Toeitiiti—Se Lalolagi e Aunoa ma Tiga!

SE LALOLAGI e aunoa ma tiga ua vave oo mai? Maeu se tala faafeiloai mo ē o loo pagatia i maʻi faaumiumi—e tusa lava pe o o latou tiga e faaletino, faalemafaufau, po o faalogona ootia! Mo se faataʻitaʻiga, o le a sili atu ona olioli le faitau miliona i le aveesea o tiga matuitui o le tino e faapogaia e nisi ituaiga o kanesa, le faalavelavea e tiga ona o maʻi o neura, le maʻi fatu e faapogai ai ni tiga tutui faafuasei o le fatafata [angina pectoris]. O i latou o pagatia i faafitauli matuiā o le mafaufau o le a fiafia i se mapusaga mai i tiga lē mafaamatalaina e masani ona latou pagatia ai. Ma e faitau miliona isi o le a olioli pe a tau lava ina faaiʻuina o latou tiga tau faalogona ootia ua faapogaia ona o lagona e pei o le fefe, mapuitiga, taʻusalaina, popole, ma le faanoanoa. Ae pe o tatou mananao moni lava e vaai atu i le iʻuga o tiga uma?

“O se mala le faapea o le a matuā lē iai lava ni tiga,” ua taʻua ai e se tagata tomai e suesueina vaega o tino o manu ma laau, o Allan Basbaum o le Iunivesite o Kalefonia i San Francisco. Na ia faia lenei faamatalaga faatasi ma se mafuaaga lelei. I le avea o se faailoilo, o tiga faaletino e faailoa mai ai ia i tatou e iai se mea matuiā o loo tupu.

O le lē mafai ona faalogoina o tiga faaletino e mafai ona matuā i se tulaga mataʻutia. Ua faataʻitaʻia lenei mea i lenei lipoti a le mekasini o le Time e faapea: “O si ʻataʻata manaia mai a si tamaitiiti e sefululua ona tausaga ua o se faaeseesega matuā faanoanoa i nai ona foliga faamomoi loto. O ona lima ma ona vae ua sisipa ma pipio, e pei na maua i se faamaʻi o tamaiti e vaivai ponaivi. Ua leai isi ona tamatamailima. O se manua telē o loo ufitia ai le isi tuli, ma o ona laugutu o loo ʻataʻata mai ua ʻatiʻatia. I le lalolagi uma e foliga mai o ia o se tamaitiiti na sasa faamoʻamoʻaina . . . Na fanau mai o ia ma se matuā lē lelei e seāseā ona maua i nisi lea ua faapogaia ai ona ia lē lagona se tiga. O ona tamatamailima a leʻi omia i se mea pe na mu ona na te lē seʻieseina lona lima mai ni mea vevela po o ni mea mataʻutia. O ona ponaivi ma sooga ua lē tulaga tutusa ona e soona tuʻi lona tino pe a savali pe tamoe foi. Ua matuā papala lona tuli ona o le fetolofai i luga o mea maamaai na e lē mafai ona ia lagona. Pe gau sona ponaivi pe see sona suilapalapa, o le a ia lē lagona se tiga e ono tagi ai mo se fesoasoani.”

Ua vave lava ona tuuaʻia e nisi le Atua mo ia puapuaga ma mea tiga ua tofo i ai le faitau miliona. Ae peitai, pe mafai ona tatou tuuaʻia ma le tonu le Atua ona o le tiga o puapuaga o le fanau a tagata?

Pe e Tuuaʻia le Atua?

Mo le 6,000 tausaga e oo mai i le taimi nei, ua iai pea le fanau a tagata i noataga o tiga faaletino, i le mafaufau, ma faalogona ootia. O le mea moni, i le 19 senituri ua mavae, na matauina ai ma le saʻo e le aposetolo Kerisiano o Paulo e faapea: “Auā ua tatou iloa, ua oi faatasi, ma oono faatasi mea uma lava na faia, ua oo mai lava i ona po nei.” (Roma 8:22) E ui lava i le tele o fualaau e faateʻa ai le tiga o loo maua i fale tala vai ma i taumafaiga a fomaʻi ma fomaʻi o le mafaufau, ae o loo faaauau pea ona noatia i so o se ituaiga o tiga o loo salalau atu. Ioe, ua oo lava ina fetuu e nisi le Atua ona o o latou tiga, e pei lava ona uunaia e le avā a le tagata o Iopu o ia e faia faapea i le tele o senituri ua mavae! Ae peitai, e pei ona iloa e Iopu lava ia faapea o se agaga faapena o se mea valea ma e lē saʻo.—Iopu 2:9, 10.

O le noatia o le fanau a tagata i tiga i le taimi nei e lē mafai ona tuuaʻia ai ma le tonu le Atua. Na i lo o lea, e paʻū atu lava le tuuaʻiga i se pepelo lē vaaia ma faatasi ai ma o tatou uluai mātua. Faapefea?

