Pe e te manatua se taimi na e sulu ai a o e laʻitiiti? Atonu na lavea lou lima pe maʻosia lou tuli. Pe e te manatua le auala na faamāfanafana ai oe e lou tinā? Atonu na ia faamamā lou manuʻa ma tuu i ai se mea faapipii. Na e tagi, ae o ana upu mālū ma lana opo māfana, na vave ai ona toe lelei ou faalogona. I lenā taimi i lou olaga sa vave lava ona e maua faamāfanafanaga.

Ae ua faigatā le olaga a o faasolo ina tatou matutua. Ua faigatā atu faafitauli ma ua faigatā ona maua ni faamāfanafanaga. E faanoanoa ona ua seāseā mafai ona foʻia faafitauli o tagata matutua, i se mea faapipii po o le opo a se tinā. Seʻi iloilo ni nai faaaʻoaʻoga.

• Po ua iai se taimi ua e fesagaʻia ai le tulaga faigatā o le lē toe faigaluega? Ua taʻua e Julian ina ua tuli o ia mai i lana galuega, sa faateʻia o ia ma lagona ai le matuā mafatia. Na taumānatu o ia, ʻO le a faapefea nei ona tausi loʻu aiga? Ua tele tausaga o oʻu galue malosi, ae aiseā ua manatu ai le kamupani ua lē toe manaʻomia aʻu?’

• Atonu ua e mafatia ona ua malepe lau faaipoipoga. Ua faamatala e Raquel: “Ina ua tuua faafuaseʻi aʻu e laʻu tane i le 18 masina ua mavae, sa ou matuā faanoanoa. Sa pei ua taʻe loʻu fatu. E lē gata sa vaivai ai loʻu tino, ae sa tigā foʻi oʻu faalogona. Na ou atuatuvale pe a ou mafaufau i le lumanaʻi.”

• Atonu o loo iai sou faafitauli tugā i le soifua mālōlōina, ma e foliga mai e lē toe foʻi i se lelei. O nisi taimi e ono pei ou lagona o le augātamā o Iopu, o lē na tagiauē: “Ua ou teena lea mea; ou te lē fia ola i aso uma.” (Iopu 7:16) Atonu e tutusa ou lagona ma Luis o se tane ua silia ma le 80 ona tausaga, o lē na taʻutino mai: “O nisi taimi ou te lagona e pau le mea ou te faatalitali i ai, o le oti.”

• Pe atonu foʻi o loo e fia maua ni faamāfanafanaga ona o le maliu o sē e pele iā te oe. Ua taʻua e Robert: “Ina ua oti loʻu atalii i se faalavelave mataʻutia tau vaalele, ou te leʻi talitonu i ai i le taimi muamua. Sa sosoo ai ma lagona tigā, o le tigā lea e faatusa e le Tusi Paia e pei o le tuia ia ati i le pelu.”—Luka 2:35.

Na maua e Robert, Luis, Raquel, ma Julian faamāfanafanaga e oo lava i na taimi na sili ona mafatia ai. Na latou maua le fesoasoani mai i Lē sili e saunia faamāfanafanaga, o le Atua o Lē e ona le malosi uma lava. E faapefea ona ia saunia mai faamāfanafanaga? Po o le a ia saunia mai foʻi ni faamāfanafanaga i taimi e te manaʻomia ai?

Ua faamatala e le aposetolo o Paulo Ieovaa o le “Atua o faamāfanafanaga uma, o lē na te faamāfanafanaina i tatou i o tatou puapuaga uma.” (2 Korinito 1:3, 4) O lea, ua faamautinoa mai e le Tusi Paia iā i tatou, e fesoasoani le Atua i tagata uma ma e faamāfanafanaina e lo tatou Tamā i le lagi i tatou i so o se tulaga faigatā.

O le mea moni, e iai se mea e tatau ona tatou faia pe a tatou fia maua faamāfanafanaga mai i le Atua. E faapefea ona fesoasoani mai se fomaʻi iā i tatou, pe afai e lē faia se fuafuaga ia vaai le fomaʻi? Na fesili le perofeta o Amosa: “Pe e savavali faatasi ea se toʻalua, pe e leʻi feiloaʻi muamua ma fai sa laʻua fuafuaga?” (Amosa 3:3) O lea, ua faalaeiau ai i tatou i le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.”—Iakopo 4:8.

E faapefea ona tatou mautinoa o le a mafuta vavalalata mai le Atua iā i tatou? Muamua, talu ai e tele taimi ua ia taʻu mai ai e finagalo e fesoasoani mai iā i tatou. (Tagaʻi i le pusa.) Lona lua, talu ai ua tatou maua faamaoniga mai i tagata na faamāfanafanaina e le Atua, o tagata moni i taimi ua mavae faapea foʻi o tatou taimi.

