“Ia Faapelepeleina Pea Tane ua Faapea”

“Ia talileleia i tane ua faapea.”—1 KORINITO 16:18, NW.

1. O le ā le ituaiga o tane sa faapelepeleina faapitoa e le aposetolo o Paulo, ma o le ā na ia tusia e uiga i se tasi o tagata Kerisiano faapea?

O LE ITUAIGA o tane na faapitoa lava ona faapelepeleina e le aposetolo o Paulo, o i latou ia sa mananao e faaaogā lo latou malosi ma le lē mataofiofia mo Ieova ma o latou uso. E faatatau i se tasi o uso faapena sa la galulue faatasi, na tusi ai Paulo: “Ia talileleia o ia e tusa ma le tu masani i la le Alii ma le olioli uma; ma ia faapelepeleina pea tane ua faapea, auā na fai a oti o ia ona o le galuega a le Alii, na oo ina lamatia ai lona solu.”—Filipi 2:29, 30, NW.

2. Ia te ai e ao ona tatou manatunatu faapitoa i ai, ma ai se ā?

² I aso nei, i le sili atu i le 55,000 faapotopotoga o Molimau a Ieova, ua i ai tane Kerisiano lelei e toatele o ē e tatau ona tatou talisapaia faapitoa ona o a latou galuega mamafa faatasi ma o latou uso. I le faaalia faapea e tatau ona tatou faapelepeleina na tane, na taʻua ai e Paulo: “Matou te aioi atu foi ia te outou, le au uso e, ia outou iloa e o galulue [mamafa] ia te outou, ma pule ia te outou i la le Alii, ma latou apoapoai atu ia te outou; ia matuā mānatua i latou ma le alofa, ona o la latou galuega. Ia outou nonofo fefilemuai.”—1 Tesalonia 5:12, 13.

3. (a) O le ā o le a fesoasoani ia i tatou ia nonofo fefifilemuaʻi o le tasi i le tasi? (e) I le ā le itu e tatau ai i toeaina ona faataatia le faaaʻoaʻoga?

³ O le talisapaia e tatau ai o o tatou uso ma tuafafine uma, ma ae maise lava toeaina galulue mamafa, ua mautinoa lava o se vala tāua lea i le nonofo fefifilemuai i totonu o a tatou faapotopotoga. I lenei vala, e pei o vala uma o le olaga faa-Kerisiano, e tatau ona avea toeaina ma “faaaʻoaʻo i le lafu mamoe.” (1 Peteru 5:2, 3) A e peitai, a o faatalitalia ma le tonu toeaina e talisapaia e uso ona o a latou galuega mamafa, e tatau foi ona latou faataatia le faaaʻoaʻoga i le faaalia o le manatunatu e onomea ai o le tasi i le isi.

“Faaalia le Faaaloalo o le Tasi i le Isi”

4, 5. (a) O le ā ua faaalia ai na talisapaia e le aposetolo o Paulo toeaina galulue mamafa? (e) O le ā na ia tusi atu ai i Kerisiano i Roma, ma ai se ā ua faatatauina faapitoa ai lava ana upu i toeaina?

⁴ Na faataatia e le aposetolo o Paulo se faaaʻoaʻoga lelei e tusa ai ma lenei mea. E pei ona sa tatou iloa i le mataupu ua mavae atu, sa ia vaavaai mo mea lelei i ona uso ma tuafafine. Ma sa lē gata ina ia faalaeiau i Kerisiano ina ia alolofa ma faaaloalo i toeaina galulue mamafa, a e sa ia faaalia foi e ia lava le faaaloalo e onomea ai ia i latou nei. Sa manino lava lona faapelepeleina o tagata faapena.—Faatusatusa le Filipi 2:19-25, 29; Kolose 4:12, 13; Tito 1:4, 5.

