Pe E te Manatua?
Pe sa e fiafia e faitau lomiga talu ai nei o Le Olomatamata? Afai o lea, o le a avea la o se mea e faafiafiaina ai oe le manatuaina o mea nei:
◻ Aisea e mafai ai ona tatou mautinoa i le filifiliga a Ieova i tagata taitoatasi e taitaia ona tagata?
E filifilia e Ieova mo tiute tauave patino, tagata taitoatasi o ē e iai ni uiga patino talafeagai ina ia taitaia ai ona tagata i le ala o loo ia finagalo ia latou savavali ai i lena taimi patino.—8/15, itulau 14.
◻ O le ā e mafai ona tatou aʻoaʻoina mai le mea na tupu ia Iona?
Sa mātele le mafaufau o Iona mo ia lava ae itiiti mo isi. E mafai ona tatou aʻoaʻoina se lesona mai ia Iona, e ala i le lē faasilia o o tatou lava manaoga ma o tatou faalogona.—8/15, itulau 19.
◻ I le ā le itu e mafai ai ona faapea atu “o le suafa o Ieova, o le ʻolo malosi lea”? (Faataoto 18:10)
O le sulufai atu i le suafa o le Atua e faaalia ai tatou te faatuatua ia Ieova lava ia. (Salamo 20:1; 122:4) O lona uiga o le lagolagoina o lana pule silisili ese, sapasapaia ana tulafono ma ana mataupu silisili, faatuatua i ana folafolaga, ma tuutoina atoatoa ia te ia. (Isaia 50:10; Eperu 11:6)—9/1, itulau 10.
◻ Ua faapefea i le auala na molimau atu ai Paulo i luma o tagata maualuluga ona saunia ai se faaaoaoga mo i tatou?
I le talanoa atu i le tupu o Akeripa, na faaaogā ai e Paulo le faautauta, i le faamamafa atu o manatu ia na la tau fai ioe uma i ai ma Akeripa. I le tulaga tutusa, e tatau ona tatou faamamafa vala tāua o le tala lelei, ma faamamafa faamoemoe o loo tatou taofi uma i ai. (1 Korinito 9:22)—9/1, itulau 31.
◻ O ai ua aogā i ai le onosai o Ieova?
Talu ai le onosai o Ieova, e faitau miliona tagata i aso nei ua latou mauaina le avanoa e faasaoina atu ai i le “aso o [Ieova].” (2 Peteru 3:9-15) O lona onosai ua maua ai foi e i tatou taitoatasi le avanoa e ‘galueaiina ai pea lo tatou faaolataga i le mataʻu ma le gatete.’ (Filipi 2:12)—9/15, itulau 20.
◻ O le ā le tele o le aogā o le faaliliuga o le Septuagint a le Tusi Paia?
Ua matilatila lenei faaliliuga i le faasalalauina atu o le poto e faatatau ia Ieova le Atua ma lona Malo ma Iesu Keriso o le Tupu. E ala i le Septuagint, na faataatia ai se faavae tāua mo tagata Iutaia sa tāutala i le gagana Eleni ma tagata o Nuu Ese i le uluai senituri ina ia latou talia le tala lelei o le Malo.—9/15, itulau 30.
◻ O le ā ua aʻoaʻo mai ia i tatou e le faataoto i le atalii faamaumauoa e uiga i le Atua?
Muamua, o Ieova e “alofa mutimutivale ma le alofa fua, e telegese lona toasa, a e tele le alofa ma le faamaoni.” (Esoto 34:6) Lona lua, e ‘nofosauni o ia e faamagalo’ pe afai e suia le loto o le tagata agasala ma saunia ai se faavae mo ia e faasalafa mai ai lona alofa mutimutivale. (Salamo 86:5)—10/1, itulau 12, 13.
◻ O afea o le a tutupu ai tulaga filemu na o loo folafola mai i le Isaia 65:21-25?
