Mataupu 5
Le Saolotoga ua Olioli ai Tagata Tapuai o Ieova
1, 2. (a) O le ā le ituaiga o saolotoga na avatu e le Atua i le uluai ulugalii? (e) Taʻu mai nisi o tulafono sa pulea ai a la gaoioiga.
INA ua foafoaina e Ieova le uluai ulugalii, sa la olioli i se saolotoga e sili mamao atu i so o se saolotoga ua iai i tagata i aso nei. Na avea le Parataiso ma o la aiga. E aunoa ma se faamaia na faaleagaina ai lo la fiafiaga i le olaga. Sa lē o le oti lo la taunuuga. Peitai o le faaaloalo mo tulafono a le Atua sa o se itu tāua i le faaauau pea ona la maua o sea saolotoga.
2 O nisi o na tulafono atonu sa leʻi fofogaina atu, peitai na faia Atamu ma Eva i se auala ua avea ai ma masani le usiusitai i ai. O lea ua tagisia ai e le laualo le manaoga e ʻai; le galala, le manaoga e inu. O le goto ifo o le la ua faamalosia ai i laua ia maua le malōlō ma le moe manaomia. Na fetalai foi Ieova ia te i laua ma avatu ia i laua se galuega tofia. E mautinoa o lena tofiga o se tulafono, auā o le a pulea ai a la gaoioiga. Peitai maeu se agalelei ma le aogā o lena tulafono! Na avatu ai ia i laua galuega o le a matuā faamalieina ai, ma e mafai ona faaaogā atoatoa ai o la tomai i ni auala e manuia ai. O le a la aumaia ni fanau, faatino le pule i luga o meaola faalelalolagi ma faasolosolo ona faalautele tuaoi o le Parataiso seia aofia ai le lalolagi atoa. (Kene. 1:28; 2:15) Sa leʻi faavaivaia i laua e le Atua i ni auiliiliga faaletatau. E anoanoai mea sa faatagaina mo i laua e filifili ai. O le ā se isi mea e toe manao i ai se tasi?
3. Sa mafai faapefea ona fesoasoania Atamu e faaaogā ma le atamai lona saolotoga e faia ai faaiuga?
3 E moni, ina ua lautogia Atamu i le faaeaga o le faia o faaiuga, sa lē uiga ai faapea so o se faaiuga lava atonu na te faia, e tusa lava po o le ā, ae o le a fua mai ai ni āuga lelei. O lona saolotoga e faia faaiuga sa aofia ai ni avega tauave. Sa mafai ona ia aʻoaʻo e ala i le faalogologo i lona Tamā faalelagi ma matauina Ana galuega, ma na tuu e le Atua ia Atamu le atamai e mafai ai ona ia faatatauina mea sa ia aʻoaʻoina. Talu ai sa foafoaina Atamu i le “faatusa o le Atua,” o lona faanaunauga masani la o le faaatagia lea o uiga faaleatua pe a faia faaiuga. E mautinoa o le a ia faia ma le faaeteete lena mea pe afai na te talisapaia moni le mea na faatino e le Atua mo ia ma manao e faafiafia le Atua.—Kene. 1:26, 27; faatusatusa i le Ioane 8:29.
4. (a) Pe na faoa e le poloaiga sataputapu na avatu ia Atamu lona saolotoga? (e) Aisea na avea ai o se mea manaomia talafeagai?
4 I le avea o se faamanatu i le faalagolago o le tagata i Lē na Foafoaina o ia ma le Foai ola, na faataatia ai e Ieova lenei poloaiga ia te ia: “O laau uma o i le faatoaga e te ʻai ai. A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.” (Kene. 2:16, 17) Pe na faoa ea e lena tulafono le saolotoga o le tagata? E mautinoa e leai. Sa tuufaitalia Atamu e usiusitai pe lē usiusitai i ai. Na aunoa ma se mafatiaga na faalālā atu e lea faasasaaga. Sa fau ma soloi ana mea taumafa e aunoa ma le tagofia o lena laau e tasi. Ae sa talafeagai ona ia iloa faapea o le lalolagi o loo ia mau ai e ā le Atua, ma ona o Lē na Foafoaina Mea, ua tonu ai la ona avea le Atua ma Pule o ana foafoaga.—Sala. 24:1, 10.
