PE A e talanoa atu i isi e uiga i fuafuaga a le Atua, pe na o oulua pe o e talanoa atu mai i le pulelaa, e ao ona faaautū lau talanoaga i mea o loo i le Afioga a le Atua. E masani lava ona aofia ai le faitauina o mau mai i le Tusi Paia, lea e manaʻomia ona fai i se tulaga lelei.

O Faamamafaga Talafeagai e Aofia ai Faalogona. E ao ona faitauina mau faatasi ai ma faalogona. Manatunatu i nisi nei o faaaʻoaʻoga. Pe a e faitauina leotele le Salamo 37:11, e ao ona faailoa atu e lou leo le faatalitali atu ma le fiafia i le filemu lea o loo folafola mai i inā. Pe a e faitauina le Faaaliga 21:4 e faatatau i le iʻuga o puapuaga ma le oti, e ao ona faailoa atu i lou leo le talisapaia māfana mo le mapusaga ofoofogia e pei ona folafola mai. O le Faaaliga 18:2, 4, 5, faatasi ai ma lana augani ina ia ō ese mai iā “Papelonia le aai tele” lea ua matuā agasala lava, e manaʻomia ona faitau i se leo faanatinati. O le mea moni lava ia, o faalogona o loo faaali atu e ao ona sau mai le loto peitaʻi ia aua foʻi le soona faia. E fua le talafeagai o le tele o lagona loloto i le mau lava ia, atoa ai ma le auala o loo faaaogāina ai.

Faamamafa Upu Saʻo. Afai o ou manatu e faatatau i se fuaiupu o se mau o loo agaʻi atu i le na o se vaega o lenā fuaiupu, e ao la ona e faamatilatila le vaega lenā pe a e faitauina le mau. O se faaaʻoaʻoga, pe a faitau le Mataio 6:33, e te lē tuuina atu le faamamafaga autū i “lana amiotonu” po o “ia mea uma” pe afai o loo e manaʻo e faamatala le uiga o le “muai saili le malo.”

I se lauga i le Sauniga o le Auaunaga, e te ono fuafua e faitau le Mataio 28:19. O ā upu e ao ona e faamamafaina? Afai e te manaʻo e faalaeiau le filigā e amata suʻesuʻega faale-Tusi Paia i aiga, ia faamamafa le ‘fai ma soo.’ I le isi itu, afai o e fuafua e talanoaina le tiute tauave a se Kerisiano o le tufa atu o upu moni o le Tusi Paia i tagata ese e malaga mai ma nonofo i lo outou atunuu, pe faapea foʻi o loo e manaʻo e faalaeiau nisi o tagata talaʻi e auauna i le mea o loo sili ona manaʻomia ai le fesoasoani, e te ono faamamafa le faaupuga, “nuu uma lava.”

O le tele lava o taimi, e faaaogā se mau e tali ai se fesili pe lagolagoina ai se faamatalaga e lē ioeina e isi. Afai e tutusa le auala e faamamafa ai manatu uma lava i le mau, e ono lē taulau ona iloa e lau aofia le fesootaʻiga. Atonu e na o oe e iloa le manatu peitaʻi latou te lē iloa.

O se faaaʻoaʻoga, Pe a faitau le Salamo 83:18 mai i se Tusi Paia o loo maua ai le suafa tauatua, afai e te tuu faamamafaga uma i le faaupuga “le Silisili ese,” e ono lē taulau ona maua e le tagata e ona le fale le mea moni e faapea e iai le suafa totino o le Atua. E ao ona e faamamafaina le suafa “Ieova.” Peitaʻi, pe a e faaaogā le mau lava lenā e talanoaina ai le pule silisili ese a Ieova, e ao ona e tuu atu le faamamafaga autū i le faaupuga “le Silisili ese.” E faapena foʻi, pe a faaaogā le Iakopo 2:24 e faaalia ai le tāua o le ō faatasi o le faatuatua ma galuega, o le tuu atu o le faamamafaga autū i le “taʻuamiotonuina” na i lo le faamamafa o le upu “galuega” e ono misi ai le manatu i nisi o faalogo mai iā te oe.

