Papelonia le Aai Tele—Ua Paʻū ma Faamasinoina

“UA PAŪ, ua paū Papelonia o le aai tele, auā ua ia faainu i nuu uma i le uaina o le toasa i lana faitaaga.” “Ua paū, ua paū Papelonia le aai tele, ua avea foi o ia ma mea e nofo ai temoni, ma mea e puipui ai agaga leaga uma, o le mea foi e puipui ai manu felelei uma e leaga ma le inosia.”—Faaaliga 14:8; 18:2.

Maeu se valoaga e faateia ai! ‘Ua paʻū Papelonia le Aai Tele.’ Sa nunumi tele i tagata aʻoga o le Tusi Paia lenei faamatalaga faafaatusa mo le tele o senituri. Ai se ā e ao ai ona e fia iloa lenei mea? Auā, e tusa ai ma valoaga a le Tusi Paia, o le iʻuga o Papelonia le Aai Tele o le a lē pine a e aafia ai le fanau uma a tagata. E pei ona tatou vaaia i lomiga o lenei mekasini o Iuni 1 ma Iulai 1, ua faailoa manino ai lenei fafine talitane e tumu i taaʻiga e faapea o le emepaea o lotu sese o le lalolagi a Satani.a

A e i le ā le auala ua paʻū ai o ia? Ma o anafea?

Ua Paʻū Papelonia a e Leʻi Faaumatiaina

Ina ia maua le uiga atoa o le paʻū o Papelonia le Aai Tele, e tatau ona tatou malamalama i le mea na tupu ina ua paʻū Papelonia anamua i le 539 T.L.M. O le taimi lena na faatagataotauaina ai tagata o le Atua, o Isaraelu, mo le toetoe lava 70 tausaga. Ona latou faatalitalia loa lea o se faasaolotoina e tusa ai ma upu a o latou perofeta. (Ieremia 25:11, 12; 29:10) Maeu se faafiafiaina atonu sa ia i latou ina ua faapogaia e Kuresa le Peresia le paʻū o Papelonia ma faasaolotoina tagata Iutaia e toe foi i lo latou aai paia, o Ierusalema!—Isaia 45:1-4.

Peitai, e ui lava ina motusia le pule a Papelona i luga o tagata Iutaia, a e sa lei faapea ai o le iʻuga lea o Papelona anamua. Ua tusi le tusitala o tala faasolopito o Joan Oates i lana tusi Babylon: “Sa ulufale atu Kuresa i Papelonia ma le manumalo, ma vaoia le vetea o mea ma tofia se kovana Peresia, ma tuua ai e aunoa ma le faalavelavea tulafono faavae faalotu faapea ma pulega o tagatanuu. . . . E moni e foliga mai i fafo o olaga totino o tagatanuu Papelonia sa itiiti lava se suiga na i ai i lalo o le pulega a Peresia. Sa tausia pea faiga faalotu ma talaulau ai gaoioiga tau fefaatauaiga.” O lea, e ui lava i lona paʻū, a e sa faaauau pea ona galue Papelonia, peitai e tasi sona eseesega tele—ona sa lē toe taofia faatagataotauaina ai tagata o le Atua, o Isaraelu. Na latou toe foi i Ierusalema e toe faafoisia le tapuaiga moni i inā.

Pe tusa ma le 331 T.L.M. ina ua ulufale le taʻitaʻi ʻau sili Eleni o Alesana le Sili i Papelonia, sa faafeiloaiina o ia ma le mafana e tagatanuu. Na tonu ia te ia e manao e faaliliuina le aai e avea ma ona laumua i sasae, peitai na maliu o ia a o lei mafai ona ia faataunuuina lona faanaunauga. Ua faaalia ai e lenei mea faapea sa uluola pea Papelonia i lena vaitaimi lata mai.

O lea, o le paʻū o Papelonia i le 539 T.L.M. sa lē faapea ai ua muta lona i ai pea. Sa faaauau pea ona galue mo le tele o senituri. Ua faapefea ona faaataina lenei mea i le faataunuuga faaonaponei o valoaga e aafia ai Pepelonia le Aai Tele?

