Talisapaia Lau Auaunaga Paia

INA ia ausia so o se sini e aogā, e tatau ona tatou nofo sauni e faaalu ai ni mea. Ina ia avea o se fomai, e faaalu ai le tele o tausaga i suesuega, ma le maumauai, faapea foi ma tupe. O se tagata taalo (gymnast) e manao ina ia taulau, na te faaaluina le tele o lona olaga talavou e galue maelega ai ina ia faaleleia masaniga na e sili atu ona faigata i se tauiviga ina ia atoatoa ona lelei. E faapena foi i se tagata tomai i le ta piano, e mafai ona toe tepa i tua i tausaga e tele na tuuina atu i le aʻoaʻoga.

Ae peitai, e na o le tasi lava le sini e maua mai ai taui e sili mamao atu na i lo o mea na faaalu. O le ā lena sini? O le faaeaga o le avea o se auauna a Lē Silisili ona Maualuga, o Ieova le Atua. Po o ā lava ni taulaga uma ua tatou faia e ala i le foaiina atu o le taimi, tupe, po o le malosi, ae o le faaeaga o le tuuina atu o le auaunaga paia i Lē na Foafoaina i tatou, e aumaia ai taui e lē mafaatusaina. Ua moni ai upu a le aposetolo o Pauro: “A o le amio Atua e aoga lea i mea uma lava, o loo i ai le mea ua folafolaina mai i la le olaga nei atoa ma lē atali.” (1 Timoteo 4:8) Seʻi o tatou vaai po ua faapefea ona moni o lena mea.

Ina ua Tatou Uluai Aʻoaʻoina e Uiga i le Atua

O le toatele o ē ua talia fiafia le tala lelei ma amata ona suesue le Tusi Paia, e foliga latou te lē iloa le tele o suiga o le a iu i ai ō latou olaga. Muamua, atonu ua lē toe iai i le tagata aʻoga fou o le Tusi Paia ana uo, o ē e lē o malamalama i le mafuaaga ua ia lē toe auaufaatasi ai ma i latou i mea o loo latou tuliloa, ia ua ia iloa nei e lē viia ai le Atua. (1 Peteru 4:4) Atonu ua tofo nisi i teteega mai aiga, ma lagona ai le tiga pe a vaai atu i ē latou te alolofa i ai o faaalia se lē fiafia, po o le inoino foi i a Ieova. (Mataio 10:36) E mafai ona avea lena ma mea e faigata ona faafetaiaia.

I le galuega po o le aʻoga, o le a iai foi se luʻi e tatau ona faafetaiaia. I le taimi lea, atonu ua taofia ai e le tagata aʻoga fou o le Tusi Paia lona toe auai i patī faalelalolagi ma isi aso faamanatu. O le a lē toe fia faalogologo o ia i talanoaga leaga a ana aumea i le galuega po o uo i le aʻoga, pe lē tali atu foi i a latou tausuaga i upu matagā. Na i lo o lea, o le a ia taumafai e faatinoina le apoapoaiga o loo maua i le Efeso 5:3, 4: “A o le faitaaga, ma amio leaga uma, po o le manumanu foi, aua neʻi taʻua lava ia te outou, e pei ona tatau i e ua paia. O le anovale foi, ma le tautala i upu faatauvaa, ma le faaulaula, o mea ia e le tatau; a o le faafetai e lelei lava lea.”

O suiga faapena o le a avea ai le tagata aʻoga o le Tusi Paia o se tagata ese. Ma o se mea faigata lena, ae maise lava mo se talavou o loo iai pea i le aʻoga. I le feagai ai ma lea aso malōlō ma lea aso malōlō, faapea ma aʻoaʻoga e tetee i le Atua, e pei o le evolusione, atoa ma omiga ina ia miomiō faatasi ma tagata, e tatau ai i talavou Kerisiano ona tau maumauai mo le faatuatua. O le mulimuli i auala a le Atua, o le a faaesea ai i latou ma e ono iu ai ina amusia e tamaiti o le vasega ma faiaʻoga. E faigata tele ona talia o lenei mea, ae maise lava o le vaitaimi lea o tausaga e taaʻina gofie ai, ae o le talileleia e le Atua, e sili atu ona aogā na i lo o mea ua lafoaia.

Po o ni Taulaga Moni ea Na?