O se tasi o faaaʻoaʻoga aogā e mafai ona maua i le Roma 15:7-13. O se vaega lenei o se tusi na tusi atu ai le aposetolo o Paulo i se faapotopotoga sa faia aʻe i tagata o Nuu Ese ma tagata o Isaraelu faaletino. I inei o loo finau atu ai le aposetolo e faapea o le faiva a Keriso e aogā e lē gata o Iutaia peritomeina, ae faapena foʻi tagata o nuu ese ina “ia vivii foi nuu ese i le Atua ona o le alofa.” E fā mau o loo sii e Paulo, e tataʻi atu ai manatu i lenā avanoa mo nuu ese. E ao faapefea ona e faitauina na manatu sii ina ia faamamafa ai le manatu sa i le mafaufau o Paulo? Afai e te faailogaina faaupuga e faamamafa, e te ono faailogaina “nuu ese” i le fuaiupu e 9, “outou nuu ese” i le fuaiupu e 10, “outou nuu uma” ma “outou tagata uma lava” i le fuaiupu e 11, ma “nuu ese” i le fuaiupu e 12. Taumafai e faitau le Roma 15:7-13 faatasi ai ma faamamafaga na. A o e faia faapea, o le a oo ina manino ma faigofie ona e malamalama i le manatu atoa sa finauina e Paulo.

O Metotia e Faamamafa Ai. O upu e tauave ai manatu o loo e manaʻo e faamatilatila e tele auala e ono faamamafa ai. E manaʻomia i le ala e te faaaogāina ona ōgatusa ma le mau atoa ai ma le faatulagaga o le lauga. O loo ofoina atu i inei nai fautuaga.

Faamamafa le leo. E aofia ai i lenei mea ia so o se suiga o le leo lea o le a faamatilatila ese ai upu e tauavea manatu, mai i le isi vaega uma o le fuaiupu. E ono mafai ona faamamafa e ala i le sui o le malosi o le leo—a lē o le leotele ia pe leo laʻitiiti. I le tele o gagana, e faaopoopo atu le faamamafaga e ala i se suiga o le iʻī po o le oolo o le leo. Peitaʻi, i nisi gagana, e ono suia atoa ai le uiga o le manatu i lenā faiga. Pe a faalemu le saosaoa mo faaupuga autū, e avatu ai le faamamafaga i na faaupuga. I gagana ia e lē faatagaina ai ona faamamafa le leo mo le faamamafaina o nisi upu, e ao ona fai po o le ā lava se auala e masani ai i lenā gagana ina ia maua ai le mea o loo manaʻomia.

Mānavaga. E ono fai le mea lenei a o leʻi faitauina po ua uma foʻi ona faitauina le vaega autū o se mau—pe o taimi uma foʻi. O le mānava a o e leʻi faitauina se manatu autū e faaosofia ai le naunau faatalitali; o le mānava pe a uma ona faitau se manatu autū e atili faatāuaina ai mea ua taʻua. Peitaʻi, afai o le a tele naʻuā mānavaga, o le a leai se manatu e matilatila ese atu.

Toe taʻua. E mafai ona e tuuina se faamamafa i se manatu patino e ala i le taofi o lau faitau ae toe faitau le upu po o se fasi fuaiupu. O le auala e masani lava ona fai ai, o le faitau uma lea o le mau ona toe taʻua ai lea o faaupuga autū.

Tāga. O gaoioiga o le tino faapena foʻi ma foliga vaaia e masani lava ona faaopoopo atu ai lagona loloto i se upu po o se fasi fuaiupu.

