Fesili Mai i le Au Faitau

◼ Pe o se mea poto mo se Kerisiano ua maliu sana paaga ona nofo fua pea ma le faamoemoe e toe faatasia i le lumanai?

Maeu le lelei mo se Kerisiano e tatau ai ona ia alofa pea mo lana paaga e ui lava ua maliu lena tagata! Ona o lenei tulaga, ua nofo fua ai pea nisi e lē ona o le fia nofo fua, a e ona o le faamoemoe e toe faia le faaipoipoga pe a mavae le toe tu. Ina ia lē aafia la i faalogona faaletagata i tua atu o na faamoemoega, ua matou faalaeiauina ai i latou na, ina ia manatunatu i ni manatu faale-Tusi Paia.

O se faataʻitaʻiga, o upu nei a Paulo e uiga i le mataupu: “Ua noatia le fafine i le tulafono i aso uma e ola ai lana tane, a e afai ua oti lana tane, ua saʻoloto o ia e nofotane i le ua loto i ai, tau lava i le ua i le Alii. A e afai e nofo fua pea ia, e sili lona manuia.” (1 Korinito 7:39, 40) Ua faaalia i lenei mea e faapea, pe a maliu le paaga a se tasi, ua muta ai foi la i inā ma noataga tau i le faaipoipoga. Sa avea o se agalelei mo le Atua le faailoa mai i Kerisiano o lenei mea, auā o le mea lena ua mafai ai e fafine ua oti a latou tane, po o tane foi ua oti a latou avā ona fuaina o latou faalogona ma isi manaoga i le filifili pe toe faaipoipo, e lē o noanoatia i latou i lē ua oti.—1 Korinito 7:8, 9.

E ui i lea, pe o faaali mai i le Tusi Paia faapea, o i latou o le a toe faatutūina e mafai ona toe faaipoipo pe toe faia foi le faaipoipoga lea na faaiʻuina i le oti? E tasi lava le faamatalaga e pei e foliga mai e faatatau i lenei fesili. E aafia ai le au Satukaio o ē e ui lava sa latou leʻi talitonu ia Iesu, a e na ō mai ia Iesu ma taumafai e maileia o ia. Na latou faatū mai lenei faafitauli e aafia ai se faaipoipoga a se au uso. “E toafitu le au uso, na fai avā le ulumatua, ua oti e leai sana fanau. Ona fai avā lea i le fafine o le aupito ane i ai, ua oti foi o ia e leai sana fanau. Ua fai avā foi i ai lona toatolua,” ua faapea foi ua oo i lona toafitu, ua latou oti ua leai ni a latou fanau. A e muliai oti foi le fafine. A oo foi i le toe tu, o ai so latou e ana le avā?”—Luka 20:27-33; Mataio 22:23-28.

Ua lē o toe nonofo Kerisiano i lalo o le Tulafono, a e atonu foi ua mapuna aʻe se faigata faapena ia i latou. Mo se faaaʻoaʻoga: na faaipoipo Uso ma Tafafine C—ma sa i ai la laua fanau e toalua. Ona maliu lea o le uso. Sa alofa tele ma sa misia foi o ia e Tuafafine C—, a e sa lagona e le tuafafine le manaoga mo se paaga, se lagolagosua tau tupe, o ni faalogona tau i feusuaiga, ma se fesoasoani foi mo tamaiti. O lea na ia faaipoipo ai ia Uso M— ,ma o lea faatasiga sa faale-Tusi Paia foi e pei o le faatasiga muamua. Mulimuli ane ona maʻi ai lea o le uso ma na maliu foi. Afai la sa toe faatutūina mai nei paaga uma muamua, ma afai foi sa mafai ona faaipoipo, o ai la atonu sa faaipoipo i ai le tuafafine?

Manatu i le tali a Iesu i le au Satukaio: “O tagata o le olaga nei, ua fai avā ma nofo tane i latou, a o e taʻuaogaina ia maua e i latou la olaga, ma le toe tu mai o e ua oti, latou te le fai avā, pe nofo tane; e le mafai foi ona toe oti o i latou, auā ua latou tutusa ma agelu; o fanau foi i latou a le Atua, o tagata o le toe tu. A o le faatuina o e ua oti, ua faailoa mai lea mea e Mose . . . i lona taʻua o (Ieova) o le Atua o Aperaamo, o le Atua foi o Isaako, o le Atua foi o Iakopo. E le o le Atua ia o e ua oti, a o e ola, auā ua ola uma ia te ia.”—Luka 20:34-38; Mataio 22:29-32.

