O Ai le Atua?

E leʻi leva lava talu ona foafoaina le tagata, ae amata loa ona latou tapuaʻi i isi atua ma atua fafine. Ae o loo taʻua i le Tusi Paia le Atua e toʻatasi e “silisili nai lo o isi atua uma.” (2 Nofoaiga a Tupu 2:5) O ai lenā Atua? E faapefea ona silisili o ia nai lo o atua uma o loo tapuaʻi i ai isi tagata? I lenei lesona, o le a e aʻoaʻoina ai le auala o loo faailoa mai ai e lenā Atua o ia lava iā te oe.

1. O ai le suafa o le Atua, ma e faapefea ona tatou mautinoa e finagalo ia tatou iloa o ia?

Ua faailoa mai e le Atua o ia lava iā i tatou i le Tusi Paia. Ua ia faapea mai: “O aʻu o Ieova. O loʻu igoa lea.” (Faitau le Isaia 42:​5, 8.) O le suafa “Ieova,” e faaliliuina mai i le igoa Eperu lea e uiga atu “E Gaoioi o Ia e Tusa ma Tulaga Manaʻomia.” E finagalo Ieova ia tatou iloa lona suafa. (Esoto 3:​15) E faapefea ona tatou iloa o lona finagalo lenā? E silia ma le 7,000 taimi o loo taʻua ai lona suafa i le Tusi Paia!a O le suafa Ieova, e faasino atu i le “Atua moni i le lagi i lugā atoa ma le lalolagi i lalo nei.”​—Teuteronome 4:​39.

2. O le ā o loo taʻu mai i le Tusi Paia e faatatau iā Ieova?

O loo taʻua i le Tusi Paia, e na o Ieova lava le Atua moni mai i atua uma o loo tapuaʻia e tagata. Aiseā? E tele māfuaaga. O Ieova o le pule aoao, ma e na o ia lava “o Lē e Silisili Ese i le lalolagi uma.” (Faitau le Salamo 83:18.) O loo taʻua i le Tusi Paia o ia “o Lē e ona le malosi uma lava,” ona e iā te ia le mana e faia ai so o se mea e finagalo i ai. Na ia “foafoaina mea uma lava,” e aofia ai le vateatea ma meaola uma i le lalolagi. (Faaaliga 4:​8, 11) E leai se isi e pei o Ieova, o le Atua e mai i le vavau e oo i le faavavau.​—Salamo 90:2.

3. E tele faalupega e ave i le Atua, ae tasi lava lona suafa

Ina ia iloa le eseesega o taʻu e ave i se tagata, ma lona igoa, faaali le VITIŌ, ona talanoa lea i le fesili lenei:

VITIŌ: E Tele Faalupega ae e Tasi Lona Suafa (0:​41)

• O le ā le eseesega o se taʻu e pei o le “Alii,” ma le suafa?

O loo taʻua i le Tusi Paia, e tapuaʻi tagata i le tele o atua ma alii. Faitau le Salamo 136:​1-3, ona talanoa lea i le fesili lenei:

• O ai le “Atua o atua” ma le “Alii o alii”?

4. E finagalo Ieova ia e iloa lona suafa ma faaaogā

VITIŌ: Pe e Iai se Suafa o le Atua?​—Vaaiga Puupuu (3:​11)

• Pe e te manatu e finagalo Ieova ia iloa e tagata uma lona suafa? Aiseā?

E finagalo Ieova ia faaaogā e tagata lona suafa. Faitau le Roma 10:​13, ona talanoa lea i fesili nei:

• Aiseā e tāua ai le faaaogā o le suafa o le Atua, o Ieova?

• O ā ni ou faalogona pe a iloa e se tasi lou igoa ma valaau ai oe?

• O le ā sou manatu, o ā faalogona o Ieova pe a e faaaogāina lona suafa?

5. E finagalo Ieova e avea oe ma ana uō

VITIŌ: O Laʻu Saʻiliga o le Atua Moni (8:​18)

• I le vitiō, na faapefea i le iloaina e Soten o le suafa o le Atua, ona aafia ai o ia?

A o leʻi avea oe ma uō a se tasi, e tatau lava ona e iloa muamua lona igoa. Faitau le Iakopo 4:8a, ona talanoa lea i fesili nei:

• O le ā o loo valaaulia e Ieova oe e fai?

• E faapefea i lou iloaina ma le faaaogāina o le suafa o le Atua, ona fesoasoani e te mafuta vavalalata atu ai iā te ia?

AOTELEGA

O Ieova le suafa o le Atua moni e toʻatasi. E finagalo ia tatou iloa ma faaaogā lona suafa, ma mafai ai ona tatou mafuta vavalalata atu iā te ia.

Fesili Autalu

• E faapefea ona ese Ieova mai atua uma o loo tapuaʻi i ai tagata?

• Aiseā e tatau ai ona tatou faaaogāina le suafa o le Atua?

• E faapefea ona iloa e finagalo Ieova e te faalatalata atu iā te ia?

MANATU FAAOPOOPO

Iloilo māfuaaga e lima e tatou te mautinoa ai e iai moni lava le Atua.

“Pe e Iai se Atua?” (Mataupu i le jw.org)

Aiseā e talafeagai ai ona tatou talitonu e iai moni lava le Atua?

“O Ai na Foafoaina le Atua?” (Le Olomatamata, Aokuso 1, 2014)

Iloilo pe aiseā e tatau ai ona faaaogā le suafa o le Atua, e ui tatou te lē iloa tonu le faaleoga na iai i aso anamua.

“O Ai Ieova?” (Mataupu i le jw.org)

Pe e tāua le igoa e tatou te faaigoa ai le Atua? Iloilo māfuaaga e tatou te faapea atu ai e iai le suafa patino o le Atua.

“E Fia Suafa o le Atua?” (Mataupu i le jw.org)