E Lagolagoina e le Faalapotopotoga a Ieova Lau Faiva

“Na aʻu iloa foi le tasi agelu ua lele i le taulotoaiga o le lagi, ua ia te ia le tala lelei faavavau e folafola atu.”—FAAALIGA 14:6.

1. Ua faapefea ona tofotofoina Molimau a Ieova, ma aisea ua latou sao mai ai?

AISEA e tāua tele ai le iloaina o le matafaioi a le faalapotopotoga faalelagi a Ieova i le lagolagoina o le faiva faa-Kerisiano? Ia, pe mafai ea e Molimau a Ieova ona faataulauina le talaʻia o le tala lelei o le Malo o le Atua i totonu o se lalolagi sili ona leaga, e aunoa ma le lagolagosua a ʻau faalelagi a Ieova? Ua faia e Molimau lena talaʻiga a o faagasolo se senituri o le matuā malosi o le lotonuu, o faiga faapolotiki pulepuletutū, o taua a le lalolagi, ma le anoanoai o toʻatugā eseese. Pe ana aunoa ma le fesoasoani a Ieova, pe mafai ea ona sao mai Molimau i le fetaomi mai o le faailogalanu, faailogatagata, ma sauaga matuitui mai atunuu eseese lea ua masani ona fetaiai ma i latou?—Salamo 34:7.

Faasaoina e Ui i Teteega i le Lalolagi Aoao

2. O le ā le faatutusaga o loo iai i le va o Kerisiano moni o le uluai senituri ma Kerisiano moni i aso nei?

² I lenei 20 senituri, o fili mai lotu ma faiga faapolotiki, ua taufai lāgā aʻe toʻatugā uma e mafai, pe faaletulafono pe leai, ina ia taumafai e taofia pe faaleagaina le galuega a Ieova. Ua sauaina uso ma tuafāfine Kerisiano, ua talaseseina, ua faia i ai ni tusitusiga lē tonu, ma faia i ai faamatalaga taufaaleaga—e toatele ua oo ina fasiotia—e masani ona o uunaiga a taʻitaʻi lotu a Papelonia le Aai Tele. E mafai ona faapea atu, e pei ona sa fai atu ai i uluai Kerisiano, “ua iloa e i matou ua talaeseina lena lotu i nuu uma lava.” E pei lava ona matuā vilivilitai taʻitaʻi lotu Iutaia i taimi o Keriso e taofi lana faiva, ua faapena foi i taʻitaʻi lotu ma aposetate, i le auaufaatasi ma a latou aumea faapolotiki, ona taumafai e taofia le galuega tele tau aʻoaʻoga o le molimau atu a tagata o Ieova.—Galuega 28:22; Mataio 26:59, 65-67.

3. O le ā e mafai ona tatou aʻoaʻoina mai le faamaoni o Henryka Żur?

³ Seʻi fai ma faaaoaoga le mea na tupu i Polani, ia Mati 1, 1946. O Henryka Żur, o se teine Molimau e 15 ona tausaga, e nofo i se nuu e latalata i Chełm, sa la ō atu faatasi ma se isi Molimau, o se uso, ina ia asia ni tagata loto fiafia i se pitonuu e latalata ane. Na ave faamalosi i laʻua e ni tagata o le vaega faafitafita a le lotu Katoliko e taʻua o le Narodowe Siły Zbrojne (Vaega Faaauupegaina a le Malo). Na sasaina faamoʻamoʻa le uso ae na mafai ona ola o ia. Sa lei faapena le tulaga o Henryka. Sa matuā faataugāina o ia mo le tele o itula a o latou taumafai e faamalosi o ia e faia se faailoga faa-Katoliko o le koluse. Na faapea atu i ai se tasi o ē na faaoosala ia te ia: “E pule lava oe i ou talitonuga e te manao e talitonu ai, ae tau lava o lou faia mai o le faailoga faa-Katoliko o le koluse. A leai, o le a fana loa oe!” Pe na vaivai ai ea lona faamaoni? E leai. Na toso faatātā atu o ia e nei tagata lotu palaaai i se togavao na latalata ane ma fanaina ai o ia. Peitai, sa manumalo pea o ia! Na lē taulau ona latou gausia lona faamaoni.a—Roma 8:35-39.

