa latou mumusu e tapuaʻi atu i le emeperoa po o le aafia i sauniga faalelotu faapaupau i na ona aso. Na inosia i latou ma oo iai le tele o tofotofoga ona o lo latou faatuatua. O le talafeagai o le taimi na tusia ai ma le tōfā mamao e faamaonia ai le iai o le agaga o le Atua ina ua tusia e Peteru lana tusi muamua, e faalaeiauina ai Kerisiano ina ia tutumau mausalī ma apoapoaʻia i latou i le auala e ola ai i lalo o le pulega a Nero, le Kaisara o lenā taimi. Na faamaonia le fetaui lelei o le tusi ma lenā taimi pe a mafaufau atu i le tele o sauāga na aliaʻe ina ua faatoʻā uma lava ona tusia le tusi.

² Ua faailoa mai i upu amata o le tusi o Peteru lē na tusiaina. E lē gata i lenā, o loo siiina uma mai foʻi e Irenaeus, Kelemene o Alesania, Origen, ma Tetuliano le tusi e faapea o Peteru na tusiina.a Na matuā faamaonia le moni aʻiaʻi o le Peteru Muamua e pei lava foʻi o isi tusi faagaeeina. Ua taʻu mai e Eusipio iā i tatou sa tele ina faaaogā e toeaina o le lotu le tusi; e leai se fesiligia o lona moni aʻiaʻi i ona taimi (pe tusa o le 260-342 T.A.) ma o loo faasino uma atu foʻi i ai Ignatius, Heremea, ma Panapa o le senituri lona lua.b E ōgatusa lelei le Peteru Muamua ma isi Tusitusiga Paia uma, ma sa iai se feʻau tāua tele mo Kerisiano Iutaia ma ē e lē o ni Iutaia sa “aumau ma nonofo solo i Pono, i Kalatia, i Kapatokia, i Asia ma Pitunia” o itumalo o Asia Itiiti.—1 Pete. 1:1.

³ O anafea na tusia ai le tusi? Ua faaalia i le tusi sa fesagaʻia e Kerisiano tofotofoga, a lē ala mai i tagata faapaupau o tagata Iutaia e leʻi liulotu, ae o le taimi lea e leʻi amataina sauāga a Nero lea na faataunuuina i le 64 T.A. E faamaonia ai na tusia e Peteru le tusi a o leʻi oo i i le taimi lea, atonu i le va o le 62 ma le 64 T.A. E atili faamaonia lenei manatu ona o loo iai faatasi pea Mareko ma Peteru. I le taimi na faafalepuipuiina muamua ai Paulo i Roma (pe tusa o le 59-61 T.A.) sa iai faatasi Mareko ma Paulo ae o loo fuafua e malaga atu i Asia Itiiti; ma i le taimi na faafalepuipuiina faalua ai Paulo (pe tusa o le 65 T.A.), ae o loo sauni atu Mareko e toe alu atu iā Paulo i Roma. (1 Pete. 5:13; Kolo. 4:10; 2 Timo. 4:11) Atonu la o le va o le faafalepuipuiina muamua ma le faafalepuipuiina lona lua o Paulo na maua ai le avanoa la te faatasi ai ma Peteru i Papelonia.

⁴ O fea na tusia ai le Peteru Muamua? E ui lava e tau fai ioe uma le ʻaufaitofā o le Tusi Paia i le moni aʻiaʻi, i le aofia ai i le lisi o tusi ua faamaonia o le Tusi Paia, i lē na tusiaina, le aso atonu na tusia ai, ae eseese o latou manatu i le nofoaga na tusia ai. E tusa ai o le taʻutinoga a Peteru lava ia, na ia tusia lana tusi muamua a o iai i Papelonia. (1 Pete. 5:13) Ae ua manatu nisi e faapea na ia tusia i Roma, auā o “Papelonia” o le igoa faalilolilo lenā o Roma. Ae ui i lea, sa leʻi faamaoniaina lenā manatu. E leai se vaega o le Tusi Paia o faaalia ai o loo faasino patino atu i Papelonia faapea o Roma. Ona sa tusi atu Paulo iā i latou na iai i itumalo moni lava o Pono, Kalatia, Kapatokia, Asia, ma Pitunia, e tatau foʻi la ona manatu na faasino atu o ia i le nofoaga moni lava e taʻu o Papelonia. (1:1) Na iai se māfuaaga lelei na iai ai Peteru i Papelonia. Na tuuina atu iā te ia ‘le tala lelei mo ē ua peritomeina’ ma na iai se aofaʻiga tele o tagata Iutaia na i Papelonia. (Kala. 2:7-9) Na faasino atu le Encyclopaedia Judaica, ina ua talanoaina le faiga o le tusi a Papelonia o le Talmud i “aʻoga maualuluga [faa-Iutaia] i Papelonia” a o faagasolo Aso Taatele.c

⁵ Tusitusiga Paia lea e aofia ai ma tusi e lua na tusia e Peteru, e lē o taʻua ai na alu Peteru i Roma. I le taʻua foʻi e Paulo o lona iai i Roma na te leʻi taʻua lava le iai o Peteru i inā. Sa taʻua e Paulo igoa o tagata e toʻa 35 i lana tusi na avatu i Roma ma aualofa atu i nisi e toʻa 26, ae aiseā na ia lē taʻua ai Peteru? Atonu ona e leʻi iai i inā i lenā taimi Peteru! (Roma 16:3-15) O “Papelonia” lea na tusia mai ai e Peteru lana tusi muamua, e foliga mai o Papelonia moni lava lea sa i le auvai o le Vaitafe o Eufirate i le agaʻi i Mesopotamia.

