Faasologa mo le Vaiaso iā Ianuari 24

VAIASO E AMATA IĀ IANUARI 24

Pese 51 (67) ma le Tatalo

□ Suʻesuʻega Faale-Tusi Paia a le Faapotopotoga:

lv mata. 17 ¶1-10 (25 minu.)

□ Aʻoga o le Faiva Faatiokarate:

Faitau Tusi Paia: Esera 6-10 (10 minu.)

Nu. 1: Esera 7:1-17 (4 minu. pe itiiti ifo)

Nu. 2: Na Faaalia e Iesu ua Talafeagai Ona Avea o Ia ma Tupu (5 minu.)

Nu. 3: Po o Iesu Keriso o le Atua?—w09 2/1 itu. 7 (5 minu.)

□ Sauniga o le Auaunaga:

Pese 28 (33)

5 minu: Faasilasilaga. Faailoa le ofo mo Fepuari, ma fai se faataʻitaʻiga se tasi.

20 minu: “O Aogā o le Tapuaʻiga a le Aiga.”—Vaega 1. (Palakalafa 1-6 ma le pusa i le itulau e 6.) Fesili ma tali. Faalaeiau le aofia e faataʻitaʻi nisi o fautuaga mai i le pusa i le itulau e 6, a o fai le Tapuaʻiga e sosoo ai a le Aiga. I le vaiaso e sosoo ai, pe a talanoaina le vaega mulimuli o le mataupu, o le a maua le avanoa e fefaasoaaʻi ai manatu i aogā ua maua e le aiga.

10 minu: Sauni e Ofo Mekasini iā Fepuari. Talanoaga. Autalu mataupu o mekasini mo se minute se tasi pe lua. Ona filifili lea o ni mataupu se lua pe tolu, ma valaaulia le aofia e taʻu mai ni fesili ma ni mau e faaaogā i se taulimaga. Ia faataʻitaʻi le auala e ofo ai mekasini uma e lua.

Pese 8 (10) ma le Tatalo

O Aogā o le Tapuaʻiga a le Aiga

1. Na faapefea ona aogā i aiga Isaraelu le tausia o le Sapati i vaiaso taʻitasi?

Sa avea le tausia o le Sapati o se sauniuniga alofa a Ieova, na maua ai e aiga aogā. Sa mālōlō ai tagata Isaraelu mai i a latou galuega masani, ma mafaufau i mea lelei ua faia e Ieova faapea la latou faiā ma ia. Sa faaaogā e mātua lenā avanoa e aʻoaʻo ai a latou fanau i le Tulafono. (Teu. 6:6, 7) O le Sapati sa maua ai le avanoa i vaiaso taʻitasi e uaʻi atu ai tagata o Ieova i la latou tapuaʻiga.

2. O le ā ua aʻoaʻo mai e le Sapati iā i tatou e uiga iā Ieova?

² E moni e lē o toe poloaʻia e Ieova aiga e tausia le Sapati. Peitaʻi, ua aʻoaʻo mai ai e lenā tulafono iā i tatou se mea e uiga i le Atua. E matuā naunau o ia i le lelei faaleagaga o ona tagata. (Isa. 48:17, 18) O se tasi o auala ua faailoa mai ai e Ieova i aso nei lenā naunau alofa, o le iai lea o se afiafi mo le Tapuaʻiga a le Aiga.

3. Aiseā e faatulaga ai se afiafi mo le Tapuaʻiga a le Aiga?

³ Aiseā e Faatulaga ai se Afiafi mo le Tapuaʻiga a le Aiga? Na amata mai iā Ianuari 2009, ona fai le Suʻesuʻega Tautusi a le Faapotopotoga, i le afiafi lea e faia ai le Aʻoga o le Faiva Faatiokarate ma le Sauniga o le Auaunaga. O se tasi o māfuaaga na faia ai lenei suiga, ina ia maua ai le avanoa mo aiga e faamalosia ai i latou faaleagaga, i le faatulaga lea o se afiafi patino i vaiaso taʻitasi mo le tapuaʻiga a le aiga. Sa faalaeiauina aiga uma e fai la latou suʻesuʻega faaleaiga i le pō lea sa fai ai le suʻesuʻega tautusi, ia aua neʻi faatopelauina le talanoaga faale-Tusi Paia, ma ia fai e talafeagai ma manaʻoga o le aiga.