4. Ua faapefea ona taumafai faiga faapolotiki ma faiga faalotu e taofia le galuega talaʻi o le Malo?

⁴ Mo le silia i le selau tausaga, ua faia ai i auauna i ona po nei a le Atua faiga lē alofa ma le lē faaaloalo. Talu ai e lē iai Molimau a Ieova, ma e lē mananao foi, ina ia avea i latou o se vaega o lotu autū a Satani, ua manatu ai ia i latou o se mailei talafeagai lea mo so o se tagata faitio po o se tasi e tetee valea. Ua matuā osofaia i latou e faiga faapolotiki. E toatele Molimau ua faamaturoina ona o lo latou faatuatua. E oo lava i pulega ua taʻua e faatemokalasi ua latou taumafai foi e taofia le talaʻia o le tala lelei. I tuā lava i le 1917 i Kanata ma le Iunaite Setete, na faaoso ai e taʻitaʻi lotu ni tuuaʻiga sese faapea o Tagata Aʻoga o le Tusi Paia, e pei ona sa iloa ai Molimau i na taimi, sa latou tetee i le faiga malo. O lea na faafalepuipuiseseina ai i latou sa taimua i galuega a le Sosaiete o le Olo Matamata, ae na mulimuli ane toe faaleaogaina o latou moliaga.—Faaaliga 11:7-9; 12:17.

5. O ā upu ua avea ma faamalosiau i auauna a Ieova?

⁵ Ua faaaogā e Satani auala uma e oo i ai lona malosi i le taumafai e taofia le galuega molimau atu a uso o Keriso ma a latou aumea faamaoni. Peitai, e pei ona faaalia e le tele o mea tutupu, e lē mafai e faamataʻuga, le faafefeina, o sauāga i le tino, o falepuipui, o nofoaga o faasalaga, e oo lava i le oti, e lē mafai ona latou taofia ai le tautala atu o Molimau a Ieova. Ma o le tulaga lava lena o loo iai a o faagasolo mai talafaasolopito. O loo faaauau pea ona avea upu a Elisaia ma faamalosiau: “Aua e te fefe, auā e toatele ua ia te i tatou i e ua ia te i latou.” O se tasi o mafuaaga auā e toatele mamao atu agelu faamaoni nai lo ʻau a le Tiapolo!—2 Tupu 6:16; Galuega 5:27-32, 41, 42.

E Faamanuia Ieova i le Talaʻiga e Faia ma le Maelega

6, 7. (a) O ā uluai taumafaiga na fai ina ia talaʻia le tala lelei? (e) O le ā le suiga aogā na faia e amata mai i le 1943?

⁶ I le gasologa o le 20 o senituri, ua faaaogā ai e Molimau a Ieova le tele o aogā i masini faaonaponei (technology) ina ia faalauteleina ma faavave ai le galuega tele o le molimau atu a o lei oo mai le iuga. I tuā i le 1914, na faatulai ai e le faifeau o Russell, o le uluai peresitene a le Watch Tower Bible and Tract Society, le uluai faaaogaina o ata lē gaoioi (slides) ma ata gaoioi (motion pictures), e faaali faatasi ma ni faamatalaga faale-Tusi Paia i lipine o fonokalafi (phonograph records), i se polokalame faale-Tusi Paia e valu itula le umi na taʻua o le “The Photo-Drama of Creation.” Na matuā ofo ai ē sa maimoaina i le tele o atunuu i lena taimi. Mulimuli ane, i vaitausaga mai le 1930 ma le 1940, na amata ai ona lauiloa Molimau i la latou talaʻiga mai lea fale i lea fale ma le faaaogaina o masini fonokalafi sa mafai ona feaveai solo, sa tā ai lipine o lauga faale-Tusi Paia na faia e J. F. Rutherford, o le peresitene lona lua a le Sosaiete.

⁷ I le 1943 na laasia ai se laasaga iloga i le taitaiga a Nathan H. Knorr, le peresitene lona tolu o le Sosaiete, ina ua filifili e faatulaga le Aʻoga o le Faiva Faatiokarate i faapotopotoga uma. O iina na toleniina ai Molimau e talaʻi atu mai lea fale i lea fale e aunoa ma le faaaogaina o lipine o fonokalafi. Talu mai lena taimi, sa amata ai foi ona faamaopoopoina isi aʻoga e toleni ai misionare, o faifeau paeonia faataimi atoa, o toeaina o faapotopotoga, ma ovasia o loo galulue i lālā a le Sosaiete o le Olo Matamata. O le ā le iuga?

