Le Iʻuga o le Lalolagi​—Mataʻu, Naunau, ma Lē Fiafia

O LE ā sou manatu e uiga iā Tesema 21, 2012, o le aso lenā i le kalena a tagata Maya, na manatu ai le toʻatele o le a oo mai ai le tele o suiga i le lalolagi atoa? E faalagolago lava i le mea sa e faatalitalia, atonu sa e lagona ai le mapu o le mafaufau, le lē fiafia, po o le lē ano foʻi i ai. Po ua na o se valoaga lē moni e pei o isi foʻi valoaga e uiga i le iʻuga o le lalolagi?

Ae faapefea “le gataaga o le lalolagi” lea e taʻua i le Tusi Paia? (Mataio 24:3, Tusi Paia Samoa-Lomiga 1969) E matataʻu nisi tagata i le susunuina o le lalolagi. O isi e naunau e fia iloa po o le ā o le a tupu pe a oo mai le iʻuga. A o isi ua fiu i le faalogo soo i tala ua lata mai le iʻuga. Po ua māfua ona iai i tagata na faalogona ona o ni tala na faalogo i ai ae e lē moni?

E ono faateʻia oe i manatu o le Tusi Paia e uiga i le iʻuga o le lalolagi. E lē gata o loo taʻua ai māfuaaga e tatou te tulimataʻia ai le iʻuga, ae faapea foʻi māfuaaga e ono manatu ai isi ua tuai tele mai le iʻuga, ma ua fiu e faatalitali. E matou te valaaulia oe e iloilo tali a le Tusi Paia i nisi o fesili masani e uiga i le iʻuga o le lalolagi.

Po o le a susunuina le lalolagi

TALI A LE TUSI PAIA: ʻUa faavaeina e le Atua le lalolagi i luga o ona faavae malolosi; e lē maluelue e faavavau, faavavau lava.’​—SALAMO 104:5.

E lē faaumatiaina le lalolagi i se afi po o se isi lava mea. Ae ua aʻoaʻoina i le Tusi Paia, o le lalolagi paneta o le nofoaga lea e faavavau mo tagata. Ua taʻua i le Salamo 37:29: “E fai lava le lalolagi mo ē e amiotonu, e nonofo ai pea i latou e oo i le faavavau.”​—Salamo 115:16; Isaia 45:18.

Ina ua uma ona foafoaina le lalolagi, na fetalai le Atua e faapea “ua matuā lelei lava,” ma o loo tumau pea ona manatu o ia faapena. (Kenese 1:31) Ua ia folafola mai o le a ʻfaafanoina i latou o loo faaleagaina le laueleele,’ o lona uiga, o le a lē faaumatiaina lava le lalolagi.​—Faaaliga 11:18.

Ae atonu e te manatu i le 2 Peteru 3:7 lea e faapea mai: “Ua tuu ai le lagi ma le lalolagi o loo iai i le taimi nei mo le afi.” Po o lona uiga o le a susunuina le lalolagi? O le mea moni, o nisi taimi e faaaogā faafaatusa ai e le Tusi Paia upu “lagi,” “lalolagi,” ma le “afi.” O se faataʻitaʻiga, ua faapea mai le Kenese 11:1: “Sa tautatala le lalolagi uma i le gagana e tasi,” mātau, o loo faaaogā le upu “lalolagi” e faasino atu i le sosaiete o tagata.

O fuaiupu o loo siʻomia ai le 2 Peteru 3:7, ua iloa ai e faafaatusa le lagi, lalolagi, ma le afi. O loo taʻua i le fuaiupu e 5 ma le 6 sa faaumatia le lalolagi tuai i le Lolo o aso o Noa, ae e leʻi mou atu ai le lalolagi paneta. Nai lo lea, na faaumatia ai se sosaiete o tagata po o se “lalolagi” o tagata sauā, faapea ma se ituaiga o “lagi,” lea e faasino atu i taʻitaʻi sa iai i lenā taimi. (Kenese 6:11) I se tulaga taitutusa, o loo valoia i le 2 Peteru 3:7 le faaumatiaga aʻiaʻi o le sosaiete o tagata leaga ma ana faigāmalo piʻopiʻo, e pei o loo faaumatia i se afi.

O le ā e tupu i le iʻuga o le lalolagi?

TALI A LE TUSI PAIA: “E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.”​—1 IOANE 2:17.

O le “lalolagi” o le a mavae atu e lē o faasino i le paneta, ae o le lalolagi o tagata e lē o ola e tusa ma le finagalo o le Atua. E pei lava ona aveese e se fomaʻi se tuma o le kanesa ina ia faasaoina le ola o se maʻi, e faapena foʻi ona “faaumatia” e le Atua tagata leaga, ina ia olioli ai tagata lelei i le olaga i le lalolagi. (Salamo 37:9) Pe a fua la i ai, o le iʻuga o le lalolagi o se mea lelei.

O lenā vaaiga saʻo e uiga i le iʻuga o le lalolagi, o loo taʻua foʻi i nisi o faaliliuga o le Tusi Paia e faapea, o “le taufaaiʻuiʻuga o le faiga o mea a le lalolagi,” po o le “iʻuga o se vaitaimi.” (Mataio 24:3; New International Version) Pe afai la o le a faasaoina tagata lelei ma le lalolagi paneta i le iʻuga, po o lona uiga la e iai se isi faiga fou o mea o loo mulimuli mai? Ioe, auā o loo taʻua pea i le Tusi Paia e iai se isi “faiga o mea o le a iai i le lumanaʻi.”​—Eperu 6:5.

