Pe ua e Nofo Sauni ea mo le Aso o Ieova?

“O loo latalata mai le aso tele o Ieova, e lata mai lava, o loo matuā tele vave mai lava.”—SEFANAIA 1:14.

1. E faapefea ona faamatalaina e le Tusi Paia le aso o Ieova?

UA LĒ o toe mamao ona oo mai lea o le “aso tele ma le silisili o Ieova” i luga o lenei faiga amioleaga o mea. E faamatalaina e le Tusi Paia le aso o Ieova o se aso o le taua, e pogisa, e maʻemaʻeā, e faavauvau, e toatamai, e faateʻia ai, ma le faatamaʻiaga. Peitai, o le a iai ē faasaoina, auā e “faaolaina o i latou uma lava o e valaau atu i le suafa o Ieova.” (Ioelu 2:30-32; Amosa 5:18-20) Ioe, o le a faaumatia ai loa e le Atua ona fili ae faasaoina ona tagata.

2. Aisea e tatau ai ona ia i tatou le uiga o le faanatinati i le aso o Ieova?

² Sa faafesootaia e perofeta a le Atua se uiga o le faanatinati ma le aso o Ieova. Mo se faataitaiga, na tusi mai faapenei Sefanaia: “O loo latalata mai le aso tele o Ieova, e lata mai lava, o loo matuā tele vave mai lava.” (Sefanaia 1:14) Ua avea le tulaga o loo iai ma pogai ua sili atu ai ona faanatinati mea i aso nei, auā ua toe nei o se aga, ona fusi lea e le Faaoosala Sili a le Atua, o le Tupu o Iesu Keriso, ‘lana pelu i lona sulugatiti, ma tietie atu ona o le upu moni, le agamalu, ma le amiotonu.’ (Salamo 45:3, 4) Pe ua e nofo sauni ea mo lena aso?

Sa Tetele o Latou Faamoemoega

3. O ā faamoemoega sa iai i nisi Kerisiano Tesalonia, ma o ā mafuaaga e lua na sese ai i latou?

³ E toatele na faivavale o latou faamoemoega e tusa ai o le aso o Ieova. Na faapea mai nisi uluai Kerisiano i Tesalonia, ‘Ua oo mai nei le aso o Ieova!’ (2 Tesalonia 2:2) Peitai e lua mafuaaga autū na lē oo mai ai i lena taimi. I le sii mai o se tasi o nei mafuaaga, na faapea mai ai le aposetolo o Paulo: “Auā pe a latou fai ane, ‘O loo filemu, ua le afaina,’ ona oo lea ia te i latou o le fano faafuasei.” (1 Tesalonia 5:1-6) I lenei ‘taimi o le iuga’ o loo tatou faatalitalia ai le faataunuuga o na upu. (Tanielu 12:4) Sa lei iai foi i tagata Tesalonia le isi faamaoniga o le oo mai o le aso o Ieova, auā na taʻu atu e Paulo ia i latou: “E le oo mai lena aso, seia muai ona taunuu o le teteʻa ese [“aposetasi,” NW].” (2 Tesalonia 2:3) Ina ua tusia e Paulo na upu (pe tusa o le 51 T.A.), o le taimi lea sa lei matuā atoatoa le tuputupu aʻe o “le aposetasi” mai le Faa-Kerisiano moni. I aso nei, ua tatou vaaia ai lona matuā mauaa atoatoa i totonu o Kerisinetoma. E ui lava i o latou faamoemoega faivavale, ae sa auauna faamaoni pea i le Atua i latou faauuina faamaoni sa iai i Tesalonia, seia oo lava i lo latou oti, ma mulimuli ane ai o latou mauaina le taui faalelagi. (Faaaliga 2:10) O le a tauia foi i tatou pe afai tatou te tutumau pea i le faamaoni a o tatou faatalitalia le aso o Ieova.

4. (a) O le ā le mea lea ua faafesootai atu i ai le aso o Ieova i le 2 Tesalonia 2:1, 2? (e) O ā manatu sa iai i ē na taʻua o Faatamā o le Lotu e tusa ai o le toe afio mai o Keriso ma isi mataupu na sootaga atu i ai?

