Pe e te Vaai i le na o Foliga i Fafo?

NA UUNAIA le talavou o Heinz e le matuā inoino, ma na fuafua ai e fasiotia lona tamā fai. E fiafia lava, ona sa lē ia te ia le lototele e faia ai faapea. I ni nai tausaga mulimuli ane na ia filifili ai e pule i lona ola ae sa leʻi mafai foi ona faia o lena mea. Na aafia o ia i le faia o le gaoi ma le tagofia o vailaau faasaina, o lea na tuuina ai o ia i le fale puipui. Ona lē taulau ai lea o lana faaipoipoga.

I aso nei ua lē o toe faapipii atu Heinz i vailaau faasaina. Ua ola nei o ia i se olaga faamaoni. Ua iai sana faaipoipoga fiafia ma se faiā lelei ma lona tamā fai. O le ā na ia faia lea suiga? Sa amata ona ia suesue le Tusi Paia ma Molimau a Ieova. Ona amata lea ona auaumalie mai ona suia lana vaaiga i le olaga.

E lē taumatea, o le toatele o ē na iloa le Heinz tuai ua latou lē toe amanaiaina o ia faapea o se tasi ua leai se faamoemoe. E faafetai ona, mo le toatele o tagata e pei o ia, sa leʻi teena o ia e le Atua faapea ua lē mafai ona togiolaina. Aiseā e leʻi faapea ai? O le pogai: “E le vaai Ieova pei o le vaai o tagata, auā e vaai tagata i le tino, a e vaai Ieova i le loto.”—1 Samuelu 16:7.

O le tasi lena o eseesega tele i le va o le tagata ma le Atua. Tatou te taumafai e faamasino i foliga mai fafo. Ua oo lava ina tatou faapea atu “o le uluai filifiliga, e faigata ona aveesea.” I se isi faaupuga, ua masani ona tatou faavasegaina tagata e faavae mai i uluai manatu e uiga i le foliga mai. Ae o le Atua, talu ai e mafai ona ia silafia mea o i le loto, e tonu ma e lē faailoga tagata. Ma o le mafuaaga lena na ia auina mai ai lona Alo, o Iesu Keriso, i le lalolagi ina ia “faaolaina ituaiga uma lava o tagata ma ia oo ina iloa le poto saʻo o le upu moni.” (1 Timoteo 2:4, NW) I lenei itu, ua iai i Kerisiano tuuina atu le faaeaga o le avea ma ni ē ‘galulue faatasi ma le Atua’ e ala i le talaʻia ma le tiotio o le tala lelei o le Malo o le Atua i tagata uma lava. (1 Korinito 3:9) Peitai, o Kerisiano e iai tapulaa o lo latou iloa—e lē mafai ona latou iloa loto o tagata. O le mea lea e tatau ai ona lē faailoga tagata ma ia aloese mai le faamasinoina o tagata i foliga mai fafo.

Sa iloa e le afa uso o Iesu o Iakopo lenei tulaga mataʻutia i le uluai faapotopotoga Kerisiano. Na ia faapea mai: “Oʻu uso e, ona o lo outou talitonu i lo tatou Alii o Iesu Keriso, o lē pule i le mamalu, e lē tatau ai ona outou faaalia le fiasili. Mo se faataʻitaʻiga, atonu o le a ulu atu ni tagata asiasi se toalua i lo outou nofoaga o le tapuaiga, o le tasi o se tagata e ofu lelei e iai ni mama auro i ona lima a o le tasi o se tagata mativa ma ofu masaesae. Seʻi faapea ua outou uaʻi faapitoa atu ai i le tagata e ofu lelei . . . Pe tou te lē iloa ea ua filitaa outou ma ua faamasino i tulaga sese?” Ona o lenei le faavae, pe tatou te faamasino sese ai i nisi taimi tagata o ē ō mai i le Maota o le Malo mo le uluai taimi?—Iakopo 2:1-4, The New English Bible.

