O le ā le Uiga o le Gauai atu i le Faaipoipoga?

PE AFAI e faaipoipo se fafine Kerisiano, e tatau ona ia faia le tele o fesuiaiga. Atonu o le fesuiaiga aupito sili o nei mea, e mafai ona aafia ai lona saolotoga. I le avea o se tagata matua nofo toatasi, atonu sa saoloto o ia e faia le tele o ana lava filifiliga e aunoa ma le tau faafesootai atu o se tasi. Ae ona o lea ua iai nei sana tane, ua ia te ia ai la se avega tauave e faafesootai atu ia te ia ma fesiligia foi lana faatagaga e faia ai le tele o mea na sa masani ona filifilia e ia lava. Aiseā ua faapea ai?

Auā ina ua faafaaipoipoina e Lē na Foafoaina le fanau a tagata le uluai fafine i le uluai tane, sa Ia tofia le tamaloa ina ia avea o le ulu o lana avā ma sa la fanau o le a maua. Sa talafeagai lenei mea. I so o se vaega ua faamaopoopoina o ni tagata, e manaomia ona iai se tasi na te taʻitaʻiina ma faia faaiʻuga o filifiliga. E tusa la ma le tulaga o le faaipoipoga, na poloaiina e Lē na Foafoaina Mea faapea “o le tane o le ulu ia o le avā.”—Efeso 5:23.

I le lagolagoina o lenei mea, ua taʻua e le faatonuga tauatua: “O outou fafine, ia outou usiusitai i a outou lava tane.” (Efeso 5:22) I le pe faapefea ona aafia ai o le avā i lenei faatulagaga, e lua mea e faalagolago i ai: Muamua, o le ā le tele o lona naunau e usiusitai i le faatulagaga? ma lona lua, o le a faapefea ona faatinoina e lana tane lana pule? O le upu moni, pe a saʻo le vaai a paaga faaipoipo e toalua i lenei faatulagaga, ona la iloa lea, o se faamanuiaga mo le avā, le tane, ma a la fanau.

E Lē o se Pule Sauā

E ao faapefea i se tane ona faatinoina lana pule? E ala i le mulimuli i le faaaʻoaʻoga lelei a le Alo o le Atua. Ua faapea mai le Tusi Paia: “O le tane o le ulu ia o le avā, pei o Keriso foi o le ulu ia o le faapotopotoga, o ia foi o le faaola o le tino. O outou tane, ia outou alolofa atu i a outou lava avā, faapei o Keriso foi ona alofa mai i le [faapotopotoga], ma foaiina mai e ia ia te ia e fai mona sui.” (Efeso 5:23, 25) O le faatinoina o le tulaga ulu o Iesu Keriso sa o se faamanuiaga i le faapotopotoga. Sa lē o ia o se pule sauā. Na te leʻi faia ona soʻo e oo i ai se lagona saisaitia pe mafatia. Na i lo lena, sa ia maua le faaaloalo a tagata uma lava e ala i lana tausiga alofa mutimutivale ia i latou. Maeu se faaaʻoaʻoga lelei mo tane e mulimuli ai i la latou tausiga o a latou avā!

E ui i lea, e iai tane e lē o mulimuli i lenei faaaʻoaʻoga lelei. Ua latou faaaogā ma le manatu faapito lo latou tulaga ulu na tuuina atu i ai e le Atua, na i lo o le maua ai e a latou avā o se lelei. Ua latou pulea a latou avā i se auala pule sauā, e tapā ai le matuā usiusitai atu ma e masani lava ona latou lē faatagaina avā e faia so o sa latou lava filifiliga. O le tulaga moni lava la, o avā a na tane e masani lava ona ola i se olaga lē fiafia. Ma o se tane faapena e puapuagatia foi auā e lē taulau ai ona ia maua le faaaloalo alofa a lana avā.

E moni, e manaomia e le Atua se avā ina ia faaaloalo i le tulaga ua umia e lana tane i le avea o le ulu o le aiga. Ae afai e faanaunau le tane ina ia olioli i le faaaloalo mai le loto a lana avā mo ia i le avea o se tagata, e tatau ona ia galue ina ia maua mai lea faaaloalo, ma o le auala sili ona lelei e faia ai lena mea, o le gaoioi lea e faia ona tiute tauave, ma atiina aʻe uiga lelei faaleatua i le avea o le ulu o le aiga.