I le avea o ni tagata tapuai autasi a Ieova i totonu o se parataiso faaleagaga i aso nei, ua tofo ai nei le vaega faauuina faatasi ai ma i latou o “isi mamoe” i le filemu mai le Atua. (Ioane 10:16) Ma o lena filemu o le a faasalafa atu i le Parataiso faaletino, pe a oo ina ‘faia le finagalo o le Atua i le lalolagi uma, e pei ona faia i le lagi.’ O le taimi lena o le a faamaonia ai le moni atoatoa o upu a le perofeta o Isaia. (Mataio 6:10)—10/15, itulau 24.
◻ Aisea e faamanatu ai e Kerisiano aso na faaipoipo ai ae lē faamanatuina aso fanau?
E tusa ai ma le Tusi Paia, e lē leaga le faaipoipo. O se mataupu e matuā patino lava pe filifili ni Kerisiano e faamanatuina le la faaipoipoga, ina ia faaalu se taimi e toe manatunatu ai i le fiafiaga o lena aso ma le la faaiuga e galulue mo le taulau manuia i le avea o se ulugalii. Peitai, na o le pau faamanatuga o aso fanau o loo taʻua i le Tusi Paia, o aso fanau o tagata faapaupau, ma o na aso fanau sa fesootai atu i gaoioiga sauā.—10/15, itulau 30, 31.
◻ I le talafaatusa a Paulo lea o loo faamauina i le 1 Korinito 3:12, 13, o le ā e faatusa i ai le “afi,” ma o le ā e tatau ona nofouta i ai Kerisiano uma?
E iai le afi lea o loo tatou fesagaia uma lava i le olaga—o tofotofoga o lo tatou faatuatua. (Ioane 15:20; Iakopo 1:2, 3) O tagata uma o loo tatou aʻoaʻo atu i ai le upu moni o le a tofotofoina. Pe afai e leaga la tatou aʻoaʻo atu, e mafai foi ona iai ni āuga faanoanoa, e pei ona sa lapatai mai ai Paulo. (1 Korinito 3:15)—11/1, itulau 11.
◻ Na faapefea ona ‘savavali faatasi Noa ma le Atua moni’? (Kenese 6:9)
Sa savavali faatasi Noa ma le Atua i le uiga faapea sa ia faia mea na fetalai atu le Atua ia te ia e fai. Talu ai sa tuutoina atu e Noa lona ola i le faia o le finagalo o le Atua, sa ia olioli ai i se faiā mafana, ma le vavalalata ma le Atua.—11/15, itulau 10.
◻ O ā avanoa ua tatou maua ona o lo tatou lē iloaina o le taimi tonu o le a faaoo mai ai le toasa o le Atua i ē amioleaga?
O lenei mea ua tatou maua ai se avanoa e faamaonia atu ai tatou te alolofa moni ia Ieova ma mananao e savavali i ona ala e faavavau. E faaalia ai foi o loo tatou faamaoni i le Atua ma faatuatua atu i lana auala o loo faafoeina ai mataupu. E lē gata i lea, e fesoasoani lenei ina ia tatou mataalia ai pea ma mataala faaleagaga. (Mataio 24:42-44)—11/15, itulau 18.
◻ O le ā le uiga o le faatuatua atu “i le suafa o le Alo o le Atua”? (1 Ioane 5:13)
O le uiga o lenei mea o le usiusitai i poloaiga uma lava a Keriso, e aofia ai lana poloaiga ina ia “fealofani.” (Ioane 15:14, 17) O le alofa e saili e faia mea lelei i isi. E tineia ai faiga faailoga lanu uma, faiga faalotu, ma le faailoga tagata.—12/1, itulau 7.
◻ Aisea ua “inosia” ai Molimau a Ieova? (Mataio 10:22)
Ua inosia ma le lē saʻo Molimau a Ieova ona o mafuaaga lava na sa sauaina ai foi uluai Kerisiano. Muamua, e faatinoina e Molimau a Ieova o latou talitonuga faalotu i auala e ono faaesea ai i latou e nisi. Lona lua, ua avea i latou o ni taulaiga o tuuaʻiga sese—o ni pepelo tuusaʻo ma ni faauigaga ua mimilo sese o o latou talitonuga.—12/1, itulau 14.