E tatou te faitau i lenei tala mataʻina i tusi e fā o Evagelia i Tusitusiga Eleni, lea e masani ona taʻua o le Feagaiga Fou. Pe na tutupu moni lava nei mea? E talafeagai ma tāua lenei fesili auā afai e lē moni, ua lē aogā la le faatuatua o Kerisiano, ma ua na o se miti le faamoemoe o le ola e faavavau i le Parataiso. (1 Korinito 15:14) Ae afai na tutupu moni lava nei mea, o loo iai la se faamoemoe pupula mo le fanau a tagata, lea foʻi e mafai ona e mauaina. O lea, po o ni tala moni po o ni talafatu tala na faamauina e Evagelia?

O MEA UA FAAALIA MAI I MEA MONI

E ese mai i talatuu, o tusitusiga a Evagelia sa tusia ma le māeʻaeʻa ma le saʻo aʻiaʻi faamatalaga o loo iai. O se faataʻitaʻiga, e tele igoa o nofoaga moni o loo taʻua ai, ma o le tele o na nofoaga e mafai ona asiasi i ai i aso nei. O loo taʻua ai foʻi igoa o tagata moni, ma e faamaonia na igoa i tala o loo faamauina e tusitala o talafaasolopito a le lalolagi.—Luka 3:1, 2, 23.

O loo taʻua Iesu i tala a tusitala o le lalolagi i le senituri muamua ma lona lua.a O le auala na maliu ai o ia e pei ona faamatalaina i Evagelia, e ōgatusa lelei ma le auala na faia ai faasalaga a Roma i lenā vaitaimi. E lē gata i lea, o mea na taʻua e moni ma faamaoni, auā o loo taʻua ai foʻi uiga lē lelei o nisi o soo o Iesu. (Mataio 26:56; Luka 22:24-26; Ioane 18:10, 11) O nei mea uma ua faaalia ai, sa faamaoni ma saʻo aʻiaʻi tusitala o Evagelia i mea na latou tusia e faatatau iā Iesu.

PE E MONI NA TOE FAATŪINA IESU?

E moni e talitonu tagata na soifua ma maliu Iesu, ae e iai lava nisi e fesiligia lona toetū. E oo lava i aposetolo o Iesu e leʻi talitonu foʻi ina ua faatoʻā faalogo i le tala ua toetū mai o ia. (Luka 24:11) Peitaʻi, na aveesea uma na masalosaloga ina ua vāai aposetolo ma isi soo i taimi eseese iā Iesu ina ua toe faatūina mai. I se tasi taimi, e silia ma le 500 i latou na molimauina ua toetū mai o ia.—1 Korinito 15:6.

E ui lava sa iloa e soo o Iesu e molia ma fasiotia i latou, ae sa latou lototetele lava e faailoa atu le toetū mai o Iesu i tagata uma, e oo lava i ē na fasiotia o ia. (Galuega 4:1-3, 10, 19, 20; 5:27-32) Faamata e lototetele soo o Iesu pe ana faapea e latou te leʻi mautinoa pe na toetū moni o ia? O le moni o le toetū o Iesu, o se uunaʻiga malosi lea na faamalosia ai Kerisiano i lenā taimi faapea foʻi i aso nei.

O tala a Evagelia e faatatau i le maliu ma le toetū o Iesu, o loo iai uma faamatalaga e manaʻomia e avea ai o se tusi o talafaasolopito e moni aʻiaʻi. O le faitau ma le totoʻa i tusi a Evagelia, o le a e talitonu ai o nei tala o ni mea moni lava na tutupu. E mafai ona faamalosia atili lou mautinoa pe a e malamalama i māfuaaga na tutupu ai nei mea. O le a faamatala mai i le mataupu o sosoo mai na māfuaaga.

O le ā sau tali pe a fesiligia oe, “Pe e te fia ola e faavavau?” O le toʻatele e faapea mai e fia ola e faavavau, ae e latou te manatu e lē mafai ona tupu lenā tulaga. E latou te faapea mai o le oti o se tulaga masani o le olaga, ma o le iʻuga lea o tagata uma.

