Faaalia o le Alofa mo i Latou o Iai Manaoga
UA IAI i Kerisiano le tiute tauave ma le faaeaga e faaalia ai le alofa i o latou uso ma tuafāfine o iai manaoga. (1 Ioane 3:17, 18) Na tusi le aposetolo o Paulo: “Ia tatou agalelei . . . i tagata uma lava, ae maise i le aiga o le faatuatua.” (Kalatia 6:10) O se uso ua toeitiiti nei atoa le 40 o tausaga talu ona auauna ia Ieova, na tofo talu ai nei i le alofa faa-Kerisiano o le au uso i le taimi na gasegase ai lana āva ma oo atu ai lava ina maliu mulimuli ane ai. Ua ia tusi mai faapea:
“Ona na ou tausia laʻu āva i le fale a o gasegase, na lē mafai ai ona ou faigaluega i le pe ā ma ni masina se lua. Maeu le mauaina o se mapusaga ina ua fesoasoani mai ma le loto malilie a ma uō i le faapotopotoga! O le tele o meaalofa tautupe—‘e fesoasoani i le totogia o isi mea’ e pei ona taʻua i tusi na aumai faatasi ma ia tupe—na totogi ai le mokesi, le pili o le molī, eletise, vai faapea ma isi pili.
“I le lua o vaiaso a o leʻi maliu laʻu āva, na asiasi faalaeiau mai ai le ovasia o matagaluega ia i maʻua. Na oo lava ina ia faaalia mai ata (slides) ia o le a matamata i ai le faapotopotoga i le faaiuga o le vaiaso. Na mafai ona ma faalogologo i sauniga e ala i le telefoni (e fesootai atu le telefoni o i le Maota o le Malo i mea faaleotele leo ia e faaogā i sauniga)—e aofia ai ma faatasitasiga mo le auaunaga i le fanua ia na taʻitaʻia e le ovasia o matagaluega. I se tasi o nei faatasitasiga, na faatasia e le ovasia le autalaʻi ina ia taitoatasi ma faatalofa mai i laʻu āva. O lea, e ui ina tuua na o ia i se itu faaletino, ae na lē oo lava ia te ia se lagona o le tuua toatasi.
“A o lei atoa se itula talu ona maliu o ia, e toetoe lava o toeaina uma o le faapotopotoga na iai i loʻu fale. E sili atu ma le selau uso ma tuafāfine na asiasi mai i lena lava aso. Na ‘lava ma totoe’ meaʻai na saunia e uso mo i latou uma na iai i loʻu fale. E lē mafai ona ou faamatalaina le tele o meaalofa, faaupuga o le tigā alofa, o upu faamafanafana, ma tatalo na faia mo aʻu. Maeu se faalaeiauina ai i ia mea! Na iu lava ona ou talosaga atu i uso e taofi le aumaia o meaʻai ma le fesoasoani i le tapenaga o le fale!
“Po o fea ea e maua ai nei faaaliga lē manatu faapito o le alofa mutimutivale, naunau totino ma le alofa, seʻi vagana ai le faalapotopotoga a Ieova? O le toatele o tagata i aso nei ua tau lē maua ni a latou uō moni. Ua faamanuiaina i tatou e Ieova i le mauaina o se auaiga toatele o uso ma tuafāfine faaleagaga!”—Mareko 10:29, 30.