O isi mea na sa muai foliga mai o ni taulaga, ae ua liua o ni faamanuiaga. O nisi, sa taumafai e taofia le masaniga leaga o le ulaula tapaa. (2 Korinito 7:1) E ono avea lenei mea o se tauiviga, ae maeu se faamanuiaga ina ua mafai ona foia mulimuli ane lena masaniga leaga! E mafai foi ona fai atu faapena e uiga i le foia o le masaniga leaga o le faaaogaina o isi vailaau faasaina po o le ʻava malosi. Maeu se olaga e sili ona lelei pe a aunoa ma na masaniga e faaleagaina ai! O isi o le taumafai lea e faasaʻosaʻo ā latou mataupu tau i faaipoipoga. O i latou o loo nonofo faatasi e pei o ni ulugalii e aunoa ma le faaipoipoina, e tatau ona faaipoipo, a lē o lea po o le teteʻa ia lē toe nonofo faatasi. (Eperu 13:4) O i latou sa fai autaunonofo, e tatau ona nonofo tau o le avā na fai a o taulealea. (Faataoto 5:18) O na fesuiaiga, e manaomia ona faia ai se faataulagaina, ae e aumaia ai le filemu i le aiga.

Manatunatu i Taui

E moni, so o se tasi e usiusitai i tulafono a Ieova na te maua moni ai aogā. Mo le uluai taimi i lona olaga, ua mafai ai e le tagata aʻoga o le Tusi Paia ona faalagi atu Lē na Foafoaina o ia i le faaaogaina o Lona suafa, o Ieova. (Salamo 83:18) Ua oo ina alofa le tagata aʻoga i a Ieova a o faaauau ona ia aʻoaʻoina e uiga i mea ofoofogia na Ia faia ma o le a faia mo tagata. I atunuu e taatele ai le fefe i tagata ua maliliu, ua oo ina lē toe fefe o ia i faiga faataulaitu, i le iloa o ē ua oti o loo momoe, e faatali ai i se toetu. (Failauga 9:5, 10) Ma maeu se mapusaga i le iloa e faapea e lē faapuapuagatiaina e Ieova tagata e faavavau i se afi i seoli! Ioe, ua faasaolotoina moni o ia e le upu moni.—Ioane 8:32.

A o matuaʻi faatatau atu e le tagata aʻoga lona olaga i tapulaa a Ieova, ua ia maua ai se loto fuatiaifo mamā ma faaaloalogia ai o ia lava. O le aʻoaʻo e ola e avea o se Kerisiano moni, ua fesoasoani lea i a te ia e tausia lelei ai lona aiga, ma aumaia ai le lotomalie sili ma le olioli. O le isi mea, o le auai i sauniga i le Maota o le Malo. Maeu se mea e matuā fiafia ai! I inei, e iai tagata o ē o faatinoina moni le alofa mafana lea e fai mai ai le Tusi Paia e ao ona iloa ai tagata o le Atua. (Salamo 133:1; Ioane 13:35) O ā latou tala e mamā ma atiina aʻe ai a o latou tautala i “vavega o le Atua.” (Galuega 2:11) Ioe, o le auaufaatasi ma “le au uso” o se puna o le fiafia. (1 Peteru 2:17) O mafutaga lelei faapena a le auuso, e fesoasoani i le tagata aʻoga o le Tusi Paia “ia oofu [ai] i le tagata fou ua faia e foliga i le Atua, i le amiotonu ma le amio lelei e faamaoni.”—Efeso 4:24.

Le Laasaga o le Tuuina Atu

A o agaigai i luma se tagata i le poto, e iu ina uunaia ai o ia e le alofa mo Ieova e tuuina atu lona ola i a te ia ma faatinoina ai lenei mea i le papatisoga i le vai. (Mataio 28:19, 20) O le fautuaga a Iesu e faapea, a o leʻi faia lenei laasaga, e tatau i ona soo ona manatunatu i iuga uma o ā latou fuafuaga. (Luka 14:28) Ia manatua, o se Kerisiano tuuina atu, na te faamuamua le finagalo o Ieova ae fulitua i galuega a le tino. E galue malosi o ia e tetee atu i “galuega a le tino” ma atiina aʻe “fua o le agaga.” (Kalatia 5:19-24) Ua faia ai nei e le fautuaga o loo maua i le Roma 12:2 se vaega atoatoa i lona olaga: “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.” I lea, o se Kerisiano tuuina atu, e ola i se olaga o lagona ua toe faafouina ma se fuafuaga.

Seʻi manatunatu la i le mea ua ia maua. O le tasi o mea, ua ia maua nei, o se faiā totino ma Lē na Foafoaina le vateatea. Ua tauamiotonuina o ia ma le manatu e avea ma uo a le Atua! (Iakopo 2:23) I se uiga e sili atu ona loloto, ua ia faalagi ai le Atua e faapea “lo matou Tamā e, o i le lagi.” (Mataio 6:9) Ma o se isi faamanuiaga mo lē fou ua tuuina atu, o le iloa lea e faapea, e iai moni lava se fuafuaga i le olaga, ma ua ola ai i se olaga e ogatasi ma lena fuafuaga. (Failauga 12:13) I le mulimuli i le taitaiga a Iesu, ua mafai ai ona ia faamaonia le Tiapolo e pepelo e ala i lona tumau i le faamaoni. Maeu le olioli o le finagalo o Ieova ona o lena mea!—Faataoto 27:11.

