Fesili Mai le ʻAufaitau

Pe afai e iai faatasi na o ni tagata se toʻalua e leʻi faaipoipo i le fale i le pō atoa e aunoa ma ni māfuaaga tatau, pe e manatu i ai o se agasala e tatau ona iloilo e se komiti faafaamasinoga?

Ioe, pe afai e leai ni māfuaaga tatau e manaʻomia ai ona iai faatasi na o i laʻua, e ao ona tofia se komiti faafaamasinoga e faavae i faamaoniga malolosi e iloa ai sa faia le faitaaga.​—1 Kori. 6:18.

E iloilo totoʻa e le ʻautoeaina tulaga taʻitasi ina ia iloa ai pe e tatau ona iloiloina e se komiti faafaamasinoga. O se faataʻitaʻiga: Pe e feoaʻi i laʻua? Pe na fautuaina muamua i laʻua i amioga e faaalia i la laʻua faigāuō? Aiseā ua la iai faatasi na o i laʻua i le pō atoa? Pe na la muaʻi fuafua e faia lea gaoioiga? Pe e leʻi iai lava se isi mea e mafai ona la faia, pe na iai ni māfuaaga tatau na manaʻomia ai ona iai na o i laʻua, atonu o se mea e leʻi faatalitalia po o se faalavelave faafuaseʻi ua tulaʻi mai ma ua leai ai se isi mea e mafai ona faia? (Fai. 9:11) Pe na momoe faatasi? Talu ai e eseese uma tulaga e tulaʻi mai, e ono iai la isi faamatalaga e fua i ai le faaiʻuga a toeaina.

Pe a uma ona tilofaʻia e le ʻautoeaina faamatalaga uma i le mea na tupu, ona latou filifili lea po ua tatau ona iloilo e se komiti faafaamasinoga.