Ieova—O Sē Lua te Masani po o Sau Uo?

“IOANE, e mafai ona ou faafeiloai atu oe i laʻu uo? O ia o—faamolemole, o ai ea foi le suafa?”

Pe sa e faalogo i sea ituaiga o mea sese i se talanoaga? Ua saunia ai i lea mea se faaaʻoaʻoga i le faapefea e nisi tagata ona faaaogāsese le upu “uo.” E tusa ai ma le mea moni, ua na ona latou faasino atu i sē latou te “masani” po o i nisi taimi e lē masani ai. O le masani ia Mr. Smith e nofo i le isi itu o le auala o le tasi lena mea; ae o le avea o sana uo, e ese foi lena mea.

Ua faamatalaina e se tasi lomifefiloi le upu “masani” faapea “o se tagata o lē sa la feiloai i se faatasiga, ae e lē o se tagata o iai ni faalogona loloto e pipii totino atu i ai.” Ua faaalia ai i lea le “itiiti o se masaniga, e lē vavalalata, e leai se faatasiga faaleuso, ma ua na o ni moomooga lelei na i lo o se UO.”

O le leai o se faalogona malosi e pipii totino atu, ua fesoasoani e faamatala le pogai e masani ai ona tatou lē manatu mamafa i se mea e tupu i ē tatou te masani ai, a o tatou aafia ma le mafana i olaga o a tatou uo. Tatou te aufaatasi i mea latou te olioli ai ma o latou faanoanoaga, ma faatagaina i latou e matuā pāʻia loloto i tatou. Ae o le mea moni, e tatau ona tatou faaeteete ina ia aua neʻi faatagaina le aafia o o tatou faalogona e faaseseina i tatou i le aiā fua i a latou mataupu totino.—1 Peteru 4:15.

O le malosi o lo tatou pipii totino atu i a tatou uo, ua faamatalaina ai foi le pogai e masani ai ona tatou taumafai e faafiafia i latou. Afai e iloa e se tasi tatou te masani ai le lē lelei po o le lē saʻo foi o sa tatou amio, o lona lē fiafia e lē uunaia ai i tatou e fai se suiga. Ae o se uo, o le mea moni, e mafai ona ia faia se taaʻiga malosi ia i tatou a lē i mataupu tau i laei, amio, po o uiga faaalia.

Ae e tusa ai ma le maufaatuatuaina, tiga alofa, faaaloalo, ma le faamaoni, e mafai e le faigauo ona maua se tulaga sili ona maualuga o nei tiute tauave na i lo o se masaniga. I se isi itu, o sē e talosaga mo se faigauo, ae e leai ni tiute tauave e aafia ai, o le mea moni la ua na ona manao i se masaniga, ae e lē o se uo. O uo mamae e fiafia e faataunuuina tiute tauave e aafia ai e ala i se piitaga malosi totino, i le iloa faapea o nei mea ua avatu ai ia i laua se avanoa e faamaonia ai la laua faigauo.

Faigauo ma le Atua

Ona o Lē na Foafoaina Mea, ua avea ai Ieova o le Tamā faalelagi o le fanau a tagata, ma ua tatau ai ona alolofa, usiusitai, ma faaaloalo ia te ia. Ae e finagalo o ia i le fanau a tagata ina ia faia lenei mea ona o se piitaga totino malosi, ae e lē na o se lagona faapea o se tiutefai. (Mataio 22:37) E finagalo foi o ia ia i latou ina ia alolofa atu ia te ia o sa latou Uo. (Salamo 18:1) Talu ai ona “na ia muai alofa mai ia te i tatou,” na faataatia ai e ia lava le faavae lelei atoatoa mo sea faigauo.—1 Ioane 4:19.

O o tatou uluai mātua, o Atamu ma Eva, sa masani ma Ieova. O le fesili la: Po o le a laua talia lana ofo mo se faigauo? E faanoanoa e faapea atu, e leai, la te leʻi talia. O lo la faanaunau ma le manatu faapito e fia tutoatasi mai le Atua, ua faaalia ai le leai o se faalogona o se piitaga totino malosi atu ia te ia. Na i lo o le loto malilie e talia faamanuiaga o le faigauo sa ia ofoina atu, sa la lē mananao e faataunuuina ona tiute tauave. Sa foliga mai e pei e na ona la mananao e olioli i le lafulemu ma le saogalemu o lo la aiga Parataiso mafana e aunoa ma le loto malilie e totogi atu lo la nofo aitalafu.

