O le Soifuaga o Iesu ma Lana Faiva

O se Soʻo Uiga Ese

PAGA se vaaiga e mataʻu ai, a o savali atu Iesu i le matafaga! O ni tagata uiga ese se toaiva ua foliga mai ua feʻai, ua ō mai mai tuugamau ma taufetuli mai agaʻi ia te ia. O ni tagata ua uluitinoina e temoni. Talu ia ona o le tasi o i laua, ua foliga mai e sili atu ona sauā na i lo o le isi, ma ua sili atu ona umi se taimi o i lalo o le pulega a temoni, ua avea ai o ia o se taulaʻiga o manatu o tagata.

Mo se taimi umi lava, sa ola ai pea lenei tagata puapuagatia e lē lavalavā i le va o tuugamau. I le ao ma le po, e faaauau ai pea ona ʻalaga ma selei o ia i maʻa. E mataʻutia tele o ia, e leai ai se tasi e mafai ona maua le lototele e ui atu ai i lena auala. Sa faia foʻi ni taumafaiga ina ia fusifusia o ia, a e sa ia motusi filifili ma filifili uamea sa faamau ai ona vae. E matuā leai se tasi na lava sona malosi e puʻea ai o ia.

A o faalatalata le tagata ia Iesu ma faapaū i ona vae, na faia e temoni o loo pulea o ia ina ia alaga atu: “Se a lau na ia te au nei, Iesu e, le Alo o le Atua silisili ese? ou te fai atu ia te oe ia e tauto mai i le suafa o le Atua, e te le faatiga mai ia te au.”

A ua fetalai atu Iesu: “Alu ia i fafo i le tagata, o oe na le agaga leaga.” A e ua toe fesili atu foʻi Iesu ia te ia: “Po o ai lou igoa?”

“O Lekeono loʻu igoa; auā e toatele matou,” o lana tali lea. E fiafia tele temoni e vaai atu i mafatiaga o i latou ua mafai ona latou uluitinoina, ma mulimuli ane ua latou matuā fiafia e potopoto faatasi i ia tagata, i se agaga tuufaatasi palaʻai. A e ina ua fesagaʻi ma Iesu, na latou ole atu ina ia lē aauina atu i latou i le to e lē gata. Ua tatou toe vaai nei foʻi la i le malosi tele na ia Iesu, ina ia faatoilalo ai e oo lava i temoni taufeaai. Ua faaalia ai foʻi i lenei mea faapea, ua iloa lelei lava e temoni o le tuuina o i latou i le to e lē gata, faatasi ma lo latou taʻitaʻi o Satani le Tiapolo, o le faamasinoga faaiʻu lava lea a le Atua mo i latou.

O loo tataa latalata ane i le mauga se lafu puaa e tusa ma 2,000. Ona aioi atu lea o temoni: “Ia e aauina i matou i puaa, matou te uluitino ai.” O le mea moni, sa i ai i temoni se ituaiga o faalogona e fiafia e faiga faaleituaiga e lē faalenatura, mai lo latou uluitinoina o mea faiola faaletino. Ina ua faatagaina i latou e Iesu e uluitino i puaa, ona feosofi uma ifo lava lea o lenei 2,000 o i latou i le tofē ma malelemo ai i le sami.

Ina ua iloa mai e latou sa fafagaina puaa lenei mea, ona latou faataalise atu lea ma tala atu ai i aai ma faoa aai. Ona o mai ai lea o tagata, e matamata i le mea ua tupu. Ina ua latou taunuu atu, ona latou iloa ai lea o lē sa uluitinoina e temoni, ua ofu ma ua atamai, o loo i vae o Iesu!

O ē na vaai i lea mea, ua latou faamatala atu i isi e uiga i le faamaloloina o lea tagata. Ua latou taʻu atu foʻi e uiga i le uiga ese o le malelemo o puaa. Ina ua latou faalogo ai, na matuā fefefe tagata, ma ua latou pulunaunau atu ia Iesu ina ia maliu ese mai lo latou nuu. Ona maliu aʻe loa lea o Iesu i le vaa. A ua aioi atu le tagata na uluitinoina ia Iesu, ina ia faataga mai o ia la te ō. A ua fetalai atu Iesu ia te ia: “Alu ia oe i lou fale, i lou aiga, ma ia e taʻu atu ia te i latou mea tetele ua faia e le Alii ia te oe, ma lona alofa ia te oe.”

E masani lava ona faatonu atu e Iesu i latou na te faamalōlōina, ina ia ʻaua neʻi o latou taʻu atu i se tasi, talu ai ona e lē manao o ia e faia e tagata ni faaiʻuga, e faavae i ni lipoti po o faamatalaga e faia ona o le fiafia tele. Peitaʻi, o le taliaina o lenei mea ua talafeagai lelei, auā o lē na uluitinoina e temoni o le a molimau i tagata, atonu ua lē mafai nei ona maua e Iesu se avanoa e oo atu ai iai. A e lē gata foʻi i lea, o le iai o lea tagata o le a saunia ai se molimau faamaoni, e uiga i le mana o Iesu e galueaʻiina ai le lelei, e foʻia ai ni lipoti po o ni faamatalaga sese atonu o le a salalau solo atu, ona o le le iloa po o le faamamateina o le lafu puaa.

I le usitaʻi atu i le faatonuga a Iesu, ua alu ese ai lē na uluitino e temoni. Ua alu loa o ia ua talaʻi atu i Tekapoli o mea tetele uma sa faia e Iesu ia te ia, ona ofo ai lea o tagata uma. Mataio 8:28-34; Mareko 5:1-20; Luka 8:26-39; Faaaliga 20:1-3

◆ Ai se ā, atonu ua taulaʻi atu ai manatu i le tagata e toatasi na uluitinoina e temoni, a e se manū e toalua na i ai?

◆ O le ā e faaalia ai sa iloa e temoni e uiga i le iai o le to e lē gata i le taimi o i luma?

◆ Mulimuli ane, ai se ā e fiafia ai temoni e uluitino tagata ma manu?

◆ Ai se ā ua faataga ai e Iesu lē na uluitinoina e temoni, i le faatonu atu ia te ia, e alu e taʻu atu i isi e uiga i mea na la faia mo ia?