Faataatia e Iesu le Faaaʻoaʻoga

Na silasila Iesu i tagata, e lē o ni tagata agasala ua lē mafai ona togiolaina, ae ua na o ni tagata faamaoni ua loto malilie e faia ni suiga pe afai e tuuina atu i ai le fesoasoani talafeagai ma le faalaeiauga tatau. O le mea lena na ia “foaifuaina e ia ia te ia e fai ma togiola mo tagata uma lava.” (1 Timoteo 2:6) I lana galuega talaʻi, sa leʻi manatu o ia faapea e leai se tagata ua iai se loto lelei e lē mafai ona paʻia, ma e lē aogā ona uaʻi atu i ai. O lona manatu e uiga i tagata, sa leʻi faaalia ai ni faalogona fiasili o le faafiaamiotonu.—Luka 5:12, 13.

Maeu le lē pei o le au Faresaio, o ē ua tatou faitau ai: “Ua iloa e le au tusiupu ma le au faresaio o ia o loo taumafa faatasi ma telona ma tagata agasala, ona latou fai atu lea i ona soo, Se a le mea e ʻai ai o ia ma inu faatasi ma telona ma e ua agasala? Ua lagona e Iesu, ona fetalai atu lea o ia ia te i latou, E le aoga le fomai i e malolo, na o e mamai; ua ou le sau e valaau i e amiotonu, a o e agasala ina ia salamo.”—Mareko 2:16, 17.

O le mea moni, e lē o le uiga o lenei mea faapea na faamagaloina e Iesu faiga lē faamaoni ma le gaoioiga sese na faia e nei tagata agasala ma le au ao lafoga. Ae sa ia silafia faapea e mafai ona puea tagata i se auala sese o le olaga, atonu e leʻi fuafuaina pe ona o tulaga ua faigata ona pulea. O lea na ia faaalia ai le malamalama, ma sa “uunaia i le alofa mutimutivale mo i latou, auā sa faapei i latou o mamoe ua leai so latou leoleo.” (Mareko 6:34, NW) Na ia faia ma le alofa se faaeseesega i le va o a latou galuega leaga ma o o latou loto atonu ua lelei.

I le feagai ai ma ona soʻo, na silasila foi Iesu i tala atu o foliga i fafo. Sa o i latou o ni tagata agasala o ē e masani ona faia mea sese, ae sa lē o Iesu o se tagata lē magafagafa e manaomia le lelei atoatoa i mea uma, i le faasalaina o i latou mo ni nai mea sese iti uma. Sa ia silafia faapea sa lelei o latou faanaunauga, pe e pei ona tatou fai atu ai i aso nei, o o latou loto sa i le tulaga saʻo. O le mea sa latou manaomia o se fesoasoani ma le faalaeiauga; i le avatua o lenei mea, sa lē taitai faatalatu ai Iesu. E aunoa ma se masalosalo e uiga i ai, sa ia silasila i tagata i le auala na silasila ai le Atua ia i latou. Pe o tatou taumafai e faataʻitaʻi i lana faaaʻoaʻoga ofoofogia?

Pe E te “Faamasino i le Faamasinoga Tonu”?

I se tasi taimi sa fesagaʻi ai Iesu ma se vaega o tagata faitio faafiaamiotonu o ē na feita ona o lona faia o galuega o le faamalologa i le Sapati. Na ia faatonu atu ia i latou: “Aua le faamasinoina mai foliga i fafo, ae ia faamasino i le faamasinoga tonu.” Aiseā na latou lē olioli ai i le vaai atu ia Iesu o lē e faia vavega o lē na ia “faamaloloina le tino atoa o le tagata” na i lo o le “ita” tele ma vaai atu ia te ia o sē ua soli le tulafono o le Sapati? I lo latou faamasino mai foliga i fafo, na latou faaalia moni ai o latou lava faanaunauga leaga. Na latou faaalia la latou faamasinoga e faafiaamiotonu ma e lē tonu i le taimi lava e tasi.—Ioane 7:23, 24, NW.

