O le a Faapeī Lou Tu atu i Luma o le Nofoa Faamasino?

“Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu.”—MATAIO 25:31.

1-3. O le ā le mafuaaga ua tatou faatalitalia ai ni iuga manuia e tusa ai o faamasinoga?

‘E AGASALA PE MAMĀ?’ E tau mānatu le toatele o tagata a o latou faalogo i nisi o mataupu faafaamasinoga. Atonu e taumafai faamasino ma ē o loo faia faaiuga faafaamasinoga ina ia faamaoni, ae pe faia ea i taimi uma lava le faamasinogatonu? Pe e te lei faalogo ea i ni faiga lē faamasinotonu pe lē saʻo i taualumaga faafaamasinoga? E lē o se mea fou na faiga lē tonu faafaamasinoga, e pei ona tatou iloa i le tala faatusa a Iesu lea o loo taʻua i le Luka 18:1-8.

² Po o le ā lava sou iloa e faatatau i faamasinoga a tagata, ae seʻi mātau le faamatalaga faaiu a Iesu: “Pe le faia ea e le Atua le faamasinoga mo e na ia filifilia, o loo alalaga ia te ia i le ao ma le po? . . . Ou te fai atu ia te outou, e vave ona faamasino e ia o a latou mea. Peitai, a sau le Atalii o le tagata, pe maua ea e ia le faatuatua i le lalolagi?”

³ Ioe, o le a faamautinoa e Ieova, e maua e ana auauna le faamasinogatonu. Ua aofia ai foi Iesu, ae maise lava i le taimi lenei, auā o loo tatou ola nei i “aso e gata ai” o lenei faiga amioleaga o mea. Ua lē o toe umi ona faaaogā lea e Ieova lona Alo malosi ina ia soloiesea atoatoa le amioleaga mai le lalolagi. (2 Timoteo 3:1; 2 Tesalonia 1:7, 8; Faaaliga 19:11-16) E mafai ona tatou malamalama i le matafaioi a Iesu, mai se tasi o tala faatusa mulimuli na ia faamatala mai, e masani ona taʻua o le faataoto i mamoe ma ʻoti.

4. Ua faapefea ona tatou malamalama i le taimi e faataunuu ai le faataoto i mamoe ma ʻoti, ae aisea o le a tatou uaʻi atu ai nei loa i le faataoto? (Faataoto 4:18)

⁴ Ua leva ona tatou malamalama e faapea, o loo faaata mai i le faataoto le afio o Iesu i le nofoālii o se Tupu i le 1914, ma talu mai lena taimi o loo faia ai le faamasinoga—le ola e faavavau mo tagata ua faamaonia le pei ni mamoe, ma le oti e faavavau mo ē ua pei ni ʻoti. Peitai o le toe iloiloina o le faataoto ua faasino atu ai i se malamalamaga ua toe faasaʻoina e faatatau i le taimi e faataunuu ai, ma le mea o loo faataʻitaʻia mai ai. O lenei faamalamalamaga atili ua faamalosia ai le tāua o la tatou galuega talaʻi ma le uiga o le tali mai a tagata. Ina ia maua le faavae mo lenei malamalamaga loloto o le faataoto, seʻi o tatou iloiloina po o le ā ua faaalia e le Tusi Paia e uiga ia Ieova ma Iesu, i le avea uma o i laua o Tupu ma o Faamasino.

I le Avea o Ieova ma Faamasino Aoao

5, 6. Aisea ua talafeagai ai ona manatu ia Ieova, o ia o le Tupu, ma o le Faamasino foi?

⁵ E pule Ieova i le aoao o mea, ma o ia e pule i foafoaga uma. O ia o le “Tupu o le vavau,” auā e leai sona amataga e leai foi sona gataaga. (1 Timoteo 1:17; Salamo 90:2, 4; Faaaliga 15:3) Ua ia te ia le pule e faia ai tulafono, ma na te faamalosia foi nei tulafono. Peitai o lana pule e aofia ai lona avea ma Faamasino. Ua faapea mai le Isaia 33:22: “O Ieova o lo tatou faamasino ia, o Ieova o lo tatou fai tulafono, o Ieova o lo tatou tupu, o ia lava e faaola ia te i tatou.”