5. (a) Sa faapefea ona leiloa e Atamu ma Eva lo la saolotoga mamalu na iai? (e) O le ā na sui tulaga ai, ma ua faapefea ona afaina ai i tatou?
5 Peitai o le ā na tupu? I le uunaia e naunautaiga manatu faapito, na faaseseina ai Eva e se agelu i le faafoliga atu o se taiala saʻo, ma faamautinoaina ai o ia i se mea e feteenai ma le finagalo o le Atua. Na i lo le usiusitai i lona Tamā, sa aufaatasi Atamu ma Eva i le solitulafono. E ala i le aapa atu mo se mea e lē tau ia i laua, na leiloa ai e Atamu ma Eva le saolotoga mamalu na la maua. Na avea le agasala ma o la matai, ma e pei ona sa lapataia e le Atua, e mautinoa o le oti lo la taunuuga. O le iuga, o le ā le taui ua faasolo mai i a la fanau? O le agasala, ua faaalia lea i le soona tosina atu i le amioleaga, i vaivaiga ua ulufia ai se tasi i faamai ma faasolo ina mafatia i le olaga matua. Atoa foi ma le oti. O le faanaunauga tuufaasolo mo le amioleaga, na faateleina e aafiaga faa-Satani, ua fua mai ai se sosaiete ua faafaigataina le olaga mo tagata uma. Pagā se eseesega ma le saolotoga na tuu mai e le Atua i tagata i le amataga!—Roma 5:12; Iopu 14:1; Faaa. 12:9.
LE MEA E MAFAI ONA MAUA AI LE SAOLOTOGA
6. (a) O fea e mafai ona maua ai le saolotoga moni? (e) O le ā le ituaiga o saolotoga na fetalai i ai Iesu i le Ioane 8:31, 32?
6 Ona o tulaga o aso nei, e lē o se mea e ofo ai le moomoo o tagata mo se saolotoga e sili atu na i lo lea o loo ia i latou. Peitai o fea e mafai ona maua ai le saolotoga moni? Na fetalai Iesu Keriso: “Afai tou te tumau pea i laʻu mataupu, o oʻu soo moni outou. E iloa foi e outou le mea moni, e tuu saʻoloto foi outou e le upu moni.” (Ioa. 8:31, 32) O lenei saolotoga e lē o le ituaiga e gata mai lea e faamoemoe i ai tagata pe a latou teena se tasi o taʻitaʻi faapolotiki po o se faiga pulega ona ua mananao i le isi. Na i lo lea, e taulai tonu lava i le aa o faafitauli o tagata. O le mea sa talanoaina e Iesu o le saolotoga mai le agasala, ma le nofo pologa i le agasala. (Tagai i le Ioane 8:24, 34-36.) O lea afai e avea se tagata ma soʻo moni o Iesu Keriso, o le a iu lenei i se suiga iloga i lona olaga, se tuusaolotoga.
7. (a) I le ā la le uiga e mafai ai ona tatou saoloto mai le agasala i le taimi nei? (e) Ina ia maua lena saolotoga, o le ā e tatau ona tatou faia?
7 E lē o le uiga o lena mea faapea e lē toe lagona e se Kerisiano moni i le taimi nei āuga o aafiaga tuufaasolo agaʻi i amioga agasala. I le tuufaafeagai, o loo latou faia se tauiviga ona o lea itu. (Roma 7:21-25) Peitai afai e ola moni se tagata i le ogatasi ma aʻoaʻoga a Iesu, o le a lē toe avea ai o ia o sē nofo pologa i le agasala. E lē toe avea ai le agasala e pei o se pule ia te ia e aumaia faatonuga e usiusitai i ai o ia. O le a lē toe maileia o ia i se auala o le olaga e leai se faamoemoe ma tuua ai o ia ma se loto fuatiaifo ua oia. O le a ia olioli i se loto fuatiaifo mamā i luma o le Atua auā ua faamagaloina agasala ua tuanai e faavae i lona faatuatua i le taulaga a Keriso. Atonu e taumafai faanaunauga agasala e faamaite aʻe lava i latou, peitai afai na te lē fia faatinoina ia faanaunauga ona ua toe fafagu mai i lona mafaufau aʻoaʻoga mamā a Keriso, o le a ia faaalia ai e lē o sona matai le agasala.—Roma 6:12-17.
