Pe E te Talitonu i Vavega o Loo i le Tusi Paia?

AFAI e faamatala atu iā te oe se tala manaia, e faalagolago lou talitonu i lenā tala, i le maufaatuatuaina o lē o loo faamatalaina, lea e aofia ai le auala o loo ia faamatala ai le tala, faapea ma lona talaaga faamaoni. Auā foʻi, pe afai ua tele tausaga o taʻu atu e lenā tagata mea moni iā te oe, ma e leʻi pepelo atu lava ma le loto iai, e tatau la ona e talitonu i le tala ua ia faamatala atu.

E faapena foʻi vavega o loo i le Tusi Paia. E leai ma se tasi o i tatou na ola i taimi na tutupu ai na mea. Ae e faapefea ona e iloa pe e maufaatuatuaina na tala? O nisi nei o vala e iloa ai:

Na faia i nofoaga faitele. I nisi taimi, e vāai ai le faitau afe po o le faitau miliona i vavega. (Esoto 14:21-31; 19:16-19) E leʻi faia faalilolilo mai i le vaaiga a tagata lautele.

E leʻi faigatā le auala na faatino ai. E leʻi faia ni mea faamaneta e faia ai vavega. O le tele o vavega sa faia ona na talosagaina e tagata, po ona ua fetaui lelei ma le taimi ma le nofoaga ua iai. (Mareko 5:25-29; Luka 7:1-16) O lea la, o nei vavega, e leʻi sauniunia muamua e lē na faia.

E leʻi faia ina ia taʻutaʻua, viiviia, pe e maua ai mea. Nai lo lea, na faia e viia ai le Atua. (Ioane 11:1-4, 15, 40) Na taʻusalaina so o se taumafaiga e faaaogā le mana faivavega e maua ai mea.—2 Tupu 5:15, 16, 20, 25-27; Galuega 8:18-23.

E lē o ni galuega na faia e tagata. O se faaaʻoaʻoga, o le toʻafilemu o le matagi ma le sami, liua le vai e avea ma uaina, taofia le timu ma toe faatotō mai, faamālōlōina tagata mamaʻi, ma faapupulaina mata o ē tauaso. O na vavega uma ma le tele o isi vavega, ua faamaonia ai na faataunuuina i se mana e sili atu nai lo o le malosi o tagata.—1 Tupu 17:1-7; 18:41-45; Mataio 8:24-27; Luka 17:11-19; Ioane 2:1-11; 9:1-7.

Na taʻutino mai e tagata tetee. Ina ua faatūina e Iesu lana uō o Lasalo, e leʻi teena e fili faalelotu o Iesu le mea moni na maliu Lasalo. Auā e faapefea ona latou tetee atu, a o lea na tanuina Lasalo mo aso e fā? (Ioane 11:45-48; 12:9-11) E ui lava ina tele tausaga talu ona maliu Iesu, ae o loo faailoa mai pea i le Tusi Tulafono a Iutaia e faapea, sa iai sona mana faivavega. Ae e na o le puna o lenā mana faivavega, sa latou fesiligia. E faapena foʻi ina ua molia soo o Iesu i luma o le faamasinoga a Iutaia, e leʻi fesiligia i laʻua e faapea, “Pe na lua faia ni vavega?” Nai lo lea sa fesiligia i laʻua e faapea: “O le ā le mana, ma o le igoa o ai ua oulua faia ai lenei mea?”—Galuega 4:1-13.

O lea, pe e te talitonu i vavega o loo i le Tusi Paia? Ua manino mai i manatu na iloiloina, e iai faailoga e maufaatuatuaina ai na vavega. O se faaaʻoaʻoga, pe a taʻua i le Tusi Paia se mea na tupu, e masani lava ona taʻua ai le taimi, le nofoaga, ma tagata na aafia ai. E oo lava i tagata faitio o le Tusi Paia e maofa i le saʻo aʻiaʻi o talafaasolopito o loo iai. E tele valoaga o le Tusi Paia ua faataunuuina, e oo lava i nai faamatalaga lāiti. E lē gata i lea, o loo iai foʻi le tele o fautuaga i le auala e maua ai e tagata ni faiā lelei, ma fesoasoani i tagata uma e tusa lava po o le ā le matua, ma le ituaiga o olaga o ola ai. Ua faamaonia foʻi le moni o fautuaga o loo i le Tusi Paia, e tusa ai o faiā faaletagata.

Pe afai e te lē o mautinoa atoatoa lava i le Tusi Paia, aiseā la e lē faaalu ai se taimi e iloilo totoʻa ai? O le tele o lou iloa o le Tusi Paia, o le tele foʻi lenā o lou maufaatuatuaina o faamatalaga o loo iai. (Ioane 17:17) O le a e iloa ai e mafai ona e maufaatuatuaina mea o loo taʻua ai e uiga i vavega na tutupu i aso ua mavae. Afai e te talitonu i na mea, o le a iai la se faavae lelei e te maufaatuatuaina ai le Tusi Paia, e uiga i mea o loo taʻua ai o le a tutupu i se taimi lata mai.