⁶ Ua leva ona iloa e auauna a le Atua le avea o Ieova ma Faamasino i mataupu ma finauga. Mo se faaaoaoga, ina ua uma ona fefulifulisai e “le na te faamasinoina le lalolagi uma,” faamaoniga e uiga i amioleaga a Sotoma ma Komoro, ona ia faia lea o le faaiuga e lē gata ua tatau le faaumatiaga i tagata sa nofoia na aai, ae sa ia faataunuu foi le faia o lena faamasinoga amiotonu. (Kenese 18:20-33; Iopu 34:10-12) Maeu le tatau ona faamautinoa atili ai lo tatou iloa, o Ieova o le Faamasino amiotonu, o lē e mafai ona ia faataunuuina pea ana faamasinoga!

7. Na faapefea ona gaoioi Ieova e avea ma Faamasino i ana feutagaiga ma Isaraelu?

⁷ I Isaraelu anamua, sa iai ni taimi na tuusaʻo atu ai e Ieova ni faamasinoga. Pe sa lē ono faamafanafanaina ai ea la oe pe ana e i tuā i inā i lou iloaina, sa iai se Faamasino lelei atoatoa na ia faia faaiuga i mataupu? (Levitiko 24:10-16; Numera 15:32-36; 27:1-11) Sa saunia foi e le Atua ‘faaiuga faafaamasinoga’ sa lelei uma e avea ma tapulaa mo le faafoeina o faamasinoga. (Levitiko 25:18, 19; Neemia 9:13; Salamo 19:9, 10; 119:7, 75, 164; 147:19, 20) O ia o le “faamasino aoao,” o lea ua aafia ai i tatou uma.—Eperu 12:23.

8. O le ā le faaaliga e fetaui i la tatou mataupu na iloa e Tanielu?

⁸ Ua ia i tatou se molimau “vaaitino” i lenei mataupu. Na tuuina atu i le perofeta o Tanielu se faaaliga o ni manu feai tetele sa faaatagia mai ai faiga malo po o emepaea. (Tanielu 7:1-8, 17) Na ia faaopoopo mai: “O nofoālii, ua tietie mai foi Lē ua mai anamuā ona aso, ua sinasina lona ofu e pei o le kiona.” (Tanielu 7:9) Seʻi mātau, sa vaaia e Tanielu ni nofoālii ma “ua tietie mai [ai] foi Lē ua mai anamuā ona aso [o Ieova].” Seʻi fesili ifo ia te oe lava, ‘Pe o molimauina ai i inā e Tanielu le avea o le Atua ma Tupu?’

9. O le ā se tasi o uiga o le ‘tietie’ i le nofoālii? Aumai ni faaaoaoga.

⁹ O lea, pe afai tatou te faitauina faapea sa “tietie” se tasi i se nofoālii, atonu tatou te mafaufau i le avea o lena tagata ma tupu, auā o le gagana lena e faaaogā e le Tusi Paia i nisi o taimi. Mo se faaaoaoga: “Ua fai o ia [Semeri] ma tupu, ma ua tietie o ia i lona nofoalii, ua ia . . .” (1 Tupu 16:11; 2 Tupu 10:30; 15:12; Ieremia 33:17) Na faapea mai se valoaga faa-Mesia: “E tietie foi o ia ma pule i luga o lona nofoālii.” O lea, o le ‘tietie i se nofoālii’ e mafai ona uiga i le avea ma tupu. (Sakaria 6:12, 13) Ua faamatalaina Ieova o se Tupu o lē o loo tietie i le nofoālii. (1 Tupu 22:19; Isaia 6:1; Faaaliga 4:1-3) O ia o le “Tupu o le vavau.” Peitai, a o ia faalauiloa mai se vala fou o le pule silisili ese, sa ono mafai ona faapea atu, ua avea o ia ma Tupu, e pei o loo toe tietie i lona nofoālii mo nisi taimi.—1 Nofoaiga a Tupu 16:1, 31; Isaia 52:7; Faaaliga 11:15-17; 15:3; 19:1, 2, 6.

10. O le ā se gaoioiga autū a tupu o Isaraelu? Seʻi faamatala mai.

¹⁰ Ae o se manatu autū lenei: O se tasi o gaoioiga autū e faia e tupu anamua, o le faalogologo atu lea i mataupu faafaamasinoga ma fofogaina atu faaiuga. (Faataoto 29:14) Seʻi manatu i le faaiuga atamai a Solomona ina ua fefinauai ni fafine se toalua i se pepe e tasi. (1 Tupu 3:16-28; 2 Nofoaiga a Tupu 9:8) O se tasi o fale o lana faiga malo o “le faapaologa mo le nofoālii na te fai ai faamasinoga, na taʻua foi “o le faapaologa . . . e faamasino ai.” (1 Tupu 7:7) Sa faamatalaina Ierusalema e faapea, o le nofoaga sa “tu ai nofoālii e faamasino ai.” (Salamo 122:5) E manino la, o le ‘tietie i le nofoālii’ e mafai foi ona faauiga i le faatinoina o se pule faafaamasinoga.—Esoto 18:13; Faataoto 20:8.