I le pei o le toʻatele i aso nei o ē saʻili mo se fesoasoani mai i le Atua, e tele faigatā sa feagai foʻi ma le tupu o Tavita. Na ōle atu o ia iā Ieova i se tasi taimi: “Ia e faafofoga mai i le leo o aʻu ʻaiʻoiga pe a ou tagi atu mo se fesoasoani.” Pe na tali mai Ieova? Ioe, auā na toe faapea mai Tavita, ua ia “fesoasoani mai iā te aʻu, o le mea lea ua olioli ai loʻu loto.”—Salamo 28:2, 7.

LE VAEGA A IESU I LE FAAMĀFANAFANAINA O Ē UMA E FAAVAUVAU

O le finagalo o le Atua ia iai se vaega autū a Iesu i le saunia o faamāfanafanaga. O se tasi o tiute na tofia atu e le Atua iā Iesu, ia “fusifusi i ē ua loto momomo” ma ʻfaamāfanafana i ē uma o loo faavauvau.’ (Isaia 61:1, 2) E pei ona valoia, sa naunau faapitoa Iesu i tagata na “tigāina ma mafatia i avega.”—Mataio 11:28-30.

Na faamāfanafana e Iesu tagata e ala i le avatu o fautuaga atamai, feutagaʻi ma i latou i se auala agalelei, ma o nisi taimi e ala i le faamālōlōina o o latou maʻi. I se tasi aso na ʻaiʻoi atu ai se lepela iā Iesu: “A e finagalo i ai, e mafai lava ona e faamamā iā te aʻu.” O le alofa mutimutivale o Iesu na ia tali atu ai: “Ou te loto i ai. Inā mamā ia oe.” (Mareko 1:40, 41) Sa faamālōlōina le lepela.

E ui e lē o toe iai le Alo o le Atua i le lalolagi ina ia faamāfanafana tuusaʻo i tatou. Peitaʻi, o loo faaauau ona fesoasoani mai lona Tamā o Ieova, o le “Atua o faamāfanafanaga uma,” i ē o loo manaʻomia se fesoasoani. (2 Korinito 1:3) Seʻi iloilo auala autū e fā ua faaaogā e le Atua e faamāfanafana ai tagata.

• Tusi Paia. “O mea uma na tusia i aso ua mavae, na tusia e faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.”—Roma 15:4.

• Agaga Paia o le Atua. Ina ua mavae le maliu o Iesu, sa matuā manaʻomia e le faapotopotoga Kerisiano faamāfanafanaga. Ua faamatalaina i le Tusi Paia, na saunia mai e le Atua lenā faamāfanafanaga e ala i lona agaga paia. (Galuega 9:31) E malosi tele le agaga paia po o le mana galue o le Atua. E mafai ona faaaogā e le Atua lona mana e faamāfanafana ai i so o se tasi e tusa po o le ā le tulaga.

• Tatalo. Ua fautua mai le Tusi Paia: “Aua neʻi popole i se mea.” Nai i lo o lea, ua faapea mai “ia faailoa atu o outou manaʻoga i mea uma lava i le Atua . . . , ona leoleoina ai lea o o outou loto ma mafaufau i le filemu mai i le Atua.”—Filipi 4:6, 7.

• Isi Kerisiano. E mafai ona avea i latou ma uō moni e saunia mai faamāfanafanaga i taimi o faigatā. Na faamatala e le aposetolo o Paulo ana aumea o ni ē na “fesoasoani e faamalosiau” iā te ia i taimi o “puapuaga.”—Kolose 4:11; 1 Tesalonia 3:7.

Ae atonu e te taumānatu pe faapefea ona aogā na vala. Seʻi o tatou iloilo totoʻa mea na tutupu i tagata ia na feagai ma faafitauli, ia na taʻua i le mataupu muamua. I le pei o i latou, e mafai ona e faamaonia ai o loo faataunuu pea e le Atua le folafolaga faamāfanafanaloto lenei: “E pei o se tagata e faamāfanafana pea i ai lona tinā, e faapea foʻi ona ou faamāfanafana iā te outou.”—Isaia 66:13.

PE A LĒ TOE FAIGALUEGA

Na faapea mai Setha: “E tutusa le taimi na ma lē toe faigaluega ai ma laʻu avā. E lua tausaga na ma ola ai i mea e maua mai i o ma aiga, ma nai galuega lāiti e lē tumau. O le iʻuga, na lotovaivai ai laʻu avā o Priscilla ma ou manatu ai ua lē toe iai soʻu aogā.

