pea i aso uma.” E lē o se mea e ofo ai ona o le toatele o tamaiti ua iloa na mea atonu latou te lē o iloa pe faapefea ona aloese mai puapuaga i le aiga i le avea o tagata matutua.

O nisi o tagata o loo matauina nei mea atonu ua latou tuuaʻia puapuaga i le aiga i suiga tau tamaoaiga, le va fealoaloai, ma suiga tau amio na ua tafia ai nuu tamaoaiga. Mo se faaaʻoaʻoga, o le fua aupito sili ona telē o le ulu atu o fafine i au faigaluega ua masani pea ona faaletonu ai le toe faia o ni fuafuaga i vaega ma tiutefai faaleaiga. Ua taumafai ma le popole tinā ina ia faaleleia o latou tomai i galuega ina ia ō atu e faigaluega, ae o tamā o loo tauivi ma le musuā ma galuega i le aiga, ma o tamaiti o loo taumafai ma loimata e faafetaui atu i le olaga i nofoaga e tausi ai tamaiti i aso taitasi.

E tele lava aiga i atunuu uma o le kelope o loo i lalo o omiga matuā faigata. Ua faatusatusa e se tasi o matua faigaluega lenei mea i le “ola i se tulaga e matuā faanatinati i aso uma.” E lē o se mea e ofo ai faapea toetoe lava o le ʻafa o i latou na palota i se suesuega na faaalia ai manatu o tagata lautele talu ai nei, na faapea mai ‘ua sili atu ona leaga le aiga faa-Amerika i aso nei na i lo le mea sa iai i le 10 tausaga ua mavae,’ ma e toaitiiti ua talitonu faapea o le a faaleleia lea tulaga.

O lea la, o puapuaga i le aiga, ua avea ma mataupu e talanoaina pea lava pea i televise ma faaaliga o talanoaga i leitio. Ua lotulotu le lautele e faitau i tusi e fesoasoani ai ia i latou lava e uiga i le aiga, ua ofo atu e nisi fautuaga poto ma le aogā. E ui lava ina apoapoaia faapea e mafai ona fesoasoani le ‘matuā tatala o fesootaiga’ pe ia ‘fetufai faalogona o se tasi,’ ae ua lē taulau ona maua le pogai tonu o faafitauli i le aiga. O le a faia faapea e le mataupu o sosoo mai, ma o le a faaalia ai pe o le a faapefea ona feagai ai ma puapuaga i le aiga.

Ia Faamuamua le Atua i Lou Olaga Faaleaiga!

O BOB MA JEAN—le ulugalii faaipoipo na faailoa atu i le mataupu lea na seʻi mavae atu—e leʻi tatalaina la la faaipoipoga. Na i lo lea, na la talanoaina o la faalavelave faatasi ma se faifeau Kerisiano. Sa vave lava ona ia iloa faapea o le faavae autū lava o o la faafitauli, e pogai mai i le eseese o talaaga o o la olaga.

Mo se faaaʻoaʻoga, talu ai ona o Bob e sau mai se aiga e fai pisinisi ma ē galulue i le faia o mea i o latou lava lima, ma ua ia faia ai foi galuega mamafa i ona lava lima, na manao ai o ia i se taumafataga lelei i taeao uma lava. O Jean, o lē e sau mai i se aiga o tagata galulue faaofisa, na te avatua ia Bob na o le kofe ma le falaoa faapaʻu. O lea, sa na o se taugaupu lava ona o le mea taumafa i le taeao na oo ai ina faatetele ma avea o se taua lava!

Sa manaomia e Bob ma Jean ona faaleleia la laua fesootaiga. Ae peitai, sa sili ona loloto le pogai moni o lo la mafatiaga. “E mafai ona manatu le tasi i le isi e tusa ai ma le malamalamaga i le 1 Korinito 13:4?” na fesili atu ai le faifeau. E faapenei ona faitauina o lena mau mai le Tusi Paia (NW): “E onosai ma agalelei le alofa. E lē matauʻa le alofa, e lē mitamitavale, e lē faafefeteina.” Ua faapea mai le fuaiupu e sosoo ai o le alofa “e lē amio matagā, e lē sailia e ia na o ana lava mea e fiafia i ai, e lē itaitagofie. E lē tuuina atu i nisi le leaga.” Sa mananao uma Jean ma Bob e faatatau nei upu i la laua faiā.

