Po o E Fesoasoani i Lau Tamaitiiti e Filifili e Auauna i a Ieova?

NA FAALAUILOA mai e se tasi tama talavou e faapea: “Sa ou lagona le fiu ma le vaivai i le suesueina o le Tusi Paia. O lea, na ou faapea lemu ifo ai i loʻu loto, o le a lē avea aʻu o se Molimau a Ieova pe a ou matua.” E ui i lea, e iai le faamoemoe o le toatele o fanau i aiga Kerisiano o le a iu ina filifili mulimuli ane e tutū i le itu a Ieova, ae o talavou e pei o lena tama, atonu o le a uia se taimi faigata e filifilia ai Ieova e avea ma ō latou Atua.

I nisi taimi, ua lē iloa ai e mātua po o le a faapefea ona taitaiina ā latou fanau i se auala aogā. Ua latou uia le tele o sailiiliga e suesue ai i latou lava, e pei o se tasi tamā popole o lē na faapea mai: “Ma le faamaoni lava, sa iai taimi na ou vaavaai atu ai i foliga o laʻu fanau a o momoe, sa iai pea loimata o le lē fiafia i ō latou alafau, ma ou tau mānatu ai pe e lē ao ea ona tau faamāmā teisi le faiga o i laua.” Sa tutupu aʻe ona atalii e toalua, ma filifili e auauna i a Ieova.

Peitai, e iai foi talavou o ē ua tuulafoaiina Ieova ma tuua le lotoā faa-Kerisiano ona o le manao i le lalolagi a Satani. O lea, po o le a faapefea ona taulau mātua i le fesoasoani atu i ā latou fanau i le faia o le filifiliga e auauna i a Ieova? Ina ia taliina lena fesili, seʻi o tatou muai sailia le pogai ua tuua ai e nisi talavou Ieova ae o loo matuā mananao ō latou mātua ina ia latou tumau i a te ia.

Le Pogai ua Tuulafoaiina ai e Nisi Talavou Ieova

O se tasi o vala e sili ona taatele, o le lē oo ina matuaʻi iloa lelei e isi talavou Ieova ma ona ala. E ui lava o loo auai i sauniga faa-Kerisiano mai lava a o tamameamea, atonu sa na ona ō ona o se masaniga, ae lē faamaoni, e leai se sailiga moni mo Ieova. (Isaia 55:6; Galuega 17:27) O le tama e pei ona taʻua i luga, sa fiu i sauniga faa-Kerisiano ona sa lē malamalama i mea na fai mai ai le failauga i le pulelaa.

Ua totō ai lava fatu o le upu moni i nisi fanau, ae ua faatagaina ō latou loto e faaseseina i le olaga soonafai, manao tele i mea faitino a le lalolagi a Satani, ona atonu ua lē leoleomaluina. Ua lē mafai e nisi ona teena le faanaunauga matuā malosi o le fia auaufaatasi atu ma le fia pei o ā latou tupulaga.—1 Nofoaiga a Tupu 28:9; Luka 8:12-14; 1 Korinito 15:33.

Ae peitai, i le lalolagi aoao, e toatele lava fanau i aiga Kerisiano ua latou filifili e tutū i le itu a Ieova. Pe mafai ona aʻoaʻoina se mea mai gaoioiga mautinoa na faia e ō latou mātua?

Amata a o Iti i Latou

O se vala matuā tāua e fesoasoani ai i lau fanau e filifilia Ieova, o le amata lea a o iti lava. I le tele o tulaga, e talia aoaiga ma aʻoaʻoina lesona pe a malū pe agavaivai le loto, ma aogā mo le olaga atoa. (Faataoto 22:6) O lea, ia vave amata a o iti ona taʻu atu i lau fanau e uiga i le lelei o Ieova, lona alofa ma le matautia, ia taumafai e atiina aʻe i totonu o ō latou loto le alofa mo Ieova, ma le talisapaia o mea ua faia e Ieova mo i latou. Ina ia faataunuuina lenei mea, e toatele mātua ua taulau i le faaaogaina o le anoanoai o mataupu e uiga i foafoaga a Ieova na e maua i lomiga a le Sosaiete o le Olomatamata.

