Le Auala e Faamaopoopoina ai se Fatatusi Faatiokarate

O SHEREZADE o se teineitiiti Sepania e sogasogā, ma i le fa o ona tausaga na faatonuina ai e lona faiaoga la latou vasega o le a latou valiina ni ata o le “Tamā o le Kirisimasi.” Ma o lea na talosaga ane loa Sherezade pe mafai ona faataga o ia ina ia lē auai. Sa ia faamatala le lē faatagaina o ia e lona loto fuatiaifo e faia lea tulaga.

I le faateia ona o lenei tetee, na taʻu i ai e le faiaoga e faapea, e tai pei lava o le valiina o le ata o se pepe meataalo ma e leai se leaga o lea tulaga. Na tali atu Sherezade: “Afai o se pepe meataalo, e sili atu la i a te aʻu pe a ou tusia se ata o le pepe meataalo pe a talafeagai ai ma lou finagalo.”

I se tasi foi mea na tupu na faatonuina le vasega e vali le ata o le tagāvai a le atunuu. Ma sa toe talosaga atu foi Sherezade pe mafai ona ia faia se isi mea e ese mai ai. Na faaauala atu i lana faamalamalamaga, lona faamatalaina i le faiaoga o le tala i a Sataraka, Mesako, ma Apeteniko.—Tanielu 3:1-28.

E leʻi leva ae telefoni atu loa le faiaoga i le tinā o Sherezade ma faamatala atu lona ofo tele e faapea: “I nisi o meafai a le aʻoga na talanoa mai ai lau tama i a te aʻu e uiga i lona loto fuatiaifo. Pe e te talitonu i lena mea? I lenei teineitiiti pe a faatusatusa atu i ona tausaga ae ua faamatalaina mai le mafuaaga e faalavelavea ai o ia e lona loto fuatiaifo! Vaai oe, ou te lē ioe i mea o loo e aʻoaʻoina ai o ia, ae ou te taʻutino atu o loo faamanuiaina au taumafaiga. Ma ou te manao ia e iloa ua matuā to loʻu pulou i lau tama.”

E faapefea i se teineitiiti e na o le fa tausaga ona i a te ia se loto fuatiaifo ua toleniina i le Tusi Paia? Na faamatala e lona tinā o Marina, o Sherezade e iai lana ia lava fatatusi faatiokarate i lona potu moe. O lenei fatatusi o loo iai ana lava lomiga o Le Olomatamata, ia ua uma ona ia vasevaseina, o ana lomiga mo le talaʻiga, ma lomiga uma lava a le Sosaiete o le Olomatamata na maua talu mai le taimi na fanau ai. O se mea e pito sili ona fiafia i ai o i lana fatatusi o le pusa kaseti mo Laʻu Tusi o Tala o Le Tusi Paia, lea e faalogologo i ai i po uma a o mulimuli atu i lana kopi. O tala faale-Tusi Paia faapenei na fesoasoani i a te ia e faia ai faaiuga e pei ona taʻua i luga.

Pe e mafai ea e se fatatusi faatiokarate ua faamaopoopoina lelei ona fesoasoani i a te oe ma lau fanau? Aisea e manaomia ai le iai o se fatatusi i lou aiga?

“O le Fatatusi o se Mea Tāua e Ao ona Iai”

“O le fatatusi o se mea tāua e ao ona iai auā o se mea e manaomia moni lava i le olaga,” o le faamatalaga lea a Henry Ward Beecher. E mautinoa, e toetoe lava o i tatou uma e tofu ma lea mea e “manaomia i le olaga,” e ui ina tatou te lē o iloaina. E faapefea? Auā e tusa lava pe na o le Tusi Paia o loo tatou maua, ae o lena lava ua i a i tatou se ituaiga o fatatusi.

O le Tusi Paia o se faaputuga o tusi faatiokarate e aupito sili ona aogā na i lo se isi lava mea. I le senituri lona fa, na muai tusia ai e Jerome le fasifuaitau faa-Latina o le Bibliotheca Divina (Faaputuga o Tusi Mai le Atua) e faamatala ai le aotelega atoa o tusi faagaeeina lea ua tatou taʻua o le Tusi Paia. Ua saunia e Ieova mo i tatou lenei faaputuga paia o tusi e aumaia ai i a i tatou fesoasoani talafeagai, o faatonuga, ma taiala. E lē o se mea tatou te manatu faatauvaa i ai. O le iai i a te oe o le Tusi Paia atoa o lona uiga ua tatou maua se faaputuga o tusi e sili lona telē na i lo o ia na iai i le toatele o auauna a le Atua i aso ua mavae.