Ua lagona e nisi faapea sa faasino e Iesu i inei i le toetu faalelagi, ae e i ai mafuaaga e talitonu ai e faapea, o lenei tali sa faatatau i le toetu i le lalolagi i le “(faiga o mea)” o loo sau. O ā mafuaaga o i lalo o lenei vaaiga? O i latou na fesiliga Iesu, sa leʻi talitonu ia te ia pe iloa foi e uiga i se toetu faalelagi. Na latou fesili e uiga i se aiga Siu i lalo o le Tulafono. I lana tali atu sa faasino atu ai e Iesu ia Aperaamo, Isaako ma Iakopo, o ē o loo faamoemoe mo le toe foi mai i le ola i luga o le lalolagi. (Kenese 42:38; Iopu 14:13-15; faatusatusa i le Eperu 11:19) O na tamā matutua, ma le faitau miliona o isi, o ē e toe faatutūina mai i luga o le lalolagi ma ua faamaonia lo latou faamaoni o le a “tutusa ma agelu” E ui lava e oti i latou, a e o le a lē toe oti ona ua uma ona taʻuaogaina i latou e le Atua mo le ola e lē uma.

Atonu ona o faalogona ootia faaletagata i aso nei ua faafaigata a i ona talia lenei faaiʻuga. A e tatau ona matauina e faapea, e leai lava se mea o fai mai ai le Tusi Paia faapea o le toe faatutūina e le Atua o tagata amiotonu o lona uiga o le a toe faia a latou faaipoipoga. o lea foi, e leai se tasi e talitonu faapea afai ua maua e Akula ma Pisila le ola faalelagi, o le a toe faamautuina la laua faaipoipoga. (Galuega 18:2) Ma o Iosefa ma Maria o le a manino lava le eseese o nofoaga e i ai—o Iosefa i le lalolagi ma Maria i le lagi. (Ioane 19:6; Galuega 1:13, 14) Talu ai ona e leai se tasi o i tatou na ola i le lagi, e lē mafai ai la ona tatou faapea atu po o ā faalogona o iai i a Akula, Pisila, ma Maria i inā, peitai tatou te mautinoa lo latou fiafia atoatoa i la latou auaunaga faalelagi.

E fapena i tatou, tataou te leʻi ola lava o ni tagata lelei atoatoa. O lea, e lē mafai foi la ona tatoau mautinoa po o ā o tatou lagona e uiga i o tatou faiā i aso ua mavae, pe afai ma pe a tatou maua le ola lelei atoatoa faaletagata i le parataiso. E lelei mo i tatou ia manatua faapea, sa lelei atoatoa Iesu i le taimi na ia faia ai lea faamatalaga, ma o le mea lea, sa i ai o ia i se tulaga e sili ona lelei na i lo o i tatou e talisapaia ai faalogona o i latou ua “taʻuaogaina ia maua e i latou lea olaga.” E mafai foi ona tatou faalagolago, e mafai e Iesu ona ‘tiga alofa i o tatou vaivaiga i aso nei.’ (Eperu 4:15) O lea afai e faigata i se Kerisiano ona talia le faaiʻuga e faapea o tagata o le a toe faatutūina mai e lē toe faaipoipo, e mafai lava ona ia mautinoa lelei o loo sili ona malamalama i ai le Atua ma Keriso. Ma e lelei la ona ia faatali ina ia iloa ai po o le ā le mea o le a tupu.

E leai se mafuaaga e soona faamamafa ai fua lenei mataupu i le taimi nei. Na tusi mai le faisalamo: “Ia outou iloa o Ieova o ia lava le Atua; o ia na faia i tatou, ua fai i tatou mona, o lona nuu i tatou o le lafu mamoe ua ia fagaina . . . .ia outou vivii atu ia te ia, ia outou faamanu atu i lona suafa. Auā e lelei Ieova.” (Salamo 100:3-5) E mautinoa lava o le a saunia e lo tatou Atua lelei le anoanoaʻi o mea o tatou manaomia moni, pe a taʻuaogaina i tatou ia maua lea olaga.—Iopu 34:10-12; Salamo 104:28; 107:9.

Ua faaatagia foi le lelei o le Atua, i lona faailoa mai ia i tatou e faapea, o le maliu o se paaga o le iuga lena o le faaipoipoga. (Roma 7:2) O lea so o se tasi lava ua maliu sana paaga, ua mafai ona ia iloa ua ia saoloto e toe faaipoipo nei pe a foliga mai e manaomia po o se mea e sili foi ona lelei. Ua toe faaipoipo nisi ona o le faatumuina o ō latou manaoga i le taimi nei atoa foi ma manaoga o ō latou aiga. (1 Korinito 7:36-38; Efeso 6:1-4) O le mea lea, o se Kerisiano ua maliu lana paaga, e lē tatau ona avea o se avega le nofo fua pea ma le manatu ina ia faatalitali o le a toe faamautuina le uluai faaipoipoga ma lana paaga muamua, pe a toe faatūina mai i le ola i inei i luga o le lalolagi, i le faiga o mea o loo sau.

[Faaopoopoga i lalo]