O le usiusitai ma le faaaloalo mo Ieova ma lana tapuaiga, o isi na uiga e tatau ona vave tāmau i le amataga o le olaga. O se mea e faamafanafana loto le vaai atu i tamaiti o i aʻoga faataitai o tauivi ina ia faia ni faamaumauga faigofie i sauniga faa-Kerisiano, ma suʻe mau i a latou lava Tusi Paia, po o le ō foi ma ō latou mātua i le paipa e fufulu o latou mata i vai mālūlū pe a tautulemomoe. O ni mea faigofie nei, ae maeu le tāua o lo latou tāmauina i mafaufau o talavou e faapea, o le usiusitai ma le faaaloalo e tatau ona faaalia i a Ieova!

O aoaiga uigā totino faale-Tusi Paia, e ao foi ona amata a o laiti. Ina o taʻi lua tausaga le matutua o la laua fanau tama, na amata ai e se tasi ulugalii ona faitau i a i laua le tusi Listening to the Great Teacher.a Mulimuli ane ina ua amata ona aooga tamaiti, la te alapopo ma faia le suesuega i taeao taitasi ma lo la tinā i tusi o Laʻu Tusi o Tala o Le Tusi Paia ma le E Mafai ona E Ola e Faavavau i Parataiso i Le Lalolagi.* Ona sosoo ai loa lea ma le talanoaina o le mau o le aso e faia e le tamā a o leʻi faia le taumafataga o le taeao. Sa matuā faatamaoaigaina taui o taumafaiga a mātua, ina ua filifilia talu ai nei e le la fanau tama e auauna i a Ieova, ma faatinoina lo la tuuina atu e ala i le papatisoina i le vai ina ua 10 ma le 11 o la tausaga.

Na manatua e se tama talavou amio lelei o lē o loo auauna i le ofisa o le lālā o le Sosaiete o le Olo Matamata i Iapani e faapea, ina o laitiiti lava o ia, sa fesoasoani lona tinā i a te ia e atiina aʻe se faiā ma Ieova e ala i le nofo i ona tafatafa i le po, ma fesoasoani i a te ia e tatalo. E lē mafai ona galo i a te ia le lesona na aʻoaʻoina—e tusa lava po o fea na alu i ai po o le ā foi lana mea sa fai, sa latalata mai pea Ieova ma nofosauni e fesoasoani mai.

Ua aʻoaʻoina mātua ua taulau manuia ina ia iloa faanaunauga sese o ā latou fanau ona o le lē lelei atoatoa tuufaasolo, ma ua amata ai e mātua ona fesoasoani i a latou fanau a o laiti lava ina ia faasaʻoina nei mea sese. (Faataoto 22:15) O mafaufauga agaʻi i le manatu faapito, faauamaaʻa, faamaualuga, le soona faitio i isi, e tatau ona vave foia i le amataga. Afai e lē foia, o le a oo ina tutupu aʻe na uiga ma fouvale ai faasaga i le Atua ma ona ala i se taimi mulimuli ane. Mo se faaaoaoga, o mātua e fuafua lelei ae soona mananao tele, e masani ona tuufau a latou fanau e atiina aʻe ni uiga manatu faapito. Ua faigata ai i nei fanau ona faaaloalo i ō latou lava mātua po o Ieova, ma oo ai ina pei o ‘ē e lē loto faafetai’ ia o loo taʻua i le Tusi Paia. (Faataoto 29:21) I le isi itu, o fanau o ē e tuuina atu i ai feau i le aiga ma aʻoaʻoina ina ia mataala i manaoga o isi, e iu ina sili atu ona loto faafetai i ō latou mātua, faapea foi ma Ieova.

