“Sa Faapea Lava ona Fai” e i Latou
“O lenei lava le alofa i le Atua, ia tatou tausi i ana poloaiga.”—1 IOANE 5:3.
1. O le ā e mafai ona fai atu ai e tusa o le telē o le alofa o le Atua?
“O LE ATUA, O LE ALOFA LAVA IA.” O i latou uma latou te iloa le Atua ma usiusitai i ana poloaiga latou te matuā talisapaia le loloto o lena alofa. “O le alofa lava lenei, e le ona ua tatou alofa i le Atua, a ua alofa mai o ia ia te i tatou, ua na auina mai foi lona Alo o le togiola mo a tatou agasala.” O lo tatou faaalia o le faatuatua i le taulaga togiola tautele a Iesu, tatou te ʻtumau ai i le alofa o le Atua.’ (1 Ioane 4:8-10, 16) Ona tatou olioli ai lea i le tamaoaiga o faamanuiaga faaleagaga i le taimi nei, ma i le faiga o mea o loo fotuai mai, le ola e faavavau.—Ioane 17:3; 1 Ioane 2:15, 17.
2. Ua faapefea i le tausia o poloaiga a le Atua ona aogā i ana auauna?
2 Ua tumu faamaumauga a le Tusi Paia i faaaoaoga a i latou o ē na usitaia poloaiga a le Atua ma ua iu ina matuā faamanuiaina ai i latou. O i latou nei e aofia ai molimau sa iai a o lei oo i le vaitaimi o uluai Kerisiano, o nisi o i latou sa tusi faatatau i ai le aposetolo o Paulo e faapea: “Na oti i latou nei uma lava o faatuatua, e lei maua mea na folafolaina, a ua iloa ai e i latou a e mamao, ma latou talia ma le fiafia, ma latou taʻutino mai o tagata ese i latou ma le āumau i le lalolagi.” (Eperu 11:13) Mulimuli ane, na maua ai e Kerisiano tuutoina o auauna a le Atua aogā mai “le alofa tunoa ma le mea moni, [lea na] mai ia Iesu Keriso ia.” (Ioane 1:17) A o faagasolo le tusa ma le 6,000 tausaga o le talafaasolopito o le tagata, ua tauia ai e Ieova molimau faamaoni o ē na usitaia ana poloaiga, lea e mautinoa lava “e le mamafa.”—1 Ioane 5:2, 3.
I Ona Po o Noa
3. I ā itu na “faapea lava” ona faia ai e Noa?
3 Ua faapea mai le tala a le Tusi Paia: “O le faatuatua na fausia ai e Noa le vaa ina ua mataʻu, e ola ai lona aiga, ina ua aʻoaʻoina e le Atua i mea e lei vaaia i ia ona po, na ia faasalaina ai le lalolagi, ua na maua ai foi le amiotonu, o le amiotonu lea e i le faatuatua.” I le avea o Noa o “lē talaʻi le amiotonu,” na ia usitai maumauai atu ai i le Atua, i le lapataia o le lalolagi sauā i lena vaitaimi a o lei oo le Lolo, e uiga i le faasalaga a le Atua o loo faaloloʻi ane. (Eperu 11:7; 2 Peteru 2:5) I le fausiaina o le vaa, sa ia mulimulituʻi ai ma le faaeteete i le ata na saunia mai e le Atua. Ona ia tuuina lea i totonu o le vaa manu sa fuafuaina ma le anoanoai o meaʻai. “Na faia foi e Noa e faapei ona poloai atu ai le Atua ia te ia i mea uma, sa faapea lava ona fai e ia.”—Kenese 6:22.
4, 5. (a) Ua faapefea ona aafia tagata i aso nei i se taaʻiga e matuā leaga lava? (e) Aisea e ao ai ona “faapea lava” ona tatou faia mea i le usiusitai atu i faatonuga mai le Atua?