Ituaiga o leo. I nisi gagana, e iai taimi e ono faitauina ai upu i se ituaiga o leo lea e mafai ona aafia ai o latou uiga ma faatulaga ese ai. I lenei foʻi tulaga e manaʻomia lava ona faautauta ai, aemaise lava i le faaaogāina o upu faapaʻitau po o faaupuga tutui.

Pe a Faitau e Isi ia Mau. Pe a faitauina e lē e ona le fale se mau, atonu na te faamamafa upu sesē po o le leai foʻi. O le ā e mafai ona e fai i ai? O le tulaga e masani ai e sili ona lelei le faamanino atu o le uiga e ala i lau faatatauga o mau. A uma ona fai le faatatauga, e te ono tataʻi saʻo atu se uaʻi faapitoa i upu e tauave ai manatu i le Tusi Paia.

PE A aʻoaʻoina isi, e tele mea e manaʻomia na i lo le na ona faitauina o fuaiupu o le Tusi Paia. Na tusi atu le aposetolo o Paulo i lana aumea o Timoteo e faapea: “Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te talaʻitonuina le upu moni.”—2 Timo. 2:15, LF.

Ina ia faia lenei mea, o lona uiga e ao i a tatou faamalamalamaga o mau, ona tutusa ma mea o loo aʻoaʻoina e le Tusi Paia. E manaʻomia ai i lenei mea ona tatou amanaʻia le siʻomaga, na i lo le tau lava ina fili faaupuga tatou te fiafia i ai, ona faaopoopo lea i ai o o tatou lava manatu. Na lapataʻi mai Ieova e ala mai i le perofeta o Ieremia, e faatatau i perofeta o ē sa faafoliga atu o loo latou tautatala i mea mai i le fofoga o Ieova, peitaʻi sa latou taʻu atu “le faaaliga mai o latou lava loto.” (Iere. 23:16) Sa lapataʻi atu le aposetolo o Paulo i Kerisiano ina ia aua neʻi o latou faaleagaina le Afioga a le Atua i filosofia a tagata ina ua ia tusi atu: “Ua matou lafoai mea lilo e masiasi ai, e le o savavali ma le amio pepelo, e le o faafilogia e i matou le afioga a le Atua.” I na aso, sa sui vai ai e le ʻaufaatau uaina lē faamaoni a latou uaina ina ia faatele ai ma maua ai le tele o tupe. Tatou te lē faafilogiaina le Afioga a le Atua e ala i le faafefiloi ma filosofia faaletagata. Na faalauiloa atu e Paulo e faapea. “O i matou nei, e le pei o le toatele o e o faafilogia le afioga a le Atua; a ua matou tautalatala atu mai le loto lelei, mai le Atua foi, o i luma o le Atua, o i matou ua ia Keriso.”—2 Kori. 2:17; 4:2.

E iai taimi e te ono sii atu ai se mau e faamatilatila ai se mataupu silisili. O loo tumu le Tusi Paia i mataupu silisili ia o loo maua ai taʻiala lelei i le taulimaina o le tele o tulaga eseese. (2 Timo. 3:16, 17) Peitaʻi e ao ona e faamautinoa ua saʻo lau faatatauga ma e te lē o faaaogāsesēina se mau, i le faafoliga lea o loo e faauiga atu i le mea e te manaʻo e fai atu ai. (Sala. 91:11, 12; Mata. 4:5, 6) E ao i le faatatauga o le mau ona talafeagai ma fuafuaga a Ieova, ma ia tutusa ma le Afioga atoa a le Atua.