11, 12. (a) O le ā le tāua o le afio o Ieova i le nofoālii, lea e taʻua i le Tanielu mataupu e 7? (e) Ua faapefea ona faamautinoa mai e isi mau e faapea, e afio Ieova i le nofoālii ina ia faia le faamasinoga?

¹¹ Seʻi o tatou toe liliu atu la i le vaaiga lea na iloa atu ai e Tanielu ‘Lē ua mai Anamuā ona Aso o loo tietie.’ Ua faapea atili mai le Tanielu 7:10: “Ua nofoia le faamasinoga, ma ua fofola tusi.” Ioe, sa tietie Lē ua mai Anamua ona Aso i le nofoālii ina ia fofoga atu le faamasinoga e uiga i le puleaina o le lalolagi, ma ina ia faia le filifiliga e faapea, ua onomea ona pule le Atalii o le tagata. (Tanielu 7:13, 14) Ona tatou faitau ai lea e faapea, ua “afio mai Lē ua mai anamuā ona aso, ma ua faamasinoina le au paia,” o i latou ua filifilia ua talafeagai ona pule faatasi ma le Atalii o le tagata. (Tanielu 7:22, NW) Ona mulimuli ai lea “nofoia le faamasinoga” ma fofogaina atu le faasalaga mamafa i le malo malosi mulimuli o le lalolagi.—Tanielu 7:26.a

¹² Mulimuli ane, o le vaaia e Tanielu o le Atua o loo ‘tietie i le nofoālii’ sa uiga i Lona afio mai e faia le faamasinoga. Muamua atu, na pese ai Tavita e faapea: “Ua e [Ieova] faia loʻu faamasinoga ma laʻu finauga; ua e tietie i le nofoālii e faamasino tonu ai.” (Salamo 9:4, 7) Ma na tusi Ioelu e faapea: “Ia laga mai o nuu ese, ma o ae i le vanu o Iosefatu; auā ou te [Ieova] nofo ai e faamasino i nuu uma mai itu uma.” (Ioelu 3:12; faatusatusa i le Isaia 16:5.) Sa iai uma Iesu ma Paulo i tulaga na faia ai ni faamasinoga, lea sa nofo ai se tagata ina ia faalogologo i se mataupu ma fofogaina atu le faaiuga faafaamasinoga.b—Ioane 19:12-16; Galuega 23:3; 25:6.

Le Tulaga o Iesu

13, 14. (a) O le ā le faamautinoaga na iai i tagata o le Atua e faapea o le a avea Iesu ma Tupu? (e) O anafea na tietie ai Iesu i lona nofoālii, ma o le ā le uiga o lana pule lea na amata mai i le 33 T.A. ma faasolo mai ai?

¹³ O Ieova, o ia o le Tupu, ma o ia foi o le Faamasino. Ae faapefea Iesu? Sa faalauiloa e le agelu lona fanau mai e faapea: “E foai atu e le Alii le Atua ia te ia le nofoaiga a Tavita lona tamā, o lona malo foi e leai sona gataaga.” (Luka 1:32, 33) O le a avea Iesu ma suli tumau o le nofoaiga tautupu faa-Tavita. (2 Samuelu 7:12-16) O le a pule o ia mai le lagi, auā na faapea mai Tavita: “Ua tulei mai le afioga a Ieova i loʻu Alii [Iesu], Ia e nofo i loʻu itu taumatau, seia ou faia e ua ita ia te oe ma mea e tu ai ou vae. E auina atu e Ieova lou tootoo malosi mai Siona; ia pule oe i totonu o e ita ia te oe.”—Salamo 110:1-4.