4 Sa tatau ia Noa ma lona aiga ona latou tauivi e teena taaʻiga matuā leaga a agelu lē usiusitai. O nei atalii o le Atua sa latou faia ni tino faaletagata ina ia feusuai ai ma fafine, ma maua mai ai ni fanau itulua e sili atu ona malolosi nai lo tagata, ma sa fiapule sauā i tagata. “Ua leaga lava le lalolagi i luma o le Atua, ma ua tumu le lalolagi i le saua.” Na auina mai e Ieova le Lolo ina ia tafiesea ai lena tupulaga amioleaga. (Kenese 6:4, 11-17; 7:1) Talu mai taimi o Noa, ua lē toe faatagaina ai agelu faatemoni ina ia faaliutinoina i latou e pei o foliga o tagata. Peitai, ʻua faaauau pea ona iai le lalolagi atoa i le pule a lē o leaga,’ o Satani le Tiapolo. (1 Ioane 5:19; Faaaliga 12:9) I se uiga faavaloaga, na faatusatusa ai e Iesu lena tupulaga fouvale o ona po o Noa, i le tupulaga o tagata o ē ua teena o ia talu mai le faailoga o lona ʻfaatasi mai’ lea na amata ona manino mai i le 1914.—Mataio 24:3, 34, 37-39; Luka 17:26, 27.
5 I aso nei, e pei foi o aso o Noa, o loo taumafai ai Satani e faaleagaina tagata ma lo tatou paneta. (Faaaliga 11:15-18) Ua matuā manaomia vave ai la ona tatou utagiaina le poloaiga faagaeeina e faapea: “Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.” (Efeso 6:11) O le faia faapea, ua faamalosia ai i tatou e ala i le suesueina o le Afioga a le Atua ma faatatauina i o tatou olaga. E lē gata i lea, ua ia i tatou foi le faalapotopotoga alofa a Ieova, lea o loo iai lana “auauna faamaoni ma le mafaufau” faauuina ma ona toeaina alolofa, ina ia leoleoina ma le onosai i tatou i le ala e ao ona tatou ui ai. Ua ia i tatou le galuega talaʻi i le lalolagi aoao e ao ona faataunuuina. (Mataio 24:14, 45-47) I le pei o Noa, o lē na matuā usiusitai atu i faatonuga mai le Atua, tau ina ia tatou “faapea lava” ona faia foi e lē aunoa.
Mose—Le Tagata e Sili ona Agamalu
6, 7. (a) O le ā le filifiliga tauia na faia e Mose? (e) O le ā le faaaoaoga lototele ua faataatia e Mose mo i tatou?
6 Seʻi manatu i le isi tagata faatuatua—o Mose. Sa ono mafai ona ia olioli i se olaga e faamalieina ai o ia lava i le tamaoaiga a Aikupito. Peitai na ia filifili ina “ia agaleagaina o ia faatasi ma tagata o le Atua e lelei ai, a e aua le ia te ia le fiafia i le agasala e vave mavae.” I lona avea ma auauna na tofia e Ieova, “sa faanaunau o ia i le taui [ma] na faamalosi o ia [e] pei o sē iloa atu i le le o vaaia.”—Eperu 11:23-28.
7 I le Numera 12:3, tatou te faitau ai: “Na matuā agamalu lava le tagata nei o Mose, e sili lava i tagata uma o i le lalolagi.” I le tuufaafeagai, sa amioaʻi le Farao o Aikupito e pei o se tagata e sili ona faamaualuga i tagata uma lava. Ina ua poloai Ieova ia Mose ma Arona ina ia faalauiloa atu lana faamasinoga e faasaga ia Farao, na faapeī le la tali atu? Ua taʻu mai ia i tatou: “Ona faia lea e Mose ma Arona e pei ona fetalai mai ai o Ieova ia te i laua, sa faapea lava ona fai e i laua.” (Esoto 7:4-7) Maeu se faaaoaoga lototele mo i tatou o ē o loo faalauiloaina atu faamasinoga a le Atua i aso nei!
8. Sa faapefea ona manaomia le fanauga a Isaraelu ina ia “faapea lava” ona latou faia, ma pe o le a tutusa ea le olioli na latou iu i ai, ma le olioli lea e i le lumanai ua lata mai?