8. (a) O le ā le saolotoga atili ua aumaia e le Faa-Kerisiano moni mo i tatou? (e) E ao faapefea i lenei mea ona aafia ai o tatou uiga i taʻitaʻi faalelalolagi?
8 Ona o ni Kerisiano ua tatou olioli ai i se saolotoga sili. Ua tuusaoloto mai i tatou i aafiaga a aʻoaʻoga sese, mai le noanoatia i faiga faataulaitu ma le nofo toilalo i le agasala. O upu moni matagofie i le tulaga o ē ua maliliu ma le toetu ua faasaoloto ai i tatou mai le mataʻu fua i le oti faataugā lea ua faapogaia ai le momomo o loto fuatiaifo o tagata. O le iloa faapea o le a suia pulega lē lelei atoatoa faaletagata e le Malo amiotonu o le Atua, e tuusaoloto ai i tatou mai le leai o se faamoemoe. Peitai o sea saolotoga ua lē faatagaina ai se faaleamanaia o le tulafono po o le lē faaaloalo mo ofisa faalemalo i le manatu faapea o le a toeitiiti mavae le faiga tuai o mea.—1 Pete. 2:16, 17; Tito 3:1, 2.
9. (a) Ua faapefea ona fesoasoani ma le alofa Ieova ia i tatou e olioli ai i se faatatauga sili o le saolotoga ua mafaia nei mo tagata? (e) I le faia o faaiuga, e mafai faapefea ona tatou faaalia o loo tatou manino ma malamalama i le mea na iu i ai le melea e Atamu o lona saolotoga?
9 Ua lē tuulafoaia i tatou e Ieova ia fuafuaina po o lē fea auala e sili ona lelei e ola ai, e ala i le tofotofoina ma iloa pe lelei pe leaga. E lē o lilo ia te ia lo tatou fausaga, le mea o le a na aumaia ia i tatou le faamalieina moni ma se faalogona o le nenee totino, ma le mea o le a sili ona aogā e faavavau mo i tatou. Ua ia silafia foi lana faasologa o taimi mo le faataunuuina o lana fuafuaga, atoa foi ma gaoioiga e sili ona aogā tatou te auai. E faapena foi ona ia utagia manatu ma amioga e mafai ona paʻū ai se tagata pe faaleagaina ai lana faiā ma isi, ma oo ina taofia ai o ia mai faamanuiaga o le Malo o le Atua. Ua ia talatala mai ma le alofa ia i tatou nei mea i le Tusi Paia ma e ala i lana faalapotopotoga vaaia. (Kala. 5:19-23; Mare. 13:10; faatusatusa i le 1 Timoteo 1:12, 13.) O lea e faitalia i tatou i le faaaogāina o lo tatou saolotoga mai le Atua, e filifili ai pe faapefea ona tatou tali atu. Afai tatou te ave i fale mea ua taʻu mai e le Tusi Paia ia i tatou e faatatau i le faapefea ona leiloa ia Atamu o le saolotoga na tuu mai i tagata i le amataga, o le a tatou faia la ma le atamai na faaiuga. O le a tatou folasia ai faapea o lo tatou faanaunauga autū i le olaga o le iai lea o se faiā lelei ma Ieova.