⁴ Ua faafesootai e le Tusi Paia “le aso tele o Ieova” ma “le afio mai [“faatasi mai,” NW] o lo tatou Alii o Iesu Keriso.” (2 Tesalonia 2:1, 2) Sa tele manatu faaalia o ē na taʻua o Faatamā o le Lotu e tusa ai o le toe afio mai o Keriso, lona faatasi mai, ma lana Pulega o le Afe Tausaga. (Faaaliga 20:4) I le senituri lona lua T.A., sa talitonu ai Papias o Iarapoli i faamoemoega o le matuā fua tele mai o le laueleele a o faagasolo le Pulega Faameleniuma a Keriso. Sa taʻua soo e Justin Martyr le faatasi mai o Iesu ma sa ia faatalitalia ai le toe fausiaina o Ierusalema e avea ma laumua o Lona Malo. Na aʻoaʻo e Irenæus o Lyons [Falani] e faapea pe a uma ona faaumatia le Emepaea o Roma, o le a vaaia e mata le faaali mai o Iesu, ona fusifusia lea o Satani, ma nofotupu i Ierusalema faalelalolagi.

5. O le ā ua fai mai ai nisi tagata popoto faapitoa e faatatau i le “Afio Faalua” mai o Keriso ma lana Pulega Faameleniuma?

⁵ Na matauina e le tusitala o talafaasolopito o Philip Schaff e faapea “o le talitonuga e sili ona mataina” i le vaitaimi a o lei faia le Fonotaga i Nicaea i le 325 T.A., o “le talitonuga lea i le vaaia e mata o le nofotupu o Keriso i le mamalu faatasi ma tagata paia o le a toe tutū mai, i luga o le lalolagi mo tausaga e afe, a o lei oo i le toe tutū o le toatele ma le faamasinoga.” Ua taʻua faapea e le Dictionary of the Bible, na faatonutonuina e James Hastings: “Na faatalitali pea e Tetuliano, o Irenæus, ma Hippolytus se Afio Faalua vave mai [o Iesu Keriso]; ae o Faatamā o le Alexandrine ua toe suia ai nei o matou manatu. . . . Talu ai le faailoaina mai e Aokusotino o le Meleniuma e tusa ma le vaitaimi o le olaola o le Lotu, ua tolopo ai le Afio Faalua mai i se taimi e lei tāitai mai lava i le lumanai.”

Le Aso o Ieova ma le Faatasi Mai o Iesu

6. Aisea e lē tatau ai ona tatou manatu faapea o loo mamao le oo mai o le aso o Ieova?

⁶ O manatu lē saʻo ua taʻitaʻia atu i lagona lē fiafia, ae seʻi aua lava neʻi o tatou manatu faapea o loo mamao le oo mai o le aso o Ieova. O le faatasi mai lē vaaia o Iesu, lea e faafesootaia faatasi e le Tusi Paia ma lea aso, ua amataina. E masani i Le Olomatamata ma isi lomiga faapena a Molimau a Ieova ona aumaia ai ni faamaoniga faale-Tusi Paia e faapea na amata le faatasi mai o Keriso i le tausaga e 1914.a O lea la, o le ā na fetalai ai Iesu e faatatau i lona faatasi mai?

7. (a) O ā nisi o vala o le faailoga o le faatasi mai o Iesu ma le faaiuiuga o le faiga o mea? (e) E mafai faapefea ona faasaoina i tatou?

⁷ Sa avea le faatasi mai o Iesu o se mataupu mo talanoaga ina ua toeitiiti oo i lona maliu. Ina ua uma ona faalogo atu i lona valoiaina o le faaumatiaga o le malumalu i Ierusalema, ona fesili lea o ona aposetolo o Peteru, Iakopo, Ioane, ma Aneterea: “Pe oo afea ia mea, ma o le ā foi le faailoga o lou faatasi mai ma le faaiuiuga o le faiga o mea?” (Mataio 24:1-3, NW; Mareko 13:3, 4) I le tali atu, sa valoia ai e Iesu taua, o oge, o mafuie, ma isi vala o “le faailoga” o lona faatasi mai ma le faaiuiuga o le faiga o mea. Na ia fetalai foi: “O lē tumau seia oo i le gataaga, e faaolaina lea.” (Mataio 24:13) O le a faasaoina i tatou pe afai tatou te tutumau faamaoni seia oo i le iuga o lo tatou olaga nei po o le iuga o lenei faiga amioleaga.