O i tatou uma lava, o nisi ua sili atu i lo o isi, ua fai mo o tatou tofi tuufaasolo lenei agaga o le lē talisapaia ma le fia tutoatasi. (Kenese 8:21) Mo se faaaʻoaʻoga, o nisi tagata talavou, ua faatagaina o latou faanaunauga faaletagata mo le fia tutoatasi latou te lē talisapaia ai o latou mātua. O lenei mea ua iʻu ai i le faamalepeina o le faigauo sili ona tāua lea e ao ona iai i le va o i latou ma o latou mātua i le olaga atoa. Ae peitai, e sili ona faanoanoa, ona o lenei mea, ua faamalepeina ai la tatou faigauo ma lo tatou Tamā faalelagi lea e matuā sili atu ona uigā. O le mea moni, e mafai ona iʻu ai i le oti!

Mea Manaomia mo le Faigauo

A leai se mau faatuatuaina, e lē mafai ona tumau se faigauo pe i le va ma tagata po o le va ma le Atua. Sa malamalama le tamā matua o Aperaamo i lenei mea, ma o le pogai lena sa ia faaalia ai pea lava pea lona matuā maufaatuatuaina o le Atua. Faitau le Kenese 12:1-5 ma le 22:1-18, ma iloa ai faaaʻoaʻoga mataʻina e lua o lona maufaatuatuaina o Ieova. Ioe, “na faatuatua Aperaamo i le Atua, ona taʻua ai lea ia te ia e fai ma amiotonu.” O le mea foi lea “na taua ai o ia o le uo a ‘Ieova.’”—Iakopo 2:23, NW.

O se isi manaoga atili mo le faigauo ma le Atua, o le ausia lea o matafaioi o loo aafia ai i lenei faigauo. Ona o lo tatou tulaga maulalo i le feagai ai ma Ieova, ua avea moni ai nei tiute tauave o ni mea sili ona mamafatū na i lo o le mea e iai i se faigauo ma tagata. E sili mamao atu nei tiute tauave na i lo o lo tatou mananao e faafiafia o ia i nisi o mea—e pei ona o le a tatou faia i se uo faaletagata. E aofia ai i na mea lo tatou mananao e faafiafia o ia i mea uma lava. O Iesu, le Alo o le Atua ma o sana uo sili ona mamae, na ia faaalia lenei mea ina ua ia fetalai e uiga ia Ieova: “Ou te faia pea lava o mea e lelei ia te ia.”—Ioane 8:29.

I lea, e lē mafai ona faia se faigauo ma Ieova po o lona Alo, pe a leai ni tiute tauave o fesootaiga e faavae ai; e faalagolago lea faigauo i lo tatou ola e tusa ma tuutuuga manaomia ua uma ona la faataatia mo le faigauo. (Tagai i le Salamo 15:1-5.) Na faaalia manino lenei mea e Iesu i la latou talanoaga ma ona soʻo. Na ia taʻu atu ia i latou, “O aʻu uo outou, pe afai tou te faia mea uma lava ou te fai atu ai ia te outou.”—Ioane 15:14.

O le isi mea manaomia mo le faigauo, o le tatala tuusaʻo o fesootaiga. I le aso o lona maliu, na taʻu atu ai e Iesu i ona aposetolo faamaoni: “Ou te le toe taʻua outou o auauna, auā e le iloa e le auauna mea e fai e lona alii; a ua ou taʻua outou o uo, auā ua ou faailoa atu ia te outou mea uma na ou faalogo ai i loʻu Tamā.” (Ioane 15:15) I le fetufaʻi o ona mafaufauga ma ana uo, na mulimuli ai Iesu i le faaaʻoaʻoga a lona Tamā faalelagi, o lē ua faapea mai ai le Amosa 3:7: “E le faia lava se mea e le Alii o Ieova, a e faaalia lona finagalo i ana auauna o perofeta.”

Pe e lē o le mea masani ea lenei i faigauo? Atonu tatou te lē lagona se uunaiga ina ia fetufaʻi mea e tutupu i o tatou olaga ma Mr. Smith lena e i le isi itu o le auala. Ma o le mea e sili ona faamautinoa mai ai ia i tatou o lo tatou lē mananao lea e taʻu atu ia te ia o tatou mafaufauga ma faalogona loloto i totonu o i tatou. Auā i lo o mea uma lava, ua na o ia o sē tatou te masani ai. Ae i a tatou uo, ioe, e masani lava ona tau lē mafai ona tatou faatali i le fia taʻu atu o na mea ia i latou!

