Taulimaina o le Tala Lelei—I le Faaaogāina o Sāvali i So o se Avanoa

¹ O nisi laau iti atonu latou te fuaina mai le faitau selau pe oo lava i le faitau afe o fatu. I lenei auala, ua faamautinoa mai ai e Ieova faapea o le a tutupu lau olaola pea na laau iti i luga o le lalolagi.—Kene. 1:29, 30.

² E faapena foi, i lona aao foai sili, ua faatutupu taufuifui ai e Ieova fatu o le upu moni o le Malo e lē gata i fofoga o ana auauna tuutoina ae atoa foi ma le lomia o tusi. Manatu i le faitau selau miliona o tusi, tamaʻi tusi, mekasini, ma polosiua ua tufatufaina atu i le tele o tausaga. I le taimi nei ua maua ai foi sāvali fou i le faa-Toga. Pe o tatou faaaogā ea sāvali e faasalalau atu ai le tala lelei i so o se avanoa?

³ Ina ia faaaogā ma le uigā sāvali, e manaomia ona tatou faamasani i ai. Ia matau lo latou felanulanuai ma ua lomia foi i pepa anagatā. O lo latou laiti ua faigofie ai ona tatou aveina nisi i so o se mea tatou te ō i ai. Ae sili atu ona tāua, o le manino o le feau faale-Tusi Paia o loo i ai i sāvali taitasi, e tuusaʻo, ma e uunaia ai. O e iloa atu ea le tele o avanoa o loo i ai e mafai ai ona e faaaogā?

⁴ Galuega mai Lea Fale ma Lea Fale: Ua iloa e le toatele o le au talaʻi faapea o le ofoina o se sāvali i a latou upu tomua e tatalaina ai le auala mo se talanoaga ma lē ona le fale. Atonu o le a e manao e fai lenei faiga faatasi ma le Mataupu mo Talanoaga o loo i ai, e faaaogā ai le Olaga i se Lalolagi Fou Filemu. A o faia se talanoaga i le fale, atonu o le a e iloa faapea na maliu talu ai nei lava sē pele i le aiga. Maeu se talafeagai o le tufa atu lea o le feau faamafanafana o loo maua i le sāvali O le ā le Faamoemoe mo Ē Pele ua maliliu? Pe o le a faaalia foi i le talanoaga faapea o loo i ai ni manatu sese o le tagata e uiga i talitonuga o Molimau a Ieova. Atonu la o le mea tonu lava o loo manaomia o le sāvali O Ā Mea e Talitonu i ai Molimau a Ieova? E masani lava ona malie lē ona le fale e talia se sāvali tusa lava pe teena le ofo o lomiga. Tatou te lē mailoa po o ā ni āuga o se sāvali e tasi e oo i lena tagata po o nisi o lona auaiga atonu e faitau i ai.—Fai. 11:6.

⁵ Molimau Lē Fuafuaina: I taimi o a tatou galuega masani, atonu tatou te feiloai ai ma le toatele o tagata o le lalolagi. Po o fea lava tatou te i ai, ua fesoasoani sāvali ia i tatou e sauniuni ai e avatu se molimau. E mafai ona faateleina se avanoa e avatu ai se molimau faatalanoa i le ofoina atu o se sāvali i le tagata e faitau ai i se taimi mulimuli.

⁶ I le mea e te faigaluega ai, pe talanoa aumea i le galuega ma isi e uiga i omiga ma faafitauli o le olaga i lenei faiga o mea? Pe o latou fia iloa po o le ā ua na avatua ia te oe le faamoemoe mo le lumanai? Afai o latou “mapuitiga ma feoi” moni ona o tulaga lē amiotonu o i ai le lalolagi, atonu o le a faapogaia e le faamatalaga mai le Olaga i se Lalolagi Fou Filemu se tali mai i o latou loto, ma tālā ai le ala mo se isi talanoaga atili.—Esekielu 9:4.

⁷ Pe o faalogo ea outou tamaiti talavou i le aʻoga i faiaʻoga po o aumea i aʻoga o fesiligia le maufaatuatuaina o le Tusi Paia? I Le Pogai e Mafai ai ona E Faatuatua i le Tusi Paia o loo i ai se feau fau-faatuatua e faaalia ai le moni o le Tusi Paia e tusa ma le faasaienisi ma tala tuufaasolo atonu o le a faagaee ai lo latou naunau e aʻoaʻo atili.

⁸ Na fetalai Iesu faapea o la tatou fanua mo le molimau atu o le lalolagi ainā uma. (Mata. 13:38; 24:14) O lea, i so o se mea e i ai tagata—i galuega, i aʻoga, i se potu faatali o se fomaʻi, po o se fomaʻi nifo, i le fale tamea po o mea tatou te faatau ai, i fale o ō tatou aiga po o tuaoi, po o ō tatou lava fale pe a afe ane tagata mo ni pogai eseese—seʻi tatou faaaogā avanoa uma e faasalalau atu ai fatu o le tala lelei o le Malo, ma le faatuatua faapea o nisi o nei fatu o le a pauū i le “eleele lelei” ma iʻu ai ina fua tele mai mo le viiga o Ieova.—Mata. 13:23.