Ua Auai Papelonia le Aai Tele i se Paʻū

E i ai sona uiga tutusa i le paʻū o Papelonia le Aai Tele faafaatusa, le emepaea o lotu sese i le lalolagi. I le vaega amata o lo tatou 20 senituri a o lei oo i le 1919, na tatau ai ona faasaolotoina Tagata Aʻoga o le Tusi Paia, e pei ona sa lauiloa ai Molimau a Ieova i lena vaitaimi, mai se ituaiga o faatagataotauaina faaleagaga i manatu ma faiga a lotu sese. E ui lava i le teena o ia aʻoaʻoga sese e pei o le Tolutasi ma le solu e lē mafai ona oti, a e sa pisipisia pea i faiga faa-Papelonia. E toatele na atiina aʻe se uiga fia amiotonu o le tagata lava ia i le atiina aʻe o uiga faaletagata. O nisi sa latou faasilisilia meafaiola, i lo latou lolo atu e auai i se tapuaia o uiga faaletagata lea na taulai atu ia Charles T. Russell, o le peresitene muamua o le Watch Tower Bible and Tract Society. E aunoa ma so o se faavae faale-Tusi Paia, sa latou faamanatuina ai aso fanau ma le Kirisimasi. Sa avea pea le koluse ma se mea e silisili i o latou mafaufau. O nisi ua oo lava ina latou laeiina ni pine fatafata e i ai le faailoga o le koluse ma le palealii, a o sailia e isi le tulaga faaaloalogia e tusa ai ma Kerisinetoma. Ona oo lea i le 1917, a o lei leva ona maliu Russell, sa amata loa ona i ai se suiga mataʻina.

I lena tausaga na lomia ai e le Watch Tower Society se faamatalaga e uiga i le Faaaliga i lalo o le ulutala The Finished Mystery. Sa faaalialia i lumāmea e lenei tusi taʻitaʻi lotu o Kerisinetoma, e aofia ai lo latou aafiaga i le Taua Tele lea sa aasa i Europa i lena vaitaimi. O nisi o taʻitaʻi lotu Porotesano, o se vaega sa fai ma sui o Papelonia le Aai Tele i Kanata, na latou aveina nei faamatalaga sii i a latou uo mamae faapolotiki i le malo Kanata ma taʻuleagaina ai Tagata Aʻoga o le Tusi Paia faapea o ni tagata fouvale. Ia Fepuari 12, 1918, na faasaina ai le Watch Tower Society i Kanata.

Sa leʻi faatuai taʻitaʻi lotu i le Iunaite Setete i le mulimuli atu i le faaaʻoaʻoga a o latou uso faifeau i Kanata. I totonu o ni nai aso, na faoa ai lomiga faale-Tusi Paia a le Watch Tower i Los Angeles, i Kalefonia, i le Iunaite Setete. Ona oo lea ia Me 1918, sa tuuina atu ai tusi saisai mo le puea faapagotaina o J. F. Rutherford, le peresitene fou o le Watch Tower Society, ma isi ofisa e toafitu o le Watch Tower. Ia Iuni, i se vave e faateia ai, na ave faamalosia ai nei tane Kerisiano i luma o le faamasinoga ma taʻusalaina. E toafitu na faasalaina i le fale puipui mo le 20 tausaga, a e toatasi mo le 10 tausaga. O le ā se tali atu a taʻitaʻi lotu? Na taʻua e Martin Marty i lana tusi Modern American Religion: The Irony of It All: “Sa faasagatau taʻitaʻi lotu i ē na mulimuli atu ia Russell [ia na mulimuli ane lauiloa o Molimau a Ieova] ma na alalaga fiafia ina ua faalogo faapea e taʻi luasefulu tausaga faasalaga ua tuuina atu i taʻitaʻi o Molimau a Ieova ua faasalaina.” Sa talie sui o Papelonia le Aai Tele. Sa galo ia i latou faapea o le tagata o lē manumalo i le iʻuga e sili atu lana ata i lo ē na talie muamua.

