Manatu mo Tapuaʻiga a le Aiga ma Suʻesuʻega a le Tagata Lava Ia
I LE amataga o le 2009, na toe fetuunaʻi ai le faasologa o sauniga a faapotopotoga o Molimau a Ieova i le lalolagi aoao. Ua tuufaatasi sauniga e lua ia sa faia i aso o le vaiaso, ma na faalaeiau tagata uma ia faaaogā le afiafi ua avanoa, e fai ai le tapuaʻiga a le aiga po o suʻesuʻega a le tagata lava ia. Po o e faaaogā tatau lenei faatulagaga fou? Po o e maua ni aogā atoatoa mai i lenei faatulagaga?
O nisi ua taumānatu po o ā ni mataupu e tatau ona latou filifilia e talanoaina i le tapuaʻiga a le aiga. E lē o mananaʻo le Vaega Pule e faatulaga mai se faiga e tasi e fai ai tapuaʻiga a aiga uma. Talu ai e eseese tulaga o mea, ua talafeagai ai i ulu o aiga po o tagata taʻitoʻatasi, ona fuafua po o le ā le auala o le a faaaogā lelei ai lenei faatulagaga faalevaiaso.
O nisi e sauniuni ai mataupu mo sauniga, ae e lē tatau lava ona tuua ai le tapuaʻiga a le aiga. O isi e latou te faitauina, talanoa, pe faatino foʻi tala mai le Tusi Paia, aemaise lava ona e aogā i le fanau lāiti. Atonu e lē o taimi uma e talafeagai ai pe manaʻomia ona faia se talanoaga o fesili ma tali, e pei ona faia i sauniga masani. E masani lava, e sili atu ona lelei se siʻomaga toʻafimālie, mo se talanoaga faalaeiau ma fefaasoaaʻi ai manatu. O lenā siʻomaga e faapogaia ai ni mafaufauga faatupu manatu, lea e mafai ona manatua pea ma fiafia ai tagata uma.
Ua tusi mai se tamā e toʻatolu lana fanau: “O mea e matou te faia, e tele lava ina faavae i le faitauga Tusi Paia. A o leʻi oo i le aso o le tapuaʻiga a le aiga, e muamua ona matou faitauina mataupu, filifili e le fanau ni vala e fai ai ni a latou saʻiliʻiliga, ona latou faamatala mai lea o manatu na latou mauaina. E masani ona tusi e Mikaele [e fitu tausaga] se ata pe tusi foʻi se palakalafa. E ono tusi e Tavita ma Katelina [e 13 ma le 15 tausaga], se faamatalaga e uiga i se tala o loo i le Tusi Paia, mai le vaaiga a sē na mātauina le mea na tupu. O se faaaʻoaʻoga, ina ua matou faitau e faatatau i le faamatalaina e Iosefa o uiga o miti a le faifalaoa ma le tautū uaina a Farao, sa tusi e Katelina se tusigatala mai i le vaaiga a se pagota, o loo vaai atu i le mea o loo tupu.”—Kene. mata. 40.
O le mea masani, e fesuisuiaʻi le tulaga o mea. O le mea e fetaui i se isi tagata po o se aiga, atonu e lē fetaui i le isi tagata po o le isi aiga. O loo taʻua i le pusa nisi o manatu e ono faaaogā i taimi o le tapuaʻiga a le aiga, po o suʻesuʻega a le tagata lava ia. Ae e mautinoa e tele nisi manatu e mafai ona e mafaufau i ai.
[Pusa/Ata i le itulau 7]
Mo aiga e iai fanau talavou:
• Faitau ma talanoa le tusi, Fesili ua Fesili Mai ai Talavou—Tali e Aogā.
• Faataʻitaʻi le fesili lenei, “O le ā lau tali pe afai e . . . ?” (Tagaʻi i Le Olomatamata o Me 15, 1996, itulau e 14, palakalafa 17-18.)
• Talanoa e faatatau i sini mo le lumanaʻi, ma sini mo aso taʻitasi.
• Mai lea taimi i lea taimi, ia matamata ma talanoa i se vitiō faale-Tusi Paia.
• Iloilo le mataupu “Mo le ʻAutalavou,” lea e faasolosolo mai i le Olomatamata.
Mo ulugalii e leai ni fanau:
• Talanoa le mataupu 1, 3, 11-16 o le tusi, Le Ala e Maua ai le Fiafia i le Aiga.
• Fetufaaʻi i manatu na maua mai i saʻiliʻiliga o manatu mai le faitauga Tusi Paia.
• Sauniuni mo le Suʻesuʻega Faale-Tusi Paia a le Faapotopotoga, po o le Suʻesuʻega o le Olomatamata.
• Talanoa i auala e faalautele atu ai la oulua faiva o se ulugalii.
Mo uso ma tuafāfine nofofua po o i latou i aiga e eseese tapuaʻiga:
• Suʻesuʻe lomiga fou na maua mai i tauaofiaga itumalo.
• Faitau Tusi Tausaga o tausaga talu ai nei ma tausaga ua tuanaʻi.
• Fai ni saʻiliʻiliga i fesili e masani ona lāgā i lau oganuu.
• Sauniuni ni taulimaga mo le galuega talaʻi.
Mo aiga e iai fanau iti:
• Faatino ni tala e faataʻitaʻi ai ni vaaiga faale-Tusi Paia.
• Fai ni taaloga matemate, e pei o taaloga o loo i le itulau e 30 ma le 31 o le Ala Mai!
• I nisi taimi, ia fai se isi mea e faaoso ai le naunau (Tagaʻi i le mataupu “E Aogā Taumafaiga!” i le Olomatamata o Fepuari 15, 2011, itulau e 11.)
• Iloilo le mataupu “Ia Aʻoaʻo Lau Fanau,” lea e faasolosolo mai i le Olomatamata.