Ae seʻi faapea la ua sui le fesili, “Po ua e sauni e te oti?” O le toʻatele lava e tali mai e leai. O le ā ua faaalia mai ai? E ui lava i faigatā ma puapuaga e tatou te fesagaʻia, ae o lo tatou faanaunauga masani, e fia ola pea. Ua faailoa mai i le Tusi Paia na foafoaina e le Atua le tagata ma le faanaunauga ia ola pea. Ua taʻua i le Failauga 3:11, “ua ia tuu le faavavau i o latou loto.”

Peitaʻi, o le mea moni e lē o ola e faavavau tagata. O lea, o le ā le mea na tupu? Ae po o gaoioi le Atua ia aveesea le oti? E faamāfanafanaloto tali mai i le Tusi Paia, ma e fesootaʻi atu i le māfuaaga na puapuaga ma maliu ai Iesu.

LE MEA NA TUPU

O loo faamatala i uluaʻi mataupu e tolu o le Kenese, na tuu atu e le Atua i le uluaʻi ulugalii o Atamu ma Eva le faamoemoe o le ola e faavavau, ma faailoa atu i ai mea e tatau ona la faia ina ia maua ai le ola e faavavau. O loo sosoo ai ma le faamatalaina o lo la lē usiusitaʻi i le Atua, ma melea ai lenā faamoemoe. E faigofie le auala ua faamatalaina ai, ma o le pogai lenā e vave ai ona manatu nisi o se talatuu. Peitaʻi, o le tusi o Kenese, o loo iai faamatalaga uma e iloa ai o se tusi o talafaasolopito e saʻo aʻiaʻi e pei foʻi o tusi o Evagelia.a

O le ā ua iʻu i ai ona o le lē usitaʻi o Atamu? Ua taʻua i le Roma 5:12: “E pei ona oo mai o le agasala i le lalolagi ona o le tagata e toʻatasi [Atamu], o le oti foʻi ona o le agasala, ona oo mai ai lea o le oti i tagata uma auā ua agasala uma lava.” O le lē usitaʻi o Atamu i le Atua ua agasala ai. O lea ua ia melea ai le faamoemoe o le ola e faavavau ma mulimuli ane oti. I le avea ai ma ē na tupuga mai iā te ia, ua tuufaasolo mai ai iā i tatou aafiaga o lana agasala. O le iʻuga ua oo mai ai maʻi, soifua matua, ma le oti. O lenei faamatalaga e faatatau i le pogai ua tatou feoti ai, ua ōgatusa ma mea ua tatou iloa i aso nei e faatatau i vala e tuufaasolo mai e mātua i fanau. Ae po o faia e le Atua se mea ina ia aveesea ai lenei tulaga?

MEA UA FAIA E LE ATUA

Ioe, ua faia e le Atua se sauniuniga ina ia toe totogi pe toe faatau mai ai le mea na melea e Atamu mo lana fanau, o le ola lea e faavavau. Na faapefea ona faataunuu e le Atua lenā sauniuniga?

Ua taʻua i le Roma 6:23, “o le totogi o le agasala o le oti lea.” O lona uiga o le oti o le āuga lea o le agasala. Sa agasala Atamu, ma o lea ua oti ai. E faapena foʻi i tatou, ua tatou agasala, ma ua tatou feoti ona o le totogi lea o le agasala. Peitaʻi e lē o i tatou e māfua ai, auā na tatou fananau mai lava ma lenei tulaga agasala. O lea, o le alofa o le Atua na ia auina mai ai lona Alo o Iesu, ina ia ʻtotogi le agasala’ mo i tatou. E faapefea?

Talu ai o le tagata lelei atoatoa e toʻatasi, o Atamu, na māfua ai ona oo mai le agasala ma le oti iā i tatou ona o lona lē usitaʻi, o lea sa manaʻomia ai se tagata lelei atoatoa e usitaʻi seʻia oo i le oti, ina ia faasaʻoloto ai i tatou mai i lenei tulaga faigatā. Ua faamatalaina i le Roma 5:19: “E pei ona agasala le toʻatele ona o le lē usiusitaʻi o le tagata e toʻatasi, e faapea foʻi ona taʻuamiotonuina le toʻatele ona o le usiusitaʻi o le tagata e toʻatasi.” O lenā “tagata e toʻatasi,” o Iesu. Na ia tuua le lagi ma avea o se tagata lelei atoatoab ma maliu mo i tatou. O le iʻuga, ua mafai ai ona tatou maua se tulaga amiotonu i luma o le Atua, ma le faamoemoe o le ola e faavavau.