E mafai faapefea ona tatou faia le mea sese lava lea? E ala i le lē taulau ona olioli pe afai e toe foi mai se tagata ua salamō i le faapotopotoga, pe pe afai e aʻoaʻoina e se tagata sa matuā faalelalolagi, le upu moni ma amata ona maua aogā mai i le faamalologa faaleagaga. I nisi taimi atonu tatou te faamasinoina tagata e ala i o latou ofu leaga po o teuga ma lafoai ai i latou faapea, e lē taitai mafai ona avea o ni Molimau. Peitai, o le toatele o tagata sa avea muamua ma tagata maumausolo ma isi sa ola i ni olaga leaga ua mulimuli ane avea ma Molimau Kerisiano a Ieova. A o faagasolo ona faia e na tagata fetuutuunaiga, tatou te lē mananao e faatagaina “le faamasinoina mai foliga i fafo” e faatauasoina i tatou i le tulaga lelei o o latou loto.

Maeu le sili ona lelei, ma i le ōgatasi ai ma le faaaʻoaʻoga lelei a Iesu, ia tatalo mo i latou ma ofoina atu ia i latou le fesoasoani tatau i le oo ai i le taʻumatuaina faa-Kerisiano! O le vaai atu ia i latou e avea o le pogai o le olioli e foliga mai e faigata. Ae afai e tataʻi mai i latou e Ieova ia te ia e ala ia Keriso, o ai la i tatou tatou te teena ai i latou e faavae i le pumoomoo o la tatou faamasinoga? (Ioane 6:44) O le faamasinoina ma le faafiaamiotonu o se tasi, pe afai tatou te lē iloa lona loto po o ona tulaga, e mafai ona tuuina ai i tatou i se auala e faasalaina ai i tatou.—Faatusatusa Mataio 7:1-5.

Na i lo o le faamasinoina matuiā o na tagata fou, e tatau ona tatou fesoasoani, faalaeiau, ma apoapoai ia i latou e ala i se faaaʻoaʻoga. Ae peitai, a o faaalia le agalelei, e mautinoa lava le lē tatau ona tatou faasilia na tagata fou o ē atonu na lauiloa i le lalolagi. O le a avea lena o se ituaiga o faailoga tagata. O le a avea foi o se faailoga o le lē taʻumatuaina i la tatou vaega. Ae mo le tagata lava ia, pe o le a fesoasoani ia te ia lo tatou faaneeneeina ina ia loto maulalo ai? Pe na i lo o lea o le a faamaina ai o ia?—Levitiko 19:15.

Aua le Faatalitalia ni Mea e Sili atu na i lo Lea e le Atua

O la tatou vaaiga i isi e matuā tapulaa lava pe a faatusatusa atu ia Ieova, o lē na te silafia loto. (1 Nofoaiga a Tupu 28:9) O le talisapaia o lenei mea o le a puipuia ai i tatou mai le avea o ni faresaio faafiaamiotonu o aso nei, i le taumafai lea e oomi tagata ina ia foliga i la tatou amiotonu e faia e i tatou lava ina ia fetaui lelei ma mea tatou te manatu i ai ua saʻo. Afai tatou te taumafai e vaai i tagata e pei ona silasila i ai le Atua, ona tatou lē manaomia lea o ni mea se tele mai ia i latou na i lo mea o loo manaomia e le Atua. O le a tatou ‘lē faia e sili atu i mea ua tusia.’ (1 Korinito 4:6) E tāua tele lenei mo toeaina Kerisiano ina ia teuloto.—1 Peteru 5:2, 3.

E mafai ona tatou faataʻitaʻia lenei mea e tusa ai o le mataupu o laei. E manaomia e le Tusi Paia—le mea e manaomia e le Atua—faapea e tatau i se Kerisiano ona mamā ma maopoopo i laei, ia faia lelei ma ia lē faaalia atu ai le ‘lē onomea ma le lē magafagafa.’ (1 Timoteo 2:9; 3:2) E manino lava la, o toeaina i se tasi faapotopotoga na oo ‘e sili atu i mea na tusia’ i ni nai tausaga ua mavae i lo latou manaomiaina o failauga uma i le lautele i la latou faapotopotoga ina ia laei ofutino papae, e ui lava ina o lanu vaivai sa masani ona talia i lena atunuu. O failauga e faimalaga mai o ni malo o ē na ofu mai i ni ofutino lanu, na talosagaina ina ia suia i se tasi o ofutino papae sa teu ai i le Maota o le Malo mo sea tulaga faafuasei e tupu mai. Maeu le faaeteetega e tatau ona ia i tatou ina ia lē faaofi atu o tatou lava manaoga totino i isi! Ma maeu le talafeagai o le fautuaga a Paulo: “Ia iloa e tagata uma lava lo outou magafagafa”!—Filipi 4:5, NW.