O lea, i le 1918, o le faatagataotauaina faafaatusa ia Papelonia sa faapea foi ona avea o se faafalepuipuiina moni mo nisi o tagata o Ieova. O se galu o sauaga o tagata aʻoga o le Tusi Paia na fafati atu mai le isi itu o le Iunaite Setete, e oo atu i Kanata, ma isi atunuu. Sa faamaopoopoina e taʻitaʻi lotu lotonuu ni ʻau faatupu faalavelave e tutuliina i latou mai aai. Sa vali i ta ma faapipii atu i ai fulu i Tagata Aʻoga o le Tusi Paia ma sasaina i uatogi. Sa faavaeina ai se faamaumauga e maasiasi ai o le lē faamasinotonu faasaga i lenei vaega toaitiiti o Kerisiano faamaoni.b

Ona oo lea i le 1919, na tupu ai se suiga e leʻi faatalitalia o mea tutupu. Na iʻu le Taua Tele ia Novema 1918. Sa toe talosagaina faasalaga faasaga i ofisa o le Watch Tower Society e faapea o se faamasinoga ua lē saʻo ona tauaveina. Sa toe faasaolotoina Rutherford ma ana aumea mai le fale puipui, o se mea sa maasiasi tele ai o latou fili faalotu. E pei ona taʻua e Marty: “Sa leai se alaga fiafia mai sui o lotu.” Mulimuli ane, ona faasaolotoina atoatoa lea o i latou uma na molia. Sa teena e le faamasino Katoliko faaituau, o Martin T. Manton, o lē na mulimuli ane fai ma “fitafita o le ituaiga o Sagato Gregory le Sili” e Pope Pio XI, le tatalaina i tua o Molimau e toavalu na moliaina, ma na faapea ona mafua ai le faafalepuipuiina o i latou ma le lē tonu mo le iva masina. Na faaalia mulimuli ane le ituaiga o tagata moni e i ai o ia i le 1939, ina ua auina atu o ia i le fale puipui ona o le faatauanauina o ni totogi i ni auala faatogafalea!

I lo latou faasaolotoina mai le fale puipui i le 1919, na toe foi atu ai Rutherford ma ana aumea i le ofisa ulu o le Watch Tower Society i Brooklyn. I lea, na amata ai ona latou toe fuafuaina e sauniuni mo se tauiviga aupito sili ona tele o le talaʻiga o le Malo i se tulaga sa leʻi faapea ona iloa muamua i le lalolagi. Ua motusia e Tagata Aʻoga o le Tusi Paia filifili na saisaitia ai o le mataʻu i tagata ma ua latou iloa manino nei lo latou tulaga e tutu ai e tusa ai ma lotu sese uma. Sa avea pea Papelonia le Aai Tele o lo latou fili ma e tatau ona faaalialia i lumāmea e faapea ua paʻū. Ua tatau ona toe faafoisia le tapuaiga moni i totonu o le va o atunuu.

Sa faateleina e na Kerisiano loto totoa la latou faiva i lea fale i lea fale. Na latou savalia foi ala tetele, ma faaalialia i lumāmea lotu sese e ala i faaaliga tusia i laupapa na taʻua ai e faapea: “O Lotu o se Mailei ma e Taufaasese” ma, “Ia Auauna i le Atua ma Keriso le Tupu.” Ua faaauau pea ona uluola ma galue lotu sese, e pei ona sa faia e Papelonia anamua peitai e tusa ai ma Molimau a Ieova, ua paʻū Papelonia le Aai Tele i le 1919. Sa saoloto i latou mai taofiofiga faa-Papelonia!

Faaitiitia Taaʻiga a Papelonia

I le 70 tausaga mulimuli ane ai, ua mafai ai ona tatou vaaia nei i le tele o vaega o le lalolagi, ua amata ona faaitiitia taaʻiga a Papelonia le Aai Tele. E moni, e foliga mai o loo lauolaola pea lotu i totonu o le Iunaite Setete, o le nofoaga o loo faaaogāina ai ma le lē tonu e le au faievagelia i televise ma tagata suesue o le mafaufau ma amioga faalotu, se vaega o tagata lautele o le atunuu e sili ona maua i faalogona ootia. Peitai ane, e oo lava i nisi o nei tagata taufaasese ma le manao tele i mea faitino, ua faaalialia ma faalumaina i se taimi e lei leva atu. E foliga mai o loo uluola lotu i Korea, le nofoaga ua oo ina matuā aafia ai lotu a Kerisinetoma i le faapolotiki. E faamaonia ai, e ui lava ina “paū” Papelonia le Aai Tele, a e o loo galue pea.