8 Pe na lagolagosua faamaoni atu le fanauga a Isaraelu ia Mose? Ina ua uma ona faapuapuagatia e Ieova le nuu o Aikupito i mala e iva mai mala e sefulu, ona ia tauaao atu lea ia Isaraelu faatonuga auiliili o le faamanatuina o le Paseka. “Ona punonou lea o le nuu, ma ifo. Ona o atu lea o le fanauga a Isaraelu, ma latou faia e pei ona poloai Ieova ia Mose ma Arona; sa faapea lava ona latou faia.” (Esoto 12:27, 28) I le vaeluapo o lena aso, ia Nisani 14, 1513 T.L.M., na agaʻi atu ai le agelu a le Atua ma fasiotia ulumatua uma a Aikupito ae sopoloa i fale o Isaraelu. Aisea na faasaoina ai ulumatua a Isaraelu? Auā na puipuia i latou i le toto o le tamai mamoe o le Paseka, lea na sausauina ai faitotoa o o latou fale. Sa latou faia e faapei lava ona poloai ai Ieova ia Mose ma Arona. Ioe, “sa faapea lava ona latou faia.” (Esoto 12:50, 51) A o iai i le Sami Ulaula, na faatino ai e Ieova se isi foi vavega i le faasaoina o ona tagata usiusitai a o ia faaumatia Farao ma ana auupega malolosi o taua. Maeu le fiafia o le fanauga a Isaraelu! I aso nei foi, e toatele ē o loo usiusitai i poloaiga a Ieova o le a olioli i le avea ma molimau vaaitino i le faamaonia o le tonu o lona silisili ese ia Amaketo.—Esoto 15:1, 2; Faaaliga 15:3, 4.
9. O ā faaeaga i ona po nei ua faaatagia mai i le “faapea lava” ona faia e le fanauga a Isaraelu, e faatatau i le fale fetafai?
9 Ina ua poloaia e Ieova le fanauga a Isaraelu e fai ni meaalofa tauofo ma fausia se fale fetafai i le vaomatua, sa matuā lagolagosua ma le limafoai tagata. Ma e oo lava foi i sina mea itiiti lava, sa usiusitai Mose ma lana aufaigaluega loto naunau ina ia mulimuli atu i ata mo le fausiaina o le fale fetafai lea na saunia mai e Ieova. “Ona uma lea o le galuega uma lava o le malumalu o le fale fetafai o le faapotopotoga; ua faia foi e le fanauga a Isaraelu e pei o mea uma na poloai mai ai Ieova ia Mose, ua faapea lava ona latou faia.” Sa faapea foi ina ua faavaeina le faiva faaositaulaga, “ona faia lea e Mose e tusa ma mea uma lava na poloai mai ai Ieova ia te ia, ua faapea lava ona faia e ia.” (Esoto 39:32; 40:16) I ona po nei, ua ia i tatou le avanoa e lagolagosua atu ai ma le loto atoa i le galuega talaʻi ma i polokalame mo faatelega o le Malo. O so tatou faaeaga la le autasia i le “faapea lava” ona faia.
Iosua—Sa Lototele ma Matuā Malosi
10, 11. (a) O le ā na faaauupegaina ai Iosua mo lona taulau manuia? (e) E mafai faapefea ona faamalosia i tatou ina ia faafetaiaia tofotofoga i aso nei?
10 Ina ua tofia e Mose Iosua na te taʻitaʻia le nuu o Isaraelu i le nuu folafolaina, e foliga mai sa na o le pau tusi o le Afioga tusia faagaeeina a Ieova na maua i na taimi, na o tusi e lima a Mose, se salamo e tasi pe lua, ma le tusi a Iopu. Na faatonuina e Mose ia Iosua ina ia faapotopotoina le nuu pe a latou taunuu i le Nuu o le Folafolaga ma ia “faitau atu ai lenei tulafono i luma o Isaraelu uma lava ia latou faalogo ai.” (Teuteronome 31:10-12) Na poloaiina foi e Ieova lava ia Iosua e faapea: “E le teʻa i lou gutu le tusi o lenei tulafono, a ia mafaufau i ai i le ao atoa ma le po, ina ia e anaana e fai e tusa ma mea uma ua tusia i ai; ona manuia ai lea ia te oe o lou ala, ona e manuia ai lea.”—Iosua 1:8.