O le mea moni, a o tumau se Kerisiano i le ala o le faamaoni, ua iai foi isi taulaga atili e ao ona faia. E tele se taimi e manaomia e faia ai se suesuega totino uigā faapea ma suesuega a le faapotopotoga i le Afioga a le Atua. (Salamo 1:1-3; Eperu 10:25) E manaomia foi ona sema se taimi mai isi gaoioiga mo le faiva i le fanua. (Efeso 5:16) E manaomia foi le taimi ma taumafaiga ina ia auai i sauniga a Molimau a Ieova ma ia mafai ona faimalaga atu i a latou fonotaga ma tauaofiaga. Atonu e manaomia foi le faataulagaina totino i le faia o se sao i le faatupeina o le Maota o le Malo ma le galuega talaʻi i le lalolagi aoao. Ae peitai, e pei ona molimauina e le faitau miliona o Kerisiano, o le lagolagosua ma le loto atoa i na mea, e fiafia ai le loto. Na fetalai Iesu: “E sili le manuia o le na te foai atu, i lo le na te talia mai.”—Galuega 20:35.

O taui e maua ona o le lagolagosua i le galuega a Ieova, e sili mamao atu aogā e maua mai ai na i lo o mea ua faaalu ai. A o tatou tutupu aʻe i le taumatuaina, o le a oo ina sili atu ona fuatele ma olioli ai i la tatou faiva. O le mea moni, e leai se mea e sili ona faamalieina ai e pei o le aʻoaʻoina o se isi tagata i le upu moni o le Tusi Paia ma vaai atu o latou talia le tapuaiga i a Ieova. Ma pe afai o le tagata tapuai fou o se sui o le aiga, pe atonu o se tamaitiiti sa aʻoaʻoina “i aoaiga ma apoapoaiga a le Alii,” e aumaia ai se olioli faapitoa i lena mea. (Efeso 6:4) Ua tatou vaai i le tamaoaiga o faamanuiaga a le Atua i a tatou taumafaiga ina ia avea o se “aufaigaluega” faatasi ma ia.—1 Korinito 3:9.

O Isi Taui mo le Auaunaga Faamaoni

E moni, o le a iai o tatou faafitauli a o iai pea lenei faiga o mea. O le a faapena foi ona sili atu ona matuia a o agaʻi atu ina puupuu le taimi mo le Tiapolo. Atonu o le a tatou puapuagatia ai i ni sauaga pe onosaia ni tofotofoga. Ae o le iloa e faapea o loo faatasi le Atua ma i tatou, e mafai ona faamafanafanaina ai, ma aumaia ai i a i tatou le malosi e tumau ai. (1 Korinito 10:13; 2 Timoteo 3:12) O nisi o uso Kerisiano, ua onosaia le tele o tausaga o faiga sauā, ae ua tumau i latou ona o lo latou alofa mo le Atua. O i latou o ē na tumau ma le manuia i tofotofoga eseese, ua lagona e pei ona sa faia e aposetolo, ina ua sasaina i latou ma toe tuuina atu e ō. Ua faamatala mai i le Galuega 5:41 e faapea: “Ona ō lea o i latou nai luma o le fono, ua olioli ina ua taʻuaogaina i latou ia faaleagaina ona o lona suafa.”

O le taui mo le tumau, e sili mamao atu na i lo o mea ua faaalu, e oo lava i le taimi nei. Ae ia manatua, o le amioatua “o loo i ai le mea na folafolaina” e lē gata “i le olaga nei” ae faapea foi “ma le atali.” (1 Timoteo 4:8) Maeu se lumanai ofoofogia mo lē e tumau! Afai e te faamaoni, o le a faasaoina atu oe i le puapuaga tele lea e faailogaina ai le faaiuga o lenei faiga o mea. Pe afai e te maliu a o leʻi oo mai lena vaitaimi fou, o le a toe faatuina oe i le lalolagi fou lea o loo mulimuli mai. (Tanielu 12:1; Ioane 11:23-25) Seʻi manatu i le lagona o le olioli tele o le a oo i a te oe i lena taimi pe afai o le a mafai ona e faapea atu: “Ua mafai ona ou maua, ona o le fesoasoani a Ieova!” Maeu se fiafiaga sili o le maua lea o se tofi i lena lalolagi, lea o le a “tumu . . . i le malamalama o Ieova, e pei ona ufitia o le iliti tai i le suāsami.”—Isaia 11:9.

Ioe, e iai ni mea e faaalu ina ia auauna i le Atua. Ae a faatusatusa atu i taui e maua mai, e matuā faatauvaa lava mea ua faaalu. (Filipi 3:7, 8) Pe a manatu i mea uma ua faia nei e le Atua ma o le a faia i le lumanai mo ana auauna, ua ao ai ona tatou faaleoina atu upu a le faisalamo: “Se a se mea ou te taui aʻi atu ia Ieova ona o lona agalelei mai uma lava ia te au?”—Salamo 116:12.