4. Pe e tatau ona faatapulaa le talanoaga a le aiga e na o le tasi le itula? Faamatala.

⁴ Ina ia tatou auai i le Suʻesuʻega Tautusi a le Faapotopotoga, sa manaʻomia se taimi e fai ai laʻei, malaga ai ma isi mea. O le toʻatele o i tatou sa toetoe o le afiafi atoa na faaaogā i lenei sauniga e na o le tasi le itula. Ona ua suia le faasologa o a tatou sauniga, o lea ua maua ai lenei afiafi e tapuaʻi ai iā Ieova o se aiga. O lea la, e lē tatau ona faatapulaa e na o le tasi le itula o le afiafi mo la tatou Tapuaʻiga a le Aiga. Nai lo o lea, ia faia e fuafua i manaʻoga ma tulaga o o tatou aiga.

5. Pe e na o le talanoaga a le aiga e tatau ona faia i lenā taimi atoa? Faamatala.

⁵ Pe e na o le Talanoaga a le Aiga e Faia i Lenā Taimi Atoa? Pe a talanoaina faatasi e ulugalii faaipoipo ma aiga e iai fanau mataupu o le Tusi Paia, e faalaeiau e le tasi le isi. (Roma 1:12) E mafuta vavalalata ai le aiga. O lea la, e tatau ona avea talanoaga i mataupu o le Tusi Paia ma vaega autū o le afiafi mo le Tapuaʻiga a le Aiga. Peitaʻi, e mafai foʻi ona iai se taimi e fai ai suʻesuʻega a le tagata lava ia. O se faaaʻoaʻoga, e ono faatasitasi pea le aiga pe a uma le talanoaga, a o faaauau ona fai e tagata taʻitoʻatasi a latou lava suʻesuʻega, atonu e faauma ona sauni ana mea mo sauniga pe faitau mekasini. O nisi aiga e latou te tapē le TV i lenā pō.

6. E faapefea ona fai le talanoaga?

⁶ E Faapefea Ona Fai le Talanoaga? E lē o taimi uma e manaʻomia ai ona fai se talanoaga o fesili ma tali. Ae ina ia ola ma manaia le Tapuaʻiga a le Aiga, o le tele o aiga ua faia e tai pei o le sauniga lea e fai i le ogatotonu o le vaiaso. Ua latou vaevae la latou talanoaga i ni vaega, ma taulima i auala eseese. O se faaaʻoaʻoga, e latou te ono faitau faatasi le Tusi Paia, sauniuni se vaega o le sauniga, ma fai ni faataʻitaʻiga mo le galuega talaʻi. O loo iai i le itulau e 6 nisi o fautuaga.

7. O le ā e fai e mātua ina ia sologa lelei ai le tapuaʻiga a le aiga?

⁷ O le ā e Fai e Mātua Ina ia Sologa Lelei ai le Tapuaʻiga a le Aiga? O le a tele mea e aʻoaʻoina e le aiga pe a filemu ma lelei le tulaga e faia ai le talanoaga. O nisi taimi e mafai ona fai le tapuaʻiga i fafo o le fale pe afai e lelei le tau. E mafai foʻi ona mālōlō pe afai e manaʻomia, ona toe amata lea. O nisi aiga e faaaofia ai sina meaʻai māmā pe a uma le talanoaga. E ui e lē faaaogāina e mātua le afiafi o le Tapuaʻiga a le Aiga o se avanoa e otegia ma aʻoaʻi ai le fanau, ae e latou te ono manaʻomia se taimi e talanoa ai i se mataupu po o se faafitauli patino ua tulaʻi mai. Peitaʻi, e sili ona lelei pe a talanoaina i se isi taimi ni mataupu maʻaleʻale ma se tasi o le fanau a o faagasolo le vaiaso, ina ia aua neʻi faamāina o ia a o iai isi o le fanau. E lē tatau ona pē pe soona sasalu le faiga o le Tapuaʻiga a le Aiga, ae e tatau ona faaatagia atu ai le Atua fiafia o loo tatou tapuaʻi i ai.—1 Timo. 1:11.

8, 9. O ā sauniuniga e ao ona fai e ulu o aiga?

⁸ O ā Sauniuniga e Fai e le Ulu o le Aiga? E tele aogā e maua e le aiga pe a muaʻi sauniuni le ulu o le aiga mo le afiafi o le Tapuaʻiga a le Aiga i vaiaso taʻitasi, e ala i le filifilia o mataupu e talanoaina ma le auala e taulimaina ai. (Faata. 21:5) E ao i le tane ona talanoa atu i lana avā e tusa ai o lea fuafuaga. (Faata. 15:22) E lelei foʻi i ulu o aiga ona fesili atu i le fanau i nisi taimi po o ā ni mataupu e fia talanoa ai. Pe a faia faapea, o le a e iloa ai mea e latou te fiafia ai ma mea o loo popole ai.