O le isi itu tāua, o le vave lea ona amata i le faataatitia o sini faaleagaga e mafai e se tamaitiiti ona ausia ma magafagafa i ai. Afai e lē vave faia lenei mea i le amataga ma tausisi i ai, o le a faatumuina la e isi ō latou loto ma mafaufau i ni sini ese. O le faitauina o le Tusi Paia atoa, i le suesuega totino o se tasi o lomiga a le Sosaiete o le Olomatamata, tusia o le igoa i le Aʻoga o le Faiva Faatiokarate, avea ma sē e folafola le tala lelei, ma i le papatisoina, e ao ona faaaofia ai i nei sini.

Ua manatua e Takafumi e faapea, sa faamasani o ia e lona tinā ina ia faitau mekasini o Le Olomatamata ma le Awake! e ala i le faia o ni fesili faigofie ma tuu i luga o le laulau i le umukuka mo ia e saili tali pe a sau i le fale mai le aʻoga. Ua manatua foi e Yuri e faapea, o le nonofo faatasi mo ni nai aso ma paeoniab o ē na auauna i le mea sa tele ai le manaoga mo ni faifeau Kerisiano, sa o se mea sili lea, o le ō faatasi ma i latou i le faiva, vaai i a i latou o kukaina ni taumafataga lelei, ma matauina lo latou olioli ma le maelega, sa matuā taaina ai lona naunau e auauna i a Ieova i lena lava auala. E manatua e le toatele o talavou faapea, sa aveina e lē aunoa i latou e ō latou mātua i Peteli, e pei ona taʻua ai le ofisa autū ma lālā o le Sosaiete o le Olo Matamata, o inā sa mafai ai ona latou matauina isi tama ma teine talavou o auauna ai ma le fiafia i a Ieova. O le toatele o i latou sa asiasi atu i ai a o laiti, ua auauna nei i Peteli o i le lalolagi aoao.

Faaalu Sou Taimi ma Lau Fanau

O le lava ma le tele o le taimi e te faaaluina ma lau fanau, o le a faapena ona tele ai se taaʻiga i le po o le a latou filifili e auauna i a Ieova pe leai. E vave lava ona latou iloa po o le ā le tele o le taimi ma sauniuniga na e tuuina atu i le suesuega faale-Tusi Paia lea na e faia ma i latou. Afai e te lē manatua po o fea na e faagataina ai pe na tolopo ai le suesuega ona o ni mafuaaga lē tatau, ua e faailoa atu la le feau e faapea, e lē tāua tele i a te oe le suesuega. Ae peitai, afai latou te iloa o faia e mātua ni faataulaga ona o le suesuega, i le sauniuni lelei ma ia faia e lē aunoa le suesuega e tusa lava po o le ā se mea e tulai mai, ia ua taʻu atu ai se feau e matuā ese lava. E ui e lē o se mea e manaomia, o nisi tinā, e ofu ō latou ofu lelei pe a faia le suesuega a le fanau, e pei ona faia pe a ō i sauniga po o le faia o se suesuega faale-Tusi Paia ma se tuaoi. E tuuina atu ai le manatu e faapea, o le tapuaiga i a Ieova, e tāua.

E tele le taimi ma taumafaiga e manaomia ina ia olioli ai i le aʻoaʻoina o lau fanau ma pāʻia ō latou loto. Ae maise lava i tamaiti laiti, e matuā fiafia lava pe a vāai o faia taga e faatinoina ai i ō latou luma mea o latou aʻoaʻoina. Mo se faaaoaoga, o se tasi tamā, sa fesoasoani i lana fanau e vaai faalemafaufau i le toetu e ala i le faatinoina o le faamatalaga a le Tusi Paia e uiga i le toetu o Lasalo. Sa alu o ia i totonu o se pusatu ma toe sau i fafo e pei o Lasalo lea na toetu.—Ioane 11:17-44.