A e ui i lea, mulimuli ane i taua a le lalolagi, ua lē iloa ai e lotu masani [orthodox] le toatele o ana tagata lotu i atunuu e pei o Siamani, Tenimaka, Suetena, ma Peretania. E oo lava i atunuu Katoliko e pei o Italia, Sepania, ma Falani ua matauina ai le paʻūū ese atu mai faiga masani faa-Katoliko o le faia o kofesio ma le auai i Misasa. O le numera o i latou o loo aʻoga mo le tofi patele ua paʻū maulalo. Ma o le mea moni lava lena na lagona ai e le pope o loo i ai nei le manaomia ona ia faimalaga i le lalolagi na i lo so o se isi lava pope i le tala faasolopito, o le faailoga lea o se lotu ua i se tulaga pagatia.

A e lē gata i lea, talu mai le 1917 o le tele o atunuu e pulea lautele ua latou tuu lotu i se tulaga maulalo i le faia o se vaega itiiti ma motusia ana taaʻiga faapolotiki sa i ai muamua. Pe a fua atu i le tulaga i le lalolagi aoao, ua avea pea lotu faaleaganuu ma mafuaaga o le tele o le feitagai ma le faamasaatoto ua faapea ona liliuese ai le toatele o tagata fai mafaufau mai lotu uma, e tusa lava po o atunuu i Sisifo po o Sasae. Ioe, o vai faafaatusa o loo tietie ai Papelonia le Aai Tele, o tagata o loo i lalo o lana faatonutonuga, ua matūtū. Ua faamasinoina Papelonia le Aai Tele, ma ua latalata lona faasalaina.—Faaaliga 16:12; 17:1, 15.

Papelonia—Le Pogai ua Faamasinoina Ai

O le ā le faavae ua ia Ieova mo le faamasinoina o le emepaea o faiga lotu sese ol le lalolagi? E moni lava, atonu e manatu nisi, e tatau ona tagatagai ma le fiafia o ia i aʻoga uma, maota gasegase, ma galuega alofa ua faaauilumaina e lotu eseese. A e ua faapefea ona lava ma totoe nei mea uma e faafetauia ai le moliaga ua faatulaga e Ieova faasaga i lotu a le lalolagi? Seʻi o tatou iloiloina puupuu lea moliga ma le talaaga o lotu.c

“Ua sau foi le tasi o ia agelu e toafitu sa i ai ipu e fitu, ua tautala mai ia te au, ua faapea mai ia te au, Sau ia, ou te faailoa ia te oe le faasalaina o le fafine talitane e sili, o lē tietie i vai e tele; ua faitaaga ma ia o tupu o le lalolagi, ua onā foi e o nonofo i le lalolagi i le uaina o lana faitaaga.” (Faaaliga 17:1, 2) E pei ona matou faaalia manino atu i a matou lomiga o Iuni 1, ma le Iulai 1, 1989, le fefaauoaiga a lotu ma taʻitaʻi faaleatunuu, “o tupu o le lalolagi,” ua avea ma pogai o le manunua ai o tagata i le faagasologa mai o le tala faasolopito, e mafai ona faatusaina i amioga a se fafine talitane o loo faitaaga ma sailia ona lava lelei. A e o loo faaauau pea le moliaga.

“Na ou iloa foi le fafine ua onā i le toto o le au paia ma le toto o e na molimau ia Iesu.” “Ua iloa foi ia te oe le toto o perofeta ma le au paia, ma i latou uma ua fasiotia i le lalolagi.” (Faaaliga 17:6; 18:4) E tatau lava ona molia Papelonia le Aai Tele i le nofosala i le toto ona o lona faamaturoina o Kerisiano moni i le tele o senituri, e aofia ai ma se aofai o i latou na faaliliua ma le lototele le Tusi Paia i le gagana a tagata lautele, faapea foi ma le toatele o ē na ia i latou le Tusi Paia ma faitauina. Ua nofosala foi i le toto Papelonia le Sili ona o Kerisiano moni o ē na faamaturoina lata mai nei i fale puipui ma nofoaga o faasalaga, pe sa i lalo o le faa-Nasi, faa-Fascist, po o isi pulega faatautalatasi. Matau o le moliaga e faasino ia “i latou uma ua fasiotia i le lalolagi,” lea o le a aofia ai le faitau selau miliona i le lalolagi atoa o ē ua maliliu i taua ma feainaiga tauimasui ia na tauina i le faagasologa mai o tala faasolopito e tagata ua fai mai o tagata lolotu. Faatusatusa le Mataio 23:34-36; 2 Timoteo 3:5.