MOOMOO I SE ISI ITUAIGA O SAOLOTOGA
10. O le ā le ituaiga o saolotoga ua aapa atu i ai nisi o ē faapea mai o Kerisiano?
10 E iai taimi e lagona ai e nisi talavou sa tausia aʻe o ni Molimau a Ieova, ma isi e lē laiti tele, faapea latou te mananao i se isi ituaiga o saolotoga. Atonu e foliga feilafi mai le lalolagi, ma o le tele o lo latou mafaufau i ai o le malosi foi lea o lo latou tuinanau e faia mea o loo faatino e tagata o le lalolagi. Atonu latou te lē o fuafua e onana i fualaau faasaina, ia inu tele pe faia le faitaaga. Peitai ua amata ona latou faaaluina taimi pe a tuua le aʻoga po o le maeʻa o itula faigaluega ma a latou aumea faalelalolagi. O le mea moni, latou te mananao ia taliaina i latou e a latou aumea fou, ona amata loa lea ona latou faaaoao i a latou upu e tautatala ai ma a latou amio.—3 Ioa. 11.
11. Mai fea e sau ai i nisi taimi faatosinaga e faia faapea?
11 I nisi taimi o faatosinaga e auai i amioga faalelalolagi e sau mai se isi tagata o loo faapea mai e auauna ia Ieova. O le mea lena na tupu i Etena ina ua ooleina e Satani Eva, ma ina ua uunaia e Eva Atamu e aufaatasi ma ia. Na moni foi lea i le lotolotoi o uluai Kerisiano, ma o le mea lava e tasi o loo tupu i o tatou aso. O tagata faapena e masani ona pupū i mitamitaga ma moomoo i mea e aumai ai faafiafiaga soonafai. Latou te uunaia isi e “faia ni fiafiaga.” Ua latou ‘folafola atu le saolotoga, a o i latou lava ua fai ma pologa o le amio leaga.’—2 Pete. 2:18, 19.
12. (a) O ā iuga faanoanoa o amioga faalelalolagi? (e) Afai ua iloa e i latou o loo aafia ai āuga, ae aisea latou te faaauau ai pea ona faia ia mea?
12 E lē manuia lona taunuuga. O feusuaiga faaleituaiga lē faatulafonoina e iu i faalogona lē mautonu. E ono taitaia foi i faamaʻi, se to e leʻi manaomia ma atonu e malepe ai le faaipoipoga. (Faata. 6:32-35; 1 Kori. 6:18; 1 Tesa. 4:3-8) O le faaaogā sese o fualaau faasaina e ono faapogaia ai le faasoesa, nunumi le tautala, puaoa le vaai, niniva, lē lava le malosi e mānava ai, maʻi valea ma le oti. (Faatusatusa i le Faataoto 23:29-35.) E iu ina avea ai ma mea e faalagolago i ai, lea e ono taitaia i le solitulafono ina ia lagolagoina lena masani. O le tulaga masani ua iloa lava e i latou ua aafia i na amioga le taunuuga e mafai ona oo i ai. Peitai ona o lo latou moomoo ia faafiafia ma ia faamalieina faaletino ua mafua ai ona latou mumusu e mafaufau i ona āuga. Ua latou faapea ifo ia i latou lava o le saolotoga lea, ae latou te iloa mulimuli ane, a ua fai si tuai, ua avea i latou ma pologa a le agasala, ma pagā se matai sauā o le agasala! O le fefulisaia nei o le mataupu e mafai ona fesoasoani e puipuia ai i tatou mai mea tutupu faapena.—Kala. 6:7, 8.
LE AMATAGA O FAAFITAULI
13. (a) E masani faapefea ona tutupu aʻe faanaunauga e ono taitaia ai i nei faafitauli? (e) Ina ia malamalama po o ā “aumea leaga,” o le manatu o ai tatou te manaomia? (i) A o e taliina fesili i le faaiuga o le palakalafa, faamamafa le manatu o Ieova. Ia auauai ona talanoa i fesili taitasi.