O le ‘talaʻitonuina o le upu moni’ e aofia ai foʻi le mauaina o le agaga o mea o fai mai ai le Tusi Paia. E lē faapea o se “pouvai” ina ia faamataʻu ai i isi. O le ʻauaʻoaʻo lotu o ē sa teena Iesu Keriso sa latou sii atu manatu mai le Tusi Paia, peitaʻi latou te leʻi manatu mamafa i mataupu e sili atu ona tāua—na sa aafia ai le faamasinotonu ma le alofa mutimutivale ma le faamaoni—lea sa manaʻomia e le Atua. (Mata. 22:23, 24; 23:23, 24) Ina ua ia aʻoaʻo atu le Afioga a le Atua, sa faaalia atu ai e Iesu uiga totino o lona Tamā. O le maelega o Iesu mo le upu moni sa ō faatasi ma lona alofa loloto mo tagata sa ia aʻoaʻoina. E ao ona tatou taumafai malosi e mulimuli i lana faaaʻoaʻoga.—Mata. 11:28.

E faapefea ona tatou faamautinoa ua tatou faia se faatatauga talafeagai o se mau? E fesoasoani le faitauina e lē aunoa o le Tusi Paia. E manaʻomia foʻi ona tatou talisapaia le sauniuniga a Ieova o “le auauna faamaoni ma le mafaufau,” le vaega tuufaatasi o Kerisiano faauuagagaina, lea o loo ia saunia mai ai taumafa faaleagaga mo le ʻauaiga o le faatuatua. (Mata. 24:45) O suʻesuʻega totino faapena foʻi ma le auai e lē aunoa ma faia se sao i sauniga a le faapotopotoga, o le a fesoasoani ai iā i tatou ina ia maua aogā mai i faatonuga o loo saunia mai e lenā vasega o le auauna faamaoni ma le mafaufau.

Afai o maua i lau gagana le tusi Reasoning From the Scriptures ma e faamasani e faaaogā lelei, o le a faigofie lava ona e maua taʻiala e te manaʻomia mo le faatatauina saʻo o le faitau selau o mau ia e masani ona faaaogā i la tatou faiva. Afai e te fuafua e faaaogā se mau e te lē masani ai, o le lotomaulalo na te taʻitaʻia oe e fai ni suʻesuʻega loloto e manaʻomia ina ia oo ai i le taimi e te tautala atu ai, ae o le a e talaʻitonuina le upu moni.—Faata. 11:2.

Ia Manino le Faatatauga. Pe a aʻoaʻoina isi, ia faamautinoa ua manino iā i latou le fesootaʻiga i le va o le mataupu o loo e talanoaina ma mau o loo e faaaogā. Afai e te faaaogā se fesili e tataʻi atu ai manatu i se mau, e ao ona iloa e lau ʻaufaalogologo pe faapefea ona tali e le mau lenā ia fesili. Afai o e faaaogāina le mau e lagolagoina ai se faamatalaga, ia mautinoa ua iloa lelei e le tagata suʻesuʻe le auala o faamaonia ai e le mau le manatu.

O le tau ina faitau o le mau—e tusa lava pe aofia ai ma faamamafaga—e masani lava ona lē lava lea. Manatua, atonu e lē masani i le Tusi Paia se tagata e leʻi lelei ni ana aʻoaʻoga, ma atonu o le a lē malamalama foʻi o ia i lou manatu i le na o le tasi o se faitau. Tataʻi atu manatu i le vaega o le mau lea e faatatau saʻo lava i mea o e talanoaina.

E masani lava ona aafia ai i lenei mea lou vavae ese o upu autū, o upu e fesootaʻi tuusaʻo i le mataupu o loo talanoaina. O le auala e sili ona faigofie o le toe taʻua lea o upu e tauavea manatu. Afai o e talanoa atu i se tagata e toʻatasi, e te ono fai atu fesili o le a fesoasoani iā te ia ina ia mātauina ai upu autū. Pe a talanoa atu i se vaega, o nisi failauga latou te mananaʻo e ausia o latou sini e ala i le faaaogā o upu e tutusa uiga po o le toe taʻua o manatu. Peitaʻi, afai e te filifili e fai le mea lenei, ia faaeteete ina ia aua neʻi lē iloa e le aofia le fesootaʻiga i le va o le manatu o loo talanoaina ma faaupuga i le mau.