⁹ E lē faapea o vaiaso uma o le a faaalu ai e le ulu o le aiga se taimi umi e sauniuni ai. Auā atonu e iai se mea e faia i vaiaso uma lava, e pei o le faitauina o se vaega o le Tusi Paia, e lē manaʻomia ai la ona ia faia se polokalame fou i taimi uma. Pe a uma le suʻesuʻega, e ono iloa ai e le ulu o le aiga manaʻoga faaleagaga o le aiga, ma mafai ai ona ia sauniuni mo le vaiaso e sosoo ai. O nisi ulu o aiga e tusia mataupu e talanoaina ma faapipii i se mea e faigofie ona faitau i ai, e pei o luma o le pusaʻaisa po o se isi mea. O le faia faapea o le a faaosofia ai le fiafia ma le naunau o le aiga, ma maua le taimi e sauniuni ai pe a manaʻomia.

10. O le ā le auala e fai ai le Tapuaʻiga a le Aiga a ē e na o i latou o latou aiga pe upu moni foʻi?

¹⁰ Ae ā pe Afai e na o Aʻu Loʻu Aiga pe e na o Aʻu Foʻi e Upu Moni? E mafai ona latou faaaogā lea afiafi e fai ai suʻesuʻega a le tagata lava ia. E tatau ona aofia ai i lea faasologa le faitauina o le Tusi Paia, sauniuni mo sauniga, ma le faitauina o Le Olomatamata ma le Ala Mai! O isi tagata talaʻi e faatulaga e i latou lava ni mataupu e suʻesuʻe. O nisi taimi e latou te ono valaaulia se isi tagata talaʻi po o se aiga, e aufaatasi ma i latou i se talanoaga faale-Tusi Paia.

11, 12. O ā ni aogā o le iai pea o se afiafi mo le Tapuaʻiga a le Aiga?

¹¹ O ā Aogā o le Iai Pea o se Afiafi mo le Tapuaʻiga a le Aiga? O ē e faia ma le lotoatoa le tapuaʻiga moni, e atili ai ona mafuta vavalalata atu iā Ieova. E lē gata i lea, e faamalosia mafutaga a aiga pe a tapuaʻi faatasi. Na tusi se ulugalii e tusa ai o aogā na la mauaina: “I le avea o se ulugalii paeonia e leai se fanau, e ma te naunau lava i le pō e faia ai le ma Tapuaʻiga a le Aiga. E ma te lagona le vavalalata o le tasi i le isi faapea lo ma Tamā i le lagi. Pe a ma feala aʻe la i le aso lea e faatulaga e ma te suʻesuʻe faatasi ai, e faapea atu le tasi i le isi: ʻO le ā foʻi le mea e fai nanei? O le Tapuaʻiga a le Aiga!’ ”

¹² E aogā foʻi i aiga e pisi tele, le faatulagaga o se afiafi mo le tapuaʻiga a le aiga. Na tusi se tinā nofo toʻatasi e toʻalua lana fanau tama ma o se paeonia sauatoa: “I le taimi ua teʻa sa faalētonu le suʻesuʻega a lo matou aiga. Sa seāseā ona faia ona ou te vaivai tele, ma e leʻi lava le taimi e faia ai mea uma. Ae ou te faafetai tele atu ona o le faatulagaga o se afiafi mo le Tapuaʻiga a le Aiga. O lea ua faia e lē aunoa le suʻesuʻega a lo matou aiga ma e tele aogā ua maua mai ai.”

13. O le ā e iloa ai o le a tele aogā e maua e lou aiga mai i lenei faatulagaga?

¹³ E pei lava o le Sapati, o le afiafi o le Tapuaʻiga a le Aiga o se meaalofa mai i lo tatou Tamā i le lagi, lea e aogā i aiga. (Iako. 1:17) Ua iloa mai i le auala na faaaogā ai e aiga Isaraelu le Sapati, le tele o aogā faaleagaga na latou maua mai ai. Ua iloa mai foʻi i le auala e tatou te faaaogā ai le afiafi lea ua faatulaga mo le tapuaʻiga a le aiga, o le a tele aogā e tatou te maua mai ai. (2 Kori. 9:6; Kala. 6:7, 8; Kolo. 3:23, 24) O le faaaogā lelei o lea faatulagaga, e mafai ai ona faapea atu lou aiga e pei o le faisalamo: “A o aʻu nei, ou te faalatalata atu i le Atua ou te lelei ai. Ou te sulufaʻi atu i le Alii Pule Silisili Ese o Ieova.”—Sala. 73:28.