8. A o lei oo i le iuga o le faiga o mea faa-Iutaia, o le ā le mea sa tatau ona faataunuuina, ma o le ā ua faia i ai i aso nei?

⁸ A o lei oo mai le iuga, o le a faataunuuina se vala e sili ona tāua o le faatasi mai o Iesu. E tusa ai o lena vala, na ia fetalai ai e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) A o lei faaumatia e autau a Roma Ierusalema ma faaiuina le faiga o mea faa-Iutaia i le 70 T.A., sa mafai e Paulo ona faapea mai o le tala lelei sa “talaʻiina atu foi i tagata uma lava i le lalolagi.” (Kolose 1:23) Peitai, i aso nei, ua faia ai se galuega talaʻi e sili mamao atu ona telē e Molimau a Ieova “i le atu laulau uma.” I ni nai tausaga ua mavae atu, ua tatalaina ai e le Atua le ala mo se molimau tele ina ia faia i Europa i Sasaʻe. I le faaaogaina o masini lomitusi ma isi fale i le lalolagi aoao, ua matuā nofo sauni ai le faalapotopotoga a Ieova mo ni gaoioiga faateleina, e oo lava i “oganuu sa lei galueaiina.” (Roma 15:22, 23, NW) Po o uunaia ea oe e lou loto e faia le mea silisili i le avatuina o se molimau a o lei oo mai le iuga? Afai o lea, e mafai e le Atua ona faamalosia oe ina ia iai sau vaega tauia i le galuega o loo i luma.—Filipi 4:13; 2 Timoteo 4:17.

9. O le ā sa autū i ai le manatu o Iesu, e pei ona faamauina i le Mataio 24:36?

⁹ Ua faataunuuina nei le galuega talaʻi o le Malo lea na valoia mai ma isi vala o le faailoga o le faatasi mai o Iesu. O lea, ua latalata mai le iuga mo lenei faiga amioleaga o mea. E moni, na fetalai Iesu: “A o lea aso ma lea itu aso e le iloa e se tasi, e le iloa lava e agelu i le lagi, e le iloa foi e le Atalii, ua na o le Tamā lava.” (Mataio 24:4-14, 36) Ae e mafai e le valoaga a Iesu ona fesoasoani ia i tatou ina ia nofo sauni ai mo “lea aso ma lea itu aso.”

Sa Latou Nofo Sauni

10. E faapefea ona tatou iloa e mafai ona mataala pea faaleagaga?

¹⁰ Ina ia faasaoina mai le aso tele o Ieova, e tatau ona tatou mataala faaleagaga ma tutū mausalī mo le tapuaiga moni. (1 Korinito 16:13) Ua tatou iloa e mafai ona faia lena tutumau, auā sa faia faapena e se aiga sa matataʻu i le Atua ma faasaoina ai i latou mai le Lolo lea na faaumatia ai tagata amioleaga i le 2370 T.L.M. I le faatusatusaina o lena vaitaimi i lona faatasi mai, na fetalai ai Iesu: “A e pei o ona po o Noa, e faapea foi pe a sau le Atalii o le tagata. Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, na le iloa foi e i latou ina seia oo le lolo, ma aveesea i latou uma; e faapea foi pe a sau le Atalii o le tagata.”—Mataio 24:37-39.

11. O le ā le ala na tausisia e Noa e ui lava i faiga sauā sa iai i ona aso?

¹¹ I le pei o i tatou, sa ola Noa ma lona aiga i se lalolagi na tumu i le sauā. Sa liutagata “atalii [agelu] o le Atua” ma fai ai ni avā ia na avea ai i latou ma tamā o Nefilimi lauiloa i le amioleaga—o tagata fia pule sauā e mautinoa o i latou ia ua atili ai ona sauā tulaga na iai. (Kenese 6:1, 2, 4; 1 Peteru 3:19, 20) Ae peitai, ‘sa feoai Noa ma le Atua moni’ i le faatuatua. Sa avea o ia “o le tagata amiotonu ia ma le sao i e tupulaga ma ia”—o le tupulaga amioleaga o ona aso. (Kenese 6:9-11) I le faalagolago atu i le Atua faatasi ma le tatalo, e mafai ai ona tatou faia le mea lava lea e tasi i lenei lalolagi sauā ma le amioleaga, a o tatou faatalitalia le aso o Ieova.