O le faamasinoina e le Atua o Papelonia le Aai Tele ua faailoa atu ai se tasi vala o lona nofosala. Ua faapea mai le faamsinoga: “Auā ua faaseseina nuu uma i au togafiti faataulāitu.” (Faaaliga 18:23) E tosina ai le mafaufau, ona o “togafiti faataulāitu” ua faaliliuina ai le upu Eleni phar·ma·kiʹa lea e “faasino muamua lava i le faaaogāina o vailaau, fualaau, vai faalauatau; o le faaonāina; ona sosoo lea ma faiga faataulāitu.d I se uiga faaleagaga, ua faaonāina e faiga lotu sese atunuu, taʻitaʻiseseina i latou ina ia talitonu i atua sese ma aʻoaʻoga ia ua liliueseina ai lo latou uai atu ia Ieova ma le finauga i le pule silisili o le vateatea. Ua faataatia foi e lotu sese le faavae mo so o se ituaiga o faiga faaagaga ma faiga faataulāitu, e ala i lana aʻoaʻoga sese o le lē mafai ona oti o le solu, e faaosofia ai le mataʻu i ē ua feoti ma le tapuai atu i tuaā. Ua matuā tonu le taʻusalaina e le Atua o Papelonia le Aai Tele. E pei ona sa tusia e Ioane: “Auā ua paʻi atu ana agasala i le lagi, ua manatua foi e le Atua ana amioleaga.”—Faaaliga 18:5.

O le ā e Tatau ona Tatou Faia?

I le manatu atu i le tulaga paʻū o Papelonia le Aai Tele ma lona tulaga faamasinoina, o le ā e ao i ē alolofa faamaoni i le upu moni ona faia nei? O le valoaga a Isaia e uiga ia Papelonia anamua ua faatatauina i sona tulaga e sili atu ona malosi i lotu sese i aso nei: “O ese ia, ina o ese outou, ia outou o atu nai lea mea; aua neʻi paʻi atu i se mea leaga; o atu ia outou nai totonu ia te ia; ia mamā outou o e tauave ipu a Ieova.” (Isaia 52:11) Ua tutusa le valaau faanatinati lenei ma lea o loo i le Faaaliga 18:4: “Ua ou faalogo foi i le tasi leo mai le lagi, ua faapea mai, Loʻu nuu e, ia outou o ese ia te ia [Papelonia le Aai Tele], ina neʻi faatasia outou i ana agasala, ina neʻi tofusia foi outou i ona mala.”

Ioe, ua oo i le taimi e momotuese ai mai i auaufaatasiga uma ma lotu sese. Peitai afai tatou te ō ese ma Papelonia le Aai Tele, o fea e tatau ona tatou liliu atu i ai? I le tapuaiga moni a Ieova i le auaufaatasi ma ana molimau. Ua uma nei, ona lolofi atu le faitau miliona mai atunuu uma o le lalolagi i le “mauga o Ieova” faafaatusa. Ua valaauina foi oe e suesue le Tusi Paia ma Molimau a Ieova ma auai i lenei tapuaiga moni.—Isaia 2:2-4; 43:10-12.

Ua tumau nei le fesili, Afai ua paʻū Papelonia le Aai Tele ma ua faamasinoina, o le ā o loo sosoo ai i le lisi o faasologa o taualumaga tauatua? O le ā o le a tupu i le lalolagi o le emepaea o faiga lotu sese a Satani? I le isi a tatou lomiga o sosoo mai ai, Novema 1, o le a suesueina ai lena fesili e fesootai ma valoaga a le Tusi Paia.

[Faaopoopoga i lalo]

[Ata i le itulau 7]

E ui lava ina paʻū Papelonia i le 539 T.L.M., a e na faaauau pea ona galue o se aai mo le faitau selau o tausaga