Na taʻua e Iesu lenā vaitaimi o le a “toe faafouina ai mea uma.” O le taimi lenā o le a ia toe faafoʻisia ai le tulaga o mea ia na muaʻi fuafuaina e le Atua. (Mataio 19:28) O le a tatou maua ai mea nei

• Se lalolagi parataiso saogalemu ma e maua ai mea uma e manaʻomia.​—Isaia 35:1; Mika 4:4.

• O galuega e aogā ma e faamalieina ai.​—Isaia 65:21-23.

• Aveesea maʻi uma.​—Isaia 33:24.

• Toe faafoʻisia i le tulaga talavou.​—Iopu 33:25.

• Toe faatutū mai ē ua maliliu.​—Ioane 5:28, 29.

Pe a tatou faia “le finagalo o le Atua” faapea ma mea e na te manaʻomia mai iā i tatou, ona tatou lē matataʻu lea i le iʻuga o le lalolagi. Nai lo lea, o le a tatou tulimataʻia lenā taimi.

Pe e moni ua lata mai le iʻuga o le lalolagi?

TALI A LE TUSI PAIA: “Pe a outou vāai ua tutupu nei mea, ia outou iloa ua latalata mai le malo o le Atua.”​—LUKA 21:31.

I le tusi The Last Days Are Here Again, na taʻua ai e le polofesa o Richard Kyle, “o suiga faafuaseʻi i le tulaga o mea ma fevesiaʻiga i le vafealoaʻi, ua faia ai e nisi ni valoaga e uiga i mea o le a tutupu i le iʻuga o le lalolagi,” aemaise lava pe a lē malamalama tagata i na suiga ma tulaga faigatā.

Peitaʻi, e leʻi filifili perofeta o le Tusi Paia e tusi e uiga i le iʻuga, ina ia faamatala ai le māfuaaga o mea leaga na tutupu i o latou aso. Nai lo lea, na faagaeeina e le Atua i latou e faamatala mea o le a tutupu e iloa ai ua lata mai le iʻuga o le lalolagi. Mātau nisi o na valoaga, ma faamaonia ai e oe lava po ua taunuu na valoaga i o tatou taimi.

• Taua, oge, mafuiʻe, ma faamaʻi oti.​—Mataio 24:7; Luka 21:11.

• Faatuputupulaʻia solitulafono.​—Mataio 24:12.

• Faaleagaina e tagata le lalolagi.​—Faaaliga 11:18.

• O tagata e alolofa iā i latou lava, o tupe, ma mea faafiafia ae e lē alolofa i le Atua.​—2 Timoteo 3:2, 4.

• Leai se lotoaiga.​—2 Timoteo 3:2, 3.

• Lē amanaʻia o faamaoniga ua lata mai le iʻuga.​—Mataio 24:37-39.

• Talaʻia le tala lelei o le Malo o le Atua i le lalolagi atoa.​—Mataio 24:14.

Na fetalai Iesu, pe a vaaia “nei mea uma,” ona iloa lea ua lata mai le iʻuga o le lalolagi. (Mataio 24:33) E talitonu Molimau a Ieova e moni nei faamaoniga, ma ua faasoa atu o latou talitonuga i isi e ala i le talaʻi i atunuu e 236.

Po o le a lē taunuu le iʻuga o le lalolagi ona o valoaga sesē?

TALI A LE TUSI PAIA: “Pe a latou faapea ane: ʻUa filemu ma saogalemu!’ ona oo faafuaseʻi mai loa lea o le faaumatiaga iā i latou, e pei o le tigā o le fafine tō o le a fanau; ma e latou te lē sao ai lava.”​—1 TESALONIA 5:3.

Ua faatusaina e le Tusi Paia le faaumatiaga o le lalolagi i se fafine ua faatigā o le a fanau, auā e faatalitalia e se fafine tō e oo faafuaseʻi tigā iā te ia. O le taimi e agaʻi atu i le iʻuga o le lalolagi e tai pei foʻi o le fafine tō, auā e iloa e se tinā o le a faateteleina ona tigā. E tusa pe e taumatemate e le fomaʻi le aso e fanau ai, po ua tuai foʻi ona fanau, ae e mautinoa lelei e le tinā e lē o toe umi ona fanau loa lea. I se tulaga taitutusa, e ui e leʻi oo mai le iʻuga o le lalolagi, ae e lē suia ai le mea moni, o lea ua tatou iai i “aso e gata ai.”​—2 Timoteo 3:1.

E te ono tuufesili, ʻPe afai o lea ua vaaia faailoga e iloa ai ua lata mai le iʻuga, aiseā la ua lē amanaʻia ai e le toʻatele o tagata?’ Ua faaalia mai e le Tusi Paia, e toʻatele o le a lē ano i faamaoniga ua lata mai le iʻuga. Nai lo o le amanaʻia o le tulaga leaga ua iai nei, ua latou tauemu mai e faapea: “E mai lava i le aso na maliliu ai o tatou augātamā, e leai lava se mea o suia talu mai le foafoaga o le lalolagi.” (2 Peteru 3:3, 4) I nisi faaupuga, e ui ua manino mai faailoga o aso e gata ai, ae e toʻatele o le a lē amanaʻiaina.​—Mataio 24:38, 39.

Ua iloiloina i lenei mataupu nisi o faamaoniga faale-Tusi Paia e iloa ai le lata mai o le iʻuga.a Pe e te fia iloa atili nisi faamatalaga? Pe afai o lea, ia faafesootaʻi Molimau a Ieova mo se suʻesuʻega faale-Tusi Paia e aunoa ma se totogi. E mafai ona faia na suʻesuʻega i lou maota, se isi nofoaga e talafeagai ma oe, po o le telefoni foʻi. E na o lou taimi e manaʻomia, ae o le a e maua ai ni aogā tautele.