⁵ Na tusia e Paulo i lana tusi i Kerisiano i Roma: “I le fealofani faaleuso, ia i ai le faalogona mafana faapelepeleina o le tasi i le tasi. Ia tausolomua ona faaalia le āva o le tasi i le tasi. Aua le paie i lau pisinisi. Ia pupula i le agaga. Ia auauna ia Ieova.” (Roma 12:10, 11, NW) E mautinoa lava le matuā faatatauina muamua o nei upu i toeaina Kerisiano. O i latou, e tatau ona taʻimua i le faaalia o le faaaloalo o le tasi i le tasi, ai Kerisiano uma lava.

6. (a) O le ā e tatau i toeaina ona aloese mai ai i le faia, ma ai se ā? (e) E mafai faapefea ona faamaualugaina e toeaina le mautinoa o le faapotopotoga i le autoeaina atoa?

⁶ E tatau i toeaina ona matuā faaeteete ina ia aua le faia ni faamatalaga e taʻu faatauvaaina ai uso a ovasia. E leai lava se toeaina o i ai uiga uma faa-Kerisiano i se tulaga e sili atu, auā o tagata uma e lē lelei atoatoa. E sili ona lelei nisi i nisi o uiga, a e vaivai i isi. Afai e i ai i toeaina le alofa e tatau ai faaleuso ma le lagona mafana o le tasi i le tasi, o le a mafai ai la ona latou faaitiitia vaivaiga o le tasi i le isi. I a latou talanoaga ma uso, o le a latou faasili atu ai uiga malolosi o o latou uso toeaina. Ma e ala i le taʻimua i le faaalia o le faaaloalo o le tasi i le tasi, o le a latou faamaualugaina ai le mautinoa o le faapotopotoga i le autoeaina e avea o se mea atoa.

Galulue Faatasi e Avea o se ʻAu e Tasi

7. O le ā o le a fesoasoani i toeaina e galulue faatasi i le autasi, ma o le a faapefea ona latou faaalia lenei mea?

⁷ Ina ua uma ona ia tautala e uiga i “mea alofa i tagata” na faia e Keriso i lana faapotopotoga i luga o le lalolagi ma le manatu i le fesuiaiga i uso ma mo le galuega i le faiva, na tusi ai le aposetolo o Paulo: “Seʻi tatou tuputupu aʻe i mea uma e ala i le alofa ia te ia o le ulu, o Keriso.” (Efeso 4:7-15, NW) I le iloaina faapea o Keriso o le Ulu tiotio o le faapotopotoga, ma e tatau i toeaina ona gauai atu i lona aao taumatau o le pule, ua avea lea o se itu e autasia ai i totonu o autoeaina taitasi. (Efeso 1:22; Kolose 1:18; Faaaliga 1:16, 20; 2:1) O le a latou sailia lana taʻitaʻiga e ala i le agaga paia, o mataupu silisili o le Tusi Paia, ma le taʻitaʻiga ua aumaia e le Vaega Pule o le “auauna faamaoni ma le mafaufau.”—Mataio 24:45-47; Galuega 15:2, 28; 16:4, 5.

8. O le ā e tatau i toeaina uma ona manatua, ma e faapefea ona latou faaalia le āva o le tasi i le isi?

⁸ O le a iloa e toeaina faapea o Keriso, e ala i le agaga paia, na te mafai ona tataʻiina le mafaufau o so o se toeaina i le autoeaina e saunia le mataupu silisili faale-Tusi Paia o loo manaomia e feagai ai ma so o se tulaga po o le faia o so o se filifiliga tāua. (Galuega 15:6-15) E leai se toeaina e toatasi o i totonu o le autoeaina o i ai le pule po o le aiā atoa o le agaga paia. E ao i toeaina ona faaalia le faaaloalo o le tasi i le isi i lo latou faalogologo atu ma le faaeteete i se tasi o i latou o aumaia se manatu e faatatau i le mataupu o loo talanoaina, o se mataupu silisili faale-Tusi Paia, po o se faatonuga mai le Vaega Pule.