8. Na faapefea ona faaalia e Molimau se faatuatua tele i le 1943?

⁸ I tuā i le 1943, a o vevela le Taua Lona Lua a le Lalolagi, sa na o le 129,000 Molimau na auauna faamaoni i atunuu e 54. Peitai, sa ia i latou le faatuatua ma se talitonuga maumauai o le a faataunuuina le Mataio 24:14 a o lei oo mai le iuga. Sa latou mautinoa o le a muamua ona folafola atu e Ieova le feau lapatai tāua a o lei faasolo mai mea tutupu na o le a aumaia ai le iuga i lenei faiga amioleaga o mea. (Mataio 24:21; Faaaliga 16:16; 19:11-16, 19-21; 20:1-3) Po ua tauia ea a latou taumafaiga?

9. O ā mea moni e faaalia ai o loo olaola le galuega o le molimau atu?

⁹ Ua iai nei a itiiti mai e 13 atunuu o loo iai le silia i le 100,000 Molimau maelega i na atunuu taitasi. O nisi o nei atunuu o loo avea ai le Lotu Katoliko ma lotu autū. Peitai, seʻi tagai i le tulaga o loo iai. I Pasili o loo iai le 450,000 tagata talaʻi o le tala lelei, ma e silia i le 1,200,000 na auai i le Faamanatuga o le maliu o Keriso i le 1997. O le isi faaaoaoga o Mekisikō, e toetoe lava 500,000 Molimau o loo iai, ma e sili atu i le 1,600,000 na auai i le faamanatuina o le Faamanatuga. O isi atunuu Katoliko o Italia (e 225,000 Molimau), Falani (tusa ma le 125,000), Sepania (sili atu i le 105,000), ma Anitenitina (sili atu i le 115,000). I le Iunaite Setete, lea o loo avea ai ma lotu tetele le Porotesano, Katoliko, ma le lotu Iutaia, o loo iai foi iina le 975,000 Molimau ma le sili atu i le 2,000,000 na auai i le Faamanatuga. E mautinoa lava, o loo lolofi ese le motu o tagata e toatele mai ia Papelonia le Aai Tele, le emepaea a le lalolagi o lotu sese, ua latou ō ese mai ana aʻoaʻoga lavelave ae ua liliu atu i folafolaga manino ma le mautinoa a le Atua e uiga i le “lagi fou ma le lalolagi fou.”—2 Peteru 3:13; Isaia 2:3, 4; 65:17; Faaaliga 18:4, 5; 21:1-4.

Faafetaui Atu i Manaoga o Tagata

10. Ua faapefea ona suia tulaga o mea i nisi vaipanoa?

¹⁰ O le toatele o i latou ua liliu atu ia Ieova e ala ia Keriso Iesu na maua i le galuega mai lea fale i lea fale. (Ioane 3:16; Galuega 20:20) Peitai e iai foi isi auala ua faaaogā. Ua suia tulaga o mea, ma o tulaga tau i le tamaoaiga ua māfua ai ona saili atu le toatele o fafine i ni galuega i fafo atu o le aiga. E masani lava, a o faagasolo le vaiaso, e toalaiti tagata e mafai ona maua atu i fale. O lea, ua faafetaui atu ai Molimau a Ieova i le tulaga o loo iai. I le pei o Iesu ma uluai soo, latou te ō atu i nofoaga ma i taimi e mafai ona maua ai tagata.—Mataio 5:1, 2; 9:35; Mareko 6:34; 10:1; Galuega 2:14; 17:16, 17.

11. O fea o loo talaʻi atu ai Molimau a Ieova i aso nei, faatasi ai ma ā iuga?

¹¹ O loo tausolomua ma faaalia e Molimau le faautauta i le talaʻi atu i tagata i vaipanoa tetele e paka ai taavale, o nofoaga tetele o loo faatulaga uma ai faleoloa, o falegaosimea, o ofisa ma pisinisi, o aʻoga, o ofisa o leoleo, o pamu penisini, o faletalimalo ma faleʻaiga, ma luga o ala tetele. O le mea moni, ua latou talaʻi atu i so o se mea lava e mafai ona maua i ai tagata. Ma pe a maua atu tagata i le fale, ona faaauau lea e Molimau ona asiasi atu ia i latou iina. O lenei auala ua faafetaui lelei ma talafeagai e faalatalata atu ai i tagata, ua iu i le faateleina ai o lomiga faale-Tusi Paia e tufatufaina atu. Ua maua ai ē pei ni mamoe. Ua amata ai suesuega fou faale-Tusi Paia. O le galuega sili tau aʻoaʻoga i le talafaasolopito o le tagata, ua faatinoina pea ma le maelega e le silia i le lima ma le ʻafa miliona faifeau tauofo! Po o ia te oe ea le faaeaga e avea ai o se tasi o i latou na?—2 Korinito 2:14-17; 3:5, 6.

O le ā ua Uunaia ai Molimau a Ieova?