A uma loa ona vavae ese upu autū, o lenā ua e faataatia se faavae lelei. E ao loa ona e mulimuli i ai. Pe sa e faatomua le mau ma faailoa manino atu lau māfuaaga ua faaaogā ai le mau? Afai sa e faia faapea, faailoa atu le auala e fesootaʻi ai upu ua e faamatilatilaina i le mea lea ua e tataʻia lau aofia e faatalitalia. Ia faailoa manino atu po o le ā lenā fesootaʻiga. E tusa lava pe e te leʻi faia lenā faatomuaga tuusaʻo i le mau, e ao lava ona iai ni faamatalaga e mulimuli atu ai.

Sa fesili atu le ʻau Faresaio iā Iesu ma lo latou manatu o se fesili faigatā, i le faapea atu: “Pe sā ea i se tasi ona faatea o lana avā ona o mea uma?” Sa faavae e Iesu lana tali i le Kenese 2:24. Mātau sa ia faauaʻi atu manatu i le na o le vaega lava e tasi o le fesili, ona ia faia ai lea o le faatatauga manaʻomia. Ina ua uma ona ia taʻua e faapea ua avea le tane ma lana avā ma “tino e tasi,” na faaiʻu le faamatalaga a Iesu i lona faapea atu: “O lenei, o e ua faatasia e le Atua, aua neʻi faateaeseina e se tagata.”—Mata. 19:3-6.

O le ā le tele o faamatalaga e tatau ona e avatua ina ia manino ai le faatatauga o se mau? E tatau ona fua le tulaga lenā i ē o loo fai aʻe ai lau aofia ma le tāua o le manatu o loo talanoaina. Ia fai ma ou sini le faafaigofie ma tuusaʻo.

Fefulisaʻi Mai i le Tusi Paia. E faatatau atu i le faiva a le aposetolo o Paulo i Tesalonia, ua taʻu mai iā i tatou e le Galuega 17:2, 3 (NW) e faapea ‘sa ia fefulisaʻi [ma i latou] mai i le Tusi Paia.’ O se tomai lenei e ao i auauna uma a Ieova ona taumafai e ati aʻe. Mo se faaaʻoaʻoga, sa taʻua e Paulo mea moni e faatatau i le soifua ma le faiva a Iesu, na ia faaalia e faapea sa uluaʻi valoia mai nei mea i Tusitusiga Eperu, ona ia avatu lea o se faaiʻuga malosi i lona faapea atu: “O Iesu lenei ou te folafola atu ai ia te outou, o le Keriso ia.”

Ina ua tusi atu i Kerisiano Eperu, sa lē aunoa ona sii atu e Paulo mai Tusitusiga Eperu. Ina ia faamamafa pe faamanino se manatu, sa masani ona ia vavaeesea se upu se tasi po o se fasi fuaiupu puupuu, ona faailoa atu lea o lona uiga patino. (Epe. 12:26, 27) I faamatalaga e pei ona maua i le Eperu mataupu e 3, o loo sii atu ai e Paulo le Salamo 95:7-11. Mātau sa ia faalautele atu i ona vaega e tolu: (1) o faamatalaga e faatatau i le loto (Epe. 3:8-12), (2) le uiga patino o le faaupuga “O le aso nei” (Epe. 3:7, 13-15; 4:6-11), ma (3) le uiga o le faaupuga: “Latou te le sao atu lava i loʻu malologa” (Epe. 3:11, 18, 19; 4:1-11). Taumafai malosi e faataʻitaʻi i le faataʻitaʻiga lenā a o e faia faatatauga o mau taʻitasi.