E faapena foi i la tatou faigauo ma le Atua. E faigata lava ona tatou faatali e talanoa atu ia te ia i le tatalo, e faailoa atu ia te ia o tatou manaoga, faanaunauga, ma o tatou faalogona loloto. O le mea moni, afai e fai itutasi le fesootaiga, o le a lē pine lava ae mate le faigauo. O lea, e tatau foi ona tatou loto malilie e tuu atu i le Atua e talanoa mai ia i tatou. Tatou te faia la lenei mea e ala i le faalogologo ma le faaeteete i lana Afioga tusia, mafaufau loloto i ana fautuaga, ia ona tatou faatatauina loa lea i le mea aupito sili ona lelei tatou te mafaia.

E Tāua Faapefea ia te Oe le Faigauo ma Ieova?

Ina ia fesoasoani ia te oe e tali lenei fesili, ia manatunatu i se ituaiga o faigauo faapitoa ma se tagata. Afai o oe o se tagata talavou, atonu la o loo e faanaunau i se faigauo e oo atu ai ina lua faaipoipo. O le mea moni, ua e iloa faapea, o le na o le faamasani ma le paaga lea ua e manatu e faaipoipo atu i ai, e matuā faigata ona avea o se faavae saʻo mo se faaipoipoga. O le masaniga, e tatau ona muamua avea o se faigauo. Ona mafai lea ona atiina aʻe o lenei faigauo ina ia foliga mai o se faiā sili ona vavalalata lea o le a iʻu i le faia aʻe ai o se faavae saʻo mo se faaipoipoga fiafia.

Seʻi mafaufau nei la. O le ā le tele o taumafaiga ua faia e le toatele o tagata ina ia atiina aʻe ai lenei ituaiga o faigauo? O le ā le tele o le taimi ma tupe ua latou faaaluina i le faavaeina ma i lea, ia tausia ai pea le lelei? O le ā le tele o le taimi o latou faaaluina e mafaufau i ai? O le ā le tele o latou faia ai ni fuafuaga—po o le faaalia o le nofo sauni e suia fuafuaga—ona o le fuafuaga ina ia faaleleia ma tausia ai lenei faiā?

Ia ona e fesili ifo lea o oe ia te oe lava: ‘E faapefea ona faatusatusa o lenei mea ma aʻu taumafaiga ina ia atiina aʻe se faigauo ma Lē na Foafoaina aʻu, ia po o le faaleleia foi ma faamalosia ai? O le ā le tele o le taimi o loo oʻu faaalu e faia ai faapea? O le ā le tele o teu ai pea i loʻu mafaufau le faigauo ma Ieova? O le ā le tele o aʻu fuafuaga fai—po o le faaalia o le loto malie e suia fuafuaga—ona o le manatu ina ia faaleleia ma i lea ia tausia ai pea lenei faiā?’

E ao i talavou Kerisiano ona iloa lelei faapea o faigauo faaletagata uma lava, e aofia ai ma lea e iʻu i se faaipoipoga, e tulaga lua lona tāua i le faigauo o latou mananao e faia ma Lē na Faia i latou. O le pogai lena ua uunaia ai i latou i le Failauga 12:1: “Ia e manatua le na faia oe i ona po o lou taulealea.” E toatele o loo latou faia lenei mea e ala i le auauna atu mo le lautele e avea o ni faifeau a le Atua, ma o se fuainumera sili ona toatele o i latou sa leʻi faapea ona iai muamua, ua auauna o ni faifeau talaʻi faataimiatoa, po o paeonia.

E ui i le tupu tele o le manatu faapito ma le tetee i lotu o loo siomia ai i latou, ae e puipuia ma le lototetele e i latou nei Ieova, pe a latou faalogo i tauemuga ma tuuaʻiga sese ua faia faasaga ia te ia. Pe e lē o le uiga ea lea e ao ia Ieova ona faatalitalia ma le tonu mai ana uo? Pe e lē o le mea ea foi lea e ao ona tatou faatalitalia mai a tatou uo? Ma pe e lē olioli ai ea o tatou loto pe a tatou iloa o loo faia faapea ma le maelega ma le talitonu faamaoni e a tatou uo?—Faatusatusa i le Faataoto 27:11.

Ioe, o le faigauo ma le Atua—e oo lava i faigauo faaletagata—e aumaia ai tiute tauave na e tatau ona faataunuuina pe afai e manaomia ona tumau se faigauo. O se tagata e lē o lotomalie e talia nei tiute tauave, pe e lē o nofo sauni e fai se tuuina atu i le Atua ma ia faaauau ona faatinoina, o le mea moni e mafai ona faamasani ma Ieova. Ae peitai, e ao ona ia tofo muamua i le olioli o le avea o Ia ma ana Uo.

[Ata i le itulau 25]

Na faatuatua Aperaamo i le Atua o lea na taʻua ai o ia o le uo a Ieova