12. (a) O loo faapefea ona aʻoaʻoina e Ieova ona tagata? (e) O ā aafiaga ua iai ona o lenei aʻoaʻoga?

¹² O le ā le matafaioi o loo faia e le faalapotopotoga faalelagi i nei mea uma? Na valoia e Isaia: “E aʻoaʻoina lau fanau uma lava e Ieova; e tele foi le manuia o lau fanau.” (Isaia 54:13) O loo aʻoaʻoina e Ieova lenei auuso autasi i le lalolagi aoao e ala i lana faalapotopotoga vaaia i le lalolagi—i Maota o le Malo, i tauaofiaga, ma i fonotaga. Ua iu ai i le autasi ma le filemu. O aʻoaʻoga a Ieova ua maua mai ai ni tagata e tutasi lava, o ē ua aʻoaʻoina ina ia fealofani ma alolofa atu i o latou tuaoi e pei o i latou lava, ia lē ita atu i o latou tuaoi, po o fea lava o loo latou nonofo ai i totonu o lenei lalolagi lē autasi ma le fevaevaeai.—Mataio 22:36-40.

13. E mafai faapefea ona tatou mautinoa o loo aofia ai le faatonutonuga faaagelu i le galuega talaʻi?

¹³ O le alofa ua uunaia ai Molimau a Ieova e faaauau pea ona talaʻi atu e ui i uiga faalēfiafia mai po o sauaga. (1 Korinito 13:1-8) Ua latou iloa o la latou galuega faasaoola ua faatonutonuina mai le lagi, e pei ona taʻua i le Faaaliga 14:6. O le ā le feau lea o loo folafolaina atu e ala i le taitaiga faaagelu? “Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.” O le talaʻia o le tala lelei o le Malo ua faasilisilia ai le suafa o Ieova. Ua valaauliaina tagata e avatu le viiga i Lē na Foafoaina Mea, o le Atua lea, ae lē i mea na foafoaina ma le talitonuga sese faaevolusione. Ma aisea ua matuā faanatinati ai le galuega talaʻi? Auā ua oo mai le itu aso o le faamasinoga—le faamasinoga faasaga ia Papelonia le Aai Tele ma isi vala uma o le faiga o mea vaaia a Satani.—Faaaliga 14:7; 18:8-10.

14. O ai o loo aofia ai i lenei tauiviga tele tau aʻoaʻoga?

¹⁴ E leai se Kerisiano tuuina atu e tuusaʻoloto mai lenei galuega talaʻi. Ua taimua toeaina faaleagaga i le talaʻiga faatasi ma le faapotopotoga. O paeonia ua toleniina ua latou faia se sao atoatoa i le galuega. O tagata talaʻi maelega o le feau o le Malo, e tusa lava pe na o ni nai itula i le masina e mafai ona latou talaʻi ai po o ni itula foi se tele, ae o loo latou faasalalauina atu lava le feau i tulimanu uma o le lalolagi.—Mataio 28:19, 20; Eperu 13:7, 17.

15. O le ā se faamaoniga o le aafiaga ua faia e le talaʻiga a Molimau a Ieova?

¹⁵ Po ua iai ea se aafiaga ua oo i le lalolagi ona o nei taumafaiga uma? O se tasi o faamaoniga faigofie, o le tele o taimi o loo taʻua mai ai Molimau a Ieova i polokalame o Televise ma tusitusiga faasalalau. O nei faasalalauga e masani ona faamatilatila ai lo latou naunautai ma le maumauai e oo atu i tagata taitoatasi. Ioe, o lo latou maelega ma le auai e lē aunoa ua avea o se aafiaga loloto, e oo lava i le toatele o tagata o ē latou te tetee i le feau ma avefeau!

Lo Tatou Maelega e Faamaeʻa le Molimau Atu

16. O le ā le uiga ua tatau nei ona faaalia i le taimi puupuu lea o loo totoe?

¹⁶ Tatou te lē iloa po o le ā le tele o se taimi o totoe mo lenei faiga o mea, ma e lē manaomia foi ona tatou iloa, o le mea sili ia saʻo lelei le uunaiga tatou te auauna ai ia Ieova. (Mataio 24:36; 1 Korinito 13:1-3) Peitai ua tatou iloa ina ia mafai ona faaalia le alofa, le malosi, ma le faamasinotonu o Ieova, e ao ona “muai” talaʻi atu le tala lelei. (Mareko 13:10) O lea la, tusa lava po o le ā le tele o tausaga na tatou tatalia ai ma le naunautai le iuga o lenei lalolagi amioleaga, lē faimea tonu, ma le sauā, ae ao lava ona tatou ola ma le maelega e tusa ai ma lo tatou tuuina atu e talafeagai ai ma o tatou tulaga. Atonu ua matutua o tatou soifua po ua mamaʻi, peitai e mafai lava ona tatou auauna ia Ieova i le maelega lea sa ia i tatou a o tatou talavou ma malaulau le malosi. Atonu ua lē o toe mafai ona tatou faaaluina se taimi tele i le faiva e pei sa tatou faia ai muamua, peitai e mautinoa le mafai ona tatou tausisia pea le uigā o la tatou taulaga o viiga ia Ieova.—Eperu 13:15.