Mātau le aogā na oo i ai le fefulisaʻi o Iesu mai i le Tusi Paia i le faamatalaga o loo maua i le Luka 10:25-37. Na fesili se tamāloa e poto i le Tulafono: “Le aʻoaʻo e, se a se mea ou te faia ina ia ou maua ai le ola faavavau?” I lana tali atu na muamua valaaulia e Iesu le tamāloa e faailoa mai lona manatu i le mataupu, ona faamamafa atu loa lea e Iesu le tāua o le faia o le mea o fai mai ai le Afioga a le Atua. Ina ua manino mai le mata o le vai e lē o malamalama le tamāloa i le manatu saʻo, ona talanoa auʻiliʻili loa lea e Iesu na o le tasi lava le upu mai i le mau—le “tuaoi.” Na i lo le tau lava ina faamatala atu le uiga o le upu, sa ia faaaogā se tala faatusa e fesoasoani ai i le tamāloa e faia e ia lava le faaiʻuga saʻo.

E manino mai la pe a taliina fesili, sa leʻi tau lava ina sii atu e Iesu ni mau o loo maua ai le tali saʻo. Sa ia iloiloina le mea o loo fai mai ai mau, ona fai ai lea o le faatatauga i le fesili o loo talanoaina.

Ina ua luʻia le faamoemoe o le toetū e le ʻau Satukaio, sa tataʻi atu e Iesu manatu i se vaega patino se tasi o le Esoto 3:6. Peitaʻi e leʻi gata ai ina ua uma ona ia sii atu le mau. Sa ia fefulisaʻia le mau ina ia faaalia manino ai o le toetū o se vaega o le fuafuaga a le Atua.—Mare. 12:24-27.

O le iai o le agavaa e faafoe ai le tomai e fefulisaʻi saʻo ai ma aogā mai le Tusi Paia, e mafai ona avea ma vala mataʻina i lou avea ma faiaʻoga tomai.

E TUSA lava pe e te talanoa atu i se tagata e toʻatasi po o se aofia toʻatele, e lē o se auala atamai le manatu faapea o le a fiafia lau ʻaufaalogologo i lau mataupu ona o lenā e te fiafia i ai. E tāua lau feʻau, peitaʻi a lē taulau ona e faamanino atu ona aogā ia e mafai ona faatinoina, atonu o le a lē umi se taimi ae mou le fiafia o lau ʻaufaalogologo.

E faapena foʻi le tulaga e iai se aofia i le Maota o le Malo. Latou te ono faalogo mai pe a e faaaogāina se tala faatusa po o se mea na tupu latou te leʻi faalogo muamua i ai. Peitaʻi e latou te ono lē faalogo mai pe a e talanoa i mataupu ua uma ona latou iloa, aemaise lava pe a lē taulau ona e faalauteleina na manatu. E manaʻomia ona e fesoasoani iā i latou ina ia latou iloa, pe aiseā ma e faapefea ona aogā moni iā i latou mea ia o le a e fai atu ai.

Ua faalaeiauina i tatou e le Tusi Paia ina ia manatunatu i mea e aogā. (Faata. 3:21) Sa faaaogā e Ieova ia Ioane le Papatiso e tataʻi tagata i “le poto [“atamai e aogā,” NW] o e amiotonu.” (Luka 1:17) O le atamai lenei e faavae i le mataʻu tatau iā Ieova. (Sala. 111:10) O i latou e talisapaia lenei atamai ua fesoasoania ina ia taulau manuia i le feagai ai ma le soifuaga nei ma aapa atu ai i le ola moni, le ola e faavavau o loo fotuaʻi mai.—1 Timo. 4:8; 6:19.

Faia o se Lauga Ina ia Aogā. Ina ia maua ni aogā mai i lau lauga, e ao ona e manatunatu ma le faaeteete e lē gata o le mataupu ae faapena foʻi le aofia. Aua e te manatu iā i latou ua na o se vaega. O loo faia aʻe lenā vaega i tagata taʻitoʻatasi ma aiga. Atonu o loo iai ni tamaiti laiti, talavou, tagata matutua, ma nisi ua afu lo latou soifua. Atonu o loo iai ni tagata fou ua fiafia mai faapena foʻi ma i latou na amata ona auauna iā Ieova ae e te leʻi soifua mai. O nisi atonu ua taʻumatuaina faaleagaga; o isi atonu o loo aafia malosi pea i uiga ma faiga patino a le lalolagi. Fesili ifo iā te oe lava: ‘O le a faapefea ona aogā i le aofia le mataupu lea o le a ou talanoaina? E mafai faapefea ona ou fesoasoani iā i latou ina ia latou mauaina le manatu?’ E te ono filifili e uaʻi faapitoa atu i le na o se vaega se tasi pe lua o vaega e pei ona taʻua i inei. Peitaʻi, aua e te matuā faagaloina isi.