9. (a) O ā uiga faaleagaga o le a fesoasoani i se ovasia e alofia le soona pule i ona uso toeaina? (e) O le a faapefea ona faaalia e se toeaina ia lava o se “magafagafa,” ma na faapefea ona faataatia e le vaega pule o le uluai senituri le faaaʻoaʻoga i lenei itu?

⁹ O le amio maulalo faa-Kerisiano, le agamalu, ma le loto maulalo o le a taofia ai so o se toeaina mai le taumafai e pule i luga o ona uso ma faaofi atu i ai ona manatu. (Faataoto 11:2; Kolose 3:12) Atonu e i ai i se ovasia Kerisiano ni manatu sili ona malolosi ma le faamaoni i nisi o mataupu. A e afai na te iloa faapea o loo i ai i ona uso toeaina ni mafuaaga faale-Tusi Paia ma faatiokarate e ese mai ai i ona manatu, o le a ia manatu ai e ‘avea o ia o sē aupito itiiti’ ma faaalia o ia e ‘magafagafa’ pe “agamalu” i lona lolo atu i mea ua manatu i ai le toatele.a (Luka 9:48; 1 Timoteo 3:3) O le a ia mulimluli i le faaaʻoaʻoga lelei na faataatia e le vaega pule o le uluai senituri, o ē ina ua uma se talanoaga faale-Tusi Paia, ma i lalo o le taʻitaʻiga na tuuina mai e Keriso e ala i le agaga paia, ona oo ai lea i “le loto gatasi.”—Galuega 15:25.

10. (a) O le ā ua faamaonia ai faapea o le tofia o se autoeaina i faapotopotoga taitasi o se faatulagaga faavae i le Tusi Paia? (e) Ua faapefea ona faamatala mai e le tusi Organized to Accomplish Our Ministry aogā o lenei faatulagaga?

¹⁰ O le tofia o se autoeaina i faapotopotoga taitasi e taʻimua, o loo faavae i le faaaʻoaʻoga na faataatia e le uluai faapotopotoga Kerisiano. (Filipi 1:1; 1 Timoteo 4:14; Tito 1:5; faatusatusa le faamatalaga i lalo o le upu “toeaina” i le Tito 1:5 i The Jerusalem Bible.) I le aoteleina o le atamai o lenei faatulagaga, ua taʻua e le tusi Organized to Accomplish Our Ministry (itulau 37) e faapea: “O nisi o toeaina o le a matuā iloga mai i se tasi o uiga na i lo isi, a o isi o le [autoeaina] o le a siʻitia i uiga ia atonu e vaivai ai isi. O le aafiaga la, i le vaaiga lautele, o le a i ai i le ʻau lava ia uiga lelei uma e faapea ona manaomia auā le faatinoga o le tausiga tonu o le faapotopotoga a le Atua.”

Feāvataʻi i le Va o Autoeaina

11, 12. (a) Ai se ā e mafai ai e le autoeaina ona faataunuuina ni mea e sili atu na i lo o le gaoioi taitoatasi o ona tagata? (e) Na faapefea ona feutagai Keriso Iesu ma le aposetolo o Paulo ma autoeaina ia lava, ma o le ā le fautuaga na tuuina atu?

¹¹ O lea, o le autoeaina o se mea faale-Tusi Paia lea e avea ai le tino atoa e fai ma sui o le sili atu na i lo o le faitau aofai o ona vaega eseese. Pe a latou faatasi ai ma tatalo mo le taʻitaʻiga a Ieova e ala ia Keriso ma le agaga paia, ona mafai lea ona latou faia ni faaiʻuga semanū e lē mafai ona latou oo i ai, pe ana fai latou te sailia e i latou lava taitoatasi. Pe a faapotopoto faatasi toeaina, o le a faatinoina ai o latou uiga eseese ma maua mai ai iʻuga e atagia ai le taʻitaʻiga a Keriso o mataupu.—Faatusatusa le Mataio 18:19, 20.