12. (a) E lē gata i le fausiaina o le vaa, ae o le ā le isi galuega sa faia e Noa? (e) Sa faapeī le tali mai a tagata i le talaʻiga a Noa, ma o ā āuga na oo ai ia i latou?

¹² Sa lauiloa Noa o lē na fauina se vaa mo le faasaoina o ola i le taimi o le Lolo. Sa avea foi o ia o “lē talaʻi le amiotonu,” peitai “na lē amanaia” e ē na latou feola i lena vaitaimi lana feau lea na auina mai e le Atua. Sa latou aai ma inu, faaipoipo, faifanau, ma faaauau ai lava i mataupu masani o le olaga seia oo ina tafiesea uma i latou e le Lolo. (2 Peteru 2:5; Kenese 6:14) Sa latou lē fia faalogo atu i tala ma amioga saʻo, e pei lava ona pupuni taliga o le tupulaga amioleaga o aso nei e lē fia faalogo i mea o loo fai atu ai Molimau a Ieova e faatatau i le “salamo i le Atua,” le faatuatua ia Keriso, le amiotonu, ma le “faamasinoga atali.” (Galuega 20:20, 21; 24:24, 25) E leai se faamaumauga o maua i le po o le ā le toatele o tagata i le lalolagi a o folafola atu e Noa le feau a le Atua. Ae tasi lea mea ua mautinoa, sa matuā faaitiitia lava le aofaiga o tagata o le lalolagi i le 2370 T.L.M.! Na tafiesea uma e le Lolo ē amioleaga, ae faatotoe ai na o i latou o ē na nofo sauni mo lena gaoioiga a le Atua—o Noa ma le isi toafitu o lona aiga.—Kenese 7:19-23; 2 Peteru 3:5, 6.

13. O le ā le poloaiga faafaamasinoga tauatua na matuā mautinoa atoatoa e Noa, ma na faapefea ona ia gaoioi PR1 ins:ia del:e talafeagai ai ma lenei mea?

¹³ E lei faapea na tele ni tausaga na muai taʻu atu ai e le Atua ia Noa le aso tonu ma le itula e oo mai ai le Lolo. E ui i lea, ina ua 480 tausaga o le soifuaga o Noa, na folafola ai e Ieova e faapea: “E le faavavau ona finau o loʻu Agaga ma tagata, auā ua na o tagata i latou; a o latou aso e selau ma le luafulu o tausaga ia.” (Kenese 6:3) Na matuā mautinoa atoatoa e Noa lenei poloaiga faafaamasinoga tauatua. Ina ua aulia le 500 o ona tausaga, sa ia “fanaua ai . . . o Semu, ma Hamo, ma Iafeta,” ma ona o le tu masani i na ona po atonu PR1 ins:na ausia ai del:e ausia e oo atu ona atalii i le 50 i le 60 tausaga le matutua faatoʻāPR1 del:latou faaipoipo. Ina ua faatonuina Noa e fau le vaa mo le faasaoina mai le Lolo, e foliga mai sa fesoasoani ia te ia i lea taumafaiga ona atalii ma a latou avā. O le fausiaina o le vaa e foliga mai na faia faatasi lava ma le auaunaga a Noa i le avea o “lē talaʻi le amiotonu,” lea sa tele ai lava mea na ia faia mo le isi 40 i le 50 tausaga mulimuli a o lei oo mai le Lolo. (Kenese 5:32; 6:13-22) I na tausaga uma, sa gaoioi ai o ia ma lona aiga i le faatuatua. Seʻi o tatou faaalia foi le faatuatua a o tatou talaʻia atu le tala lelei ma faatalitalia le aso o Ieova.—Eperu 11:7.