I le vaitaimi na maua ai na o manusikulipi taugata na tusilimaina, e toaitiiti, pe afai na iai, ni aiga na latou maua ma faapelepeleina le Tusi Paia atoa. Ina ua manao Pauro e suesue le Tusi Paia a o faafalepuipuiina mulimuli i Roma, sa ia talosaga atu i a Timoteo ina ia avatu i a te ia ni tusi taai mai Asia Itiiti—atonu o ni vaega o le Tusi Paia Eperu. (2 Timoteo 4:13) Peitai, na teuina i Sunako ni aofaiga o tusi taai, ma na faaaogaina e Iesu Keriso ma le aposetolo o Pauro na faaputuga o tusi mo le la galuega talaʻi. (Luka 4:15-17; Galuega 17:1-3) O se mea e fiafia ai, ona ua sili atu ona faigofie ona maua le Tusi Paia na i lo o le uluai senituri.

Faatasi ai ma le fesoasoani na maua mai ina ua saunia masini lomitusi, ua toetoe lava o auauna uma a le Atua i aso nei—e tusa lava po o le ā le gagana—ua mafai ona maua le Tusi Paia i se tau talafeagai. Ua tatou maua foi se isi avanoa faapitoa e fesoasoani atu ai mo le atoaga o lenei “faaputuga o tusi” paia. I le sili atu i le senituri, o loo faateleina pea galuega a le “auauna faamaoni ma le mafaufau” i le saunia o meaai faaleagaga i ona itu aso e tatau ai.—Mataio 24:45-47.

Ae o le a lē mafai ona tatou faaaogaina atoatoa nei fautuaga aogā pe a tatou lē faamaopoopoina se fatatusi faatiokarate a le tagata lava ia. E faapefea ona faia o lena mea? O le laasaga muamua lava, o le iai lea i a te oe o ni tusi e manaomia ona iai i se fatatusi. O le a sili atu ona tauia lena taumafaiga, auā foi o le a mafai ai ona tatou mauaina faamatalaga talafeagai o loo manaomia i se taimi vave mo le taulimaina o faafitauli ma le taliina o fesili faale-Tusi Paia.

O ā Tusi Ou te Manaomia?

Pe sa e manatunatu ea pe faapefea ona e foia se faafitauli tau i fesootaiga i le lio o lau faaipoipoga ma pe mafai foi faapefea ona e fesoasoani i lau fanau ina ia mafai ona tali atu e leai i vailaau faasaina? E mafai faapefea ona e fesoasoani i se uo o loo pagatia i le loto mafatia? Pe mafai ona e faamatala ma le manino atu po o ā faamaoniga o i a i tatou e iloa ai o loo soifua pea le Atua ma pe aisea ua ia faataga ai pea le amio leaga? O le ā ua faaataina mai e le manu feai mūmū o loo i le Faaaliga mataupu e 17?

O nei fesili, atoa ma le anoano o isi, e mafai ona taliina pe afai o i iai sau fatatusi faatiokarate ua lava saunia. Ua lomia e le Sosaiete o le Olomatamata tusi, polosiua, ma mataupu o i mekasini o loo faamatala ai mataupu uma eseese faale-Tusi Paia. E lē gata i lea, o na lomiga o loo talanoaina ai mataupu tau i aiga, e atiina aʻe ai lo tatou faatuatua i le Atua ma le Tusi Paia, e fesoasoani ai i le faaleleia o lo tatou tomai i le talaʻi atu, ma ua fesoasoani foi i a i tatou e malamalama i valoaga o le Tusi Paia.

O le tele lava o lomiga na lomia e le Sosaiete i le 20 tausaga ua mavae o loo maua pea. Afai e leʻi leva ona e mauaina le upu moni, o le a aogā la le iai i a te oe o na lomiga uma o loo maua i lau gagana. Atonu o ni tuufaatasiga o Le Olomatamata i tausaga ua tuanai o loo maua i lau lava gagana. O tusi faasino upu matagofie e pei o le Insight on the Scriptures ma le Comprehensive Concordance, lea foi ua lomia nei i isi gagana. O lea la, o le iai i a te oe o nei tusi, o se laasaga muamua lena.

Faamaopoopo Lau Fatatusi!

O lou iloaina o loo iai sau tusi o se tasi lea o vala, ae e sili ai ona tāua le mauaina o le tusi tonu lea ua e manaomia. Pe afai o le a faaaluina se taimi umi e suʻe ai tusi o loo tatou manaomia, e iu ina mou atu ai lo tatou naunau i le mataupu. I le isi itu, afai ua teuina ā tatou tusi i se faasologa lelei, i se nofoaga talafeagai, o le a uunaia ai la lo tatou naunau mo le faia o suesuega totino.