Ae ā pe afai ua tofia oe e talanoaina se aʻoaʻoga faavae a le Tusi Paia? E faapefea ona e faia se lauga faapena ina ia aogā i se aofia ua talitonu i le aʻoaʻoga? Ia taumafai e faamalosia lo latou talitonuina o le mataupu. E faapefea? E ala i lou fefulifulisaʻi i faamaoniga faale-Tusi Paia o loo lagolagoina ai. E mafai foʻi ona e faalolotoina lo latou talisapaia o lenā aʻoaʻoga a le Tusi Paia. E ono mafai ona faia lenei mea e ala i le faaalia o le auala e tutusa ai lenei aʻoaʻoga ma isi upu moni o le Tusi Paia atoa ma uiga o Ieova lava ia. Ia faaaogā ni faaaʻoaʻoga—ni mea moni na tutupu i le soifuaga pe a mafai—e faaalia ai le auala e aogā ai i tagata le malamalama i lenei aʻoaʻoga patino ma aafia ai o latou manatu mo le lumanaʻi.

Aua le tuua faatatauga aogā e faatoʻā faaaofia i nai faamatalaga pupuu i le faaiʻuga o lau lauga. E ao i tagata taʻitoʻatasi i lau aofia, ona lagona mai lava i le amataga e faapea “o loo aafia ai aʻu i le mea lenei.” A uma loa ona faataatia le faavae lenā, ia faaauau ona fai faatatauga aogā a o talanoaina manatu autū taʻitasi i le tino o le lauga faapena foʻi ma le faaiʻuga.

Pe a fai faatatauga, faamautinoa ua fai i se auala e ōgatusa ma mataupu silisili o le Tusi Paia. O le ā le uiga o lenā manatu? E uiga i le faia i se auala alofa ma faaalia le faapalepale. (1 Pete. 3:8; 1 Ioa. 4:8) E oo lava i le taimi a o taulimaina faafitauli faigatā i Tesalonia, sa faamautinoa e le aposetolo o Paulo lona faamatilatilaina o itu lelei o le agaʻigaʻi i luma faaleagaga o ona uso ma tuafāfine i inā. Sa ia faaalia foʻi lona talitonuina e faapea, o le a latou mananaʻo e fai le mea saʻo e tusa ai o le mataupu sa talanoaina. (1 Tesa. 4:1-12) Maʻeu se ata lelei e faataʻitaʻi i ai!

Pe tatau i lau lauga ona faagaeeina le auai i le galuega talaʻi ma le aʻoaʻoina atu o le tala lelei i isi? Ia ati aʻe le maelega ma le talisapaia mo le faaeaga. Peitaʻi a o faia faapea, ia teu i manatu e eseese le tele e mafai ai e tagata taʻitoʻatasi ona auai i lenei galuega, ma e amanaʻia e le Tusi Paia lenei tulaga. (Mata. 13:23) Aua le faamamafaina i uso le faalogona e faapea latou te lē o faia le mea sa tatau ona latou faia. Ua faalaeiauina i tatou e le Eperu 10:24 ina ia “taufaatupu . . . le alofa ma galuega lelei.” Afai e tatou te faatupu aʻe le alofa, o le a tele galuega e faavae i le uunaʻiga lelei o le a fua mai. Na i lo le taumafai e uunaʻia le tausisi uma i se faatulagaga maʻoti, ia amanaʻia le finagalo o Ieova mo i tatou ia faalaeiau le ‘usiusitai ona o le faatuatua.’ (Roma 16:26) Pe a teu i manatu lenei mea, o le a tatou saʻili ai e faamalosia e lē gata i lo tatou faatuatua ae faapena foʻi ma le faatuatua o o tatou uso.