¹⁴ O afea o le a tupu ai lena mea? Sa lei pule Iesu o se Tupu a o avea ma tagata. (Ioane 18:33-37) I le 33 T.A., na maliu ai o ia, na toe faatūina aʻe, ma afio aʻe i le lagi. Ua faapea mai le Eperu 10:12: “Na avatua e ia le taulaga e tasi mo agasala, ona nofo lea o ia i le itu taumatau o le Atua.” O le ā le pule sa iai ia Iesu? “[Na] faanofo ia te ia [e le Atua] i lona itu taumatau i mea o i le lagi, e silisili lava i alii sili uma lava, ma faipule, ma e ua malolosi, ma alii, . . . ma tuuina atu o ia e fai ma ulu o mea uma lava mo le ekalesia.” (Efeso 1:20-22) Talu ai sa ia Iesu i lena taimi le pule tautupu e pulea ai Kerisiano, o lea na mafai ai e Paulo ona tusi mai e faapea, o Ieova na ia “laveai mai ia te i tatou nai le pule a le pouliuli, a ua na aumaia i tatou i le malo o lona lava Alo pele.”—Kolose 1:13; 3:1.

15, 16. (a) Aisea tatou te fai atu ai, sa lei avea Iesu ma Tupu o le Malo o le Atua i le 33 T.A.? (e) O anafea na amata pule ai Iesu i le Malo o le Atua?

¹⁵ Peitai ane, i lena taimi, sa lei gaoioi ai Iesu o se Tupu ma se Faamasino i luga o nuu. Sa nofo o ia i tafatafa o le Atua, ma faatalitali i le taimi e gaoioi ai o se Tupu o le Malo o le Atua. Na tusi mai Paulo e faatatau ia Iesu: “A o anafea na fetalai atu ai o ia i se tasi o le au agelu, Ina nofo ia oe i loʻu itu taumatau, seia ou faia e ua fai oe mo latou fili ma mea e tu ai ou vae?”—Eperu 1:13.

¹⁶ Ua lomiaina e Molimau a Ieova le tele o faamaoniga e faapea, na faaiuina le vaitaimi faatalitali a Iesu i le 1914, ina ua avea o ia ma pule o le Malo o le Atua i le lagi lē vaaia. Ua faapea mai le Faaaliga 11:15, 18: “O le malo o le lalolagi ua avea mo lo tatou Alii ma lona Keriso, e fai foi o ia ma tupu e faavavau faavavau lava.” “Ua ita foi nuu, ona oo mai lea o lou toasa.” Ioe, sa fefaailoaai e atunuu lo latou feitagai i le vaitaimi o le Taua Muamua a le Lalolagi. (Luka 21:24) O taua, o mafuie, o faamaʻi, le utiuti o meataumafa, ma isi mea faapena, ua tatou vaaia talu mai le 1914, ua faamautinoa ai o loo pule nei Iesu i le Malo o le Atua, ma ua latalata mai le iuga faaiu o le lalolagi.—Mataio 24:3-14.

17. O ā manatu autū ua oo ina tatou faamautinoaina nei?

¹⁷ Mo sina autaluga puupuu: E mafai ona faapea atu, o loo tietie le Atua i le nofoālii i le avea o ia o se Tupu, ae i se isi itu, e mafai foi ona tietie o ia i lona nofoālii ina ia faia le faamasinoga. I le 33 T.A., na nofo ai Iesu i le itu taumatau o le Atua, ae o lea ua avea nei o ia ma Tupu o le Malo. Ae pe o auauna ea Iesu lea ua avea nei ma Tupu, e avea foi o se Faamasino? Ma aisea e tatau ai ona tatou manatu mamafa i lenei mea, ae maise lava i lenei taimi?

18. O ā faamaoniga e iloa ai o le a avea foi Iesu ma Faamasino?

¹⁸ O Ieova, o lē e iai le aiā e tofia ai ni faamasino, na ia filifilia ai Iesu e avea ma Faamasino ua ausia Ana tapulaa. Na faaalia e Iesu lenei uiga ina ua ia fetalai e faatatau i tagata ua faaolaolaina faaleagaga e faapea: “E le faamasino e le Tamā i se tasi, a ua ia tuu mai i le Atalii, le faamasinoga uma lava.” (Ioane 5:22) Peitai, e iai ma nisi mea i le matafaioi faafaamasino a Iesu, e sili atu nai lo lena ituaiga o tulaga faafaamasino, auā o ia foi o le faamasino i ē ola ma ē oti. (Galuega 10:42; 2 Timoteo 4:1) Na faalauiloa mai e Paulo: “Ua faatuina e ia [le Atua] le aso e faamasinoina ai le lalolagi ma le tonu, e le tagata [Iesu] ua tofia e ia; o loo faamaoni mai ai e ia i tagata uma lava i lona toe faatu mai ia te ia.”—Galuega 17:31; Salamo 72:2-7.