LE POGAI NA PUAPUAGA MA MALIU AI IESU

Aiseā na talafeagai ai ona maliu Iesu ina ia faataunuu ai lenei tulaga? Pe e lē mafai e le Atua o Lē e ona le malosi uma lava, ona faia se tulafono ina ia mafai ai ona ola e faavavau le fanau a Atamu? E mautinoa e iai le pule iā te ia e faia ai faapea. Peitaʻi, o le a lē ōgatusa ai ma lana tulafono i le totogiina o le agasala i le oti. O lenā tulafono e lē mafai ona faalēaogāina pe suia ona o se isi māfuaaga. O lenei tulafono ua faavaeina ai le faamasinotonu.—Salamo 37:28.

Pe ana faapea e lē amanaʻia e le Atua lana faamasinotonu i lenei tulaga, atonu la e taumānatu tagata po le a ia faia foʻi faapea i isi tulaga. O se faataʻitaʻiga, po o le a faamasinotonu o ia i le filifilia po o ai o le fanau a Atamu e mauaina le ola e faavavau? Pe e maufaatuatuaina o ia e faataunuu ana folafolaga? O le tausisi o le Atua i le faamasinotonu i lana sauniuniga mo lo tatou faaolataga, ua faamautinoa mai ai o le a ia faia le mea saʻo i taimi uma.

E ala i le maliu faataulaga o Iesu, ua tatala mai ai e le Atua le ala i le ola e faavavau i le Parataiso i le lalolagi. Seʻi mātau upu a Iesu o loo i le Ioane 3:16: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” O le maliu o Iesu e lē gata ua faaalia mai ai le faamasinotonu o le Atua i taimi uma, ae sili atu ai ua faaalia ai lona alofa faamaoni i le fanau a tagata.

Peitaʻi, aiseā na tatau ai ona puapuaga ma maliu tigā Iesu e pei ona faamatalaina i tusi a Evagelia? O lona onosaia o tofotofoga matuitui ma tumau faamaoni, na faamaonia ai e Iesu e pepelo le tuuaʻiga a le Tiapolo e faapea, e lē mafai ona tumau faamaoni tagata pe a feagai ma tofotofoga. (Iopu 2:4, 5) E foliga mai na saʻo lenā tuuaʻiga ina ua faapogaia e Satani le tagata lelei atoatoa o Atamu e agasala. Peitaʻi na tumau ona usitaʻi Iesu o lē na tutusa o la tulaga lelei atoatoa ma Atamu, e ui lava i mafatiaga ogaoga. (1 Korinito 15:45) O lea na ia faamaonia ai, na mafai lava ona usitaʻi Atamu i le Atua pe ana loto i ai. O le onosaʻi o Iesu e ui i tofotofoga, ua ia faataatia ai se faaaʻoaʻoga mo i tatou e mulimuli i ai. (1 Peteru 2:21) Sa tauia e le Atua le usiusitaʻi atoatoa o lona Alo, e ala i le mauaina e Iesu o le ola e lē mafai ona oti i le lagi.

AOGĀ MO I TATOU

O le maliu o Iesu o se mea moni lava na tupu, ma ua maua ai le ala i le ola e faavavau. Pe e te fia ola e faavavau? Na faailoa mai e Iesu le mea e ao ona tatou faia ina ua fetalai: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”—Ioane 17:3.

E valaaulia oe e ē na lomia lenei mekasini, ina ia aʻoaʻo atili e faatatau iā Ieova le Atua moni, ma lona Alo o Iesu Keriso. E fiafia Molimau a Ieova i lou vaipanoa e fesoasoani atu iā te oe. E mafai foʻi ona e maua nisi faamatalaga pe a tagaʻi i la matou upega tafaʻilagi, o le www.pr2711.com/sm.