13 Faatali ma mafaufau po o fea e masani ona amata ai na faafitauli. Ua faamatala e le Tusi Paia e faapea: “A ua taitasi ma faaosoosoina, pe a tosina ma maileia i lona lava tuʻinanau; pe a to le tuʻinanau ona fanau mai ai lea o le agasala; a matua le agasala ona fanaua mai ai lea o le oti.” (Iako. 1:14, 15) Peitai e faapefea ona mapuna aʻe na faanaunauga? E ala i mea e alu i le mafaufau, ma e masani o se iuga lenei o le auaumea ma tagata o ē lē faatinoina mataupu silisili o le Tusi Paia. O le mea moni, ua tatou silafia uma lava e tatau ona tatou alofia “aumea leaga.” Ae o le fesili, O lē fea ituaiga o aumea e leaga? E faapefea ona tagai Ieova i le mataupu? O le talanoaina o fesili ma mau o loo mulimuli mai e ao ona fesoasoani ia i tatou e taunuu ai i ni faaiuga talafeagai.
Po o le mea moni a foliga amio lelei mai ni tagata, o lona uiga o le a avea ai i latou ma aumea lelei? (Faatusatusa i le Kenese 34:1, 2, 18, 19.)
Pe mafai e a latou talanoaga, atonu po o a latou tausuaga, ona faaalia ai pe ao ona tatou auaumea vavalalata ma i latou? (Efe. 5:3, 4)
Faamata e iai se mafuaaga tatou te popole ai pe afai e lē tutusa o latou talitonuga ma tatou e uiga i fuafuaga a le Atua? (Faatusatusa i le 1 Korinito 15:12, 32, 33.)
O le ā le lagona o Ieova pe a tatou filifili e auaumea ma tagata o ē lē alolofa ia te ia? (Faatusatusa i 2 Nofoaiga a Tupu 19:1, 2.)
E ui atonu tatou te faigaluega faatasi ma tagata lē talitonu pe ō faatasi ma i latou i le aʻoga, ae e mafai faapefea ona tatou faaalia tatou te lē o filifilia i latou o ni aumea? (1 Pete. 4:3, 4)
O le matamata i le televise ma le faitauina o tusi, mekasini ma nusipepa o ni auala foi ia o le auaumea faatasi ma isi. O ā ituaiga o mataupu mai ia mea o loo iai se manaoga faapitoa e puipuia ai i aso nei? (Faata. 3:31; Isa. 8:19; Efe. 4:17-19)
O le ā ua taʻu atu e a tatou filifiliga o aumea ia Ieova e tusa ma le ituaiga o tagata e iai i tatou? (Sala. 26:1, 4, 5; 97:10)
14. O le ā le saolotoga sili o loo taatia i lumamea mo i latou o ē faatatauina faamaoni le fautuaga a le Afioga a le Atua i le taimi nei?
14 Ua matuā latalata mai le Faiga Fou a le Atua. E ala i Lona Malo o le a tuusaoloto ai tagata mai le faapologaina i aafiaga a Satani ma lana faiga aoao amioleaga o mea. O āuga uma o le agasala o le a faasolosolo ona aveesea mai tagata. Ua i o latou luma le ola e faavavau i le Parataiso. O se saolotoga e ogatasi atoatoa ma “le agaga o Ieova” o le a mulimuli ane ona olioli ai lea o foafoaga uma. (2 Kori. 3:17, NW) Faamata e talafeagai le maimau ona leiloa o na mea uma ona o le manatu māmā i le fautuaga a le Afioga a le Atua i le taimi nei? Tau ina ia tatou faaalia manino uma i le auala o loo tatou faaaogāina ai lo tatou saolotoga faa-Kerisiano i aso nei e faapea, o le mea o loo tatou mananao moni i ai o “le saolotoga o le fanau a le Atua e manuia ai.”—Roma 8:21.
Talanoaga Autalu
● O le ā le ituaiga o saolotoga na olioli ai le uluai ulugalii? E faapefea ona faatusatusa lena ma le mea ua oo i tagata i aso nei?
● I le eseesega ma le lalolagi, o le ā le saolotoga ua iai i Kerisiano moni? Ua taulau faapefea lenei mea?
● O le ā le tau ua totogia e i latou o ē sailia le ituaiga o saolotoga o loo iai i le lalolagi?
● Aisea e matuā tāua ai le alofia o “aumea leaga”? E lē pei o Atamu, o faaiuga a ai tatou te taliaina e faatatau i le mea ua leaga?