19. Aisea ua saʻo ai le taʻua faapea e tietie Iesu e avea o se Faamasino?

¹⁹ Pe ua tonu la lo tatou faapea atu o loo tietie Iesu i se nofoālii mamalu i le faatinoina o se matafaioi patino a se Faamasino? Ioe. Na fetalai atu Iesu i le au aposetolo: “Pe a tietie le Atalii o le tagata i lona nofoālii mamalu i le toefuataiga, tou te tietie ai foi i nofoālii e sefulu ma le lua, e faamasino ai i itu aiga o Isaraelu e sefulu ma le lua.” (Mataio 19:28) E ui lava ua avea nei Iesu ma Tupu o le Malo, ae o isi ana gaoioiga ia o loo taʻua i le Mataio 19:28 o le a aofia ai le tietie i le nofoālii ina ia faia le faamasinoga i le vaitaimi o le Meleniuma. O le taimi lena o le a faamasino ai e ia o tagata uma, o ē amiotonu ma ē amioletonu. (Galuega 24:15) E aogā ona teu i mafaufau lenei mea, a o tatou uaʻi atu i se tasi o faataoto a Iesu lea e fesootai mai i o tatou taimi ma i o tatou olaga.

O ā Fā a le Faataoto?

20, 21. O le ā na fesiligia e aposetolo o Iesu, e fesootai mai i o tatou taimi, ma e taʻitaʻia atu ai i le ā le fesili?

²⁰ A o toeitiiti lava maliu Iesu, na fesiligia ai o ia e ona aposetolo: “Pe oo afea ia mea? Pe se a foi le faailoga o lou maliu mai, ma le gataaga o le lalolagi?” (Mataio 24:3) Na valoia e Iesu ni mea mataʻina o le a tutupu i le lalolagi a o ‘lei oo mai le iuga.’ A o toe o se aga oo atu i lena iuga, o le a vaaia ai e atunuu “le Atalii o le tagata ua sau i ao o le lagi, ma le mana ma le mamalu tele.”—Mataio 24:14, 29, 30.

²¹ Ae o le ā o le a oo i tagata o na atunuu pe a oo mai le Atalii o le tagata i lona mamalu? Seʻi o tatou sailia mai le faataoto i mamoe ma ʻoti, lea e amata i upu nei: “Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava.”—Mataio 25:31, 32.

22, 23. O ā manatu e faaalia ai sa lei amataina i le 1914, le faataunuuga o le faataoto i mamoe ma ʻoti?

²² Pe faatatau atu ea lenei faataoto i le taimi na tietie ai Iesu i le pulega tautupu i le 1914, e pei ona ua leva ona tatou malamalama i ai? Ia, o loo tautala le Mataio 25:34, i le avea o ia ma Tupu, o lona uiga la, e fetaui le faatatau o le faataoto i le vaitaimi talu ona avea Iesu ma Tupu i le 1914. Ae o le ā le faamasinoga na mulimuli ane ona faia loa lea? E lē o le faamasinoina o “nuu uma lava.” Nai lo lea, sa ia uaʻi atu ia i latou na faapea mai o loo latou faia aʻe ai “le aiga o le Atua.” (1 Peteru 4:17) Ina ia ogatusa ma le Malaki 3:1-3, na asiasia ai faafaamasinoga e Iesu, i le avea o ia ma sāvali a Ieova, ia Kerisiano faauuina o loo totoe i le lalolagi. Sa avea foi lena o le taimi mo le faasalaga faafaamasinoga ia Kerisinetoma, o ē ua pepelo mai faapea o loo faia aʻe ia i latou “le aiga o le Atua.”c (Faaaliga 17:1, 2; 18:4-8) Peitai e leai se mea o faaalia mai ai e faapea o lena taimi, pe talu mai lena mea, na tietie ai Iesu ina ia faia le faamasinoga faaiu o tagata o nuu uma lava i le avea ma mamoe po o ʻoti.