Fesoasoani i Isi ia Maua le Manatu. A o e molimau atu i isi, aua neʻi lē taulau ona faamatilatila manatu aogā o le tala lelei e mafai ona faatinoina. Ina ia faia lenei mea e manaʻomia ona e iloiloina mea o i manatu o tagata i lau oganuu. E faapefea ona e iloa lenā mea? Ia faalogologo i tala fou i le leitiō po o le televise. Tagaʻi i le itulau muamua o le nusipepa. E lē gata i lenā, taumafai e tataʻi tagata ina ia auai i ni talanoaga, ma faalogo atu pe a latou talanoa mai. E te ono mātauina o loo latou tauivi ma faafitauli o loo tutupu i le taimi nei—ua lē o toe faigaluega, le totogiina o fale o loo nonofo ai, o maʻi, maliu o se tasi o le aiga, o lamatiaga mai i solitulafono, le lē faamasinotonu o i latou o iai le pule, malepe le faaipoipoga, le pulea o fanau iti, ma le tele lava o isi faafitauli. Pe e mafai e le Tusi Paia ona fesoasoani iā i latou? E mautinoa lava e mafai.

Pe a amata se talanoaga, e mautinoa lava e iai se mataupu o e mafaufau i ai. Peitaʻi, pe a faailoa mai e le tagata e faapea e iai se mataupu o loo ia naunau patino i ai, aua neʻi faatalatū e talanoaina le mataupu lenā pe a mafai ona e faia, po o le fai i ai e te toe foʻi mai ma nisi faamatalaga aogā. E moni tatou te taumafai e ʻalofia le ‘aiā fua i mea e lē patino iā i tatou,’ peitaʻi tatou te fiafia e fetufaaʻi ma isi i fautuaga aogā o loo taʻu mai e le Tusi Paia. (2 Tesa. 3:11, NW) E manino mai, o le mea e sili ona fiafia tagata e faatatauina, o fautuaga a le Tusi Paia lea e aafia ai o latou lava olaga.

Afai e lē mafai ona iloa mai e tagata le auala e aafia ai i latou i la tatou feʻau, latou te ono lē fiafia ma vave faamuta ai le talanoaga. E tusa foʻi pe latou te faatagaina mai i tatou e talanoa atu, a lē taulau ona tatou faailoa atu aogā e mafai ona faatinoina o le mataupu, e ono uiga atu faapea e itiiti lava se aogā o la tatou feʻau i o latou soifuaga. I lona tuufaafeagai, pe a tatou faamanino aogā o le mataupu e mafai ona faatinoina, e mafai ona faapogaia e la tatou talanoaga se suiga i soifuaga o tagata.

Pe a taulimaina suʻesuʻega faale-Tusi Paia, ia faaauau ona faamatilatila aogā e mafai ona faatatauina. (Faata. 4:7) Fesoasoani i tagata aʻoga ia malamalama i fautuaga faale-Tusi Paia, o mataupu silisili, atoa ma faaaʻoaʻoga e faaalia ai iā i latou le auala e savavali ai i ala o Ieova. Ia faamamafa aogā e maua pe a faia faapea. (Isa. 48:17, 18) O le faia faapea e uunaʻia ai tagata suʻesuʻe e faia suiga manaʻomia i o latou olaga. Ia ati aʻe iā i latou le alofa mo Ieova ma le faanaunauga e faafiafia o ia, ma ia avea le uunaʻia ina ia faatatauina fautuaga mai le Afioga a le Atua o se lagona e sau mai totonu iā i latou lava.