Lipoti a Ē Faalauiloa le Malo
O Mea na Tutupu mai Tuvalu
Ua faalauiloa atu le tala lelei o le Malo i atu motu matagofie o Tuvalu, i le Pasefika i Saute, ma ua avatua ai foi se molimau lelei e oo lava i tagata e i tulaga maualuluga. O se uso Ausetalia ma lona faletua o loo auauna i le galuega faimalaga i Tuvalu, ua ia faamatala mai lenei mea na tupu ia te ia:
“Sa valaaulia i maʻua ma laʻu avā ina ia auai i se taumafataga i le maota o le Palemia o Tuvalu. O le sauniga, sa o le asiasiga a le Minisita o le Va i Fafo o Ausetalia. I le taimi a o faagasolo le taumafataga, sa ma maua ai ma laʻu avā se avanoa lelei e molimau atu ai i le minisita Ausetalia ma lona faletua. Ina ua faafeiloai atu i ai i maʻua, sa taʻua e le Palemia faapea maeu se galuega matagofie o loo faia e Molimau a Ieova i Tuvalu, a e maise lava e faatatau i le faaliliuina o a tatou lomiga i le gagana Tuvalu. ʻE i ai aʻu kopi o a latou lomiga uma lava i laʻu fata tusi, ma e matuā silisili lava!’ na ia fai atu ai. Sa fiafia lava le minisita ma lona faletua i le tulaga agaʻi i luma o loo i ai la tatou galuega i Tuvalu.
“Mulimuli ane i le po, sa ma auai i ni faafiafiaga faaleatunuu. Ina ua mavae lena, ona faalatalata mai lea o le Kovana Sili o Tuvalu ia i maʻua ma taʻua ai faapea, sa asiasi atu ni Molimau i lona fale i le vaiaso ua teʻa ma sa tuu ai ni kopi o mekasini o Le Olomatamata ma le Awake! Sa ia matauina ai i le faavaa i tua o se tasi o mekasini se faasilasilaga mo le New World Translation of the Holy Scriptures ma sa ia fia iloa pe faapefea ona ia maua se kopi. Na ma taʻu atu i ai faapea o le a ma avatua se kopi ma ia. I le Aso Sa na sosoo ai na ou alu ai i lona maota ma le Tusi Paia, ma sa matou faia ai se talanoaga manaia pe tusa ma le tasi le itula. Sa ia taʻua ai lona talisapaia tele o la tatou galuega ma lomiga. O le mea moni, ina ua ma taunuu atu i lona fale, sa faitau e lona faletua le tusi Ola e Faavavau i le faa-Tuvalu. O lea, sa ma fiafia lava ona sa mafai ona ma molimau atu i nisi e ʻmaualuluga o latou tulaga.’”—1 Timoteo 2:1-4.
I se tasi sauniga, na asiasi ai le Palemia o Tuvalu i le Atu Motu o Solomona. Na faia e tagata Tuvalu o loo nonofo ai i inā se taumafataga mo ia. E faatasi ai ia i latou na valaaulia ai i lea taumafataga, o se tuafafine e toatasi, o lē na ia lipotia mai lenei mea:
“I le faaiʻuga o le taumafataga, na tuu mai ai e le Palemia le avanoa e fai atu ai ni fesili e uiga i taualumaga o loo i ai i Tuvalu i le taimi nei. O le tasi o fesili na faapea atu, ʻO i ai ni lotu fou i Tuvalu?’ Na tali le Palemia faapea ʻo loo i ai ni lotu fou ua talia i Tuvalu a e na o le tasi lava le lotu lelei.’ Ina ua fesiligia po o lē fea, a e na ia tali mai, ʻo Molimau a Ieova.’
“Sa faateia tagata uma ma le ofo i lana tali, ma o le fesili manino lava na lagā, pe ai se ā ʻua na o Molimau a Ieova ai le lotu lelei.’ Na ia taʻua: ʻTalu ai e na o le nonofo lava o a tatou faifeau i le fale i le aso atoa ma na o le Aso Sa lava e ta ai se logo mo tatou ina ia tatou ō atu e faalogologo ia i latou. A e o Molimau a Ieova latou te ō atu moni lava ia te oe, ma e tusa lava pe atonu e te lē alu i le lotu, a e latou te aʻoaʻo lava oe e uiga i le Tusi Paia i lou lava aiga.’”
O lea, e ui lava e faitioina e nisi la tatou faiva mai lea fale i lea fale, a e manino lava e talisapaia e isi lo tatou avatua o le feau i o latou lava aiga.—Galuega 5:42.