O faafitauli o lenei ulugalii faaipoipo sa manaomia muamua lava se fofo faaleagaga. Ona sa naunau la Bob ma Jean e tausia se faiā lelei ma le Atua, o lea, i lo o mea uma lava, sa la manaomia ona faatatauina mataupu silisili o le Tusi Paia ma ia iloa faapea, “afai e lē atiina aʻe e Ieova lava ia le fale, e lē aogā la le galuega mamafa a i latou na fauina.” (Salamo 127:1, NW) O fuaiupu e 3 e oo i le 5 e faatatau lea i le atiina aʻe o se aiga. Ma o le taulau aupito sili e maua ai le fiafia i le aiga e sau lea mai le faamuamua o le Atua i le olaga faaleaiga.—Efeso 3:14, 15.

Le Aafiaga o le Faamuamua o le Atua

O le faamuamua o le Atua i lou olaga faaleaiga e alu mamao atu lava i tala atu o le faaupuga, “O le aiga e tatalo faatasi e tumau i le aufaatasi.” E tusa ai ma le mekasini Family Relations (Faiā Faaleaiga), e toatele ua talitonu faapea o le “lotu ua fesoasoani e faafaigofie le galulue faatasi ma le mautinoa o le olaga malōlōina faaleaiga ma faaleleia ai le faagasologa o le olaga faamalieina o ona sui taitoatasi.” Ae i le na o le faatinoina o se lotu, e lē tutusa lea ma le faamuamua o le Atua. E toatele ua na ona pipii atu lava i se lotu ona ua na ona fai ma masani, po o se uputuu faaleaiga, po o se tulaga lelei o le vafealoai. E itiiti lava sina pulea e le Atua o o latou olaga mai lea aso i lea aso. O le mea sili ona tāua, ona e lē o lotu uma o “le ituaiga lea o tapuaiga e mamā ma lē faaleagaina i le silafaga a lo tatou Atua.”—Iakopo 1:27, NW.

Ina ia faamuamua le Atua i o tatou olaga faaleaiga, e tatau ai ia i tatou ma ē pele ia i tatou ona tapuai ia Ieova, “o le Silisili ese i le lalolagi uma,” e tusa ai ma mea na te manaomia. (Salamo 83:18) Na fetalai le Alo o le Atua, o Iesu Keriso, e faapea: “A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le [upu moni]; auā o loo saili le Tamā i e tapuai faapena ia te ia. O le Atua o le [Agaga] lava ia; o e tapuai ia te ia, e tatau ona tapuai atu ai i le agaga ma le [upu moni].” (Ioane 4:23, 24) Ina ia tapuai ia Ieova le Atua “i le agaga,” o la tatou auaunaga paia la ia te ia e tatau ona uunaia e se loto ua faatumuina i le alofa ma le faatuatua. (Mareko 12:28-31; Kalatia 2:16) O le tapuai atu ia Ieova ma le “upu moni” e manaomia ai ona tatou tetee atu i mea sese faalotu ma gauai atoatoa atu i lona finagalo e pei ona faaalia i le Tusi Paia. E lē mafai ona tatou faamuamua Ieova le Atua seiloga e ausia e la tatou lotu ana tapulaa.a O ā nisi o nei tapulaa? Ma e mafai faapefea i le faatatauina o ia tapulaa ona maua ai e lou aiga aogā?

Ia Faamuamua le Atua i le Avea o se Tane

I le 1 Korinito 11:3, ua faapea mai le Tusi Paia: “O le ulu o tane taitoatasi o Keriso lea, o le ulu o le avā o le tane lea a o le ulu o Keriso o le Atua lea.” Afai o oe o se tane, ua ia te oe la le tiutefai mai le Atua e avea ai o le pule e faia filifiliga i lou aiga. Ae ua lē avatua ai e lenei mea i se tane se faatagaga e faafiatonu ai pe pule sauā.