Iʻuga Lelei mai le Vaavaai i Tala atu o Foliga i Fafo

I le talisapaia faapea e lē mafai ona tatou iloa loto o tagata, o le a fesoasoani lea ia i tatou e tausisia se faiā sili ona lelei ma i latou o loo siomia ai i tatou, i totonu ma fafo o le faapotopotoga Kerisiano. O le a fesoasoani ia i tatou e mafaufau tonu ai e uiga i isi, i le lē fesiligia o a latou gaoioiga, “auā o i tatou foi, sa vālea i tatou anamua, ma faalogogata, ma faaseseina, sa auauna i tuʻinanau ma mea eseese e fiafia ai.” (Tito 3:3) I le iloa o lenei mea, o le a tatou loto malie ai e talaʻi atu i tagata uma, e oo lava ia i latou o ē foliga mai i fafo e lē aogā ona talaʻi atu i ai. I lo o mea uma lava, o le filifiliga ina ia talia pe teena le upu moni o la latou lava lea. O le tiute tauave ina ia talaʻia le upu moni i tagata uma o la tatou lea.

O le toatele o Molimau a Ieova, e pei o Heinz, ua fiafia ona ua talia i latou i totonu o le faapotopotoga Kerisiano e uso ma tuafafine o ē na vaavaai i tala atu o foliga mai fafo ae leʻi faamasinoina i uluai filifiliga.

Seʻi fai Falani ma faaaʻoaʻoga, o lē na alu atu i se tasi Aso Sa i le Maota o le Malo o Molimau a Ieova i Siamani i saute. O le ā le mea na vaaia e i latou na iai i le aofia? O se tama talavou faatalalē e iai sana ava uumi ma le lauulu uumi e oo i ona tauʻau, e laei i lavalava palapalā, sa lauiloa o sē e matuā ulaula ma e iai pea i falepia—o se tagata o lē ua lafoaia lana uo teine ma le la masaga pepe. Ae peitai, sa talia ma le mafana o ia i le sauniga. Sa matuā faafiafiaina o ia, o lea na ia toe foi mai ai i le vaiaso na sosoo ai. O le ā le mea na latou vaaia ai i lea taimi? O se tama talavou ua teuteu mamā ma ua mamā ona lavalava. I le vaiaso lona tolu na latou vaaia ai se tamaloa talavou ua lē o toe ulaula, i le taimi lea ua ō mai faatasi ma lana uo teine ma la laua fanau e toalua. I le Aso Sa lona fa, na latou vaaia ai se tamaloa talavou ma se fafine talavou o ē faatoʻā uma lava ona maua se laisene o le la faaipoipoga e faamaonia ai faaletulafono la laua faiā. I le Aso Sa lona lima, na latou vaaia ai se tamaloa talavou o lē ua motusia uma noanoataga mai lotu sese. I aso nei, i le fa tausaga ua mavae, ua latou vaaia ai, e pei ona lipotia mai e se tasi o Molimau a Ieova, “O se aiga ua faia se faaaʻoaʻoga lelei, e te manatu ai faapea o i laua o ni o tatou uso mo le tele o tausaga.”

O le tulaga lelei o se tusi o le a lē atagia mai i lona faavaa, e faapena foi se fale i lona foliga mai i fafo. E faapena foi, o le uiga moni o le tagata e lē atagia mai i ona foliga i fafo. O Kerisiano o ē taumafai e vaai i tagata e pei ona silasila i ai le Atua o le a latou lē faamasinoina i a latou uluai filifiliga. E silasila le Atua i le “tagata lilo o le loto,” ma ona o lena mea tatou te faafetai ai.—1 Peteru 3:3, 4.