17. Faamatala mai se tala faalaeiau o se mea na tupu e mafai ona fesoasoani ia i tatou uma.

¹⁷ O lea la, pe talavou pe matua, seʻi o tatou faaali atu le maelega ma tufa atu la tatou feau mautinoa o se lalolagi fou i tagata uma tatou te feiloai. Tau ina ia pei i tatou o le teineitiiti matamuli e fitu ona tausaga mai Ausetalia, o lē na ō atu ma lona tinā i le faleoloa. Sa ia faalogo i le Maota o le Malo o talanoaina ai le tāua mo tagata uma ona talaʻi atu, o lea na ia tuuina ai ni polosiua faale-Tusi Paia se lua i lana ato. A o pisi lona tinā e fai le la faatau, ae mou ese atu le teineitiiti. Ina ua saili lona tinā mo ia, sa maua atu o loo ia ofoina se polosiua i se tamaitai! Na alu atu le tinā e faamalie i le tamaitai pe afai o faalavelave lana tama ia te ia. Peitai sa talia ma le agalelei e le tamaitai le polosiua. Ina ua toe tuua na o le tinā ma lana tama teine, na fesili le tinā ia te ia pe na faapefea ona ia maua le lototele e talanoa atu ai i se tagata e lē masani ai. Fai mai le teineitiiti: “Na ona ou faapea ifo lava i loʻu mafaufau, Sauni, Amata, Alu Loa! Ona ou alu loa lea!”

18. E mafai faapefea ona tatou faaalia se agaga lelei?

¹⁸ Tatou te manaomia uma se agaga e pei o le agaga o lena teineitiiti Ausetalia, ae maise ina ia mafai ona talanoa atu le tala lelei i ni tagata tatou te lē masani ai e oo lava i ni tagata taualoa. Atonu tatou te fefefe ina neʻi tetee mai. Seʻi aua lava neʻi o tatou faagaloina le mea na fetalai ai Iesu: “Aua tou te popole i sa outou e tali atu, pe faapefea, pe se a foi tou te fai atu ai; auā e aʻoaʻo le Agaga Paia ia te outou i lea lava itu aso i upu e tatau ona fai atu ai.”—Luka 12:11, 12.

19. E faapeī ou lagona e faatatau i lau faiva?

¹⁹ O lea, ia faatuatua i le fesoasoani a le agaga o le Atua a o e talanoa atu le tala lelei i tagata i se auala agalelei. E faitau miliona o loo masani ona latou faatuatua atu i tamaloloa ma fafine e lē tatau i ai, o ē e lē faavavau ona ola. Tatou te faatuatua ia Ieova ma lana faalapotopotoga faalelagi—o Keriso Iesu, o agelu paia, ma Kerisiano faauuina ua toe faatutūina aʻe—o ē e faavavau ona ola! O lea la, ia manatua: “E toatele ua ia te i tatou i e ua ia te i latou”!—2 Tupu 6:16.

[Faaopoopoga i lalo]

E Faapefea Ona E Tali?

◻ O le ā le matafaioi o loo faia e le faalapotopotoga faalelagi a le Atua i le faasaoina o tagata o Ieova?

◻ O ā faiga faapolotiki ma faiga faalotu ua latou osofaia Molimau a Ieova i le 20 senituri?

◻ Ua faapefea ona faafetaui atu e Molimau a Ieova la latou faiva i manaoga e tusa ai ma taimi eseese?

◻ O le ā o loo uunaia ai oe e talaʻi atu?

[Ata i le itulau 17]

Henryka Żur

[Ata i le itulau 18]

Iapani

Martinique

Iunaite Setete

Kenya

Iunaite Setete

E talaʻi atu Molimau a Ieova i so o se taimi ma i so o se mea e maua i ai tagata

[Ata i le itulau 20]

I le amatamataga mai o lenei senituri, sa faaaogā ai fonokalafi e faasalalau atu ai le feau o le Malo