[Faamatalaga i le itulau 5]

E lē tatau ona pē pe soona sasalu le faiga o le Tapuaʻiga a le Aiga, ae e tatau ona faaatagia atu ai le Atua fiafia o loo tatou tapuaʻi i ai

[Pusa i le itulau 6]

TEU LELEI

Nisi o Fautuaga mo le Tapuaʻiga a le Aiga

Tusi Paia:

• Faitau faatasi se vaega o le faitauga Tusi Paia o le vaiaso. Pe afai o ni tala, ia faitau e le isi le vaega a le faamatala, ae faitau e isi upu a tagata eseese o le tala.

• Faataʻitaʻi se vaega o le faitauga Tusi Paia.

• Tofi tagata taʻitoʻatasi o le aiga e faitau mataupu o le faitauga Tusi Paia o le vaiaso o lumanaʻi, ma tusi se fesili se tasi pe lua e fia malamalama i ai i le mataupu na faitau. Ona suʻe lea o tali o fesili a tagata uma.

• Ia tusi i vaiaso taʻitasi se mau o le Tusi Paia i se fasi pepa, ma taumafai e manatua ma faamatala atu. Faaputu na pepa ma toe autalu i vaiaso taʻitasi, ina ia iloa ai pe fia ni mau e te manatuaina.

• Faalogologo i se CD ua puʻeina ai le faitauga Tusi Paia, ma mulimuli i ai i lau Tusi Paia.

Sauniga:

• Sauniuni faatasi se vaega o sauniga.

• Aʻo pese o le Malo lea e usu i le sauniga o le vaiaso o i luma.

• Pe afai e iai se lauga a se tasi i le Aʻoga o le Faiva Faatiokarate po o se faataʻitaʻiga i le Sauniga o le Auaunaga, talanoa ni auala e fai ai pe faataʻitaʻi i luma o le aiga.

Manaʻoga o le Aiga:

• Talanoa mataupu mai i le tusi Ua Fesili Mai Talavou po o le tusi Ia Faalogo i le Faiaʻoga Sili.

• Faataʻitaʻi se tulaga e ono tulaʻi mai i le aʻoga ma le auala e taulima ai.

• Fai se faataʻitaʻiga e faaāta ai ua fai e le fanau le vaega a mātua, ae fai e mātua le vaega a fanau. Ia suʻesuʻe e le fanau se mataupu ona fefulifulisaʻi lea ma mātua.

Talaʻiga:

• Faataʻitaʻi ni taulimaga e fai i le talaʻiga i le faaiʻuga o le vaiaso.

• Talanoa ni sini e mafai ona faataatitia e le aiga e faalautele atu ai la latou faiva, i le taimi o le Faamanatuga po o taimi e mālōlō ai aʻoga ma galuega.

• Tuu i sui o le aiga ni nai minute e suʻe ai tali o fesili e lāgā mai i le talaʻiga, ona fai lea o ni faataʻitaʻiga.

Nisi Fautuaga:

• Faitau faatasi se mataupu mai i mekasini fou.

• Faitau muamua e sui o le aiga se mataupu e fiafia i ai mai i mekasini fou, ona fai lea o sana faamatalaga e uiga i lea mataupu.

• Valaaulia i nisi taimi se tagata talaʻi po o se ulugalii i la outou Tapuaʻiga a le Aiga, ma faatalanoa i latou.

• Matamata ma talanoaina se tasi o a tatou vitiō.

• Talanoa faatasi mataupu mai i le Ala Mai! e pei o le “Ua Fesili Mai Talavou” po o le “Mo Talanoaga a le Aiga.”

• Talanoa faatasi mataupu mai i Le Olomatamata, e pei o le “Ia Aʻoaʻo Lau Fanau” po o le “Mo le ʻAutalavou.”

• Faitau ma talanoa se vaega o le Tusi Tausaga po o se tusi fou na tatala i le tauaofiaga talu ai nei.

• Autalu manatu tāua pe a uma se tauaofiaga po o se fonotaga.

• Tagaʻi i foafoaga a Ieova ma iloilo mea ua aʻoaʻoina mai ai e uiga iā Ieova.

• Galulue faatasi i se poloketi, e pei o se ata faataʻitaʻi o se mea, se faafanua po o se siata.