E Te Silafia?

Pe e moni sa lūlū e se tagata ni vao leaga i le fanua o se isi tagata i aso anamua?

O LOO taʻua i le Mataio 13:24-26 fetalaiga nei a Iesu: “Ua faatusaina le malo i le lagi i le tagata na lūlū le fatu lelei i lona fanua. A o momoe tagata, ona alu ane ai lea o lona fili ma lūlū vao leaga i le saito, ona alu ese ai lea. Ina ua tupu ma fua mai, ona tupu mai ai foʻi lea ma le vao leaga.” Ua fesiligia e tusitala eseese pe e moni lenei talafaatusa. Peitaʻi ua taʻua i tusitusiga i tulafono a Roma i aso anamua, e mafai ona tupu lenei tulaga.

Ua taʻua i se lomifefiloi o le Tusi Paia: “O le lūlū o titania i se fanua ona o se fuafuaga e tauimasui . . . o se solitulafono i lalo o le tulafono a Roma. Na māfua ona iai le tulafono i lenei mataupu ona sa taatele lenei faiga.” Ua faamatala e Alastair Kerr, o se tagata e atamai i mataupu tau tulafono, i le 533 T.A. na tusia ai e le Emeperoa Roma o Justinian lana tusi e taʻua o le Digest, o se aotelega o tulafono a Roma ma tusitusiga mai i lōia ma faamasino i vaitaimi anamua i Roma (pe tusa o le 100-250 T.A.). Ua taʻua i lenei tusi (Digest, 9.2.27.14), sa faasino atu le tagata atamai i le tulafono o Ulpian, i se mataupu na iloilo e Selesia, o le alii tāua o Roma i le senituri lona lua. Sa lūlū vao leaga i le fanua o se isi tagata ma iʻu ai ina faaleagaina lana faatoʻaga. Ua taʻua i le Digest ni fesoasoani faaletulafono e maua e lē e ana le fanua po o lē na lisi i le fanua, ina ia maua ai le totogi mai i lē na lūlūina vao leaga na faaleagaina ai lona fanua.

O lenei faiga leaga sa tupu i le Emepaea o Roma i aso anamua, ua taʻu mai ai sa tupu moni lava le tulaga lea na faamatala e Iesu.

O le ā le tele o le saʻolotoga na tuu atu e Roma i taʻitaʻi Iutaia i Iutaia i le uluaʻi senituri?

I LE taimi lea, sa pulea Iutaia e Roma e ala i se kovana sa fai ma ona sui, ma sa iai se vaegaau na ia faatonutonuina. Sa sili ona naunau le kovana i le aoina o lafoga mo Roma ma le faatumauina o le filemu ma le maopoopo o tagata. Sa mananaʻo Roma e taofia gaoioiga faasolitulafono ma faasala so o se tagata e faatupuina ni vevesi. Ae i le isi itu, sa masani ona tuu atu e Roma mataupufai o itumalo i aso taʻitasi ina ia taulima lava e taʻitaʻi Iutaia.

O le Saniterini sa faia aʻe ai le faamasinoga sili a Iutaia ma pulea mataupu tau tulafono a Iutaia. Sa iai foʻi faamasinoga maualalo i totonu o Iutaia. O le tele o mataupu eseese ma mataupu tau solitulafono, atonu sa taulima e na faamasinoga e aunoa ma le faalavelave ane o taʻitaʻi Roma. Peitaʻi, o se tasi o mea e leʻi oo i ai le pule a faamasinoga Iutaia, o le faaoo lea o le faasalaga oti i ē solitulafono. E na o Roma sa iai le aiā e faatinoina ai lea ituaiga faasalaga. Ae o se tasi o mea lauiloa na tupu e leʻi mulimulitaʻia ai lenei faiga, o le taimi na faamasinoina ai e sui o le Saniterini Setefano ma faatonuina le fetogia o ia i maa ina ia oti ai.—Galu. 6:8-15; 7:54-60.

O lea, sa lautele atu le pule a Saniterini Iutaia. Peitaʻi, ua taʻua e le faitofā o Emil Schürer, “sa iai le mea na gata ai le pule a Saniterini, auā sa mafai lava ona faalaa ane taʻitaʻi Roma e taulima se mataupu i so o se taimi, aemaise pe a iloa e Roma e iai nisi ua tetee i mataupufai a le malo.” O se faataʻitaʻiga o lenei mea, o le taimi o le taʻitaʻiga a le alii e pule i ʻau o Kalaotio Lusia, o lē na puipuia le aposetolo o Paulo o se tagatānuu o Roma.​—Galu. 23:26-30.