Tausia ia Malosi le Faatuatua e Ala i Suesuega Totino
1 O le suesueina o le Tusi Paia e malosi ai faaleagaga ma malosi ai le faatuatua e pei o meaʻai tatau ma paleni ona malosi ai faaletino. E lē mafai ona e malosi faaleagaga pe a leai se suesuega totino faifai pea o le Tusi Paia. Ae lē gata i lena, o le faia ma masani lelei o le suesue totino e mafai ai ona tatou tausia se faatuatua malosi ma i lea e taulau ai a tatou taumafaiga e liliu ese ma le manuia mai mea matuitui mumu a Satani, le manao tele i mea faitino, o faaosoosoga e faia mea leaga ma sauaga.—Efe. 6:16.
AOGĀ O SUESUEGA TOTINO
2 O suesuega totino e faatamaoaigaina ai lo tatou malamalama i le Tusi Paia. E fesoasoani ia i tatou e atiina aʻe ai lo tatou faatuatua ia malosi ma ia iloa le lautele, le umi, le maualuga ma le loloto o le alofa o Keriso. (Roma 11:33; Efe. 3:16-19) E mafai e le fua o le agaga o le faatuatua ona avea ma uunaiga malosi i o tatou olaga. Ua fesoasoani ia i tatou ia oofu i le tagata fou ma ia avea ai i tatou o ni tagata faaleagaga. (Kala. 5:22,23; Efe. 4:24) Ua sili ona faaauupegaina ai i tatou e feagai ma faafitauli totino. Ua mafai ai foi ona tatou faagalo masei o isi ma tausia le filemu ma le autasi i le faapotopotoga. (Kolo. 3:10,13,14) E mafai e nei mea uma ona faafouina ai i tatou atoa foi ma isi.
3 O le suesue totino foi e mafai ona faaauupegaina ai i tatou e fesoasoani atu i e loto naunau tatou te feiloai i le faiva i le fanua. E mautinoa lava o le a mafai ai ona tatou ‘tali atu ia i latou uma o ē fesili mai i le uiga o le faamoemoe ua i o tatou loto.’ (1 Pete. 3:15) I le pei o lo tatou Faaaʻoaʻo, o Iesu Keriso, e mafai ona tatou tautala e pei o sē ua iai le pule, i le iloa tonu o le finagalo o Ieova ma mafai ai ona faasino atu ma le manino ma le saʻo mea o aʻoaʻoina mai i le Tusi Paia.—Mata. 7:28,29.
FAAPEFEA MA O AFEA E SUESUE AI
4 O lo tatou faanaunauga o le faia ia sili atu na i lo o le na ona faitau o mataupu mo suesuega. E umi se taimi o tau manatunatu i mea tatou te faitauina. Fesili ifo ia te oe: E faapefea ona faatatauina le mataupu ia te aʻu? O le ā o ona faaalia mai e faatatau ia Ieova, o ona uiga ma ona ala? O le a faapefea ona ou faaaogāina lenei mataupu e fesoasoani ai i isi? O le ā lona sootaga ma mea ua uma ona ou iloa e uiga i le mataupu? I le faia o sailiiliga e tali ai nei fesili ua lagā, o le a faalauteleina ai lo tatou malamalama i le mataupu o le suesuega ma iloa ai pe ua faapefea ona fetaui i matātā uma lava o le upu moni. O le auala lena e maua mai ai le malamalama.—Faata. 4:5.
5 O le atiina aʻe o se masani lelei o le suesue, e manaomia ai ona faataatia ese ma tausisi i taimi patino mo le suesuega. (Faatusatusa Filipi 3:16.) Atonu e faigata ona faia o lenei mea e nisi, ae o le a oo lava ina faigofie pe a faaavanoa se taimi ma tuu atu i ai ni taumafaiga. Ma maeu se taui! Atonu e mafai ona e suesue a o e leʻi moe i le po. Ua filifilia e nisi le ala vave i le taeao ma faaaogā le taimi lea e leai ai se pisapisao ae na o ia. E mafai foi ona faaaogā taimi o malōlōga i le aoauli ua fai sina mapu mai galuega. I so o se taimi lava, ia saili se mea e sili ona lelei e te suesue ai. O le a mafai ai i lenei mea ona e uaʻi atu ma saosaolaumea ai i le taofimauina. O le a mafai ai ona faagaoioi le loto i ala o le amiotonu.—Faata. 15:28.
MEA E SUESUE
6 O sauniuniga mo a tatou sauniga e lima faalevaiaso e ao ona faatumuina se avanoa tele i a tatou faasologa o suesuega totino. E faaopoopo i le sauniuni mo le suesuega o le Olomatamata ma le Suesuega Tau Tusi a le Faapotopotoga, o e maua ea ni aogā atoatoa mai meaʻai susua faaleagaga ua faaauivi mai mo le Aʻoga o le Faiva Faatiokarate? Ia mautinoa ua tausia pea le faasologa o le faitau Tusi Paia ma ia faaalu se taimi, e saili ai mea tāua mai le Tusi Paia i lomiga a le Sosaiete. Afai e te muamua ona autaluina mataupu i le lauga 1,3, ma le 4, o le a e iloa le sili atu o lou fiafia a o taulimaina na mataupu i le aʻoga. O le a sili atu ai ona taofia i lou mafaufau faatonuga tāua mai le Tusi Paia.
7 O sauniuniga mo le Sauniga o le Auaunaga e lē manaomia ai se vaega tele o taimi o la tatou suesuega totino, ae e ao lava ona faaaofia lenei mea i la tatou faasologa. Afai e te faaaogāina ni nai minute i vaiaso taitasi e tilofaia ai le polokalama lena ua faaauivi atu i La Tatou Faiva o le Malo, o le a fesoasoani lena i le tausia o lou faatuatua ia malosi ma fesoasoani ai foi ia te oe e faailoa atu lou faatuatua i isi i le faiva i le fanua.
8 O se polokalama paleni mo suesuega totino o le a fesoasoani i lou “faamalosia . . . i le tagata i totonu.” (Efe. 3:16) Ioe, o le faatuatua malosi, e faalolotoina ai le alofa ia Ieova ma Keriso Iesu, e faalauteleina ai le malamalama, ma ia sili ai ona uigā i le faiva—o le a aogā nei mea uma ma o le a sili atu—ona faitaulia ai suesuega totino. O iai ea sau polokalama lelei mo suesuega totino?