“Na faapefea ona ma fesagaʻia lenā tulaga? Na faaauau pea ona mafaufau Priscilla i upu a Iesu o loo i le Mataio 6:34. Na fetalai o ia e aua le popole i mea e tutupu a taeao, auā e tofu lava le aso ma ona popolega. Na faaauau pea ona ia maua le malosi mai i ana tatalo faatauanau. Ae na faamāfanafanaina aʻu i le manatu o loo i le Salamo 55:22. E pei o le faisalamo, na ou tuuina atu oʻu popolega iā Ieova ma na ia tausia aʻu. E ui lava o lea ua maua laʻu galuega, ae ua faafaigofie o ma olaga e ōgatusa ma fetalaiga a Iesu o loo i le Mataio 6:20-22. Ae sili atu i lenā, ua ma mafuta vavalalata atu ai i le Atua faapea le tasi i le isi.”

Na taʻutino mai Jonathan: “Ina ua gau la matou pisinisi, na ou popole i le tulaga o le a iai lo matou aiga. Na lē aogā galuega mamafa sa faia mo le 20 tausaga, ina ua faalētonu le tulaga tau tamaoaiga o le atunuu. Na amata ona ma misa ma laʻu avā e faatatau i tupe. Na lē mafai foʻi ona faaaogā se credit card e fai ai faatau, ona o le popole ina neʻi lē taliaina.

“Ae na fesoasoani le Afioga a le Atua ma lona agaga e ma te faia ai ni filifiliga lelei. Na ou aʻoaʻoina le faia o so o se galuega, ma na ma faaitiitia tupe faaalu i mea e lē manaʻomia moni. I le avea ai ma Molimau a Ieova, na ma maua foʻi le lagolagosua mai i isi uso talitonu. Na latou faamalosia i maʻua ma ofoina mai le fesoasoani na ma manaʻomia, i taimi e sili ona faigatā.”

PE A MALEPE SE FAAIPOIPOGA

Na taʻua e Raquel: “Na ou lagona le tigā ma le ita ina ua faafuaseʻi ona tuua aʻu e laʻu tane. Na lofitūina foʻi aʻu i le faanoanoa tele. Ae na ou mafuta vavalalata i le Atua, ma na ia faamāfanafanaina aʻu. Na pulea loʻu loto i le filemu mai le Atua, pe a ou tatalo atu iā te ia i aso taʻitasi. E foliga mai na ia faaleleia oʻu faalogona tigā.

“Ou te lotofaafetai ona o lana Afioga le Tusi Paia na mafai ai ona ou manumalo mai lagona ita ma le lototigā. Na ou teuloto upu a le aposetolo o Paulo o loo i le Roma 12:21: ʻAua le faatoʻilaloina oe i le leaga; ae ia faatoʻilaloina pea le leaga i le lelei.’

“Na fesoasoani mai se tasi o aʻu uō lelei, e aua neʻi avea le mea na tupu ma mea ou te lotovaivai ai pea. Na ia faailoa mai le Failauga 3:6 ma faapea mai ma le agalelei, e iai le taimi e tatau ai ona tatou ʻtuʻua’ se mea ʻua leiloa.’ E ui lava na faigatā lenei fautuaga ae o le mea tonu lenā sa ou manaʻomia. Ua iai nei ni sini fou o loʻu olaga.”

Na faapea mai Elizabeth: “Pe a malepe lau faaipoipoga e te manaʻomia le lagolagosua. Na iai saʻu uō mamae na lagolagosua iā te aʻu i aso taʻitasi. Na ma fetagisi faatasi, na ia faamāfanafanaina aʻu, ma ou lagonaina ai le alofa nai lo o le avea ma sē ua tuulafoaʻia. Ou te talitonu na faaaogā o ia e Ieova e fesoasoani mai e faaleleia oʻu faalogona tigā.”

PE A MAUA I MAʻI O LE TINO PO O LE SOIFUA MATUA

E iai se faafitauli tugā i le fatu o Luis, lea na taʻua i le mataupu muamua o lenei faasologa o mataupu, ma e lua taimi na toeitiiti lava maliu ai. I le taimi lenei, ua manaʻomia ona faamānava o ia i le okesene mo le 16 itula i le aso. Ua faapea mai Luis: “Ou te tatalo pea iā Ieova. Pe a uma ona ou tatalo, ou te lagona le foaʻi mai e lona agaga o le malosi. O le tatalo ua ou maua ai le malosi e faaauau ai pea, auā ou te faatuatua iā Ieova ma iloa e manatu mamafa mai o ia iā te aʻu.”