Ua faaalia e le Tusi Paia faapea e ui lava sa amiotonu i le amataga, ae sa oo ina matapeapea se meafaiola agaga mo le mana ma le fia lauiloa. I le tafa o ata o le olaga o le tagata i le lalolagi, sa ia vaaia ai faafaaaliga se fanau a tagata i luga o se lalolagi parataiso, o loo avatu e i latou uma le tuutoina atoatoa i le Atua e Ona le Malosi Uma lava, o Ieova. I le uunaia e se loto ua leaga, na fouvale ai lenei meafaiola agaga faasaga i Lē na Foafoaina Mea, i le manao ina ia tapuai ma tuutoina atu tagata ia te ia. Na faaalialia ona lava faanaunauga leaga ina ua ia faia se pepelo faaʻoleʻole. O lenei mea na sosoo ai ma le aumaia o le agasala i le lalolagi.

Na taʻu atu e Ieova le Atua i le uluai tagata, o Atamu, e faapea o le ʻai o le fua mai le laau e iloa ai le lelei ma le leaga o le a iʻu ai i le oti. (Kenese 2:15-17) Peitai o le avā a Atamu, o Eva, sa faaseseina ina ia lē usiusitai. I le faaaogāina o le gata e avea ma sooupu, na taʻu atu ai e le Taufaasese agaga ia te ia: “Lua te le oti lava; auā ua silafia e le Atua, o le aso lua te aai ai, e pupula ai o oulua mata [mata o Eva ma lana tane]; ona avea ai lea o oulua [uma] e pei ni atua o loo iloa le lelei ma le leaga.” (Kenese 3:1-5) O le uluai pepelo lena, ma ona o lea ua faailogaina ai lenei meafaiola agaga leaga e avea ma ‘tamā o pepelo.’ (Ioane 8:44) O lona faaaogāina o le gata i lena taimi i le faatoaga i Etena ua maua ai se tulaga tutusa i lona faailoaga faale-Tusi Paia e avea o “le gata tuai lea, ua igoa i le tiapolo, i le ma Satani.”—Faaaliga 12:9.

Na aumaia e le agasala le oi ma noataga o le tiga i le fanau a tagata. E moni e tusa ai ma le afioga a le Atua, o le aso lava na agasala ai Atamu, na faaleo atu ai e le Atua le sala o le oti i ē na agasala. I tulaga faafaamasinoga, i le silafaga a Ieova, na oti moni lava Atamu ma Eva i le aso lena. (Faatusatusa Luka 20:37, 38.) I Etena, na taʻu atu e Ieova i le taimi lea i le uluai fafine agasala: “Ou te matuā faateleina le tiga o lou maʻi to; e te fanau mai tama ma le tiga.” (Kenese 3:16) O le a maua e Atamu i fafo atu o le faatoaga o Etena se olaga tiga i se lalolagi ua lē o toe avea o se parataiso faalenatura. Na fetalai Ieova: “E te ʻai foi au mea e ʻai ma le afu o ou mata, seia e toe foi atu i le eleele; auā na faiina aʻi lava oe; auā o le efuefu oe, e te toe foi atu lava i le efuefu.” (Kenese 3:17-19) I lea, na amata ai i lea taimi le tiga mo le fanau a tagata.

O lea la, o noataga i le tiga ua fesootai atu ma le lē lelei atoatoa, agasala, ma le oti ua tuufaasolo mai ia Atamu. E pei ona faatulaga ai e le aposetolo o Paulo mataupu: “Faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava.” (Roma 5:12) Ae ua fesoasoani mai le Afioga a le Atua ia i tatou i le tauaveina o tiga, auā ua ia taʻu mai ia i tatou le pogai ua faatagaina ai e Ieova lea mea, ma ua faamautinoa mai ia i tatou faapea o le a lē pine ae faaiʻuina. Na faatagaina e le Atua le ‘tamā o pepelo’ pei se gata, o Satani le Tiapolo, ina ia faatigaina Iopu amiotonu ma i lea na tofoina ai lona faamaoni. Sa manatu le Tiapolo faapea sa auauna Iopu i le Atua ona o le manatu faapito, ae lē o le alofa. (Iopu 1:8-12) Peitai sa tumau le faamaoni o Iopu i le Atua, e faamaonia ai e mafai e le fanau a tagata lē lelei atoatoa ona auauna ia te Ia ona o le alofa ma e mafai ona faamaualugaina ma le faamaoni Lana pule silisili ese e ui lava i tofotofoga matuiā o lo latou faatuatua. O le tumau o Iopu i le avea o se tagata tausisi i le faamaoni na saosaolaumea i le faapaiaina o le suafa o Ieova, na faamaonia ai o Satani o le pepelo, ma aumaia ai oa o taui i lena tamā matua na fai ma faaaʻoaʻo. (Iopu 42:12-17; Iakopo 5:11) Mai le mea na oo ia Iopu, ua mafai ona tatou faaiʻua ai faapea pe a faataunuuina le fuafuaga a le Atua, o le a faaiʻuina ai noataga o le fanau a tagata i le tiga. Ae mafai faapefea ona tatou mautinoa e uiga i lena mea?