Ua faalaeiau le Tusi Paia i tane ina ia magafagafa i faalogona o a latou avā pe a faia filifiliga e aafia ai i latou. (Faatusatusa Kenese 21:9-14.) E moni lava, ua uunaia i tatou uma e le Tusi Paia ina ia ‘vaavaai, e lē tau o o tatou lava faanaunauga totino i le vaaia na o a tatou lava mea, ae ia vaavaai i faanaunauga totino po o mea a isi.’ (Filipi 2:2-4) Afai e lē o aafia ai se mataupu silisili faale-Tusi Paia, e masani lava ona lolo atu se tane Kerisiano i mea e filifilia e lana avā. I le iai o se faanaunauga totino ia te ia, o le a faamautinoa ai foi e le tane ua lē mafatia naʻuā le avā i tiutefai. Mo se faataʻitaʻiga, atonu e fesoasoani atu ia te ia i feau o le aiga, ae maise lava pe afai e iai sana galuega masani.

Na tusi le aposetolo o Paulo: “O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava; auā e leai lava se tasi e ita i lona lava tino; a e peitai na te fafaga ma tausi atu i ai, faapei o le Alii foi ona tausi i le ekalesia.” (Efeso 5:28, 29) E feutagai Iesu Keriso ma sui o le faapotopotoga i se auala alofa.

E aogā foi ona matau le fautuaga a le aposetolo o Peteru: “O outou tane, ia faapea ona nonofo pea ma a outou avā e tusa ma le poto, ia āva ia i latou ona o le ipu ua sili ona vaivai, o uiga faafafine, talu ai, ona o outou foi o suli faatasi ma i latou i le ola ua foaifuaina mai, ina ia lē faalavelaveina a outou tatalo.” (1 Peteru 3:7, NW) Pe ua lē o se mea uigā ea le iloa faapea o le faia o se avā a se tasi i se auala lē alofa e mafai ona faalavelavea ai tatalo a se tane? Ioe, e tatau i se tamaloa ona feutagai ma lana avā i le uiga alofa pe afai e manao ia faafofoga ma tali mai le Atua i ana tatalo.

O le faamuamua o le Atua e afaina ai foi le faiā a se tamā ma lana fanau. E ao lava ona matuā popole o ia e uiga i lo latou lelei faaleagaga. Ae, i se suesuega autū na faia i le Iunaite Setete, e na o le ʻafa o tane na fai mai faapea “o le auai i suesuega faale-Tusi Paia po o talanoaga faale-Tusi Paia a vaega” sa ‘sili ona tāua mo le agaʻigaʻi i luma faaleagaga a lo latou aiga.’ Na taʻua e le isi vaega uma na mea, e pei lava o le “matamata ma faalogologo i faasalalauga o sauniga faalotu” po o le ‘manatunatu i le uiga o le olaga.’

Ae peitai, ua taʻu atu e le Tusi Paia i tamā: “Aua neʻi tou faaonoono atu i a outou fanau, ae ia tausi atu i ai i aʻoaʻiga ma apoapoaiga faalemafaufau a Ieova.” (Efeso 6:4, NW) I totonu o Molimau a Ieova, e faatalitalia tamā e taʻimua i le tapuaiga i le aiga. E ala i le faia e lē aunoa o suesuega faale-Tusi Paia, auai i sauniga faa-Kerisiano, ma ia ōgatasi ma isi mea manaomia faale-Tusi Paia, ua faamuamua ai e na tane le Atua i le olaga faaleaiga.

Faamuamua le Atua i le Avea o se Avā

Afai o oe o se avā, e mafai ona e faamuamua le Atua e ala i lou lagolagoina o lau tane i lana vaega o le avea ma ulu o le aiga. Ua faapea mai le Tusi Paia: “O outou [avā], ia outou usiusitai atu i a outou lava tane, pei ona tatau i le Alii.” (Kolose 3:18) E ono faafaigata lenei mea pe afai e lē tatala e le tamaloa fesootaiga pe faatamala i le avea ma taʻimua i le tapuaiga a le aiga. I so o se mea e tupu mai, o le matuā faamatilatila mai pea o ona pona, po o le sili atu ona leaga, o le tetee atu ia te ia o le a na ona faateleina ai puapuaga i le aiga.