Ua faapea mai Petra o lē ua silia i le 80 ona tausaga: “E tele mea ou te manaʻo e fai, ae ua lē mafai. O le mou atu o loʻu malosi o se mea e faigatā tele. Ou te lagona le vaivai, ma ou te faalagolago i vai ma fualaau mai fomaʻi. E masani ona ou mafaufau i le auala na talosaga ai Iesu i lona Tamā ina ia aveese se faigatā patino pe afai e mafai, ae na foaʻi e Ieova le malosi iā Iesu ma ua ia faamalosia foʻi aʻu. O le tatalo o se toomaga mo aʻu i aso taʻitasi. E ese le lelei o oʻu faalogona, pe a uma ona ou talanoa i le Atua.”—Mataio 26:39.

O faalogona foʻi na o Julian ua toetoe 30 tausaga o tauivi ma le maʻi e taʻua o le multiple sclerosis. Ua ia faapea mai: “O le taimi muamua sa ou nofo i le nofoa o se pule, a o lenei ua ou alu i se nofoa faataavalevale. E ui i lea, ua iai se fuafuaga o loʻu olaga talu ai o loo faaalu e auauna ai i isi. O le foaʻi atu e mafai ona faaitiitia ai mafatiaga, ma e tausisi Ieova i lana folafolaga e faamalosia i tatou i taimi faigatā. E pei o le aposetolo o Paulo e mafai ona ou faapea atu: ʻO mea uma lava, ua ou maua le malosi mai iā te ia o lē na foaʻi maia iā te aʻu le mana.’”—Filipi 4:13.

PE A MALIU SE TASI

Ua faapea mai Antonio: “Ina ua maliu loʻu tamā i se faalavelave tau taavale, ou te leʻi talitonu ai i le taimi muamua. Sa foliga mai e lē tonu le mea na tupu, auā na savali o ia i le auala ae faafuaseʻi lava ona lavea i se taavale. Peitaʻi, e leai se mea na mafai ona ou faia. E lima aso na ia leiloa ai se mea ae maliu loa. Sa ou taumafai e aua neʻi oʻu tagi pe a iai loʻu tinā, ae ou te matuā tagi lotulotu pe a na o aʻu. Ou te fesili ifo pea, ʻAiseā ua tupu ai lenei mea?’

“I na taimi faanoanoa, na ou talosaga atu pea iā Ieova e fesoasoani mai ina ia mafai ona ou pulea oʻu faalogona ma aumai le filemu. Na faasolosolo ona ou lagona le toʻafilemu. Na ou manatua ai le faamatalaga a le Tusi Paia e tutupu faafuaseʻi iā i tatou ʻmea e leʻi faatalitalia.’ Talu ai e lē mafai ona tala pepelo le Atua, ua ou talitonu ai o le a ou toe vaai i loʻu tamā pe a toetū mai.”—Failauga 9:11; Ioane 11:25; Tito 1:2.

O le manatu foʻi lenā o Robert lea na taʻua i le mataupu muamua. Ua ia faapea mai: “E ala atu i a ma tatalo iā Ieova na ma maua ai ma laʻu avā, le filemu o le mafaufau lea o loo taʻua i le Filipi 4:6, 7. O lenei filemu na mafai ai ona ma talanoa atu i tagata e lipotia mea tutupu, e uiga i lo ma faamoemoe o le toetū. E ui lava ua maliu la ma tama i le faalavelave tau vaalele, ae e ma te manatua pea taimi fiafia na matou faatasi ai. E ma te taumafai e mafaufau pea i na taimi fiafia.

“Ina ua faapea mai nisi Molimau na latou vaaia i maʻua o loo faamatala atu ma le toʻafilemu o ma talitonuga i le televise, na ma tali atu na mafai ona ma faia faapea, ona o le tele o tatalo sa faia mo i maʻua. Ou te matuā talitonu sa fesoasoani mai Ieova iā i maʻua e ala i le tele o a latou upu faamāfanafana loto.”

E pei ona faaalia i faaaʻoaʻoga na taʻua, e mafai e le Atua ona saunia mai le faamāfanafanaga mo ē o loo fesagaʻia faigatā ma luʻi eseese. Ae e faapefea oe? Po o ā lava faigatā e te fesagaʻia i le olaga, e mafai ona e maua le faamāfanafanaga e fesoasoani iā te oe i na taimi faigatā.b Aiseā la e te lē saʻili atu ai iā Ieova mo se fesoasoani? O ia o “le Atua o faamāfanafanaga uma.”—2 Korinito 1:3.