Pe a talafeagai ai, e lelei pe a teuina uma tusi faatiokarate e te faaaogaina soo i se nofoaga e tasi. E mafai ona fauina se fata e tuu ai tusi ma e taugofie atu pe a lē gafatia ona faatauina se fatatusi ua uma ona fau, ma o le a lē telē foi se avanoa e faaaluina e tuu ai. E tāua foi le tulaga e tū ai lau fatatusi. O tusi o loo teuina i ni potu maualuluga e seāseā ona faaaogaina, e masani lava ona itiiti lo latou aogā ae na o le pipii uma i ai o le pefu.

O le isi laasaga e sosoo ai o le faamaopoopoina o tusi. O le faaaluina o se taimi puupuu e faatulaga ai tusi i se faasologa lelei e maua ai aogā.

Ae ā pe a faapea o le toatele o tagata o lou aiga e lē ni Molimau a Ieova? E ui ina atonu e lē mafai ona e faamaopoopoina se fatatusi e pei ona e manao i ai, ae i totonu o lou lava potu, atonu o iai se fata e teu ai tusi o loo iai ni nai lomiga faale-Tusi Paia.

O se Fatatusi Faatiokarate e Mafai ona Fesoasoani e Atiina aʻe ai Faaleagaga

A maeʻa loa ona faatulaga ā tatou tusi, e manaomia ona faia se faatulagaga mausali e fesoasoani i a i tatou ina ia maua ai faamatalaga. E iai taimi atonu e lē saʻosaʻo ai ō tatou mafaufauga, ma atonu o i tatou taitoatasi e lē o masani lelei i faasologa o mataupu taitasi o tusi o loo i la tatou fatatusi faatiokarate. Peitai, o faamatalaga uma o i tusi o lau fatatusi o le a faigofie ona maua. O le a fesoasoani le Watch Tower Publication Index i a i tatou i le sueina o ni faamatalaga patino toetoe lava i so o se mataupu mo sina taimi puupuu, pe afai ua maua i lau lava gagana.

Na faamatala mai e Julián, o lē ua avea ma paeonia faapito ma se toeaina mo le tele o tausaga, le aogā tele o le Index i le aʻoaʻoina o lona atalii laitiiti mo le faia o ana suesuega totino. Na ia faapea mai: “E fitu tausaga o Jairo, ae ina ua tuua mai le aʻoga i se tasi aso na fesili mai, ‘Papa o le ā ua fai mai ai le Sosaiete e uiga i manu nei ua taʻua o dinosaurs?’ Na ma aumai loa le Index ma suʻe ai le upu ʻdinosaurs.’ E leʻi umi se taimi na ma faaaluina ae o ma mauaina le Awake! o loo faamatala mai ai ma le manino le mataupu. [Fepuari 8, 1990] O le aso lava lena, na amata ai loa ona faitau e Jairo. Ua ia iloa o loo maua i la matou fatatusi faatiokarate faamatalaga aogā ma le talafeagai i so o se mataupu. Ia te aʻu lava ia, ua ou mautinoa afai tatou te aʻoaʻo ā tatou fanau e faaaogā lelei se fatatusi faatiokarate, o le a fesoasoani lena i a i latou ina ia tutupu aʻe faaleagaga. Latou te aʻoaʻoina pe faapefea ona fefulifulisai manatu ma e faaopoopo atu i lena, o le a latou iloaina ai e mafai ona avea suesuega totino o se mea e fiafia ai.”

Na faamatala mai e Fausto, le tamā o Sherezade lea o loo taʻua i le amataga, ua talitonu e mafai ona toleni tamaiti i le vave e mafai ai i le faaaogaina o le fatatusi faatiokarate. Ua ia faamatala mai e faapea: “Ua uma ona ma faasino i a Sherezade, lea ua ono nei ona tausaga, le faaaogaina o le Index. Talu ai o lona naunau e vaai atu i le Parataiso i luga o le lalolagi, na amata ona ma faasino i ai le upu ‘parataiso’ i le Index ma suʻe i mataupu o Le Olomatamata o loo maua ai faamatalaga. E masani lava sa na ona ma faaali i ai o ata. Ae peitai, e ala i lenei faatulagaga ua ia aʻoaʻoina ai o le Index o le ki lea mo le mauaina o so o se faamatalaga i le fatatusi a lo matou aiga. Sa ma iloaina ua ia malamalama lelei i lena tulaga ina ua taunuu ane i le fale mai le aʻoga i le isi aso ma lana fesili e uiga i le faamanatuina o le Eseta. ‘Ae ā pe a tatou suʻe i le Index?’ o lana fesili atu lena i lona tinā.”

