O E Talaʻi ma se Fuafuaga?
1 O Ieova o se Atua o fuafuaga, ma o ana galuega e mau fuafuaga. E tatau foi ona moni lea ia i tatou, ae maise lava e faatatau i la tatou faiva. Sa faatonuina e Iesu ona soʻo e talaʻi le tala lelei mo le fuafuaga e fai ma molimau. (Mata. 24:14) A o tatou tofu sao i le faataunuuga o lenei faatonuga, e tatau foi ona tatou filigā e tulitatao i latou uma e faaalia le naunau. Ua faamaonia lenei i fetalaiga atili a Iesu o loo maua i le Mataio 28:19, 20.
2 Ona o lea ua tatou ofoina nei lomiga i se faavae atoa faameaalofa, e matuā tāua ai ona tulitatao taliaina uma. Ae peitai, ua folasia i lipoti o le auaunaga i le fanua faapea e lē o faia toe asiga ia i latou uma o ē e talia lomiga. Atonu e faatalatū nisi, ma manatu faapea e na o tagata talaʻi tomai ma faauogofie e agavaa i le faia o toe asiga. E ui i lea, e lē faigata e pei ona taumanatu i ai nei tagata talaʻi. Ae tatou te manaomia ona faia a tatou toe asiga ma se fuafuaga.
FAIA ASIGA MA SE FUAFUAGA
3 Pe a e feiloai ma se tagata naunau, e lelei ona faataatia ai loa le faavae mo lou toe asia. E faapefea? Ua iloa e nisi le uigā o le tuua o lē ona le fale ma se fesili e mafai ona taliina i le isi asiasiga e sosoo ai. O isi ua mafai ona tuua lomiga ma faamatilatila se manatu patino e talanoa i ai pe a latou toe foi atu. Ia mautinoa ua faamau le suafa o lē ona le fale, le mataupu na talanoaina, lana tali mai, ma so o se lomiga na tuu ai. O lea, a o leʻi faia le toe asiga, ia toe autalu lenei faamatalaga ma manatunatu faatasi ma le tatalo i le mea o le a e talanoa atu ai.
4 Ia Iulai ma Aokuso, o le ofo ua fautuaina o so o se polosiua lava seʻi vagana le polosiua Aʻoga. Afai e ave e lē ona le fale se polosiua i lau uluai asiasiga, e mafai ona e ofo atu e faataʻitaʻi pe faapefea lona faaaogāina i le iloiloina faatasi o ni nai palakalafa. Ona taumafai lea e atofa se feiloaiga mo se toe asiga i se taimi patino e faaauau ai le suesuega. A o moni faapea e ofoina i latou i le galuega mai lea fale ma lea fale, e mafai foi ona tatou ofo polosiua pe a toe taliu e asia i latou o ē na muai aveina isi lomiga na faaalia le naunau. Ua iai tagata o ē o loo ia i tatou pepa o Tusiga o le a Uma. E ao ona faia se toe asiga i na tagata ma taumafai e faafou a latou tusiga.
FAASOLOGA O ASIGA
5 E lē faia e nisi toe asiga ona latou te lē faia se faasologa o se taimi patino mo i latou. E mafai ona faia toe asiga i le afiafi, i faaiʻuga o vaiaso, pe a faatoā maeʻa asiasiga mai lea fale ma lea fale, po o isi taimi paganoa. Aiseā e le faataatia ai se sini totino o le faia a itiiti o le tasi le toe asiga i vaiaso taitasi? Tuliloa so o se isi e naunau e te tau i ai i le vave e mafai ai. Saili le fesoasoani a i latou o ē e sili ona agavaa i lenei vala o le auaunaga i le fanua. Ia lagona saoloto e fesili i lau taʻitaʻi o suesuega tau tusi mo faufautuaga i ia itu. Atonu foi, e te manao e maua le poto masani i le ō faatasi ma se paeonia po o se tagata talaʻi o sē alualu i luma i lenei galuega.
TAUMAFAI E AAOINA SUESUEGA
6 O se vaega o le talaʻi e faatasi ma se fuafuaga o le aaoina o suesuega faale-Tusi Paia ma i latou o ē faaalia le naunau. I nisi taimi e lē aaoina ai na suesuega ona ua malaga ese le tagata aʻoga o le Tusi Paia e malolō, ma faapea foi ona tuuvaa ese lē e aaoina le suesuega i se isi taimi. Na i lo le faatagaina o vaiaso e mou atu faatasi ma le suesuega e lē faia, faamata e mafai ona tatou fuafua mo se tasi i le faapotopotoga e aaoina le suesuega a o tatou toesea? E lelei ona faifai pea le aaoina o le suesuega pe a mafai ina ia faamamafa ai i le mafaufau o le tagata aʻoga le manaoga mo le fafagaina faaleagaga e lē aunoa.
7 Na taʻua uma e le aposetolo o Paulo le totōina ma le faasūsūina i le sootaga ma le faiva faa-Kerisiano. (1 Kori. 3:6, 7) O lea o loo i ai sa tatou avega tauave e toe foi i tagata ma le fuafuaga e amata se suesuega faale-Tusi Paia. E mautinoa o le a faateleina lo tatou olioli pe afai o loo tatou talaʻi ma se fuafuaga.