Fai mai le Faataoto 14:1 (NW): “O le fafine poto na te atiina ae lona fale, ae o lē e valea, na te lepetia i lalo i ona lava lima.” O le tasi o auala e mafai ai e se fafine faaipoipo e poto moni ona faamuamua le Atua ma ‘atiina aʻe lona fale,’ e ala lea i le gauai atu i lana tane. (1 Korinito 11:3) Faatasi ma le iai ‘o le tulafono o le alofa agalelei i lona laulaufaiva,’ na te alofia ai le soona faitio naua i lana tane. (Faataoto 31:26) E galue malosi foi o ia ina ia taulau ma le manuia ana filifiliga.

O le isi auala e faamuamua ai e le fafine faaipoipo le Atua o le avea lea ma se avā galue mamafa. O le mea moni, afai e galue i se galuega masani, atonu o le a lē maua sona taimi po o le malosi manaomia e tausia ai lona aiga e pei ona ia naunau i ai. E mafai pea ona ia tauivi ina ia pei o le “avā amio lelei” lea o loo fai mai ai le Tusi Paia: “Ua vaavaai o ia i amioga a lona aiga; e le ʻai foi o ia i mea e ʻai a le paie.”—Faataoto 31:10, 27.

I lo mea uma lava, e manaomia e se avā ona tausia ia faamuamua le tapuaiga a le Atua i lona olaga. E toatele ē e asiasi atu i le Maota o le Malo a Molimau a Ieova mo le uluai taimi, ua latou faia ni tala lelei i foliga mamā o tamaiti. Ua matuā sili mamao atu ona tāua galuega a se avā i lenei itu. Ae tatau foi ona ia galue ina tausia pea lona tulaga faaleagaga e ala i le tatalo, suesue, ma le auaunaga i le Atua.

Faamuamua le Atua i le Avea o ni Talavou

Ua taʻua i se mataupu i se tusi o le Adolescent Counselor e faapea: “Ua tauāu ina atiina aʻe e tamaiti uiga ma filosofia ua faatagaina ai i latou e pulea o latou mātua. . . . I le auai lea i se sosaiete ua faamamafa ma viiviia ai le vave faamalieina o manao ma le tamaoaiga faaletino, le tuputupu aʻe o uiga o tagata talavou faapea ‘Ou te manao i ai i le taimi lava lenei.’” Afai o oe o se talavou, pe o lou uiga faaalia ea lena?

Ua faapea mai le Kolose 3:20: “O outou le fanau, ia outou faalogo [usiusitai] i o outou mātua i mea uma; auā o le mea mālie lea i le Alii.” O se talavou o lē manatu i sea usiusitai faapea o se mea manaomia tauatua, o le a felagolagomai la ma ona mātua. Mo se faataʻitaʻiga, o le a na lē tetee faalilolilo ia te i laua e ala i le auaufaatasi ma aumea i aʻoga, o ē la te lē o faamaonia; na te lē taumafai foi i se auala faatogafiti poto e faatosina ona mātua ina ia fai le mea ua loto lava o ia i ai. (Faataoto 3:32) Na i lo lea, so o se talavou lava na te faamuamua le Atua i lona olaga, o le a gauai atu i le taʻitaʻiga alofa faamatua.

Ia Faamuamua Pea le Atua!

E tusa lava po o le ā le tulaga o tatou maua i totonu o le liʻo faaleaiga, ua manaomia ona tatou faamuamua le Atua i le olaga ma ia atiina aʻe se faiā vavalalata ma ia. Po o e faia lena mea faatasi ma lou aiga?

I nei “aso e gata ai,” o loo fesagaʻi ai i tatou uma lava ma “aso faigata.” (2 Timoteo 3:1-5) Ae peitai, e mafai lava ona malolosi ma malōlōina faaleagaga ma ia sao ai i le faaiʻuga o lenei faiga o mea. (Mataio 24:3-14) E ala i le gaoioi e ōgatasi ma le poto saʻo lelei o le Tusi Paia, ona mafai ai lea e oe ma lou aiga ona maua le faamoemoe o le ola e faavavau i se lalolagi parataiso. (Luka 23:43; Ioane 17:3; Faaaliga 21:3, 4) Ioe, o le mea lena e mafai ona faia, pe a e faamuamua le Atua i lou olaga faaleaiga.

[Faaopoopoga i lalo]

[Ata i le itulau 5]

O se avā amio lelei e matuā talisapaia

[Ata i le itulau 7]

Ua faalaeiauina e le Tusi Paia tane ina ia taʻimua i le tapuaiga a le aiga