Usiusitai e Faatatau

O le pule a se tane i luga o lana avā e lē atoatoa. I nisi o auala o le usiusitai faaleavā e mafai ona faatusatusa i le usiusitai o se Kerisiano i se pule faalelalolagi. Ua poloaiina e le Atua faapea, e tatau i se Kerisiano ona “usiusitai . . . i faipule silisili.” (Roma 13:1) Ae o lenei usiusitai e tatau pea ona paleni ma le mea tatou te tuuina atu i le Atua. Na fetalai Iesu: “Ina avatu ia o mea a Kaisara ia Kaisara; ia avatu foi mea a le Atua i le Atua.” (Mareko 12:17) Afai e tapā mai e Kaisara faiga malo faalelalolagi ina ia tatou avatu ia te ia mea e ā le Atua, ona tatou manatua lea o le mea na fai mai ai le aposetolo o Peteru: “E tusa ona sili o lo matou anaana i le Atua i lo matou anaana i tagata.”—Galuega 5:29.

I se auala tali tutusa foi faapena, afai ua faaipoipo se fafine Kerisiano i se tamaloa o lē e lē malamalama pe lē taulau foi ona faaaloalo i mataupu silisili faa-Kerisiano, e ui i lea ua ia te ia pea se avega tauave e usiusitai atu ia te ia [le tane]. Na i lo o le fouvale faasaga i lenei faatulagaga tofia mai le Atua, e sili ona lelei ona gaoioi agaʻi ia te ia i le alofa ma le magafagafa, ma i lea ia taumafai ai e maua lona faatuatuaga atoatoa ia te ia. Atonu o na amioga lelei o le a suia ai lana tane; ma oo ai lava ina ia manumalo ia te ia i le aumaia i le upu moni. (1 Peteru 3:1, 2) Afai e faatonuina o ia e lana tane e faia se mea e faasaina e le Atua, e ao ona ia manatua faapea o le Atua o lona Pule muamua. Mo se faaaʻoaʻoga, afai na te faatonuina lona auai i faiga lē mamā tau amio, e pei o le faafesuiaia o avā, ua ia te ia le tiute tauave ina ia aua neʻi usiusitai. (1 Korinito 6:9, 10) O le usiusitai i lana tane e pulea e lona loto fuatiaifo ma e ala i lona muai usiusitai i le Atua.

I taimi o le Tupu o Tavita, sa faaipoipo atu ai Apikaila ia Napalu, o se tamaloa sa lē faaaloalo i mataupu silisili faaleatua ma o lē na gaoioi ma le faasauā ma le lē alofa ia Tavita ma ona tagata. O i latou nei na puipuia le faitau afe o mamoe ma ʻoti a Napalu, ae ina ua talosagaina e Tavita se meaalofa o ni meaʻai, sa musu Napalu e avatu so o se mea.

Ina ua iloa e Apikaila faapea o uiga mataʻū o lana tane o le a aumaia ai le mala i le aiga, ona ia filifili loa lea e alu atu lava ia e avatu ni meaʻai ia Tavita. “Ona faataalise lea o Apikaila, ua ia avane areto e lua selau, ma fagu paʻu o uaina e lua, ma mamoe ua uma ona saunia e lima, ma sea o saito tunu e lima, ma fuifui vine mago e selau, ma potopotogāmati e lua selau, ua ia faaee ai i luga o asini; ua fai atu i ona taulelea, Muamua ia outou i oʻu luma; faauta, ou te mulimuli atu ia te outou; a ua ia le taʻu atu ai ia Napalu lana tane.”—1 Samuelu 25:18, 19.

Pe sa sese le mea na faia e Apikaila i le faia o se gaoioiga e lē loto i ai lana tane? E leai e tusa ai ma lenei mea. O le usiusitai o Apikaila, sa lē manaomia ai o ia ina ia agaleaga e pei o lana tane, ae maise lava talu ai o le auala valea na uia e Napalu ua tuuina ai lona aiga atoa i se tulaga lamatia. O lea la, na faapea atu ai Tavita ia te ia: “Faafetai ia Ieova le Atua o Isaraelu, o le na auina mai oe i le aso nei e faafetaiai ia te au. Faafetai foi i lou mafaufau [poto].” (1 Samuelu 25:32, 33) E faapena foi, e lē ao i avā Kerisiano i aso nei ona faaita ma fouvale i tulaga ulu o a latou tane, ae afai e faia i se auala lē faa-Kerisiano nei mea, e lē tatau la i avā ona usiusitai ia i latou e tusa ai ma lenei mea.