¹² Ona sa feutagai Keriso ma le autoeaina e pei o lena, o loo faaalia mai i feau na ia aauina atu i “fetu e fitu,” po o “agelu ia a ekalesia e fitu” i Asia Itiiti. (Faaaliga 1:11, 20) O le uluai feau o na feau na auina atu lea i le faapotopotoga i Efeso e ala atu i sana ‘alofa’ po o le tino o ovasia faauuina. I ni tausaga e 40 muamua atu, na faatonuina ai e le aposetolo o Paulo le autoeaina i Efeso ina ia malaga atu i Meleto mo se fonotaga faapitoa ma ia. Na ia faamanatu atu ia te i latou ina ia tausi i latou ia te i latou ma ia leoleo le faapotopotoga.—Galuega 20:17, 28.

13. Ai se ā e tatau ai i toeaina ona uaʻi atu i le agaga o loo latou faaalia i totonu o le autoeaina i la latou lava faapotopotoga ma i la latou faiā tuufaatasi ma isi autoeaina?

¹³ E tatau i autoeaina ona uai faapitoa atu, i le tausisia o se agaga mautinoa i totonu ia i latou lava ma i totonu o la latou faapotopotoga. (Galuega 20:30) E pei lava ona faaalia e se Kerisiano e toatasi se agaga faapitoa, e faapena foi ona mafai e autoeaina ma faapotopotoga atoa ona atiina aʻe sea agaga faapitoa. (Filipi 4:23; 2 Timoteo 4:22; Filemoni 25) I nisi taimi o toeaina o ē e faaaloalo le tasi i le isi i totonu o la latou lava faapotopotoga, e faaalia le lē fia ōgatasi ma se isi autoeaina. I aai i nofoaga e feiloai ai ni nai faapotopotoga i le Maota o le Malo lava e tasi, e tupu aʻe ai i nisi taimi se feeseeseaiga i le va o autoeaina ona o faasologa o sauniga, tuaoi o oganuu, i mea e fausia ma faaleleia o le Maota o le Malo, ma isi lava mea faapena. O mataupu silisili lava e tasi o le amio maulalo, agamalu, loto maulalo ma le magafagafa lea o loo pulea ai toeaina i tino taitasi, e tatau foi ona pulea ai le faiā lea i le va o tino o au toeaina. Na fautua mai le aposetolo o Paulo: “Ia faia mea uma e iʻu i le atiina aʻe ai.”—1 Korinito 14:26, NW.

Faaaloalo e Tatau ai i Ovasia Faimalaga

14. O le ā le isi vasega o toeaina e tatau ona faapelepeleina, ma ai se ā?

¹⁴ O se isi faatulagaga faavae i le Tusi Paia o loo faagaoioia ai i le va o faapotopotoga o Molimau a Ieova, o le asiasia lea o i latou e lē aunoa e toeaina femalagaai, ua taʻua o ovasia matagaluega po o ovasia itumalo. (Galuega 15:36; 16:4, 5) E matuā iloga lava i latou nei, o “toeaina o e pule lelei.” E lē maulalo ifo i isi toeaina, a e tatau ona manatu ia i latou o ē “faateleina atu i ai o le mamalu, a e faasili i e galulue i le upu atoa ma le aʻoaʻo atu.”—1 Timoteo 5:17.