14. O le ā le mea na mulimuli ane taʻu atu e Ieova ia Noa, ma aisea?

¹⁴ A o toeitiiti faamaʻeaina le vaa, atonu sa mafaufau Noa ua matuā lalata tele mai le Lolo, e ui sa ia lei iloa tonu po o afea e tupu ai. Na oo ina taʻu atu mulimuli ane e Ieova ia te ia e faapea: “E toe fitu aso ona ou faatotoina ifo ai lea o le ua i le lalolagi e fagafulu ona ao e fagafulu foi ona po.” (Kenese 7:4) Na faapea ona lava ai se taimi na maua e Noa ma lona aiga ina ia ave uma ai ituaiga o manu i totonu o le vaa ma latou ō atu uma i totonu a o lei amata le Lolo. E lē manaomia ona tatou iloa le aso ma le itula mo le amataina o le faaumatiaga o lenei faiga o mea; e lē o faamoemoe mai foi ia i tatou le faasaoina o manu, ma ua ulu atu foi i le vaa faafaatusa, le parataiso faaleagaga o tagata o le Atua, tagata o ē ua fuafua e fia faasaoina.

“Ia Outou Mataala”

15. (a) I au lava upu, e faapefea ona e faamatalaina fetalaiga a Iesu o loo maua i le Mataio 24:40-44? (e) O le ā le taunuuga o le lē iloa o le taimi tonu e afio mai ai Iesu e faaoo le taui ma sui a le Atua?

¹⁵ E tusa ai o lona faatasi mai, na faamatala atu e Iesu e faapea: “O ia ona po e i ai [galulue] i le vao o tagata e toalua, e avea le tasi, a e tuua le tasi. E olo [le saito e fai ai le falaoamata] faatasi fafine e toalua i le mea e olo aʻi saito, e avea le tasi, a e tuua le tasi. O lea, ia outou mataala ai; auā tou te le iloa po o le fea aso e sau ai lo outou Alii. Ia outou iloa lenei mea, ana iloa e le matai o le aiga po o le fea itu po e sau ai le gaoi, po ua na leoleoina, a e le tuua e ia lona fale ia elia. O le mea lea ia outou nofo sauni ai; auā o le itu aso tou te le manatunatu ai, e sau ai le Atalii o le tagata.” (Mataio 24:40-44; Luka 17:34, 35) Ona o le lē iloa o le taimi tonu e afio mai ai Iesu e faaoo le taui ma sui a le Atua, e mafai ai ona tatou mataala pea ma maua le avanoa i aso taitasi e faamaonia ai o loo tatou auauna ia Ieova mai i ni uunaiga lē manatu faapito.

16. O le ā le mea o le a tupu i tagata o ē ua “tuua” ma i latou e “avea”?

¹⁶ O tagata taitoatasi o ē ua “tuua” ina ia faaumatia faatasi ma ē amioleaga o le a aofia ai i latou o ē sa mauaina muamua le malamalama ae ua toe paʻuū atu i se ala manatu faapito o le olaga. Tau ina ia tatou iai faatasi ma i latou o ē e “avea,” o i latou ua tuuina atu atoatoa ia Ieova ma ua matuā loto faafetai moni mo ana sauniuniga faaleagaga e ala mai i “le auauna faamaoni ma le mafaufau.” (Mataio 24:45-47) Seʻi o tatou auauna pea i le Atua seia oo lava i le iuga, ma le “alofa lea ai le loto mamā, ma le loto fuatia ifo ua lelei, ma le faatuatua faamaoni.”—1 Timoteo 1:5.

E Matuā Manaomia Gaoioiga Paia

17. (a) O le ā le mea sa valoia mai i le 2 Peteru 3:10? (e) O ā nisi o gaoioiga ma amio ua faalaeiauina mai i le 2 Peteru 3:11?

¹⁷ Na tusi mai le aposetolo o Peteru: “E sau le aso o le Alii pei o se gaoi, e mavaeeseina ai le lagi ma le gogolo tele, e teʻa eseese ai foi o mea na fai aʻi ina ua mu; o le lalolagi foi ma galuega o i ai e susunuina lava.” (2 Peteru 3:10) O le a lē sao mai le lagi ma le lalolagi faafaatusa i le aasa o le toasa o le Atua. Ona faapea atili mai lea o Peteru: “O lenei, o le a teʻa eseese nei mea uma, pe faapefea la outou amio e tatau ai i le amio lelei ma le amio Atua.” (2 Peteru 3:11) O nei gaoioiga e aofia ai le auai e lē aunoa i sauniga faa-Kerisiano, le faia o mea lelei i isi, ma le iai o se sao uigā i le talaʻia atu o le tala lelei.—Mataio 24:14; Eperu 10:24, 25; 13:16.

