O ā Ituaiga o Tagata e Tatau ona Iai Outou?
1 Ua lata mai le aso mo tagata uma e tala atu ai ni tala. Ua taʻua e le Tusi Paia lea aso “o le aso o Ieova.” O le taimi lea o le a faaooina mai ai le faamasinoga tauatua faasaga i ē amio leaga; ma o se taimi foi e laveaiina ai ē amiotonu. O tagata uma lava la o le a ola ai i lena taimi, o le a valaauina e tala atu se tala i le auala o ola ai o latou olaga. I le manatua o lena mea, ua lāgā ai e Peteru se fesili faatupu manatu e faapea: ‘O le ā le ituaiga o tagata e iai outou?’ Ua ia faamamafa mai le tāua o le ‘amio lelei e tatau ai, o galuega o le tuutoina i le Atua, ma ia manatua le aso o Ieova,’ ma le manaoga ina ia ‘le ponā, ia lē matauleagaina, ma ia filemu.’—2 Pete. 3:11-14.
2 Amio Lelei e Tatau ai, ma Galuega o le Tuutoina i le Atua: O le amio lelei e tatau ai, e aofia ai galuega e fai ma faaaʻoaʻoga e faaalia ai le faaaloalo mo mataupu silisili o le Tusi Paia. (Tito 2:7, 8) E ao i se Kerisiano ona aloese mai amioga faalelalolagi e uunaia e tuinanauga manatu faapito o le tino.—Roma 13:11, 14.
3 Ua faamatalaina le ‘tuutoina i le Atua,’ “o le pipii totino atu i le Atua, e puna mai i se loto ua faagaeeina e le talisapaia loloto o ona uiga matalasi.” O lo tatou maelega i le faiva, o se auala matilatila lea tatou te faaalia ai lenei uiga. O lo tatou maelega i le talaʻiga, e sili atu nai lo le na ona manatu faapea o se tiute; e puna mai i le alofa loloto ua mauaa mo Ieova. (Mare. 12:29, 30) I le uunaia e lena alofa, ua tatou manatu ai i la tatou faiva o se faaaliga uigā o lo tatou tuutoina i le Atua. Talu ai o lo tatou tuutoina atu i le Atua e tatau ona faifai pea, e ao foi la ona tausisi pea i le faia o so tatou sao i le galuega talaʻi. E ao ona avea o se vaega tāua o la tatou faasologa o galuega o le vaiaso.—Epe. 13:15.
4 O le ‘manatua pea o le aso o Ieova’ o lona uiga, ia sili ona faamuamua i mea uma tatou te mafaufau i ai i lea aso ma lea aso, aua lava neʻi teʻa ese pe tuu faalona lua i mea o tatou mafaufau i ai. O lona uiga ia tuu faamuamua manaoga tau i le Malo i o tatou olaga.—Mata. 6:33.
5 Lē Ponā, Lē Matauleagaina, ma le Filemu: Ona o se vaega o le motu o tagata e toatele, ua ‘ta ai o tatou ofu, ma ua faasinasinaina i le toto o le Tamai mamoe.’ (Faaa. 7:14) O le “le ponā” o lona uiga, e tatau ona tatou leoleomaluina i tatou ia tumau ona mamā o tatou olaga tuuina atu neʻi pisipisia i amioga lē mamā a le lalolagi. Tatou te tausia i tatou ia “le matauleagaina” e ala i le teena o amioga e lē faaleatua, sailia o mea faitino e faaleagaina ai o tatou uiga faa-Kerisiano. (Iako. 1:27; 1 Ioa. 2:15-17) Ia tatou faaalia o loo tatou ola “i le filemu” e ala i le faaatagia atu “o le filemu mai le Atua” i a tatou feutagaiga uma ma isi.—Fili. 4:7; Roma 12:18; 14:19.
6 Afai tatou te taulau manuia i le leoleoina o i tatou mai le faaleagaina e le lalolagi, o le a lē mafai lava ona tatou “amio faatasi ma lenei lalolagi, [faiga o mea]” lea ua taʻusalaina e Ieova. Nai lo lea, o a tatou galuega lelei o le a fesoasoani i isi e iloa ai le eseesega o “le ua auauna i le Atua, ma le ua le auauna ia te ia.”—Roma 12:2; Mala. 3:18.
7 Ua lē pine ona tatou auai atu lea i le Tauaofiaga Itumalo o “Ē Vivii ma le Olioli,” ma tatou te maua ai i inā meaʻai faaleagaga e faafouina ai, e lē taumatea o le a tele ai lo tatou naunau e faatino lo tatou tuutoina i le Atua. E toatele tagata fou e iai lenei faanaunauga. E mafai ona avea i tatou o se faamanuiaga, i le fesoasoani atu ia i latou ia faia se sao i le auaunaga i le fanua ia Aokuso.
8 E faasilisiliina ai le suafa o Ieova, e faamalosia ai le faapotopotoga, ma maua ai e isi aogā pe a tatou tausisia pea “galuega lelei.” (1 Pete. 2:12, NW) Tau ina ia avea pea i tatou o na ituaiga o tagata.