15. O le ā le fautuaga na aumaia e le aposetolo o Ioane e faatatau i le au faievagelia faimalaga?

¹⁵ I lana tusi lona tolu na faitioina ai e le aposetolo o Ioane o Tioterifi ona sa ia musu e “talia le au uso ma le faaaloalo.” (3 Ioane Fuaiupu 10, NW) O nei uso o ni Kerisiano faimalaga o ē na ō atu ‘ona o le suafa [o Ieova].’ (3 Ioane Fuaiupu 7) E manino lava sa aauina atu i latou o ni faievagelia e talaʻi le tala lelei ma atiina aʻe faapotopotoga i aai sa latou asia. Sa faatonu atu e Ioane ‘ina ia aauina atu nei tagata talaʻi femalagaai i o latou auala i se uiga e taʻuaogāina ai i la le Atua.’ (3 Ioane Fuaiupu 6) Na faaopoopo mai le aposetolo: “O le mea lea ua i ai ia i tatou se avega tauave e talia ai tagata faapea ma le agaga talimalo, ina ia avea ai i tatou o ni ē galulue faatasi i le upu moni.” (3 Ioane Fuaiupu 8, NW) Sa tatau ona talia i latou ma le faaaloalo.

16. E mafai faapefea e Kerisiano uma i aso nei ona mulimuli atu i le faaaʻoaʻoga a Kaio i ‘le galuega faamaoni’ na ia faia mo le au faievagelia i le uluai senituri, ma ai se ā ua tatau ai lenei mea?

¹⁶ E faapena foi i aso nei, e tatau ona talia ma le agaga talimalo ma le faaaloalo ovasia faimalaga ua aauina atu e le Vaega Pule e talaʻi le tala lelei ma fesoasoani i faapotopotoga. O nei uso ma o latou faletua (pe afai ua faaipoipo, ona o le toatele o i latou ua faia faapea) ua latou loto malilie e tuua le olaga i aiga mautu. Latou te faimalaga mai lea nofoaga i lea nofoaga, e masani lava ona faalagolago i le agaga talimalo o uso mo ni a latou mea taumafa ma ni mea e momoe ai. Na tusi Ioane ia Kaio, o lē sa talia ma le alofa le au faievagelia faimalaga i le uluai senituri T.A., e faapea: “Le pele e, ua e faamaoni lava i mea uma o faia e oe i le au uso atoa ma tagata ese.” (3 Ioane 5) E faapena foi i aso nei, o i latou o faimalaga ‘ona o le suafa o Ieova’ ua tatau ona faapelepeleina ma ia faaalia i ai le alofa ma le faaaloalo.

17. E ao faapefea ona faaalia e toeaina o le faapotopotoga le faaaloalo tatau mo sui asiasi o le Vaega Pule?

¹⁷ E tatau faapitoa lava i toeaina ona faaalia le faaaloalo e tatau ai mo nei sui asiasi o le Vaega Pule. Ua aauina atu i latou i faapotopotoga ona o o latou uiga faaleagaga ma lo latou poto masani, lea e masani ona sili ona faalautele atu na i lo o le toatele o toeaina o le faapotopotoga. O nisi o nei ovasia faimalaga atonu e laiti i tausaga na i lo o toeaina i le faapotopotoga o latou asiasi atu i ai. A e lē o se mafuaaga tāua lena e lē faaalia ai ia i latou le faaaloalo e tatau ai. Atonu latou te lagona e manaomia ona taofiofia le fautuaina faanatinati e toeaina o le faapotopotoga se uso e avea o se auauna o le faiva po o se toeaina, i le manatuaina o le lapataiga a Paulo ia Timoteo. (1 Timoteo 5:22) A o tuuina atu e le ovasia faimalaga le iloiloga e tatau ai i finauga ua tuuina mai i lumāmea e toeaina o le faapotopotoga, e tatau lava i ia toeaina ona malie e faalogo atu ia te ia ma maua ai aogā mai lona poto masani ua faalauteleina. Ioe e tatau ona latou “faapelepeleina pea tane ua faapea.”—Filipi 2:29, NW.

“Ia Talileleia i Tane ua Faapea”

18, 19. (a) Na faapefea ona faaalia e Paulo lona talisapaia mo ona uso galulue faatasi? (e) O le ā le faaaʻoaʻoga e faailoa ai sa leʻi taofia pea e Paulo se tauvale faasaga i ona uso?