18. Pe afai ua tuputupu aʻe so tatou lagona māfana atu i le lalolagi, o le ā e tatau ona tatou faia?

¹⁸ O le “amio lelei ma le amio Atua” e manaomia ai lo tatou ‘tausia o i tatou ina ia lē pisia mai le lalolagi.’ (Iakopo 1:27) Ae faapefea pe afai o loo tuputupu aʻe so tatou lagona māfana atu i lenei lalolagi? Pe atonu ua maileia i tatou i se tulaga matautia i luma o le Atua e ala i le sailia o faafiafiaga lē mamā pe i le faalogologo atu i musika ma pese o loo uunaia atili ai le agaga lē mataʻu i le Atua o lenei lalolagi. (2 Korinito 6:14-18) Pe afai o le tulaga lena, seʻi o tatou sailia le fesoasoani a le Atua e ala i le tatalo ina ia lē tafiesea atu ai i tatou faatasi ma le lalolagi ae o le a faamaonia i tatou i luma o le Atalii o le tagata. (Luka 21:34-36; 1 Ioane 2:15-17) Pe afai ua tatou faia se tuuina atu i le Atua, e mautinoa o le a tatou mananao e faia le mea e sili ona lelei ina ia atiina ae ma tausisia se faiā māfana ma ia nofo sauni ai mo le aso tele ma le matautia o Ieova.

19. Aisea e mafai ai e le motu e toatele o ē folafola le Malo ona faatalitali e faasaoina mai le faaiuiuga o lenei faiga o mea amioleaga?

¹⁹ Sa faasaoina Noa o lē na mataʻu i le Atua, faatasi ma lona aiga mai le Lolo lea na faaumatia ai le lalolagi anamua. O tagata taitoatasi o ē amio saʻo sa faasaoina mai le iuga o le faiga o mea faa-Iutaia i le 70 T.A. Mo se faataitaiga, sa galue pea le aposetolo o Ioane i le auaunaga i le Atua i le tusa o le 96-98 T.A., ina o ia tusia le tusi o le Faaaliga, lana tala faa-Evagelia, ma isi tusi faagaeeina e tolu. I le faitau afe o ē na latou taliaina le faatuatuaga moni i le Penetekoso o le 33 T.A., e foliga mai e toatele na faasaoina mai le iuga o le faiga o mea faa-Iutaia. (Galuega 1:15; 2:41, 47; 4:4) I aso nei ua mafai e le motu e toatele o ē folafola le Malo ona faamoemoe e faasaoina mai le faaiuiuga o le faiga o mea amioleaga o loo iai nei.

20. Aisea e tatau ai ona avea i tatou o ‘ē talaʻi ma le maelega le amiotonu’?

²⁰ A o tatou taulai atu i le faasaoina i totonu o le lalolagi fou, seʻi avea i tatou o ‘ē talaʻi ma le maelega le amiotonu.’ Maeu se faaeaga o le auauna atu i le Atua i nei aso e gata ai! Ma e maeu se olioli i le tataʻi atu o tagata i le “vaa” o ona po nei, le parataiso faaleagaga o loo olioli ai tagata o le Atua! E talosia ia tutumau faamaoni ai pea le faitau miliona o i latou ua iai nei i totonu, ia mataala faaleagaga, ma ia nofo sauni mo le aso tele o Ieova. Ae o le ā o le a fesoasoani ia i tatou uma ina ia mataala ai pea?

[Faaopoopoga i lalo]

O le a Faapefea Ona E Tali?

◻ O ā faamoemoega sa iai i nisi e tusa ai o le aso o Ieova ma le faatasi mai o Keriso?

◻ Aisea e mafai ai ona tatou faapea atu sa nofo sauni Noa ma lona aiga mo le oo mai o le Lolo?

◻ O le ā le mea o le a tupu ia i latou o ē “mataala” ma i latou o ē e lē faia faapea?

◻ Aisea e matuā tāua ai gaoioiga paia, ae maise lava a o tatou tulata tele atu i le aso tele o Ieova?