Faatomua Polosiua e Faasoa atu ai Lou Faamoemoe o le Malo
1 A o tatou molimauina le faataunuuga o valoaga a le Tusi Paia, tatou te olioli ona o lo tatou faamoemoe o le Malo, ma ua uunaia ai i tatou e taʻuina atu i so o se tasi e faalogo mai. (Luka 6:45; Roma 12:12) O lo tatou faatomuaina la o polosiua i le faiva i le fanua ia Iulai, o se tasi lea o auala e mafai ai ona tatou faasoa atu lo tatou faamoemoe o le Malo i isi e pei ona poloaia e Iesu.—Mata. 24:14.
2 Ona o le tele o a tatou polosiua felanulanuai ma le aogā e filifili mai ai, o lē fea la atonu e sili atu ona fetaui ma manaoga o i latou i la tatou oganuu ma faagaeeina ai lo latou naunau? Ina ia faaaogāina polosiua i se auala e sili ona lelei, e tatau ona tatou iloaina mea o loo iai. O le a fesoasoani ia i tatou le autaluga puupuu o loo mulimuli mai.
3 O le Malo o le a na Aumaia le Parataiso: A o iai Iesu i le lalolagi, sa avea le Malo o le Atua ma matua o lana talaʻiga. Ua faaalia i lenei polosiua le Malo, o se pulega moni lava, ma le auala o le a ia foia ai faafitauli ua faafaigata ai le olaga i aso nei.
4 Olioli i le Ola i le Lalolagi e Faavavau!: O loo faamatala ai le pogai na faia ai e le Atua le tagata ma le auala e mafai ai ona tatou olioli i le olaga i le lalolagi e faavavau. E mafai ona tosina ata matagofie ma faamatalaga pupuu o loo i lenei polosiua i ē laiti atoa ma i latou ē faalēlelei le faitau. E mafai foi ona faaaogā e faailoa atu ai aʻoaʻoga faavae a le Tusi Paia ia i latou e lē lelei le faalogo.
5 “Faauta! Ou te Faia ia Fou Mea Uma Lava”: Ua faaataina mai e lenei polosiua le parataiso ma e atiina aʻe ai le talisapaia mo le Tusi Paia atoa ma Lē na Foafoaina i tatou. A uma ona talanoaina le pogai ua faatagaina ai e le Atua le amioleaga, ona taulai atu lea i aʻoaʻoga faavae e tolu a le Tusi Paia: o le togiola, le toetu, ma le Malo. O loo iai foi i lenei polosiua ni fesili i le pito i lalo o itulau, e faafaigofie ai mo i tatou ona faafoeina se suesuega faale-Tusi Paia.
6 Pe Ao ona E Talitonu i le Tolutasi?: Atonu e faapea mai tagata latou te talitonu i le Tolutasi, ae e eseese o latou malamalamaga i ai. O loo taliina e lenei polosiua fesili e pei: O le ā le Tolutasi? Po o aʻoaʻoina ea e le Tusi Paia? Faamata o Iesu Keriso o le Atua e Ona le Malosi Uma lava ma o se vaega o le Tolutasi? O le ā le agaga paia, ma e faapefea ona gaoioi?
7 A uma loa ona tatou filifilia polosiua tatou te mananao e faaaogā i le faiva i lea fale ma lea fale po o le molimau lē fuafuaina, e ao loa ona tatou toe autaluina mataupu o loo i le pito i tua o lenei lomiga o La Tatou Faiva o le Malo. O i inā o le a tatou maua ai ni faufautuaga mo le ofoina atu o a tatou lomiga ma le faia o toe asiga faatasi ma le manatu ia atiina aʻe le naunau ma amataina se suesuega faale-Tusi Paia.
8 I le tele o avanoa, pe fuafuaina pe lē fuafuaina lau molimau atu, na pau lava le mea e manaomia ina ia avatu ai se molimau lelei, o se polosiua patino. Peitai, e tatau ona tatou sauniuni, ia lava ma totoe ni au polosiua o iai, ia iloa mea o loo iai, ma ia faautauta. Talosia ia avea le faamanuiaga a Ieova i la tatou faiva maelega, ma pogai e toatele atili ai nisi e olioli faatasi ma i tatou i le faamoemoe o le Malo!—Galuega 13:47, 48.