¹⁸ Na tusia e Paulo i lana uluai tusi i tagata Korinito e faapea: “O lenei, ou te apoapoai atu ia te outou le au uso e: ua outou iloa faapea o le aiga o Setefana o le faapolopolo i Akaia, ma ua tuuina atu i latou e i latou e auauna i le au paia. Ia outou gauai pea i tagata faapena ma i latou uma o ē felagolagomai ma galulue. A e peitai ua ou olioli i le oo mai o Setefana ma Fotunato ma Akaiko, auā ua latou avea i latou ma sui i lou lē auai i inei. Auā ua latou faafouina loʻu agaga atoa ma lo outou agaga. O le mea lea ia talileleia i tane ua faapea.”—1 Korinito 16:15-18, NW.

¹⁹ Maeu se uiga lelei, ma le lima foai sa i ai ia Paulo agaʻi i ona uso, o nisi o i latou sa leʻi lauiloa. A e sa alofa Paulo ia i latou ona sa latou “felagolagomai” ma “galulue” malolosi i a latou taumafaiga e auauna atu i le au paia. Sa faataatia foi e Paulo se faaaʻoaʻoga maualuga o le faamagalo ma faagalo ai i ni mea ua tuanai. E ui lava ina sa faatupu e Ioane Mareko le faanoanoa o Paulo i lana uluai malaga faamisionare, a e na mulimuli ane ona taʻuleleia ma le mafana o ia e Paulo i le faapotopotoga i Kolose. (Galuega 13:13; 15:37, 38; Kolose 4:10) Ina o faafalepuipuiina i Roma, na talosagaina ai e Paulo le aumaia o Mareko ona, e pei ona ia fai mai, “auā e aoga [Mareko] ia te au i le galuega.” (2 Timoteo 4:11) E leʻi taofia pea se taʻuvalea ona o se mea iti i inā!

20. E tatau faapefea i Kerisiano a lautele, a e maise lava toeaina, ona faaalia lo latou talisapaia o ovasia faamaoni ma latou te “faapelepeleina pea tane ua faapea”?

²⁰ I totonu o tagata o le Atua i aso nei, o loo toatele ovasia tuutoina o ē e pei o Setefana, o loo auauna i o latou uso. E mautinoa lava e i ai o latou sese ma vaivaiga. A e ui i lea, o loo latou “felagolagomai” ma le “auauna faamaoni ma le mafaufau” ma lona Vaega Pule, ma “galulue” malolosi i le galuega talaʻi ma i le fesoasoani atu i o latou uso. E tatau ona ‘tatou gauai atu pea i tagata faapena,’ ma talisapaia i latou ona o o latou uiga, a e lē o le sailia o o latou sese. E tatau i toeaina ona taʻimua i le faaalia o le talisapaia ma le faaaloalo e tatau ai i o latou uso toeaina. E ao i toeaina ona felagolagomai o le tasi i le isi i le agaga o le alofa ma le autasi. O le a iloa ai e tagata uma le tāua o na uso faamaoni ma “faapelepeleina pea tane ua faapea.”—Filipi 2:29, NW.

[Faaopoopoga i lalo]

Manatu mo le Autaluga

◻ O le ā le ituaiga o tane sa faapelepeleina faapitoa lava e Paulo, ma o ai ua onomea ona tatou manatu mamafa faapitoa i ai i aso nei?

◻ E tatau faapefea ona faaalia e toeaina latou te āva o le tasi i le isi?

◻ Ai se ā e mafai ai e se autoeaina ona faataunuuina ni mea e sili atu na i lo o le gaoioi taitoatasi o ona tagata?

◻ I ā vala o le a faaalia ai e se autoeaina latou te faaaloalo i le isi autoeaina?

◻ O le ā le vasega o ovasia e onomea ona faapelepeleina faapitoa, ma e faapefea ona faaalia lenei faaaloalo tatau?

[Ata i le itulau 28]

E tatau i toeaina ona faaalia le talisapaia tatau o le tasi i le isi

[Ata i le itulau 31]

Ia faaalia le alofa ma le faaaloalo i ovasia faimalaga