Le Olomatamata—O Taumafa Faaleagaga i le Taimi Tatau

¹ Ua toeitiiti 114 tausaga, o loo timaʻi pea Le Olomatamata i ona tagata faitau ina ia mataala pea faaleagaga. O lona soa le mekasini o le Awake! ua faatupuina se mautinoa i le folafolaga a Lē na Foafoaina Mea e uiga i se lalolagi fou filemu ma le saogalemu i lo tatou lava tupulaga. Ua avea nei lomiga e lua o ni meafaigaluega faamaoni i le faamalamalamaina o lo tatou ala i se lalolagi ua matuā pogisa. (Isaia 60:2) E lē taitai ona suia le upu moni o le Afioga a le Atua, ae ua faasolo pea ina manino lo tatou malamalama i ai, a o faaaogāina e Ieova nei meafaigaluega, ma isi foi ina ia aumaia ai ia i tatou ‘taumafa faaleagaga i le taimi tatau.’—Mata. 24:45; Faata. 4:18.

² Ia Matuā Faaaogā Lelei Mekasini: E mafai ona tatou faaali atu lo tatou loto faafetai mo le faamalamalamaina faaleagaga ua tatou maua, e ala i le matuā faalaeiauina o isi ina ia faitau Le Olomatamata ma le Awake! O le tulaga masani, tatou te lē ofoina atu se tusiga i la tatou uluai asiasiga i le galuega mai lea fale i lea fale po o le molimau atu lē fuafuaina. O le toatele o tagata ua latou maua ni kopi o mekasini e lē aunoa, ma e manino mai lo latou fiafia e faitauina. O tagata la nei atonu latou te talisapaia le avanoa e maua ai se tusiga mo le ono masina. Peitai, e sili atu ai pe a ofo lomiga taitasi o mekasini i tagata e ona fale, o ē e lē masani lelei i a tatou lomiga ma atonu foi e itiiti so latou talisapaiaina o le tāua o lomiga.

³ E mafai faapefea ona e faamautinoaina le moni o se naunau fiafia? A o e faatomua atu ni manatu autū se tasi pe lua o se mekasini, o se sāvali, po o se polosiua, ia e mātau lelei le tali mai a lē ona le fale. Po o matuā uaʻi mai ea lana faalogologo? Po o faaaloalo mai o ia i le Tusi Paia ma mulimuli mai i le faitauina o mau o le Tusi Paia? Po o tali mai o ia i fesili na e maua ai manatu tāua? Afai o lena le tulaga, e mafai ona e fuafua e toe asia i se isi taimi o lena lava vaiaso po o se isi lava taimi vave, ma olioli ai i se talanoaga atili. Afai e manino mai sa faitau e lē ona le fale le lomiga lea na e tuua i ai, ma e fiafia foi e talanoa i mea faaleagaga, e mafai ona e fesili atu ia te ia pe na te talisapaia le mauaina e lē aunoa o mekasini.

⁴ O lomiga taitasitasi o mekasini e mafai ona ofo atu i uō i galuega, i uō i aʻoga, ma tauaiga. E mafai foi ona ofo atu mekasini i tagata e masani ai i pisinisi ma i le galuega o le molimau atu i ala tetele.

⁵ E tatau ona maua e tagata talaʻi mekasini fou i le taimi lava e avatu ai i le faapotopotoga. Pe a e mauaina se lomiga fou, ia matuā lelei ona e faamasani atoatoa i ai. O ā mataupu e sili ona manatu mamafa i ai tagata o lou vaipanoa? Po o le filemu ea ma le saogalemu i le lalolagi? Le tamāoaiga? Se pulega malo e lelei? Le siosiomaga? O le tulaga ua mataʻina, ona ua faasino saʻo atu e Le Olomatamata tagata i le na o le pau lava le vaifofo tumau, o le Malo lea o le Atua. (Tani. 2:44; Mata. 6:10) O le meaalofa lē mafaatusalia moni lava lea mai lo tatou ‘Aʻoaʻo Sili.’—Isaia 30:20.

⁶ Ua ofoina mai ia i tatou e masina o Aperila ma Me ni avanoa ua sili ona lelei e tuutoina atu ai se taimi tele i le auaunaga i le fanua. Talu ai o Me e lima ona faaiʻuga o le vaiaso, e toatele foi la o le a avea ma paeonia lagolago. Tatou te mafaia uma lava ona faataatitia ni sini totino i le taimi nei, ina ia faateleina la tatou auaunaga i le fanua i nei masina e lua, ma ia matuā faalaeiau atu ai i tagata uma tatou te feiloai i ai, ina ia faitau Le Olomatamata ma le Awake!