11 O le faitauina i aso taitasi o le “tusi” a Ieova sa faaauupegaina ai Iosua e taulimaina tofotofoga sa la fetaiai, e pei lava ona avea le faitauina i aso taitasi o le Afioga a Ieova, le Tusi Paia, e faamalosia ai Ana Molimau i ona po nei, ina ia latou faafetaiaia tofotofoga o nei taimi faigata o “aso e gata ai.” (2 Timoteo 3:1) I le siomiaina o i tatou i aso nei e se lalolagi o faiga sauā, seʻi o tatou teulotoina foi timaʻiga a le Atua ia Iosua e faapea: “Ia e faamalosi, ma loto tele; aua e te fefe, aua e te mataʻu; auā o Ieova lou Atua o loo ia te oe i mea uma e te alu i ai.” (Iosua 1:9) Ina ua uma ona faatoilaloina le nuu o Kanana, ona matuā tauia ai lea o ituaiga uma o Isaraelu ina ua latou maua lo latou tofi. “E pei ona fetalai mai ai o Ieova ia Mose, ua faapea lava ona faia e le fanauga a Isaraelu.” (Iosua 14:5) E faapena foi le taui o loo faatalia maia i tatou uma i aso nei o ē faitauina le Afioga a le Atua ma faatatauina i o tatou olaga, i le “faapea lava” ona faia ma le usiusitai.
O Tupu—O Ē na Faamaoni ma Ē na Lei Usiusitai
12. (a) O le ā le poloaiga na tuuina atu i tupu o Isaraelu? (e) O le lē usiusitai o tupu na oo ai i ā iuga?
12 Ae faapefea tupu o Isaraelu? O le mea lenei sa manaomia e Ieova mai le tupu: “A oo foi ina nofo o ia i le nofoalii o lona malo, na te tusia māna se tusi o lenei tulafono i se tusi ai lena tusi o i luma o le au faitaulaga o sa Levī; ia i ai foi lea ia te ia, na te faitau ai foi i aso uma lava o lona olaga; ina ia aʻoaʻoina ai o ia ia mataʻu ia Ieova lona Atua, ma ia tausi i upu uma lava a lenei tulafono ma nei sauniga, na te faia.” (Teuteronome 17:18, 19) Pe na usiusitai ea tupu o Isaraelu i lena poloaiga? I le tele o tulaga, sa latou matuā lē taulau lava, o lea na latou puapuagatia ai i ni mala na valoia mai i le Teuteronome 28:15-68. I le iuga, na taapeape ai Isaraelu “e afua mai i le tasi tuluiga o le lalolagi e oo atu i le tasi tuluiga o le lalolagi.”
13. E mafai faapefea ona aogā ia i tatou, e pei ona sa aogā ia Tavita, pe a faaalia le naunau i le Afioga a Ieova?
13 Ae peitai, o Tavita—le uluai tupu faaletagata sa faamaoni o Isaraelu—sa ia faaalia le lē maluelue o lona tuutoina atu ia Ieova. Sa faamaonia o ia e avea o ʻse tamai leona i Iuta,’ sa faaatagia ai Keriso Iesu o le ʻleona manumalo o le ituaiga o sā Iutā, le aa o Tavita.’ (Kenese 49:8, 9; Faaaliga 5:5) O fea na maua mai ai le malosi o Tavita? Sa ia matuā talisapaia le Afioga tusia a Ieova ma ola ai e ogatusa ma lea. I le Salamo 19, “le salāmo a Tavita,” tatou te faitau ai: “E sao le tulafono a Ieova.” Ina ua uma ona faasino atu i faamanatuga, o faatonuga, o poloaiga, ma faaiuga faafaamasinoga a Ieova, ona faapea atili mai lea o Tavita: “E silisili ona lelei i le auro, o le auro e sili ona lelei e tele; e sili foi ona suamalie i lo le meli, o le meli ua sisina ifo. Ua apoapoaiina mai ai foi lau auauna; e tele foi le taui pe a tausi i ai.” (Salamo 19:7-11) Pe afai o le faitauina i aso taitasi o le Afioga a Ieova ma le mafaufau loloto i ai sa tauia i le 3,000 tausaga ua mavae, maeu la le sili atu ona faapea foi i aso nei!—Salamo 1:1-3; 13:6; 119:72, 97, 111.