LE POGAI E AOGĀ AI

¹¹ Ua iai i le tusi muamua a Peteru ni fautuaga talafeagai mo ovasia. I le faamamafaina o le apoapoaʻiga a Iesu o i le Ioane 21:15-17 ma le fautuaga a Paulo i le Galuega 20:25-35, ua faailoa atili mai e Peteru o le galuega a le ovasia o se galuega faaleoleo mamoe, ia faia ma le lē manatu faapito, ia lotomalie ma iai se uiga naunau. O le ovasia o se leoleo mamoe lagolago, e auauna ma le usiusitai atu i le “leoleo mamoe sili” o Iesu Keriso, ma e tali atu o ia iā Iesu e tusa ai ma le lafu mamoe a le Atua, i le avea o ia ma faataʻitaʻiga i le tausiaina o o latou manaʻoga ma ia loto maulalo.—5:2-4.

¹² E tele isi vala o le gauaʻi faa-Kerisiano na lāvea i le tusi a Peteru, ma na ofoina atu ai ni fautuaga sili ona lelei. I le 1 Peteru 2:13-17, o loo fautuaina ai le gauaʻi talafeagai i ē pule, e pei o tupu ma kovana. Ae ui i lea, e ao ona fai faatatau lenei gauaʻi ona o le Alii faapea ma le “matataʻu i le Atua” lea e ana Kerisiano o loo avea ma auauna. Ua timaʻia ai auauna i le aiga ina ia gauaʻi atu i o latou matai ma ia loto tetele pe afai latou te tigā “ona o lona lotofuatiaifo i luma o le Atua.” Na tuuina atu foʻi i avā fautuaga tāua e tusa ai ma lo latou gauaʻi atu iā latou tane, e aofia ai ma tane lē talitonu, e faaalia ai o lo latou tulaga mamā ma amioga faaaloalo “o mea tautele ia i le silafaga a le Atua,” ma e ono tosina mai ai a latou tane i le upu moni. Ina ia faamamafa lenei manatu, o loo faaaogā ai i inei e Peteru le faataʻitaʻiga o le gauaʻi faamaoni o Sara iā Aperaamo. (1 Pete. 2:17-20; 3:1-6; Kene. 18:12) E faapena foʻi i tane, e tatau ona faia lo latou tulaga ulu ma le magafagafa “i le ipu e sili ona vaivai.” I lenei lava mataupu, ua timaʻi mai ai Peteru: “Ia faapea outou tauleleʻa, ia gauaʻi i toeaina.” Ona ia faamamafa lea o le manaʻomia o le loto maulalo ma le faamaulalo, o se uiga faa-Kerisiano o loo faamamafa i lana tusi atoa.—1 Peteru 3:7-9; 5:5-7; 2:21-25.

¹³ I le taimi ina ua amata ona toe aliaʻe tofotofoga ma sauāga ogaoga, na saunia ai e Peteru ni faalaeiauga e faamalosia ai, ma o loo aogā moni lana tusi iā i latou uma o loo fesagaʻi ma na tofotofoga i aso nei. Mātau le auala na ia tataʻi atu ai i Tusitusiga Eperu i le siiina mai o afioga a Ieova: “E tatau ona paia outou, auā o aʻu nei e paia lava.” (1 Pete. 1:16; Levi. 11:44) I le vaega o loo tele ina faasino atu ai i isi tusi faagaeeina, ua faaali ai le auala o loo fausia aʻe ai le faapotopotoga Kerisiano e pei o se fale faaleagaga o maa ola e faavae iā Keriso. Ae o le ā le fuafuaga? “A o outou o ‘se vaega ua filifilia, o ositaulaga ua avea ma tupu, o le nuu paia, o tagata ua faapitoa mo le Atua, ina ia outou faalauiloa atu uiga silisili ona lelei’ o lē na valaauina outou mai le pōuliuli i lona malamalama matagofie”.” (1 Pete. 2:4-10; Isa. 28:16; Sala. 118:22; Isa. 8:14; Eso. 19:5, 6; Isa. 43:21; Ho. 1:10; 2:23) O i latou nei o “ositaulaga ua avea ma tupu,” le faiva faaositaulaga lea e aofia uma ai le nuu paia o le Atua, lea o loo faailoa atu i ai e Peteru le folafolaga o le Malo o “se tofi e lē pala, e lē faaleagaina, ma e lē mavae,” o “se pale mamalu e lē mamae,” o le “mamalu e faavavau ona o le autasi ma Keriso.” Sa matuā faalaeiauina ai lava i latou e faaauau pea ona olioli ina ia latou ‘fiafia ma olioli ai i le taimi o le faaaliga o lona mamalu.’—1 Pete. 1:4; 5:4, 10; 4:13.

[Faaopoopoga i lalo]