A o agaʻi ina tagata matutua tamaiti, atonu o le a sili atu foi ona tele le taimi ma le tomai e faaaluina ina ia faafesagaia ai le tafe faavai mai o faalogona ootia, masalosaloga, ma popolega o latou fesagai. O le taimi lea ua faataatia ese e mātua alolofa ma magafagafa e tusa ai ma lenei tulaga, e sili ona tāua, pe afai e atiina aʻe e fanau le faatuatua i a Ieova. Na manatua e se tasi tamā o se fanau e toʻafā lona taulau manuia e faapea, pe a fesagai lana fanau ma faafitauli eseese, na te sailia po o ā, ma talanoa ma i latou i aso uma mataupu o loo aumaia i lomiga a le Olomatamata seia oo lava ina foia atoatoa ia faigata.

Sa matauina e se tinā paeonia e tele naua feau e fai, ma e toalua lana fanau e faapea, sa oo ina solomuli lana tama teine ma ua lē fiafia i gaoioiga faatiokarate. Ona filifili lea o le tinā ina ia iai i le fale i afiafi taitasi e foi mai ai le teine mai le aʻoga, ma talatalanoa ma lana tama a o inu se la iputi. E ala i ni talanoaga mafana a le tinā ma lana tama teine, na maua ai e le teine le fesoasoani lea na ia manaomia. Nei la, ina ua faauu mai le aʻoga maualuga, sa aufaatasi atu o ia ma lona tinā i le auaunaga paeonia.—Faataoto 20:5.

Aufaatasiga ma Faaaoaoga Lelei

E faaopoopo i le tuuina atu o ō latou taimi, e tatau i mātua ona saunia se aufaatasiga e atoatoa ona mamā mo ā latou fanau. Ua faapea mai le Faataoto 13:20: “O lē latou te feoai ma tagata popoto, e poto lava ia; a o le uo a e valelea, e leaga ai lava ia.”

E toatele mātua taulau ua latou iloa le moni o lena faataoto. Ua faapea mai le tamā o se fanau e toʻafā: “Pe a ou toe mafaufau i aso ua mavae, ona ou manatu ai lea, ona o le matuā toatele o uo a la ma fanau i le upu moni, sa fesoasoani lea i a i latou e auauna ai i a Ieova. Sa ou faalaeiauina i latou ina ia faia ni ā latou uo i isi faapotopotoga faapea foi ma la matou lava faapotopotoga, ma ia atiina aʻe na faauooga.” Sa manatua ma le fiafia e se toeaina Kerisiano o lē sa auauna i Peteli mo le tele o tausaga e faapea: “Ina o oʻu talavou, sa matou nonofo i se tamai fale, ae sa masani ona ofoina atu e api ai le ovasia matagaluega. E faaopoopo i lena, sa lē aunoa ona matou fai ʻaiga ma paeonia faapito o la matou faapotopotoga. Latou te taeele i lo matou fale ma auaufaatasi ma i matou. I le faalogologo atu i tala o mea na tutupu i a i latou i le faiva ma vaaia lo latou olioli, sa fesoasoani lea i a te aʻu e atiina aʻe le talisapaia mo le auaunaga faataimi atoa.”

O aumea lelei, e fesoasoani foi i a i latou o uia tulaga faigata. O se tinā o se tama na oo i se vaitaimi o fesouaina, na talanoaina le faafitauli ma se ovasia femalagaai o Molimau a Ieova. Sa ia fautuaina ina ia la ō ma le tama i le auaunaga i le fanua. Na faapea atu le ovasia: “Afai e te faia faapea, o le a faalelei ai lona tulaga faaleagaga ma isi faafitauli uma lava.” Ua lipotia mai e le tuafafine e faapea: “Sa faia se fuafuaga a la matou faapotopotoga mo le galuega molimau atu i le afiafi, ma e toatele tamaiti aʻoga, nisi o paeonia sauatoa matutua, ma pe na o le toatasi le toeaina na auai. Muamua, o se tauiviga le taumafai ina ia alu e lē aunoa laʻu tama i le fanua, ae e leʻi umi se taimi na faia ai lena mea, ona sa vave lava ona suia o ia, e foi mai pea i le fale ma le matuā fiafia ma ua faalaeiauina ona o se auaufaatasiga e atoatoa ona mamā. Sa papatisoina o ia ma auauna o se paeonia lagolago i masina uma a o aʻoga pea i le aʻoga maualuga, ma ina ua faauu o ia, sa avea loa ma paeonia sauatoa.” O aufaatasiga e atoatoa ona mamā faatasi ma le faia o le finagalo o Ieova, o le a aumaia ai iuga lelei.

