Mala Faalenatura​—Pe e Faamaonia ai e Sauā le Atua?

MANATU O TAGATA: “O le Atua o loo pulea le lalolagi. O ia foʻi o loo faapogaia mala faalenatura e tutupu. O lea, o ia o se Atua sauā.”

MANATU O LE TUSI PAIA: “O le lalolagi atoa o loo nofo toʻilalo i le pule a lē o loo leaga.” (1 Ioane 5:19) O ai “lē o loo leaga”? Ua faamatalaina e le Tusi Paia o ia o Satani. (Mataio 13:19; Mareko 4:15) Pe e moni lenā manatu? Manatu i le mea lenei: Pe afai o loo pulea e Satani le lalolagi, e faigofie la ona ia taaʻina tagata e faaalia uiga manatu faapito, matapeʻapeʻa ma le lē manatu mamafa i le lumanaʻi o tagata. Pe e lē o le māfuaaga ea lenā ua faatamaʻia ai e tagata le siʻosiʻomaga? Ua faapea mai le toʻatele o tagata atamamai, atonu e saosaolaumea le faaleagaina o le siʻosiʻomaga i mala faalenatura. E lē gata e faapogaia, faateteleina, ae faapea foʻi le lamatia ai o soifua o tagata.

Aiseā ua lē taofia ai e le Atua Satani mai le taaʻina o le lalolagi? E maua le tali pe a tatou toe tepa i le taimi na fouvale ai o tatou uluaʻi mātua i le Atua le Pule. E toʻatele foʻi tagata ua fouvale i le Atua. O le māfuaaga lea ua pulea ai e le fili o le Atua o Satani le fanau a tagata. Na taʻua e Iesu Satani o “le pule o le lalolagi.” (Ioane 14:30) Po o le a pule ai pea e faavavau Satani? E leai.

E matuā tigā le finagalo o Ieovaa i mafatiaga e faapogaia e Satani. O se faataʻitaʻiga, ina ua feagai Isaraelu ma tulaga faigatā, na faapea mai le Tusi Paia e uiga i le Atua: “Na mafatia o ia i taimi o o latou mafatiaga.” (Isaia 63:9) O le alofa mutimutivale o le Atua, o le a ia tafiesea ai le pulega sauā a Satani i se taimi lata mai, ae avea lona Alo o Iesu Keriso ma Tupu amiotonu e faavavau.

LE AUALA E TE AAFIA AI: E lē o mafai e le pule a Satani ona puipuia tagata mai i mala faalenatura, ae e mafai e le pulega a Iesu. Na taʻua i le Tusi Paia se taimi na puipuia ai e Iesu ona soo mai se matagi malosi e faapea, ona ia “vavao lea o le matagi ma fetalai atu i le sami: ʻIa fifilemu, ma ia malū!’ Ona toʻa ai lea o le matagi ma ua malū lava ai.” Ona faapea ifo lea o ona soo: “O ai ea lenei tagata ua usiusitaʻi i ai le matagi ma le sami iā te ia?” (Mareko 4:37-41) O lenā mea na tupu ua faamautinoa mai ai iā i tatou, e mafai e Iesu ona puipuia tagata usiusitaʻi i le taimi e pule ai o se Tupu.​—Tanielu 7:13, 14.