E moni, fai mai Paulo i lana tusi i tagata Efeso: “Faapei ona usiusitai o le ekalesia ia Keriso, ia faapea foi fafine i a latou lava tane i mea uma lava.” (Efeso 5:24) O le faaaogāina e le aposetolo i inei o le upu “mea uma lava” e lē uiga faapea e leai ni tapulaa i le usiusitai o le avā. O le faaupuga a Paulo, “faapei ona usiusitai o le ekalesia ia Keriso,” ua faaalia ai le mea sa i lona loto. O mea uma lava ua manaomia e Keriso mai lana ekalesia, e amiotonu, e tusa ai ma le finagalo o le Atua. O le mea lea, e faigofie lava ona usiusitai ma le olioli le ekalesia ia te ia i mea uma lava. E faapena foi i le avā a se tane Kerisiano o lē e taumafai ma le naunautai e mulimuli i le faaaʻoaʻoga a Iesu, o le a fiafia e gauai atu ia te ia i mea uma lava. Na te iloa o loo manatu mamafa tele lana tane mo ona faanaunauga sili ona lelei, ma o le a lē taitai ona ia tapā ma le loto i ai le faia e lana avā o se mea e lē ōgatasi ma le finagalo o le Atua.

O le a maua pea e se tane le alofa ma le faaaloalo a lana avā pe a ia faaatagia uiga faaleatua o lona ulu, o Iesu Keriso, o lē na poloai i ona soʻo ina ia fealofani. (Ioane 13:34) E ui lava e sese o ia ma e lē lelei atoatoa, ae a mafai ona ia faia lana pule e ōgatasi ma le tulaga ulu silisili o Keriso, o le a ia faafaigofie la mo lana avā ona fiafia e avea o ia o lona ulu. (1 Korinito 11:3) Ma afai e atiina aʻe e se avā uiga faa-Kerisiano o le agamalu ma le agalelei, o le a lē faigata la mo le avā ona usiusitai atu i lana tane.

Loto Maulalo ma ia Magafagafa

O tane ma avā i le faapotopotoga, o ni uso uma ma tuafāfine faaleagaga e tutusa i luma o Ieova. (Faatusatusa Kalatia 3:28.) Ae peitai, ua tofia e le Atua tane e vaavaaia le faapotopotoga. Ua iloa ma le fiafia lenei mea e fafine e saʻo o latou loto faatatau i le gauai atu i mea uma lava. Ma o le avega tauave mamafa ua tuu e lenei mea i tane ina ia lē aliitai ai i le lafu, ua iloa ma le loto maulalo e tane taʻumatuaina i le faapotopotoga.—1 Peteru 5:2, 3.

Afai o le tulaga lea i le va o tane ma fafine i le faapotopotoga, e mafai faapefea e se tane Kerisiano ona taʻutonuina ana gaoioiga i le pule sauā i lana avā, lona tuafafine faaleagaga? Ma e mafai faapefea e le avā ona taʻutonuina le tauvā ma lana tane i le tulaga ulu? Na i lo lea, e ao ona la fetausiai e pei ona apoapoai mai Peteru i sui uma lava o le faapotopotoga: “Ia loto gatasi outou uma, ia fealofani, ia alolofa i le au uso, ia mutimuti vale i le alofa, [ma ia loto maulalo].” (1 Peteru 3:8) Na fautua mai foi Paulo: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai. . . . Ia fefaapalepaleai ma ia fefaamagaloai outou, pe afai ua agaleagaina se tasi e se tasi; faapei ona faamagalo mai [Ieova] ia te outou, ia faapea foi outou.”—Kolose 3:12, 13.

O uiga na e ao ona atiina aʻe i totonu o le faapotopotoga. Ma ae maise lava i le va o le tane ma le avā, e ao ona atiina aʻe ai i totonu o le aiga Kerisiano. E mafai e se tane ona faaalia lona alofa naunau ma le agamalu e ala i le faalogologo i fautuaga mai lana avā. E ao ona ia manatunatu i manatu o lana avā a o leʻi faia se filifiliga e aafia ai le aiga. O avā Kerisiano e lē vālea. E masani lava ona latou avatua i a latou tane ni fautuaga aogā, e pei ona sa faia e Sara i lana tane, o Aperaamo. (Kenese 21:12) I le isi itu, o le a lē tapā ma le lē magafagafa e se avā Kerisiano se mea mai lana tane. O le a ia faaalia lona agalelei ma le loto maulalo e ala i lona mulimuli atu i lana taʻitaʻiga ma lagolagoina ana faaiʻuga, e ui lava atonu i nisi taimi e foliga mai e ese mai mea e filifilia e ia lava.

O se tane magafagafa, e pei foi o se toeaina magafagafa, e faigofie ona faalatalata atu i ai, ma e agalelei. Ma o se avā alofa, e tali atu e ala i le faaalia o le alofa mutimutivale ma le onosai, i le iloa o taumafaiga o loo ia faia ina ia faataunuuina ai ona tiute tauave e ui lava i le lē lelei atoatoa ma omiga o le olaga. Afai e atiina aʻe uma e le tane ma le avā na uiga, ona lē avea ai lea o le gauai atu i le faaipoipoga o se faafitauli. Ae na i lo o lea, ua avea o se puna o le olioli, saogalemu, ma le lotomalie e faavavau.