O le a Faapea ona Iʻu Tiga

Ma le mautinoa, ua saunia e Ieova se auala matuā aogā e faaiʻuina ai noataga i tiga o le fanau a tagata. Na ia faia lenei e faavae i le taulaga togiola a lona Alo, o Iesu Keriso. O Iesu o “le Tamai mamoe a le Atua, na te aveesea le agasala a le lalolagi.” (Ioane 1:29) Na afio mai o ia i le lalolagi, “e lei sau . . . ina ia auauna mai tagata ia te ia, a ia auauna atu ia, ma foaiina atu lona ola [lona soifua faaletagata lelei atoatoa] e fai ma togiola e sui aʻi tagata e toatele.” (Mataio 20:28) E ala i le lē usiusitai, na leiloa ai e Atamu le ola lelei atoatoa faaletagata, ma ona aiā uma ma fuafuaga. Ma o le mea tonu lena na togiolaina e auala i le taulaga togiola a Iesu. (1 Timoteo 2:5, 6; Eperu 7:26) E moni, “ua faapea lava ona alofa mai o le Atua i le lalolagi [o le fanau a tagata], ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”—Ioane 3:16.

Ua folafola faapitoa foi e le Atua faapea o noataga i le tiga o le a faaiʻuina. I le valoiaina o se taimi o le a lē toe iai le tiga ma le agasala, na faagaeeina ai tauatua le aposetolo Kerisiano o Ioane e tusi:

“Ona aʻu iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, ua leai foi se toe sami. . . . Na ou faalogo foi i le leo tele mai le lagi, ua faapea mai, Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua. Ua fetalai mai foi lē tietie i le nofoālii [Ieova le Atua], Faauta, ou te faia ia fou mea uma lava. Ua fetalai mai foi o ia ia te au, Ia e tusi; auā o upu nei e moni ma le faamaoni ia.”—Faaaliga 21:1-5.

O le a lē pine ona maua lea e le fanau usiusitai a tagata aogā atoatoa o le taulaga togiola a Iesu. O le a tupu lenei mea i lalo o le pulega a le Malo lea ua leva ona tatalo i ai tagata amiotonu, i le faapea atu: “Lo matou Tamā e, o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:9, 10) I le Malo faalelagi, o le a pule ai Iesu Keriso, seia oo ina ia tuuina ona fili i lalo o ona aao, e aofia ai ma noataga o le tiga ma le toe fili, o le oti.—1 Korinito 15:25, 26.

Ioe, pau le mea ua iloa e le fanau usiusitai a tagata, ua lē o toe umi ona ‘soloiesea lea e le Atua loimata uma, ma o le a lē toe iai se oti, se aue, se faanoanoa po o se tiga.’ (Faaaliga 21:4) O upu faavaloaga o loo mulimuli mai, lea ua iai nei sona faatatauga faaleagaga, o le a iai foi sona faataunuuga faaletino: “Loʻu agaga e, ia e faamanū atu ia Ieova, . . . o lē faamagaloina au amio leaga uma lava; o lē faamaloloina ou maʻi atoa uma.” “E le fai mai foi se tasi ua mau ai, Ou te maʻi.”—Salamo 103:1-3; Isaia 33:24.

O Afea e Iʻu ai Tiga?

O le iʻuga o noataga i le tiga ua lata tele mai. Ioe, o le a tupu i o tatou aso, ma o le a vaai i ai le tupulaga lava lenei. O le faataunuuga o le valoaga a le Tusi Paia ua faailoa ai faapea o loo tatou ola i le faaiʻuga o lenei faiga leaga o mea. O taua lē mafaatusaina, o oge, ma mafuiʻe, faapea foi ma le talaʻiga o le tala lelei i le lalolagi aoao e Molimau a Ieova, o vaega na o le “faailoga” e tasi o le “faatasi mai” (NW) lē vaaia o Iesu i le mana o le Malo faalelagi.—Mataio 24:3-14, 21, 34.

Ua lē pine, ona mavae ese atu lea o “le uluai lagi, ma le uluai lalolagi,” le faiga o mea faamaopoopoina a Satani le Tiapolo faatasi ai ma lana faatulagaga faafaigamalo. O le “sami” sousou o le fanau amioleaga a tagata o le a mou atu e lē toe iai. O le mea lea ua tatou tutū ai i le faitotoa o le pulega tauatua faamanuiaina o le “lagi fou” i luga o “le lalolagi fou,” le sosaiete amiotonu a le fanau a tagata. O nei o le a “mau ai le amiotonu.”—Faaaliga 21:1; 2 Peteru 3:13.

Ia teu loto, na faamanuiaga i lalo o se pulega fou—le Malo o le Atua—ua lata tele mai. Ia sailiili atili i le poto e uiga i le lalolagi fou e aunoa ma tiga ma le oti. Ioe, ia tulimataʻi atu i luma i le aso faamanuiaina lea ua lata tele mai, o le a ola ai i latou uma o ē alolofa ma usiusitai ia Ieova le Atua i se lalolagi e aunoa ma le tiga.