Po o le ā lava lo tatou matua o iai, ua faalaeiau i tatou e le Tusi Paia ina “ia tofotofo i mea uma lava, ia taofi mau i le mea lelei.” (1 Tesalonia 5:21) E manaomia i lenei lo tatou suesueina po o le ā ua fai mai ai le Tusi Paia. (Galuega 17:11) Afai ua iai sa tatou fatatusi faatiokarate ua lelei lona faamaopoopoina, o le a avea na suesuega o se mea e olioli ai. I taimi uma lava o le a faamanuiaina i tatou pe a faaaogā ā tatou fatatusi e sauniuni ai se lauga, le sailia o ni fautuaga talafeagai mo le taulimaina o faafitauli, ia po o le sueina foi o ni faamatalaga aogā, o le a e maofa ai i aogā e maua mai i le iai o ā tatou fatatusi.

Na taʻu manino mai e mātua o Sherezade e faapea: “I totonu o se aiga Kerisiano, o se fatatusi faatiokarate o se mea tāua e ao ona iai!”

[Pusa i le itulau 30]

FAAPEFEA ONA FAATULAGA LELEI AU TUSI?

E leai ni tulafono tusitusia ma maʻoti pe faapefea ona faatulaga lelei au tusi. Ae peitai, o le vaevaega faasolosolo lelei lea o loo mulimuli mai ua faataitaia ai se tasi o auala e mafai ona faatulaga ai au tusi e tusa ma faasologa o mataupu.

1.O tusi o loo aofia ai iloiloga o fuaiupu taitasi o isi vaega o le Tusi Paia

(Faaaoaoga: The Greatest Man Who Ever Lived, Revelation—Its Grand Climax At Hand!, “The Nations Shall Know That I Am Jehovah”—How?, “Your Will Be Done on Earth”)

2.Tusi e fesootai atu i le olaga faaleaiga

(Faaaoaoga: Faia o Lou olaga Faaleaiga ia Fiafia, Questions Young People Ask—Answers That Work, Laʻu Tusi o Tala o Le Tusi Paia)

3.Tusi Paia ma faasino tusi e aogā

(Faaaoaoga: New World Translation of the Holy Scriptures—With References, o isi Tusi Paia, Watch Tower Publications Indexes, Comprehensive Concordance, Insight on the Scriptures, The Kingdom Interlinear Translation of the Greek Scriptures, se lomifefiloi lelei)

4.Tusi o loo faaaogaina nei i le Suesuega Tautusi a le Faapotopotoga ma le Aʻoga o le Faiva Faatiokarate

5.Kaseti ma lipine vitio

6.Tuufaatasiga o Le Olomatamata ma le Awake!

7.Talaaga o Molimau a Ieova

(Faaaoaoga: Yearbooks of Jehovah’s Witnesses, Jehovah’s Witnesses—Proclaimers of God’s Kingdom)

8.Tusi ma polosiua e masani ona tatou faaaogā i la tatou faiva

(Faaaoaoga: E Mafai ona E Ola e Faavavau i Parataiso i Le Lalolagi, Reasoning From the Scriptures, Life—How Did It Get Here? By Evolution or by Creation?, Mankind’s Search for God, Autasia i le Tapuaiga i le Atua Moni e Toatasi)

[Ata i le itulau 31]

Ua avea nei Sherezade ma tagata aʻoga lelei o le Tusi Paia

[Ata i le itulau 31]

E ui i lona laitiiti, ae o loo faaaogaina e lenei tamaitiiti se fatatusi faatiokarate

Faaopoopoga mo le Vaega Pule

ONA o le manatu ia faateleina sui o le Vaega Pule a Molimau a Ieova, i a Iulai 1, 1994 na faaopoopoina atu ai se isi sui fou i toeaina e 11 o loo auauna nei. O lenei sui fou o Gerrit Lösch.

Na ulu atu le uso o Lösch i le auaunaga faataimi atoa i a Novema 1, 1961 ma na faauu mai i le vasega lona 41 o le Aʻoga faale-Tusi Paia a le Olomatamata o Kiliata. Sa galue o ia i le galuega matagaluega ma itumalo i Oseteria mai i le 1963 seia oo i le 1976. Na faaipoipo o ia i le 1967, ma na mulimuli ane galulue o ia ma lana avā o Merete, o ni sui o le aiga Peteli i Vienna Oseteria mo tausaga e 14. I le fa tausaga ua mavae na siitia ai i laua i le ofisa ulu i Brooklyn New York, lea na galue ai le uso o Lösch i Ofisa Ulu ma sa avea foi o sē e fesoasoani i le Komiti o le Auaunaga. Ma o ona agavaa eseese i le faiva i Europa ma lona atamai i le gagana Siamani, Peretania, Romania, ma le faa-Italia, o le a avea ai o ia o se meaalofa aogā i le galuega a le Vaega Pule.