14. I le ā le itu ua faaalia ai e le ala o Solomona, le manaomia o nisi mea e sili atu nai lo le poto?
14 Ae lē lava foi le tau ina mauaina o le poto. E manaomia tele foi e auauna a le Atua ona gaoioi e tusa ai ma lea poto, ia faatatauina e ogatusa ma le finagalo o le Atua—ioe, ia “faapea lava” ona faia. E mafai ona faataʻitaʻia lenei mea i le tulaga o le atalii o Tavita, o Solomona, o lē na filifilia e Ieova “e nofo . . . i le nofoālii o le malo o Ieova e pule ia Isaraelu.” Na maua e Solomona le tofiga ina ia fausia le malumalu, i le faaaogaina o ata mo le fausaga lea na tuuina ia Tavita ʻe ala mai le faagaeega a le Agaga.’ (1 Nofoaiga a Tupu 28:5, 11-13) Sa mafai faapefea e Solomona ona faataunuuina lenei galuega tele? I le taliina o se tatalo, na foaiina ai e Ieova ia te ia le atamai ma le poto. O nei mea, faatasi ai ma lona utagiaina o ata o le fausaga na saunia e Ieova, na mafai ai e Solomona ona fausia lea fale ofoofogia, lea na oo ina faatumulia i le mamalu o Ieova. (2 Nofoaiga a Tupu 7:2, 3) E ui i lea, na mulimuli ane lē taulau Solomona. I le ā le itu? Na taʻu atu e le tulafono a Ieova e faatatau i se tupu o Isaraelu e faapea: “Aua foi neʻi faatoateleina e ia o avā māna, neʻi liliueseina ai lona loto.” (Teuteronome 17:17) Peitai, sa ia Solomona o “avā o alo o alii e toafitu galau, ma ana palake e tolu galau; . . . ona faaliliueseina lea o lona loto e ana avā e mulimuli i atua ese.” I ona tausaga mulimuli, na liliu ese ai Solomona mai lona “faapea lava” ona faia.—1 Tupu 11:3, 4; Neemia 13:26.
15. Na faapefea e Iosia ona ia “faapea lava” ona fai?
15 Sa iai ni nai tupu usiusitai i Iuta, ma o le tupu mulimuli o i latou ia, o Iosia. I le tausaga e 648 T.L.M., na amata ai ona ia faamamāeseina faiga faaifo i tupua mai le laueleele ma toe faafouina le malumalu o Ieova. O iina na maua ai e le ositaulaga sili “le tusi o le tulafono a Ieova na tusia e Mose.” O le ā na faia e Iosia i lenei tusi? “Ona alu ae ai lea o le tupu i le fale o Ieova, o ia ma tagata uma o Iuta, ma e ua nonofo i Ierusalema, ma le au faitaulaga, ma sa Levī, ma le nuu uma, o e matutua atoa ma tama iti; ona faitau lea e ia, o latou o faalogologo ai, i upu uma o le tusi o le feagaiga na maua i le fale o Ieova. Ua tu foi le tupu i le tulaga ma ua osi le feagaiga i luma o Ieova, e mulimuli ia Ieova, ma tausi i ana poloaiga, ma ana tulafono, atoa ma ana sauniga, i lona loto atoa, ma lona agaga atoa, ma usiusitai i upu o le feagaiga ua tusia i lenei tusi.” (2 Nofoaiga a Tupu 34:14, 30, 31) Ioe, “sa faapea lava ona fai” e Iosia. O le iuga o ona ala faamaoni, sa lei faaoo ane ai e Ieova i lena taimi le sala o lana faamasinoga i le nuu lē faamaoni o Iuta, ae na faatoʻā faaoo mai i aso o ona atalii lē faamaoni.