²³ Pe afai tatou te iloiloina galuega a Iesu i le faataoto, tatou te mātauina ai lona faia o le faamasinoga faaiu o atunuu uma. E lē o faaalia mai i le faataoto e faapea o le a faaauauina mai lena faamasinoga i se vaitaimi umi mo le tele o ni tausaga, e pei ua foliga mai ai o tagata uma lava e maliliu i lenei faitau sefulu o tausaga ua tuanai sa faamasinoina pe ua tatau i ai le oti e faavavau po o le ola foi e faavavau. E foliga mai o le vaega tele o ē ua maliliu i le faitau sefulu o tausaga e lei leva tele atu, ua iai i le tuugamau o tagata. (Faaaliga 6:8; 20:13) Peitai, ua faailoa mai e le faataoto le taimi e faamasinoina ai e Iesu tagata o “nuu uma lava” o ē feola i lena taimi ma fesagai ma le sala o lana faamasinoga.

24. O afea o le a faataunuuina ai le faataoto i mamoe ma ʻoti?

²⁴ I se isi faaupuga, o loo faasino atu le faataoto i le lumanai i le taimi o le a afio mai ai le Atalii o le tagata i lona mamalu. O le a tietie o ia i le nofoālii ina ia faamasino i tagata o loo feola i lena vaitaimi. O le a faavae aʻe lana faamasinoga i uiga ua latou faaalia mai. I lena taimi, o le a matuā faamautinoaina ai “e eseese lē amiotonu ma lē amio leaga.” (Malaki 3:1, 8) O le faalauiloaina moni mai ma le faataunuuina o le faasalaga faafaamasinoga, o le a faia i se vaitaimi faatapulaaina. O le a tuuina atu ai e Iesu faaiuga tonu e faavae aʻe i mea ua manino mai e uiga i tagata taitoatasi.—Tagai foi i le 2 Korinito 5:10.

25. O le ā ua faaataina mai i le Mataio 25:31, i le tautala e faatatau i le tietie o le Atalii o le tagata i le nofoālii mamalu?

²⁵ O lona uiga la, o le ‘tietie o Iesu i lona nofoālii mamalu’ mo le faia o le faamasinoga lena e taʻua i le Mataio 25:31, e faatatau atu i le taimi i le lumanai pe a oo ina tietie lenei Tupu malosi ina ia fofoga atu ma faaooina le sala faafaamasinoga i atunuu. Ioe, o le vaaiga faafaamasinoga lea e aofia ai Iesu i le Mataio 25:31-33, 46, o se faatusatusaga lena o le faaaliga lea o loo taʻua i le Tanielu mataupu e 7, lea o loo tietie ai le Tupu faapaleina, o Lē ua mai Anamuā ona Aso, ina ia faaoo atu lana matafaioi o se Faamasino.

26. O le ā le faamalamalamaga fou o le faataoto ua faamanino mai?

²⁶ O le malamalama i le faataoto i mamoe ma ʻoti i lenei auala, e iloa ai o le tuuina atu o le faamasinoga o mamoe ma ʻoti e i le lumanai. O le a faia pe a mavae le pa mai o “le puapuaga tele” lea o loo taʻua i le Mataio 24:29, 30, ma ua ‘oo mai le Atalii o le tagata i lona mamalu.’ (Faatusatusa i le Mareko 13:24-26.) Ma, pe a oo loa ina faaiuina le faiga aoao amioleaga o mea, ona faia loa lea e Iesu le faamasinoga, ma tuuina mai le sala faafaamasinoga.—Ioane 5:30; 2 Tesalonia 1:7-10.

27. O le ā e tatau ona tatou naunau e fia iloa e faatatau i le faataoto faaiu a Iesu?

²⁷ Ua faamaninoina ai e lenei mea lo tatou malamalama i le taimi e faataunuu ai le faataoto a Iesu, lea e faaalia ai po o afea o le a faamasinoina ai mamoe ma ʻoti. Ae faapefea ona aafia ai i tatou o ē o loo maelega i le talaʻia o le tala lelei o le Malo? (Mataio 24:14) Pe ua faaitiitia ai ea le aogā o la tatou galuega, pe ua atili faateleina mai ai le tāua o la tatou avega tauave? Seʻi o tatou tilofaia i le mataupu o sosoo mai, po ua faapefea ona aafia ai i tatou.

[Faaopoopoga i lalo]

Pe E te Manatua?

◻ Ua faapefea ona avea Ieova o le Tupu ma o le Faamasino foi?

◻ O ā uiga e lua e mafai ona faauiga i ai le ‘tietie i se nofoālii’?

◻ O le ā sa masani ona tatou taʻua e uiga i le taimi e faataunuu ai le Mataio 25:31, ae o le ā ua faavae aʻe ai se malamalamaga fou?

◻ O afea e tietie ai le Atalii o le tagata i lona nofoālii, e pei ona faaalia mai le Mataio 25:31?