[Ata i le itulau 7]

E leʻi faafitia e i latou na tetee iā Iesu le mea moni na maliu Lasalo

Vavega ua Toeitiiti Taunuu

O Ā NI ou faalogona pe a e iloa, o le fomaʻi ua fuafua e faia sou taotoga faigatā, e leʻi faia lava sea ituaiga o taotoga? E mautinoa o le a e popole. Ae e faapefea pe a e iloa ane, e lelei tele o ia i lea matātā, ma sa taulau manuia le tele o taotoga na ia faia e pei foʻi o le taotoga o le a ia faia iā te oe? Po o le a lē sili ea ona e mautinoa e mafai ona ia fesoasoani iā te oe?

Ua manaʻomia ona faia se taotoga o lenei lalolagi faamaʻia. Ua folafola mai e Ieova le Atua e ala mai i le Tusi Paia e faapea, o le a ia toe faafoʻisia le Parataiso i lenei lalolagi. (2 Peteru 3:13) Ae ina ia tupu lenā mea, e tatau ona aveesea atoatoa le amioleaga. (Salamo 37:9-11; Faataoto 2:21, 22) O le a tafiesea mea uma o loo tatou mafatia ai, a o leʻi toe faafoʻisia le parataiso, ma ua na o se vavega e mafai ona faataunuuina na folafolaga!—Faaaliga 21:4, 5.

E talitonu Molimau a Ieova ua toeitiiti tutupu na suiga tetele. Aiseā? Ona ua faamaonia i vavega sa faia e Ieova le Atua, o loo iai iā te ia le mana e faataunuu ai ana folafolaga. Seʻi faatusatusa ni vavega se 6 o loo i le Tusi Paia, ma nisi o folafolaga o loo iai e uiga i le lumanaʻi.

Seʻi faaauau pea ona e aʻoaʻoina atili e uiga i folafolaga a le Tusi Paia mo lo tatou lumanaʻi. A o tuputupu aʻe lou faatuatua, o le a faapena foʻi ona tuputupu aʻe lou faamoemoe e ola i se taimi o le a maua ai aogā, mai i vavega e faatinoina e Ieova.

[Ata i le itulau 9]

VAVEGA:

NA FAFAGA E IESU LE FAITAU AFE I NAI FALAOA MA IʻA.—MATAIO 14:13-21; MAREKO 8:1-9; IOANE 6:1-14.

FOLAFOLAGA:

“E fua mai lava e le laueleele ona fua; E faamanuia foʻi i matou e le Atua, o lo matou Atua.”—SALAMO 67:6.

LE UIGA MO I TATOU:

E LĒ TOE MATELĀINA SE TASI I LE FIA ʻAI.

VAVEGA:

NA TOE FAAPUPULA E IESU MATA O Ē TAUASO.—MATAIO 9:27-31; MAREKO 8:22-26.

FOLAFOLAGA:

“O le a faapupulaina ai mata o ē ua pō le vaai.”—ISAIA 35:5.

LE UIGA MO I TATOU:

O LE A TOE FAAPUPULAINA MATA O Ē TAUASO.

VAVEGA:

NA FAAMĀLŌLŌ E IESU TAGATA NA LĒ ATOATOA LE MALOSI.—MATAIO 11:5, 6; IOANE 5:3-9.

FOLAFOLAGA:

“O le a osooso ai lē ua pipili e pei o le ʻaila.”—ISAIA 35:6.

LE UIGA MO I TATOU:

O LE A FAAMĀLŌLŌINA I LATOU E LĒ ATOATOA LE MALOSI O LE TINO.

VAVEGA:

NA FAAMĀLŌLŌ E IESU LE TELE O MAʻI.—MAREKO 1:32-34; LUKA 4:40.

FOLAFOLAGA:

“E lē fai mai foʻi se tasi ua nofo ai: ʻOu te maʻi.’”—ISAIA 33:24.

LE UIGA MO I TATOU:

O LE A AVEESEA MAʻI UMA MA MAUA SE SOIFUA MĀLŌLŌINA LELEI ATOATOA.

VAVEGA:

NA PULEA E IESU MEA O LE NATURA.—MATAIO 8:23-27; LUKA 8:22-25.

FOLAFOLAGA:

“O le a latou fausia fale ma nonofo ai; e latou te totō foʻi togāvine ma latou aai i ona fua. O le a lē galulue fua i latou.”—ISAIA 65:21, 23.

“E nonofo loʻu nuu i se nofoaga toʻafilemu ma fale e saogalemu ai, ma mea foʻi e mapu ai e lē faalavelave mai i ai se isi.”—ISAIA 32:18.

LE UIGA MO I TATOU:

O LE A LĒ TOE IAI NI MALA FAALENATURA.

VAVEGA:

NA FAATŪINA E IESU TAGATA NA MALILIU.—MATAIO 9:18-26; LUKA 7:11-17.

FOLAFOLAGA:

“E faalogo ai i latou uma o loo i tuugamau i lona leo, ma latou ō mai ai.”—IOANE 5:28, 29.

“Ua ave aʻe e le sami i latou na oti o iai, ua ave aʻe foʻi e le oti ma Tuugamau i latou na oti o iai.”—FAAALIGA 20:13.

LE UIGA MO I TATOU:

O LE A TOE FAATUTŪINA Ē PELE IĀ I TATOU UA MALILIU.