Ola e Tusa ma le Afioga a le Atua
16, 17. (a) I ā vala e tatau ona tatou mulimuli atu ai i tulagaaao o Iesu? (e) O ai isi auauna faamaoni a le Atua ua latou saunia ni faaaoaoga mo i tatou?
16 I tagata uma lava na ola mai, o le faaaoaoga e sili ona lelei o le mafaufau loloto i le Afioga a le Atua ma ola e tusa ai, o le Alii o Iesu Keriso lea. Sa avea le Afioga a le Atua o se meaʻai ia te ia. (Ioane 4:34) Na ia fetalai atu i lana au faalogologo: “E le mafai e le Atalii ona fai o se mea, na o ia lava; a o mea na te vaai atu i le Tamā o faia; o mea foi o faia e [Ia], o loo faia foi ia lava mea e le Atalii.” (Ioane 5:19, 30; 7:28; 8:28, 42) “Sa faapea lava ona fai” e Iesu i lona faalauiloa atu: “Ou te lei alu ifo mai le lagi e fai loʻu lava loto, a o le finagalo o le ua auina mai aʻu.” (Ioane 6:38) O i tatou o Molimau tuuina atu a Ieova, ua valaauina i tatou ina ia “faapea lava” ona tatou faia e ala i le mulimuli atu i tulagaaao o Iesu.—Luka 9:23; 14:27; 1 Peteru 2:21.
17 Sa faasilisilia pea i le mafaufau o Iesu le faia o le finagalo o le Atua. Sa masani lelei o ia i le Afioga a le Atua ma sa faaauupegaina ai o ia e avatu tali faale-Tusi Paia. (Mataio 4:1-11; 12:24-31) O le uaʻi atu pea i le Afioga a le Atua, e mafai ai foi e i tatou ona ʻatoatoa ona lelei, ia matuā faaauupegaina mo galuega lelei uma.’ (2 Timoteo 3:16, 17) Seʻi o tatou mulimuli atu i le faaaoaoga a auauna faamaoni a Ieova i aso anamua ma aso na mulimuli ane ai, ae silisili ai le faaaoaoga a lo tatou Matai, o Iesu Keriso, o lē na fetalai mai: “Ina ia iloa e le lalolagi, ou te alofa i le Tamā faapei ona poloai mai foi o le Tamā ia te au, e faapea lava ona ou faia.” (Ioane 14:31) Tau ina ia faailoa atu foi e i tatou lo tatou alofa mo le Atua e ala i le faaauau ona “faapea lava” ona tatou faia.—Mareko 12:29-31.
18. O le ā e ao ona uunaia ai i tatou ina ia ʻavea ma ē anaana i le upu,’ ma o le ā le isi mataupu o le a sosoo ona tatou talanoaina?
18 A o tatou mafaufau loloto i ala usiusitai o auauna a le Atua i aso anamua o le Tusi Paia, pe ua lē o faalaeiauina ai ea i tatou ina ia faatinoina le auaunaga faamaoni a o faagasolo aso faaiuiu o le faiga leaga o mea a Satani? (Roma 15:4-6) Ua tatau ona matuā uunaia ai i tatou ina ia ʻavea ma ē anaana i le upu’ i se uiga atoatoa, lea o le a talanoaina i le mataupu o loo sosoo mai.—Iakopo 1:22.
Pe E te Manatua?
◻ O le ā e tatau ona uiga i ai ʻle alofa o le Atuaʻ mo i tatou?
◻ O le ā tatou te aʻoaʻoina mai faaaoaoga a Noa, Mose, ma Iosua?
◻ O le ā le tele na usitai ai tupu o Isaraelu i le ʻafioga’ a le Atua?
◻ Ua faapefea ona avea Iesu ma o tatou Faaaoao i le “faapea lava” ona faia?
[Ata i le itulau 15]
“Sa faapea lava ona fai” e Noa, Mose, ma Iosua