Atonu e leai ni talavou i la outou faapotopotoga e mafai ona avea o ni taaʻiga e atoatoa ona mamā i lau tama, ae o gaoioiga sa faia pea e le toatele o talavou o ē na filifili e auauna i a Ieova, ona o faaaoaoga a ō latou mātua. E toatele talavou sa viiviia ō latou mātua ma mananao e faataitai i a i latou. E manatua e Yuri le agaga talimalo o lona tinā ma le auala na te tausia ai isi, i le talanoa atu i a i latou i le telefoni, ma faia taumafataga mo tagata mamaʻi. Na taʻua e Tatsuo, o lē e sau mai le aiga e toʻafā tama, ua matutua uma nei ma ua auauna i a Ieova, e faapea: “Sa lē mafai e Tinā ona faia se suesuega e lē aunoa ma i matou ona sa lē talitonu Tamā, ma e tele ni teteega sa ia maua mai aiga lē talitonu. Ae i le matauina o lona tulaga mo le upu moni, ma lona olioli e auauna i a Ieova, sa taaina tele ai aʻu. Sa naunau foi o ia e ala pea seia oo i le tafa o ata e fesoasoani i ō matou faafitauli.” O upu o le atamai faamatua, e iai le mana pe a lagolagoina e galuega faamaoni. Na faapea mai Yoichiro e uiga i ona mātua: “Ou te lē o manatuaina pe sa la faaleoina mai ni upu lē fiafia e uiga i isi i le faapotopotoga; pe la te faatagaina i matou le fanau e faitatala e uiga i mea sese a isi.”—Luka 6:40-42.

Olioli i le Vaai atu ua Filifili le Fanau e Auauna i a Ieova

E leai se faiga saʻo aʻiaʻi e fesoasoani ai i lau fanau ina ia filifili e auauna i a Ieova. O le a tele taimi o popolega. Ae na faapea mai le tamā popole lea na taʻua i le amataga: “I le avea o ni mātua, ma te taumafai faamaoni ai pea e mulimuli i fautuaga a le faalapotopotoga vaaia a Ieova. Sa avea lenei mea o se fesoasoani tele i le foiaina o faafitauli.” Sa mafai ona taulau manuia ā laua taumafaiga.

Ioe, o lou faia o le mea aupito sili ina ia mulimuli i taiala a le Tusi Paia, i le aʻoaʻoina o lau fanau i mafuaaga aogā e alolofa ai i a Ieova, faatasi ma lau faaaoaoga ma taumafaiga faamaoni e fesoasoani, o le a e maua mulimuli ane, ua faapaleina au taumafaiga i le manuia. Manatua le tama na uluai taʻua o lē na filifili i se tasi taimi ina ia lē avea o se tasi o Molimau a Ieova? Ia, ina ua manuia taumafaiga a lona tinā e fesoasoani i a te ia i ona tausaga faigata, na ia faapea mai: “Ua ou fiafia ona sa leʻi faavaivai o ia!” E mafai foi ona e maua se taunuuga faapena i lau fanau.—Kalatia 6:9.

[Faaopoopoga i lalo]

[Ata i le itulau 30]

Pe mafai ona e toe tepa i tua i le tausiga o lau fanau ma o faafiafia ai pea le mafaufau?